សមាជិក សមាជិកាគណបក្សប្រជាជនកម្ពុជាប្រមាណ ១ម៉ឺននាក់ មកពីបណ្តាឃុំនានាក្នុងស្រុក កោះអណ្តែត បានអញ្ជើញមកចូលរួមក្នុងពិធីជួបសំណេះសំណាលជាមួយ ឯកឧត្តម សុខ អាន សមាជិកអចិន្រ្តៃយ៏ គណៈកម្មាធិការកណ្តាលគណបក្សប្រជាជនកម្ពុជា និង ជាបេក្ខជនតំណាងរាស្ត្រមណ្ឌលខេត្តតាកែវ នាព្រឹកថ្ងៃ១៨ ខែកក្កដា ឆ្នាំ២០១៣ ក្នុងឃុំព្រៃខ្លា ស្រុក កោះអណ្តែត ខេត្តតាកែវ។ ឯកឧត្តម សុខ អាន បានមានប្រសាសន៍ពន្យល់ថា ការតម្លើងថ្លៃស្រូវរបស់កសិករជូនកសិករ ក្រៅពីការដាក់ចេញគោលនយោបាយនាំអង្ករចេញ ១ លានតោន ក្នុងឆ្នាំ២០១៥ គឺត្រូវទាក់ទាញការវិនិយោគរោងម៉ាស៊ីនកិនស្រូវ ដើម្បីកែច្នៃអង្ករនាំចេញឲ្យមានស្តង់ដារអន្តរជាតិ និងការស្វែងរកទីផ្សារ ទើបធ្វើឲ្យតម្លៃស្រូវរបស់កសិករកើនឡើង មិនមែនគ្រាន់តែសន្យានោះទេ។ ឯកឧត្តម សុខ អាន បានចាត់ទុកការឃោសនារបស់គណបក្សប្រឆាំងអំពីវិធីរកថវិកាដើម្បី តម្លើងប្រាក់បៀរវត្សរ៍ដល់កម្មករ មន្ត្រីរាជការ គឺជាការភូតកុហក់ គ្មានលក្ខណៈវិទ្យាសាស្ត្រទាល់តែសោះ។ បញ្ហាប្រាក់ខែកម្មករកម្ពុជាម...
