ទស្សនៈ
Global Witness និងការដេកចាំតែស្រែកបំផ្លាញកម្ពុជា
វាពិតជាអាក្រក់ខ្លាំងណាស់
និងគ្មានអ្វីក្រៅពីការបញ្ចេញនូវរបាយការណ៍ពណ៌ខ្មៅរបស់ខ្លួនម្តងហើយម្តងទៀត ដែលបង្កប់ទៅដោយអំពើឃោរឃៅ និងការប៉ុនប៉ងចង់បំផ្លាញភាពសុខសាន្តនៅក្នុងសង្គមកម្ពុជាឱ្យខ្ទេចខ្ទីអស់
ដោយអង្គការ Global Witness ពីព្រោះអង្គការទុច្ចរិតមួយនេះ
ពុំធ្លាប់ដែលបង្ហាញម្តងណាឡើយ
អំពីការពិតក្នុងបញ្ហានានា ជាពិសេស គ្រាន់តែករណីស្លាប់របស់លោកឈុត
វុទ្ធី នៅខេត្តកោះកុង និងករណីស្លាប់ របស់កុមារីម្នាក់នៅខេត្តក្រចេះ
ក៏ពួកគេខិតខំមួលបំភ្លើសដោយឥតអៀនខ្មាស។
ការផ្សាយរបស់វិទ្យុបរទេសមួយនិយាយជាភាសាខ្មែរនៅព្រឹកថ្ងៃទី២២
ខែ មិថុនា ឆ្នាំ ២០១២ បានស្រង់នូវរបាយការណ៍របស់អង្គការ
Global Witness ដែលបានវាយប្រហារមកលើរាជរដ្ឋាភិបាលកម្ពុជាថា
បរាជ័យនៅក្នុងការប្រមូលព័ត៌មានពិស្តារនៅជុំវិញការស្លាប់របស់លោក ឈុត
វុទ្ធី ប៉ុន្តែ អង្គការអន្តរជាតិមួយនេះ គឺពុំបានបង្ហាញឯកសារ
ឬភស្តុតាងណាមួយជាក់លាក់ ដើម្បីការពារការចោទប្រកាន់របស់ខ្លួនសោះឡើយ ។
ដោយមិនបាននិយាយអំពីការពិតនៃហេតុការណ៍ដែលបានកើតឡើង
ក្រោមចំណងជើងដែលចុះផ្សាយថា « ប្រទេសកម្ពុជាជាប់ពាក់ព័ន្ធនឹងការស្លាប់របស់សកម្មជន
» គឺអង្គការ Global Witness បានលើកតំកើងមនុស្សមួយនាក់
ឬពីរនាក់ ដែលបានស្លាប់នៅក្នុងការប៉ះទង្គិចគ្នាក្នុងឧបទ្ទវហេតុផ្ទុះអាវុធដោយឈ្លោះប្រកែកគ្នា
និងសកម្មភាពនៃការអនុវត្តវិធានការបំបែកសំបុកជនល្មើស
ដែលបានបង្កើតឡើងនូវតំបន់អបគមន៍បំពានលើសិទ្ធិស្របច្បាប់របស់រដ្ឋអំណាចមូលដ្ឋាន
គឺអង្គការ Global Witness ខំប្រឹងផ្លុំបំប៉ោង
ពង្រីកឱ្យទៅជាបញ្ហាធំឡើង និងបានឆក់ឱកាសបើកវេទិការិះគន់ និងដើម្បីសំរេចគោលដៅបំផ្លាញកម្ពុជា។
ការបដិសេធមិនទទួលយកការពិតនៃហេតុការណ៍ដែលបានកើតឡើង
គឺជាការទាត់ចោលនូវយុត្តិធម៌ ក្រោមការផ្តួចផ្តើមគំនិតដោយសម្តេចតេជោ ហ៊ុន
សែន នាយករដ្ឋមន្ត្រីកម្ពុជា ក្នុងការសម្រេចបង្កើតឡើងនូវគណៈកម្មការចម្រុះស៊ើបអង្កេតករណីស្លាប់ឈ្មោះឈុត
វុទ្ធី និងឈ្មោះ អ៊ិន រតនា កាលពីថ្ងៃទី២៦ ខែ មេសា ឆ្នាំ២០១២នៅខេត្តកោះកុង គឺបានបង្វិលខួរក្បាលរបស់អង្គការ
Global
witnessឱ្យកកល្អក់ គ្មានស្គាល់អ្វីដែលជាភាពត្រឹមត្រូវ
និងច្បាស់លាស់។
ករណីស្លាប់លោកឈុត
វុទ្ធី គួរត្រូវបានបញ្ចប់នូវភាពសង្ស័យអំពីថា តើអ្នកណាជាជនដៃដល់
និងករណីស្លាប់របស់មន្ត្រីកងរាជអាវុធហត្ថ អ៊ិន រតនា បណ្តាលមកពីមូលហេតុអ្វី?
ត្រូវបានសាក្សីដែលឃើញផ្ទាល់នៅកន្លែងកើតហេតុបំភ្លឺប្រាប់សមត្ថកិច្ចរួចហើយ
ដែល Globle
Witness គួរគប្បីហ៊ាននិយាយការពិត ហើយនិងមិនអាចចោទប្រកាន់ ឬក៏ទម្លាក់កំហុសនេះដល់អ្នកណាម្នាក់បានឡើយ
បើរូបគាត់មិនស្ថិតនៅក្នុងហេតុការណ៍ ដូចសាក្សីទេនោះ។ ដោយធ្វើខ្លួនជាខ្សែញាក់
បន្ទរសម្លេងតាមអង្គការសិទ្ធិមនុស្សក្នុងស្រុកមួយចំនួន
របាយការណ៍បំភ្លើសរបស់ ( Global Witness ) បានទម្លាក់បញ្ហាស្លាប់នោះទាំងស្រុងមកលើរាជរដ្ឋាភិបាលថា
ជាអ្នកទទួលខុសត្រូវទៅវិញ។
ការពិតលោក
ឈុត វុទ្ធី មិនមានលក្ខណៈសម្បត្តិណាមួយស័ក្តិសម
នឹងមានឈ្មោះជាវីរជនការពារព្រៃឈើដូចមជ្ឈដ្ឋានផ្សេងៗលើកតម្កើងនោះទេ
នេះបើគេគ្រាន់តែពិចារណាបន្តិចអំពីមូលហេតុដែលនាំឱ្យមានការបាញ់សម្លាប់គ្នាកើតឡើង។
កំហុសរបស់លោក ឈុត វុទ្ធី គឺចូលក្នុងក្រុមហ៊ុនរបស់គេ
និងដើរថតរូបភាពយ៉ាងអាណាធិបតេយ្យ និងគ្មានការអនុញ្ញាត។ ការបាញ់សម្លាប់គ្នានោះ
គឺជាឧបទ្ទវហេតុចៃដន្យ ដែលបានកើតឡើងដោយការមិនយល់អធ្យាស្រ័យគ្នា
ការឈ្លោះប្រកែក ជេរប្រមាថគ្នារវាងបុគ្គល និងបុគ្គល វាមិនមែនជាការគំរាមកំហែងរបស់សមត្ថកិច្ចឬក៏ការសម្លាប់បំបិទមាត់ណាមួយ
ទៅលើសកម្មជនការពារព្រៃឈើ ដូចដែលអង្គការទាំងនោះបានចោទប្រកាន់ឡើយ។
ដោយឡែក
ចំពោះឧបទ្ទវហេតុនៅស្រុកស្នួល ខេត្តក្រចេះ គឺមិនបានឃើញអង្គការ Global Witness កត់ត្រាទុកក្នុងរបាយការណ៍របស់ខ្លួន
ហើយយកមកផ្សព្វផ្សាយអំពីឬសគល់ និងគោលដៅនយោបាយរបស់ជនល្មើស
ដែលបានរំលាយរដ្ឋបាលអាជ្ញាធរមូលដ្ឋាន ការកាន់កាប់ដីធ្លីសាធារណៈរបស់រដ្ឋ
និងបង្កើតឡើងនូវតំបន់អបគមន៍ ដែលជាទង្វើខុសនឹងច្បាប់នោះទេ។
តើនៅលើពិភពលោក
ប្រទេសណាមួយដែលត្រូវបានគេអនុញ្ញាតឱ្យជនណាម្នាក់បង្កើតតំបន់អបគមន៍
ឬរដ្ឋក្នុងរដ្ឋនោះ?
តើអ្វីទៅជាបំណងជាក់លាក់របស់ជនបរទេសម្នាក់នោះ
ដែលជានិច្ចកាលផ្សព្វផ្សាយតែពាក្យចោទប្រកាន់ និងវាយប្រហារ
ដោយពុំបានផ្អែកលើមូលដ្ឋានច្បាស់លាស់ និងប្រកបសច្ចធម៌បន្តិចណាសោះនោះ? ។
អង្គការGlobal Witness បានពង្រីកឥទ្ធិពលរបស់ខ្លួនលាតសន្ធឹង
ត្រួតលើបណ្តាប្រទេសផ្សេងៗតាមរយៈការរិះគន់រដ្ឋាភិបាលប្រទេសនេះ
ប្រទេសនោះ ហាក់ដូចជាពួកគេក្តោបក្តាប់អំណាចទាំងស្រុង ស្តីអំពី
«បញ្ហាសិទ្ធិមនុស្ស » ការពិតពួកគេ បាន និងកំពុងជ្រកក្រោមស្លាកសិទ្ធិមនុស្ស
ដើម្បីគំរាមកំហែងប្រទេសដទៃតែប៉ុណ្ណោះ។
របាយការណ៍របស់ Global Witness គឺជារបស់ដែលក្តៅជានិច្ច។ ដោយភាពប៉ិនប្រសប់ខាងការប្រឌិតព័ត៌មាន
កែក្រឡៃ ផ្លាស់ប្តូរបញ្ហា ពីពណ៌ស បំលែងឱ្យទៅជាប្រផេះ ពីប្រផេះឱ្យទៅជាពណ៌ខ្មៅ
Global Witness បានបង្កើតឡើងនូវរបាយការណ៍ជាច្រើនពាក់ព័ន្ធក្នុងរឿងពុករលួយ
បញ្ហា ព្រៃឈើ បញ្ហាអំពើហឹង្សា បញ្ហាជម្លោះដីធ្លី
និងចោទប្រកាន់ក្នុងរឿងជម្លោះធនធានធម្មជាតិជាដើម ដោយពុំបានសម្លឹងមើលពីភាពវិជ្ជមាននៃកំណែទម្រង់របស់រដ្ឋាភិបាលនៃប្រទេសទាំងនោះទេ។
ទង្វើរិះគន់ និងសកម្មភាពវាយប្រហារជាប្រចាំស្ទើរគ្រប់បញ្ហាទាំងអស់របស់
Global Witness តើបានជួយអ្វីខ្លះដល់កម្ពុជា ក្រៅតែពីការផ្សាយសម្អុយកិត្យានុភាពរបស់កម្ពុជាទៅកាន់អន្តរជាតិ
និងទាមទារឱ្យប្រទេសម្ចាស់ជំនួយ ផ្តាច់ជំនួយមកកម្ពុជា ជាថ្នូរនៃការលុបបំបាត់នូវអ្វីមួយតាមការទាមទាររបស់គេម្នាក់នោះ
? តើរដ្ឋាភិបាលរបស់ប្រទេសឯករាជ្យមួយ
ដែលបាន និងកំពុងប្រឹងប្រែងយ៉ាងខ្លាំងក្លាក្នុងការកែទម្រង់ដ៏ស៊ីជម្រៅក្នុងបញ្ហាដីធ្លី
ការលុបបំបាត់អំពើពុលរលួយ ខំប្រឹងអភិវឌ្ឍប្រទេស ជាពិសេស ការខិតខំលើកកំពស់សិទ្ធិមនុស្សនៅកម្ពុជាបានប្រសើរយ៉ាងនេះ
ត្រូវដេករង់ចាំធ្វើតាមបញ្ជារបស់អង្គការបរទេសនេះឬអ្វី?
ដូច្នេះ
របាយការណ៍របស់អង្គការ Global Witness ដែលបានចេញផ្សាយនោះ គឺគ្មានអ្វីក្រៅពីការធ្វើសកម្មភាពជាឈ្នាន់បំរើនយោបាយបក្សប្រឆាំង
តាមរយៈការប្រើប្រាស់ឧបករណ៍បន្ទរសម្លេងដោយវិទ្យុប្រតិកិរិយាមួយចំនួន
ដែលជានិច្ចកាលរិះគន់ និងវាយប្រហារមកលើរាជរដ្ឋាភិបាល ក្នុងការសំរេចបាននូវទិសដៅរបស់ខ្លួន
ដោយបង្កបង្កើតឡើងជាបញ្ហាវឹកវរ បំផុសនូវចលានាបះបោរ នាំឱ្យមាននូវភាពស្អប់ខ្ពើមមកលើរាជរដ្ឋាភិបាលតែប៉ុណ្ណោះ។ នេះគឺជាសារជាតិរបស់ជនបរទេសជ្រកក្រោមស្លាកអង្កការជាមេក្លោងដែលប៉ុនប៉ងបង្កជម្លោះហែកហួរ
និងបំផ្លាញសន្តិភាពនៅកម្ពុជាឱ្យធ្លាក់ចូលក្នុងគ្រោះអន្តរាយ៕
អត្ថបទដោយៈ ពូន សំរេច