សុន្ទរកថា ឯកឧត្តមបណ្ឌិតសភាចារ្យ សុខ អាន ថ្លែងក្នុងពិធីចែកប័ណ្ណកម្មសិទ្ធិដីធ្លីជូនប្រជាពលរដ្ឋ នៅ ឃុំសំរោង និងឃុំត្រពាំងធំខាងត្បូង ស្រុកត្រាំកក់ ខេត្តតាកែវ
សុន្ទរកថា ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្ត្រីទទួលបន្ទុកទីស្តីការគណៈរដ្ឋមន្រ្តី
តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន
នាយករដ្ឋមន្រ្តី នៃព្រះរាជាណាចក្រកម្ពុជា
ក្នុងពិធីចែកប័ណ្ណកម្មសិទ្ធិដីធ្លីជូនប្រជាពលរដ្ឋ នៅ ឃុំសំរោង និងឃុំត្រពាំងធំខាងត្បូង ស្រុកត្រាំកក់ ខេត្តតាកែវ
ថ្ងៃទី១៩ ខែមីនា ឆ្នាំ២០១៣
- ឯកឧត្តម លោកជំទាវ អស់លោក លោកស្រី មន្រ្តីរាជការ បងប្អូនប្រជាពលរដ្ឋនិងក្មួយៗ វីរៈយុវជនស្ម័គ្រចិត្តសម្តេចតេជោ ជាទីមេត្រី
ថ្ងៃនេះ ខ្ញុំមានសេចក្តីសោមនស្សរីករាយ ចូលរួមជាមួយ ឯកឧត្តម លោកជំទាវ អស់លោក លោកស្រី បងប្អូនប្រជាពលរដ្ឋ និងក្មួយៗវីរៈយុវជនស្ម័គ្រចិត្តសម្តេចតេជោទាំងអស់ក្នុង «ពិធីចែកប័ណ្ណកម្មសិទ្ធិដីធ្លីជូនប្រជាពលរដ្ឋ នៅឃុំសំរោងនិងឃុំត្រពាំងធំខាងត្បូង ស្រុកត្រាំកក់ ខេត្តតាកែវ» នាពេលនេះ។ នេះជាលើកទីបីហើយ ដែលខ្ញុំបានចូលរួមជាតំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន ក្នុងពិធីចែកប័ណ្ណកម្មសិទ្ធិដីធ្លីជូនប្រជាពលរដ្ឋនៅខេត្តតាកែវយើង នេះ។ ឆ្លៀតក្នុងឱកាសនេះ ខ្ញុំសូមពាំនាំនូវការសួរសុខទុក្ខនិងសេចក្តីនឹករលឹករបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនចំពោះបងប្អូនប្រជាពលរដ្ឋនៅខេត្តតាកែវ ជាពិសេសបងប្អូននៅក្នុងស្រុកត្រាំកក់យើងនេះ ព្រមទាំងមន្រ្តីបច្ចេកទេស និងក្មួយៗវីរៈយុវជនស្ម័គ្រចិត្តទាំងអស់។
តាងនាមសម្តេចតេជោនាយករដ្ឋមន្រ្តី ខ្ញុំសូមកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែង របស់ថ្នាក់ដឹកនាំគ្រប់លំដាប់ថ្នាក់ ក៏ដូចជាមន្រ្តីជំនាញ នៃក្រសួងរៀបចំដែនដី នគរូបនីយកម្ម និងសំណង់ អាជ្ញាធរខេត្ត-ស្រុក មូលដ្ឋានភូមិ-ឃុំ និងស្ថាប័នពាក់ព័ន្ធ ព្រមទាំងកងកម្លាំង ប្រដាប់អាវុធទាំងអស់ ដែលបានយកចិត្តទុកដាក់បំពេញការងាររបស់ខ្លួន ក្នុងដំណើរការវាស់វែងនិងផ្តល់កម្មសិទ្ធិដីធ្លីជូនប្រជាពលរដ្ឋ ប្រកបដោយជោគជ័យនិងការទទួលខុសត្រូវខ្ពស់។ ខ្ញុំក៏សូមកោតសរសើរ និងថ្លែងអំណរគុណផងដែរ ចំពោះកិច្ចខិតខំប្រឹងប្រែង និងឆន្ទៈដ៏មោះមុតរបស់ក្មួយៗវីរៈយុវជនស្ម័គ្រចិត្តសម្តេចតេជោ ដែលបានលះបង់កម្លាំងកាយ កម្លាំងចិត្ត និងពេលវេលាដ៏មានតម្លៃ ដើម្បីចុះវាស់វែងដីធ្លីជូនបងប្អូនប្រជាពលរដ្ឋ។ បេសកកម្មដ៏ឧត្តុង្គឧត្តមរបស់ក្មួយៗ ពិតជាបានរួមចំណែកដល់ការអនុវត្ត «គោលនយោបាយចាស់សកម្មភាពថ្មី» របស់រាជរដ្ឋាភិបាលនាពេលបច្ចុប្បន្ននេះ។
ជាមួយគ្នានេះដែរ ខ្ញុំសូមថែ្លងអំណរគុណចំពោះសប្បុរសជននានាដែលបានចុះសួរសុខទុក្ខ ក្មួយៗវីរៈយុវជនដល់មូលដ្ឋាន ព្រមទាំងសូមកោតសរសើរនិងថ្លែងអំណរគុណយ៉ាងជ្រាលជ្រៅចំពោះ មាតាបិតានិងអាណាព្យាបាលក្មួយៗវីរៈយុវជនទាំងអស់ ដែលបានអនុញ្ញាត និងផ្តល់លទ្ធភាពឱ្យ កូនចៅជាទីស្រឡាញ់របស់ខ្លួន បានបំពេញបេសកកម្មជាប្រវត្តិសាស្រ្តជូនប្រជាពលរដ្ឋរបស់យើង។ ខ្ញុំក៏សូមយកឱកាសនេះ ថ្លែងអំណរគុណដល់ការយកចិត្តទុកដាក់ថែទាំសុខភាពរបស់ក្រុមគ្រូពេទ្យ និងការចូលរួមយ៉ាងសកម្មភាពពីសំណាក់បងប្អូនប្រជាពលរដ្ឋក្នុងមូលដ្ឋាន ដើម្បីឱ្យដំណើរការនេះមានភាពរលូននិងទទួលបានជោគជ័យ ដូចដែលយើងទទួលបាននាពេលនេះ។
ការចែកប័ណ្ណកម្មសិទ្ធិជូនប្រជាពលរដ្ឋនៅពេលនេះ ឆ្លុះបញ្ចាំងឱ្យឃើញអំពីការយកចិត្តទុកដាក់ខ្ពស់របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនា បតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ក្នុងការធានាកម្មសិទ្ធិដីធ្លីស្របច្បាប់របស់ប្រជាពលរដ្ឋ សំដៅលើកកម្ពស់ជីវភាព សុខុមាលភាព និងការកាត់បន្ថយភាពក្រីក្រ ព្រមទាំងរួមចំណែកដល់ការពង្រឹងយុត្តិធម៌និងស្ថិរភាពសង្គម។ ដូចដែលយើងបានដឹងហើយថា រាជរដ្ឋាភិបាលបាននិងកំពុងអនុវត្តគោលនយោបាយនិងយុទ្ធសាស្រ្តដ៏ សមស្របនានា ដើម្បីអភិវឌ្ឍសមត្ថភាពរបស់ប្រជាកសិករ និងអភិវឌ្ឍវិស័យកសិកម្ម ដោយផ្តោតការយកចិត្តទុកដាក់ខ្ពស់ចំពោះការកសាងប្រព័ន្ធធារាសាស្រ្ត និងការផ្តល់សេវាគាំទ្រនានា ព្រមទាំងគោលនយោបាយអភិវឌ្ឍជនបទ សំដៅបង្កើតឱកាសឱ្យកាន់តែប្រសើរជូនប្រជាពលរដ្ឋក្នុងការបង្កើនចំណូលប្រចាំ គ្រួសារ។ ដូច្នេះ ការផ្តល់កម្មសិទ្ធិដីធ្លីនេះ គឺពិតជាបានរួមចំណែកជំរុញនិងលើកទឹកចិត្តឱ្យបងប្អូនប្រជាពលរដ្ឋខិតខំ បង្កើនផលិតភាព ក៏ដូចជាការវិនិយោគក្នុងវិស័យកសិកម្មឱ្យកាន់តែខ្លាំងឡើងថែមទៀត។
ជាការពិតណាស់ ការចែកប័ណ្ណកម្មសិទ្ធិជូនប្រជាពលរដ្ឋនាពេលនេះ គឺជាការរួមចំណែកយ៉ាងសំខាន់ ក្នុងការដោះស្រាយបញ្ហាទំនាស់ដីធ្លីរវាងប្រជាជននិងប្រជាជន ក៏ដូចជារវាងប្រជាជននិងក្រុមហ៊ុន ដែលកន្លងមកបញ្ហាទាំងអស់នេះ តែងតែធ្វើឱ្យមានការប៉ះពាល់ដល់ជីវភាពរបស់ប្រជាពលរដ្ឋ។ ដូច្នេះ ការធ្វើឱ្យមានភាពច្បាស់លាស់នៃការកាន់កាប់ដីធ្លីរបស់ប្រជាពលរដ្ឋ ក៏ជាការធ្វើឱ្យមានភាពច្បាស់លាស់ដល់ការកាន់កាប់ដីធ្លីរបស់ក្រុមហ៊ុន វិនិយោគផងដែរ។ ទាំងនេះ សបញ្ជាក់ឱ្យឃើញយ៉ាងច្បាស់នូវនយោបាយឈ្នះ-ឈ្នះរបស់ រាជរដ្ឋាភិបាលលើវិស័យដីធ្លី ក្នុងការផ្តល់សម្បទានដីសេដ្ឋកិច្ចដល់ក្រុមហ៊ុនវិនិយោគ សំដៅជំរុញឱ្យផ្នែកឯកជនអាចរួមចំណែកអភិវឌ្ឍមូលដ្ឋានកាន់តែមាន ប្រសិទ្ធភាព និងផ្តល់ផលប្រយោជន៍ដល់ប្រជាពលរដ្ឋរស់នៅក្នុងតំបន់វិនិយោគនោះ យ៉ាងពិតប្រាកដ។
ឯកឧត្តម លោកជំទាវ អស់លោក លោកស្រី និង ក្មួយៗវីរៈយុវជនស្ម័គ្រចិត្តទាំងអស់!
ដូចដែលយើងទាំងអស់គ្នាបានដឹងស្រាប់ហើយថា របបប្រល័យពូជសាសន៍ ប៉ុល ពត បានលុបបំបាត់ទាំងស្រុងរាល់កម្មសិទ្ធិឯកជនទាំងអស់ រួមទាំងកម្មសិទ្ធិដីធ្លីផងដែរ។ នៅក្រោយថ្ងៃរំដោះ៧មករា១៩៧៩ ទន្ទឹមនឹងការខិតខំទប់ស្កាត់ការវិលត្រឡប់មកវិញនៃរបប ប្រល័យពូជសាសន៍ និងការកសាងប្រទេសជាតិពីបាតដៃទទេ រដ្ឋាភិបាលបានអនុវត្តគោលនយោបាយផ្តល់របបដីជូនប្រជាពលរដ្ឋ គ្រប់គ្រួសារសម្រាប់ប្រើប្រាស់ជាលំនៅដ្ឋាននិងការបង្កបង្កើន ផល។ ប្រជាពលរដ្ឋបានរួមកម្លាំងគ្នាធ្វើការបង្កបង្កើនផលទៅតាមលទ្ធភាព នៅលើដីធ្លី ដែលអាចធ្វើទៅបានដើម្បីចែកគ្នារស់។ គិតចាប់ពីឆ្នាំ១៩៧៩ រហូតមកដល់ពេលនេះ រដ្ឋាភិបាលបានអនុវត្តគោលនយោបាយកំណែទម្រង់ដីធ្លីចំនួន៤វគ្គ។ វគ្គទី១ ក្នុងទសវត្សរ៍ឆ្នាំ១៩៨០ រដ្ឋាភិបាលបានយកចិត្តទុកដាក់រៀបចំឱ្យមានលិខិតស្នាមរដ្ឋបាលបញ្ជាក់ពី កម្មសិទ្ធិដីធ្លី និងប័ណ្ណភោគៈជូនប្រជាពលរដ្ឋ។ វគ្គទី២ នៅចន្លោះឆ្នាំ១៩៩១ ដល់ ១៩៩៣ និងវគ្គទី៣ នៅចុងឆ្នាំ១៩៩៨។ វគ្គទី៤ ចាប់ពីឆ្នាំ២០១២មក ដោយមានការចូលរួមពីសំណាក់ក្មួយៗយុវជនស្ម័គ្រចិត្ត ក៏ដូចជាបងប្អូនក្នុងសហគមន៍ ក្នុងការងារវាស់វែងដីធ្លីរាជរដ្ឋាភិបាលបានអនុវត្តគោលនយោបាយ ចាស់សកម្មភាពថ្មី ដែលជាលើកដំបូងនៃប្រវត្តិសាស្រ្តកម្ពុជា ដើម្បីផ្តល់ប័ណ្ណកម្មសិទ្ធិជូនប្រជាពលរដ្ឋ ដែលកំពុងកាន់កាប់ដីធ្លីជាក់ស្តែង ប៉ុន្តែជាដីពុំទាន់ស្របច្បាប់នៅឡើយ ពីព្រោះថា ដីដែលបងប្អូនប្រជាពលរដ្ឋកំពុងកាន់កាប់ទាំងនេះ ជាដីស្ថិតក្នុងមុខសញ្ញាបីប្រភេទ គឺដីរដ្ឋក្នុងសម្បទានដីសេដ្ឋកិច្ច ដីរដ្ឋក្នុងសម្បទានព្រៃឈើ និងដីរដ្ឋដែលត្រូវបានកាន់កាប់ដោយមានដីកាដកហូត។
ជាក់ស្តែង ចាប់តាំងពីពាក់កណ្តាលឆ្នាំ២០១២មក រាជរដ្ឋាភិបាលបានបើកយុទ្ធនាការចុះវាស់វែងដីធ្លីប្រមាណ ១លាន៨សែនហិកតា បើគិតជាក្បាលដីគឺប្រមាណ ៧០ ម៉ឺនក្បាលដី សម្រាប់ចែកជូនប្រជាពលរដ្ឋប្រមាណ ៤៧ ម៉ឺនគ្រួសារ ដោយមានការចូលរួមពីមន្រ្តីជំនាញបច្ចេកទេសវាស់វែងនិងក្រុមក្មួយៗ វីរៈយុវជនស្ម័គ្រចិត្ត សរុបជាង ៣ ពាន់នាក់។ ជាការពិត ផ្ទៃដីទំហំ ១លាន៨សែនហិកតានេះ ពុំមែនសុទ្ធតែជាដីដែលមានទំនាស់នោះទេ គឺដីមួយផ្នែកតូចប៉ុណ្ណោះ ដែលមានទំនាស់ជាមួយក្រុមហ៊ុនសម្បទានដីសេដ្ឋកិច្ច និងអ្នកកាន់កាប់ផ្សេងទៀត។ ដោយឡែក ចំពោះការកាន់កាប់ដីរដ្ឋគ្រប់ប្រភេទ គឺជាការកាន់កាប់ដីពុំទាន់ស្របច្បាប់នៅឡើយ ប៉ុន្តែប្រជាពលរដ្ឋបានប្រើប្រាស់និងអាស្រ័យផលលើដីទាំងនោះរួចទៅហើយ ដោយគ្រាន់តែពុំទាន់មានសុវត្ថិភាពក្នុងផ្លូវចិត្តនិងពុំទាន់ ហ៊ានអភិវឌ្ឍដីធ្លីឱ្យអស់សក្តានុពលប៉ុណ្ណោះ។ ជារួម យុទ្ធនាការអនុវត្តគោលនយោបាយចាស់សកម្មភាពថ្មីលើវិស័យដីធ្លីនេះ គឺជាជំហានថ្មីមួយទៀតនៃការកែទម្រង់ដីធ្លីដ៏ស៊ីជម្រៅ តាមរយៈការធ្វើប្រទានកម្មដីជូនប្រជាពលរដ្ឋជាកម្មសិទ្ធិពេញលេញ ដើម្បីដោះស្រាយស្ថានភាពពីការកាន់កាប់ដីធ្លីមិនច្បាស់លាស់ ឬមិនស្របច្បាប់ ឱ្យទៅជាការកាន់កាប់ដីធ្លីដោយមានមូលដ្ឋានច្បាប់រឹងមាំ មានលក្ខណៈច្បាស់លាស់ និងមានសុវត្ថិភាព។
ផ្អែកតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ លទ្ធផលនៃការអនុវត្តបទបញ្ជាលេខ០១ នៅទូទាំងប្រទេស គិតមកដល់ថ្ងៃទី០៧ ខែមីនា ឆ្នាំ២០១៣ គឺ៖ បានបំពេញសលាកបត្រក្បាលដីបានចំនួន ៥១៨ ៦៧៨ ក្បាលដី កត់ក្នុងសម្រង់បញ្ជីឈ្មោះម្ចាស់ដីបានចំនួន ៣៨៤ ៨៤៩ គ្រួសារ ចំនួនគ្រួសារបានផ្ទៀងផ្ទាត់ចំនួន ៣១០ ៨៥៤ គ្រួសារ វាស់ក្បាលដីបានចំនួន ៤៨៦ ១៧៥ ក្បាលដី គូរក្បាលដីបានចំនួន ៤១១ ១៣១ ក្បាលដី បំពេញទម្រង់បែបបទក្បាលដីបានចំនួន ៤២៥ ០៥៩ ក្បាលដី បិទផ្សាយជាសាធារណៈបានចំនួន ២៣៦ ៤៨៩ ក្បាលដី និងបានចែកប័ណ្ណដល់ដៃប្រជាជនចំនួន ១៥១ ៦៧០ ប័ណ្ណ។
ដោយឡែក នៅក្នុងខេត្តតាកែវយើងនេះ ការអនុវត្តគោលនយោបាយចាស់សកម្មភាពថ្មី បានគ្របដណ្តប់លើឃុំចំនួន១៥ ក្នុងស្រុកគីរីវង់ និងស្រុកត្រាំកក់ ដោយមានការចូលរួមពីមន្រ្តីជំនាញបច្ចេកទេស ចំនួន ១១នាក់ និងយុវជនស្ម័គ្រចិត្តសម្តេចតេជោចំនួន ៣៦នាក់។ ជាលទ្ធផល បើគិតមកត្រឹមថ្ងៃនេះ យើងបានបំពេញសាលាកបត្រព័ត៌មានចំនួន ១១ ៨៩២ ក្បាលដី និងបានបញ្ចូលសម្រង់បញ្ជីឈ្មោះម្ចាស់ដីបានចំនួន ៩ ២៤៥ គ្រួសារ។ កន្លងមក យើងបានចែកប័ណ្ណកម្មសិទ្ធិដីធ្លីចំនួន ២ ៨៩៦ ក្បាលដី ជូនប្រជាពលរដ្ឋចំនួន ១ ៧៣៩ គ្រួសារក្នុងខេត្តតាកែវយើងនេះ។ បន្តិចទៀតនេះ ខ្ញុំនឹងចែកប័ណ្ណកម្មសិទ្ធិដីធ្លីចំនួន ៧៣៧ ប័ណ្ណ ជូនប្រជាពលរដ្ឋចំនួន ៣៧៩ គ្រួសារ នៅក្នុងឃុំសំរោង និងចែកប័ណ្ណកម្មសិទ្ធិដីធ្លីចំនួន ៧១៨ ប័ណ្ណ ជូនប្រជាពលរដ្ឋចំនួន ៣៨៩ គ្រួសារ នៅឃុំត្រពាំងធំខាងត្បូង ស្រុកត្រាំកក់ ខេត្តតាកែវ។ ខ្ញុំសូមបញ្ជាក់ថា រាជរដ្ឋាភិបាលនៅតែបន្តយុទ្ធនាការវាស់វែងដីធ្លីនេះរហូតសម្រេចបាន តាមផែនការកំណត់។ ដូច្នេះ ចំពោះបងប្អូនដែលមានដីពុំទាន់បានទទួលការវាស់វែងពីក្រុមការងារ សូមកុំមានការព្រួយបារម្ភ ពីព្រោះក្រុមការងារវាស់វែងដីធ្លីរបស់យើងកំពុងអនុវត្តការងាររបស់ខ្លួន ជាបន្តបន្ទាប់ តាមផែនការដែលបានគ្រោងទុក ហើយនឹងបន្តធ្វើរហូតដល់ចប់ជាស្ថាពរ។
ឯកឧត្តម លោកជំទាវ អស់លោក លោកស្រី និងក្មួយៗវីរៈយុវជនស្ម័គ្រចិត្តទាំងអស់!
លទ្ធផលគួរជាទីមោទនៈដែលយើងទទួលបាននៅថ្ងៃនេះ គឺជាសមិទ្ធផលដ៏ធំធេងសម្រាប់ប្រជាពលរដ្ឋក្នុងខេត្តតាកែវ ជាពិសេសក្នុងឃុំសំរោង និងឃុំត្រពាំងធំខាងត្បូងយើងនេះ។ ខ្ញុំសូមបញ្ជាក់ជាថ្មីម្តងទៀត ជូនបងប្អូនប្រជាពលរដ្ឋនៅទីនេះ ក៏ដូចជានៅទូទាំងប្រទេសថា ការវាស់វែងដីធ្លី និងចែកប័ណ្ណកម្មសិទ្ធិជូនប្រជាពលរដ្ឋ គឺដើម្បីឱ្យប្រជាពលរដ្ឋយកទៅបង្កបង្កើនផលសម្រាប់ទ្រទ្រង់ ជីវភាពគ្រួសារ និងប្រើប្រាស់តាមសេចក្តីត្រូវការរបស់បងប្អូន ប៉ុន្តែមិនមែនដើម្បីយកពន្ធដូចដែលក្រុមមួយចំនួនតូចបានលើកឡើង នោះទេ។ ដរាបណា រាជរដ្ឋាភិបាលនៅតែដឹកនាំដោយសម្តេចតេជោនាយករដ្ឋមន្រ្តី ដីធ្លីទាំងអស់របស់ប្រជាកសិករដែលប្រើប្រាស់ជាលក្ខណៈគ្រួសារ នឹងមិនត្រូវបានយកពន្ធនោះឡើយ។ បងប្អូនប្រជាពលរដ្ឋមិនត្រូវចាញ់បោកជនមួយក្តាប់តូច ដែលតែងតែមានចេតនាឃោសនាអូសទាញឱ្យប្អូនទៅចាប់យកដី របស់រដ្ឋ និងបង្កភាពចលាចលក្នុងសង្គមជាតិនោះឡើយ។ រាល់ការចូលទន្រ្ទានចាប់យកដីរដ្ឋ និងការបោះបង្គោលលើដីរដ្ឋ គឺជាសកម្មភាពខុសច្បាប់ និងត្រូវហាមឃាត់ជាដាច់ខាត ហើយរាល់ជនល្មើសនឹងត្រូវផ្តន្ទាទោសតាមច្បាប់ជាធរមាន។ ឆ្លៀតក្នុងឱកាសនេះ ខ្ញុំសូមអំពាវនាវដល់អាជ្ញាធរថ្នាក់ក្រោមជាតិ និងសមត្ថកិច្ចពាក់ព័ន្ធគ្រប់លំដាប់ថ្នាក់ រួមទាំងកងកម្លាំងប្រដាប់អាវុធ ត្រូវបន្តអនុវត្តតួនាទីនិងភារកិច្ចរបស់ខ្លួន ស្របតាមបញ្ញត្តិនៃច្បាប់ និងលិខិតបទដ្ឋានគតិយុត្តជាធរមាន ដើម្បីធានាការគ្រប់គ្រងដីធ្លីឱ្យកាន់តែមានប្រសិទ្ធភាពខ្ពស់ថែម ទៀត។
មុននឹងបញ្ចប់ ខ្ញុំសូមកោតសរសើរនិងថ្លែងអំណរគុណជាថ្មីម្តងទៀត ចំពោះថ្នាក់ដឹកនាំ មន្រ្តីជំនាញនៃក្រសួងស្ថាប័នពាក់ព័ន្ធ អាជ្ញាធរមូលដ្ឋាន កងកម្លាំងប្រដាប់អាវុធ ប្រជាពលរដ្ឋ និងក្មួយៗវីរៈយុវជនស្ម័គ្រចិត្តសម្តេចតេជោ ដែលបានខិតខំបំពេញភារកិច្ចរបស់ខ្លួន ប្រកបដោយឆន្ទៈនិងការទទួលខុសត្រូវខ្ពស់ ក្នុងការងារវាស់វែងដីធ្លី និងផ្តល់កម្មសិទ្ធិជូនប្រជាពលរដ្ឋក្នុងខេត្តតាកែវ ជាពិសេសនៅឃុំសំរោង និងឃុំត្រពាំងធំខាងត្បូង ស្រុកត្រាំកក់ ទទួលបានជោគជ័យគួរជាទីមោទនៈ។ ខ្ញុំមានជំនឿយ៉ាងមុតមាំថា ក្រុមការងារទាំងអស់ ដែលកំពុងអនុវត្តគោលនយោបាយចាស់សកម្មភាពថ្មី នឹងបន្តបំពេញបេសកកម្មរបស់ខ្លួនឱ្យកាន់តែប្រសើរឡើងថែមទៀត ដើម្បីជាប្រយោជន៍ដ៏ថ្លៃថ្លាជូនប្រជាពលរដ្ឋរបស់យើង។
ជាទីបញ្ចប់ ខ្ញុំសូមជូនពរ ឯកឧត្តម លោកជំទាវ អស់លោក លោកស្រី បងប្អូនប្រជាពលរដ្ឋនិងក្មួយៗវីរៈយុវជនស្ម័គ្រចិត្តសម្តេចតេជោទាំងអស់ សូមមានសុខភាពល្អ ទទួលបានជោគជ័យគ្រប់ភារកិច្ច និងមានសុភមង្គលក្នុងក្រុមគ្រួសារ៕
សូមអរគុណ!