សម្តេចអគ្គមហាសេនាបតីតេជោ
ហ៊ុន សែន និងលោកជំទាវកិត្តិព្រឹទ្ធបណ្ឌិត ប៊ុន រ៉ានី បានប្រកាសឲ្យដឹងនារសៀលថ្ងៃទី៦
ខែមករា ឆ្នាំ២០១៣ ថា មានតែពាក្យ ៤ម៉ាត់ ប៉ុណ្ណោះ សម្រាប់វីរនិស្សិតស្ម័គ្រចិត្ត
ដែលបានចុះបំពេញបេសកកម្មវាស់វែងដីធ្លីជូនប្រជាជន ក្នុងនយោបាយចាស់សកម្មភាពថ្មីលើវិស័យដីធ្លី
«គឺការពេញចិត្ត ការស្រឡាញ់ ការអាណិត
និងការគោរពចំពោះក្មួយកូនៗទាំងឡាយ» ដែលបានរួមចំណែកជាមួយរាជរដ្ឋាភិបាលក្នុងបេសកកម្មជាប្រវត្តិសាស្ត្រនេះ។
សម្តេចតេជោមានប្រសាសន៍ថា ការអាណិតនោះ គឺការលះបង់របស់ក្មួយៗពិតជាមានតម្លៃធំ
ធេង ព្រោះពេលដែលក្មួយៗចេញទៅនេះ ចំពេលវេលានៃធាតុអាកាសមិនអំណោយផល ហើយមិនធ្លាប់បែកចេញពីគ្រួសារដែលគួរឲ្យអាណិត ប៉ុន្តែការងារនេះ គឺជាមោទនភាព ព្រោះថា ការងារកាន់តែលំបាកគឺកាន់តែមានមោទនភាពយើង។ សម្តេចតេជោនាយករដ្ឋមន្ត្រីថ្លែងថា
ពូធ្លាប់បាននិយាយហើយថា បើសិនជាការងារនេះវាស្រួល
គឺមិនមានការចាំបាច់ត្រូវពឹងពាក់ក្មួយៗទេ ប៉ុន្តែការងារដ៏លំបាកនេះហើយ
ទើបយើងមើលឃើញតម្លៃពិតរបស់វា វាដូចគ្នានឹងថ្ងៃរំដោះ ៧មករា
ជាដើម ប្រសិនបើការផ្តួលរំលំ ប៉ុល ពត វាងាយស្រួលដូចជារាល់ថ្ងៃនេះ
វាក៏គ្មានន័យ គ្មានតម្លៃសម្រាប់ការចងចាំរបស់យើងនោះដែរ។ ប៉ុល ពត បានសម្លាប់មនុស្ស ហើយយើងបានយកជីវិតធ្វើដើមទុនដើម្បីរំដោះប្រទេសរបស់យើង។ សម្តេចតេជោនាយករដ្ឋមន្ត្រីមានប្រសាសន៍ថា “អ្វីដែលពូ និងមីងគោរពបំផុត គឺវីរភាពរបស់ក្មួយៗទាំងឡាយដែលបានបង្ហាញយ៉ាងច្បាស់នៅក្នុងកែវភ្នែករបស់ប្រជាជន
នៅក្នុងកែវភ្នែកអ្នកដែលទទួលផល ពីនយោបាយចាស់ សកម្មភាពថ្មីលើវិស័យដីធ្លីនេះ ដែលបងប្អូនប្រជាពលរដ្ឋមិនអាចបំភ្លេចបាននោះឡើយ”។
សម្តេចតេជោនាយករដ្ឋមន្ត្រីមានប្រសសន៍ថា ខ្ញុំពិតជាមានមោទនភាពយ៉ាងក្រៃលែងដោយបេសកកម្មលើកនេះ យុវជនចេញមុខមកទទួលខុសត្រូវក្នុងបេសកកម្មជាប្រវត្តិសាស្ត្រ ដែលក្នុងនោះក្រុមកុលបុត្រខ្មែរមានតួនាទីជាអ្នកសម្របសម្រួល និងមានសមាសភាពពីសហភាពសហព័ន្ធយុវជនកម្ពុជា
សមាគមសិស្ស និស្សិតក្មេងវត្ត សហព័ន្ធនិស្សិតបញ្ញវន្តប្រជាធិបតេយ្យកម្ពុជា
(ក២២) សកម្មជនយុវជនគណបក្សប្រជាជនកម្ពុជាតាមគ្រឹះស្ថានឧត្តមសិក្សានៅរាជធានីភ្នំពេញ
(ក្រុម៧៧) សមាគមមូស្លីមកម្ពុជា ដែលក្រុមទាំងអស់នេះ បានចូលរួមយ៉ាងសកម្មក្នុងបេសកកម្មជាប្រវត្តិសាស្ត្រនេះ។
សម្តេចតេជោបានមានប្រសាសន៍ផ្តាំផ្ញើទៅវីរនិស្សិតស្ម័គ្រចិត្ត
ដែលត្រូវបន្តបំពេញបេសកកម្មវាស់វែងដីធ្លីជូនប្រជាពលរដ្ឋនូវពាក្យស្លោកមួយឃ្លាថា
“ពេលនៅឲ្យប្រជាជនស្រឡាញ់ ពេលចេញឲ្យប្រជាជននឹក” ដោយសម្តេចតេជោបញ្ជាក់ថា នេះគឺជាមោទនភាពដ៏ល្អសម្រាប់ប្រជាជនរបស់យើង។
ឯកឧត្តម ហ៊ុន ម៉ានិត តំណាងក្រុមយុវជនកុលបុត្រខ្មែរ និងតំណាងឲ្យក្រុមវីរយុវនិស្សិតស្ម័គ្រចិត្តសម្តេចតេជោបានរាយការណ៍ថា
ក្នុងរយៈពេល ៦ខែ កន្លងមកនេះ ក្រុមវីរៈយុវជនទាំងអស់ ដែលមានកំលាំងសរុប ២១១៦នាក់ បែងចែកជា ១៦៨ក្រុម និងចុះអនុវត្តលើខេត្តគោលដៅចំនួន២០ ដោយបានសំរេចនូវគោលដៅធំៗជាច្រើនក្នុងការចុះវាស់វែងដីធ្លី
ចែកផ្តល់កម្មសិទ្ធិជូនប្រជាពលរដ្ឋ។ ក្រៅពីការងារចុះវាស់វែងដីធ្លីជូនប្រជាពលរដ្ឋ
វីរៈយុវជនស្ម័គ្រចិត្ត សម្តេចតេជោនូវបានបំពេញភារកិច្ចដ៏ឧត្តុង្គឧត្តមលើការងារមនុស្សធម៌ជាច្រើនទៀត ជូនប្រជាពលរដ្ឋនៅតាមគោលដៅរបស់ខ្លួន ដូចជាចុះអនុវត្តតាមរយៈការកសាងនូវសមិទ្ធផលសង្គមនានា ដែលជាតំរូវការខ្វះខាតពិតប្រាកដ ពិសេសទៅទៀតនោះក្រុមវីរៈយុវជនស្ម័គ្រសម្តេចតេជោក៏បានកសាងនូវអនុស្សាវរីយ៍ផ្ទាល់ខ្លួនរបស់ពួកគេម្នាក់ៗ ក្នុងនោះបានរៀបអាពាហ៍ពិពាហ៍រវាងវីរៈយុវជន
និងវីរៈយុវជន ក៏ដូចជាវីរៈយុវជនជាមួយកូនចៅប្រជាពលរដ្ឋតាមមូលដ្ឋានមានចំនួន
៥៧គូ និងបានភ្ជាប់ពាក្យតាមប្រពៃណីជាតិមាន ៥៩គូ។
ឯកឧត្តម អ៊ឹម ឈុនលឹម ទេសរដ្ឋមន្ត្រី
រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានគណៈកម្មការត្រួតពិនិត្យការអនុវត្តនយោបាយចាស់សកម្មភាពថ្មី
លើវិស័យដីធ្លីមានប្រសាសន៍ថា បេសកកម្មជាប្រវត្តិសាស្ត្រ នៃការអនុវត្តនយោបាយចាស់សកម្មភាពថ្មីលើវិស័យដីធ្លី គឺជាឱកាសដ៏កម្រមានសម្រាប់យុវជនជំនាន់ថ្មី ក្នុងសម័យសម្តេចតេជោ
ក្នុងការចូលរួមបំពេញបេសកកម្មជូនជាតិមាតុភូមិ និងប្រជាជន។ ឯកឧត្តមទេសរដ្ឋមន្ត្រីមានប្រសាសន៍បន្តថា
ក្នុងឋានៈជាវីរៈយុវជនស្ម័គ្រចិត្ត ក្រៅពីការដកពិសោធន៍លើការងារជំនាញក្នុងការការងារចុះបញ្ជីសុរិយោដី
ក្មួយៗយុវជន នៅបានបង្កើតស្នាដៃជាច្រើនទៀតដល់សង្គម ដែលការងារនេះសរបញ្ជាក់ឲ្យឃើញពីទឹកចិត្តគោរពស្រឡាញ់ប្រជាជន ការចែករំលែកនូវការលំបាករបស់ប្រជាជន ការយល់ដឹងពីសុខទុក្ខរបស់ប្រជាជន
ផ្សារភ្ជាប់ខ្លួនជាមួយប្រជាជន ដែលទាំងអស់នោះសុទ្ធតែជាអនុស្សាវរីយ៍ដ៏ល្អ
និងមិនអាចបំភ្លេចបាន ក្នុងទឹកចិត្តរបស់ប្រជាជន និងក៏ជាការអនុវត្តយ៉ាងល្អតាមការផ្តាំផ្ញើរបស់សម្តេចតេជោនាយករដ្ឋមន្ត្រី
និងលោកជំទាវកិត្តិព្រឹទ្ធបណ្ឌិត ដែលថា ពេលនៅឲ្យប្រជាជនស្រឡាញ់
ពេលចេញទៅឲ្យប្រជាជននឹក។
ឯកឧត្តមទេសរដ្ឋមន្ត្រីថ្លែងថា វីរៈយុវជនស្ម័គ្រចិត្តសម្តេចតេជោបានធ្វើការវាស់វែងក្បាលដីសម្រេចបាន
៣៤ម៉ឺនក្បាលដី ស្មើនឹងទំហំប្រមាណ ៥៥ម៉ឺនហិកតា បានបិទផ្សាយជាសាធារណៈនូវទិន្នន័យក្បាលដី ដែលរង់ចាំតែធ្វើពិធីចែកប័ណ្ណបានជាង
១៣ម៉ឺនក្បាលដី ពាក់ព័ន្ធប្រជាពលរដ្ឋ ៨ម៉ឺនគ្រួសារ និងប្រជាពលរដ្ឋបានទទួលប័ណ្ណដល់ដៃហើយជិត ៨ម៉ឺនប័ណ្ណ។
សូមបញ្ជាក់ថា
រាជរដ្ឋាភិបាលនឹងបន្តកិច្ចការងារនេះក្នុងជំហានទី២ ដែលចាប់ផ្តើមពីថ្ងៃទី១៥ ខែមករា ដែលនឹងបញ្ចប់នៅមុនយុទ្ធនាការឃោសនាបោះឆ្នោតនៅខែកក្កដា
ឆ្នាំ២០១៣ ខាងមុខនេះ។ កន្លងមកក្រសួងកសិកម្ម រុក្ខាប្រមាញ់
និងនេសាទ និងក្រសួងបរិស្ថានបានសហការធ្វើការកាត់ចេញផ្ទៃដីពីដីគម្របព្រៃឈើ
ដែលរហូតមកដល់ពេលនេះ មានព្រះរាជក្រឹត្យ និងអនុក្រឹត្យជិត២០០ ត្រូវបានឡាយព្រះហស្តលេខាដោយព្រះមហាក្សត្រ និងចុះហត្ថលេខាដោយនាយករដ្ឋមន្ត្រីរួចហើយ៕