សុន្ទរកថា ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី ក្នុងពិធីប្រកាសចូលកាន់មុខតំណែងអភិបាល អភិបាលរង នៃគណៈអភិបាលខេត្តតាកែវ និងអភិបាលក្រុង ស្រុក នៃខេត្តតាកែវ
ខេត្តតាកែវ ថ្ងៃទី១៦ ខែឧសភា ឆ្នាំ២០១៣
- ឯកឧត្តម លោកជំទាវ សមាជិក សមាជិកា នៃរដ្ឋសភា និងរាជរដ្ឋាភិបាល
- ឯកឧត្តម លោកជំទាវ អស់លោក លោកស្រី ថ្នាក់ដឹកនាំ មន្រ្តីរាជការនៃរដ្ឋបាលថ្នាក់ ក្រោមជាតិគ្រប់លំដាប់ថ្នាក់ និងកងកម្លាំងប្រដាប់អាវុធគ្រប់ប្រភេទ ជាទីមេត្រី!
ថ្ងៃនេះ ខ្ញុំមានសេចក្តីសោមនស្សរីករាយចូលរួមជាមួយ ឯកឧត្តម លោកជំទាវ អស់លោក លោកស្រី ក្នុងពិធីប្រកាសចូលកាន់មុខតំណែងនៃអភិបាល អភិបាលរង នៃគណៈអភិបាលខេត្តតាកែវ និងអភិបាលនៃគណៈអភិបាលក្រុង និងស្រុក ក្នុងខេត្តតាកែវ សម្រាប់អាណត្តិទី២ នាពេលនេះ។ឆ្លៀតក្នុងឱកាសនេះ ខ្ញុំសូមពាំនាំនូវក្តីនឹករលឹកនិងការផ្តាំផ្ញើសួរសុខទុក្ខពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ជូនចំពោះ ឯកឧត្តម លោកជំទាវអស់លោក លោកស្រី ជាថ្នាក់ដឹកនាំ មន្រ្តីរាជការ កងកម្លាំងប្រដាប់អាវុធ និងបងប្អូនប្រជាពលរដ្ឋ ក្នុងខេត្តតាកែវទាំងមូល ដោយសេចក្តីស្រឡាញ់រាប់អានយ៉ាងជ្រាលជ្រៅជាទីបំផុត។
ក្នុងនាមរាជរដ្ឋាភិបាល ខ្ញុំសូមកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំខេត្ត មន្រ្តីរាជការគ្រប់លំដាប់ថ្នាក់ និងកងកម្លាំងប្រដាប់អាវុធគ្រប់ប្រភេទ ដែលមានឆន្ទៈ ស្រួចស្រាល់ និងការប្តេជ្ញាចិត្តមោះមុត យកអស់កម្លាំងកាយ ចិត្ត និងបញ្ញា ក្នុងការបន្តបំពេញតួនាទី ភារកិច្ច និងកាតព្វកិច្ច ដើម្បីបម្រើនិងការពារជាតិមាតុភូមិ និងប្រជាជនក្នុងដែនសមត្ថកិច្ចរបស់ខ្លួនប្រកបដោយស្មារតីទទួលខុសត្រូវខ្ពស់។
រដ្ឋបាលថ្នាក់ក្រោមជាតិ ដែលយើងស្គាល់ថាជាអាជ្ញាធរដែនដីនេះ មានតួនាទីមិនត្រឹមតែជាអ្នកផ្តល់សេវាសាធារណៈប៉ុណ្ណោះទេ ប៉ុន្តែថែមទាំងជាសេនាធិការផ្ទាល់និងជាតំណាងឱ្យរាជរដ្ឋាភិបាល ក្នុងមូលដ្ឋានទៀតផង។ ការគ្រប់គ្រងរដ្ឋបាលថ្នាក់ក្រោមជាតិត្រូវធ្វើឡើង តាមគោលការណ៍រដ្ឋបាល ឯកភាព ដើម្បីបង្កើត ជំរុញ និងធ្វើឱ្យមានចីរភាពដល់ការអភិវឌ្ឍតាមបែបប្រជាធិបតេយ្យ តាមរយៈ នយោបាយវិមជ្ឈការនិងវិសហមជ្ឈការ។ ការបង្កើតរដ្ឋបាលឯកភាពនៅរដ្ឋបាលថ្នាក់ក្រោមជាតិ សំដៅដល់ការពង្រឹងអង្គឯកភាពរបស់រដ្ឋ ដើម្បីសម្របសម្រួលនូវរាល់សកម្មភាពរដ្ឋបាលសាធារណៈនៅក្នុងដែនដីរបស់ខ្លួន។
ឯកឧត្តម លោកជំទាវ អស់លោក លោកស្រី!
ដូចដែលយើងទាំងអស់គ្នាបានដឹងហើយថា ប្រទេសកម្ពុជាបានទទួលរងគ្រោះ ដោយសារ ជម្លោះក្រោមឥទ្ធិពល និងមនោគមវិជ្ជា របស់ប្រទេសមហាអំណាច ជាពិសេស ការបំផ្លិចបំផ្លាញដល់ឫសគល់ក្នុងរបបប្រល័យពូជសាសន៍ ប៉ុល ពត។ ចាប់តាំងពីថ្ងៃ៧មករា១៩៧៩ រដ្ឋាភិបាល កម្ពុជាបានខិតខំប្រឹងប្រែងដឹកនាំប្រទេសពីបាតដៃទទេ ដោយដៃម្ខាង ស្តារ និងកសាងប្រទេសនិងដៃម្ខាងទៀត ទប់ស្កាត់ការវិលត្រឡប់មកវិញនៃរបបប្រល័យពូជសាសន៍ ប៉ុល ពត ក្នុងពេល ដែលប្រទេសកម្ពុជាទទួលរងការហ៊ុំព័ទ្ធលើគ្រប់វិស័យ។
តាមរយៈការអនុវត្តគោលនយោបាយឈ្នះឈ្នះរបស់សម្តេចអគ្គមហាសេនាបតីតេជោ ហ៊ុន សែននាយករដ្ឋមន្រ្តីនៃព្រះរាជាណាចក្រកម្ពុជា ក្នុងការធ្វើសមាហរណកម្មរចនាសម្ព័ន្ធនយោបាយ និងយោធារបស់ខ្មែរក្រហម ឱ្យមកនៅក្រោមរដ្ឋបាលឯកភាពតែមួយរបស់រាជរដ្ឋាភិបាល ប្រទេសកម្ពុជាទទួលបានសុខសន្តិភាពពេញលេញចាប់ពីឆ្នាំ១៩៩៨។ នេះជាលើកទីមួយ ក្នុងប្រវត្តិសាស្ត្រជាង៥០០ឆ្នាំចុងក្រោយរបស់កម្ពុជា ដែលរាជរដ្ឋាភិបាលគ្រប់គ្រងលើដែនដីនៃផ្ទៃប្រទេសទាំងមូល។
បន្ទាប់ពីទទួលបាននូវសុខសន្តិភាពនិងស្ថិរភាពនយោបាយ ក្នុងប៉ុន្មានទសវត្សចុងក្រោយនេះកម្ពុជាសម្រេចបានកំណើនសេដ្ឋកិច្ចខ្ពស់ និងការកាត់បន្ថយភាពក្រីក្ររបស់ប្រជាពលរដ្ឋជាបន្តបន្ទាប់។ជាក់ស្តែង ផលិតផលក្នុងស្រុកសរុបសម្រាប់មនុស្សម្នាក់ៗបានកើនឡើងពី៧៦០ដុល្លារអាមេរិក ក្នុង ឆ្នាំ២០០៨ ដល់ជិត១.០០០ដុល្លារអាមេរិកក្នុងឆ្នាំ២០១២ ហើយរំពឹងថា នឹងកើនឡើងដល់ជាង១.០០០ដុល្លារអាមេរិកក្នុងឆ្នាំ២០១៣នេះ។ អត្រានៃភាពក្រីក្របានធ្លាក់ចុះពី២២,៩% ក្នុងឆ្នាំ២០០៩មកនៅត្រឹម២០%នៅឆ្នាំ២០១១ ហើយរំពឹងថានឹងចុះមកក្រោម១៩%នៅឆ្នាំ២០១៣នេះ។
ទន្ទឹមនឹងនេះ រាជរដ្ឋាភិបាលបានដាក់ចេញ និងអនុវត្តនូវកម្មវិធីកំណែទម្រង់ស៊ីជម្រៅលើគ្រប់វិស័យ សំដៅកសាងសមត្ថភាពស្ថាប័ន ធ្វើឱ្យប្រសើរឡើងនូវហេដ្ឋារចនាសម្ព័ន្ធសេដ្ឋកិច្ច-សង្គម និងបង្កើតឱ្យមានបរិយាកាសអនុគ្រោះ សម្រាប់ទាក់ទាញការវិនិយោគពីបរទេសនិងក្នុងស្រុក។ ថ្មីៗនេះរាជរដ្ឋាភិបាលបានអនុវត្តកំណែទម្រង់ដីធ្លី តាមរយៈ «គោលនយោបាយចាស់ សកម្មភាពថ្មី» ដោយមានការចូលរួមពីមន្ត្រីបច្ចេកទេស និងក្រុមវីរយុវជនស្ម័គ្រចិត្តសម្តេចតជោ ដើម្បីធ្វើការវាស់វែងដីសម្រាប់ផ្តល់ប័ណ្ណកម្មសិទ្ធិដីធ្លីជូនប្រជាជន។
ស្របពេលជាមួយគ្នានេះដែរ ដំណើរការប្រជាធិបតេយ្យភាវូបនីយកម្ម និងសិទ្ធិសេរីភាពគ្រប់ បែបយ៉ាងរបស់ប្រជាជន សេរីភាពខាងសារព័ត៌មាន សេរីភាពការបញ្ចេញមតិ សកម្មភាពរបស់ គណបក្សនយោបាយ និងអង្គការមិនមែនរដ្ឋាភិបាលនានា ត្រូវបានការពារ ពង្រឹង និងលើកកម្ពស់ឥតឈប់ឈរ។
ក្នុងវិស័យការពារជាតិ រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន បានប្តូរផ្តាច់ការពារថែរក្សាបូរណភាពទឹកដី និងអធិបតេយ្យភាពជាតិ ដោយប្រកាន់ខ្ជាប់គោលការណ៍អត់ធ្មត់ខ្ពស់បំផុត និងប្រឹងប្រែងដោះស្រាយជម្លោះព្រំដែន តាមច្បាប់ជាតិ អន្តរជាតិ ក្នុងជំហររក្សាទំនាក់ទំនងល្អជាមួយប្រទេសជិតខាង ដើម្បីផលប្រយោជន៍ជាតិ និងប្រជាជន។
ដោយឡែក រាជរដ្ឋាភិបាលសម្រេចបាននូវសមិទ្ធផលជាច្រើនក្នុងការដ្ឋាននៃកំណែទម្រង់វិមជ្ឈការនិងវិសហមជ្ឈការ។ ការបោះឆ្នោតជ្រើសរើសក្រុមប្រឹក្សាឃុំសង្កាត់ជាបន្តបន្ទាប់ ព្រមទាំងការបោះឆ្នោតជ្រើសរើសក្រុមប្រឹក្សារាជធានី-ខេត្ត ក្រុមប្រឹក្សាក្រុង-ស្រុក-ខណ្ឌ បានប្រព្រឹត្តទៅយ៉ាងរលូន ហើយលទ្ធផលនៃការបោះឆ្នោតនេះ ក៏បានជំរុញឱ្យដំណើរការកែទម្រង់វិមជ្ឈការនិងវិសហមជ្ឈការនេះមានលក្ខណៈល្អប្រសើរ និងកាន់តែស៊ីជម្រៅថែមទៀត។ ជាងនេះទៀត រាជរដ្ឋាភិបាលបានដាក់ចេញនូវកម្មវិធីជាតិ រយៈពេល១០ឆ្នាំ (២០១០២០១៩) ដែលជាផែនទីបង្ហាញផ្លូវរយៈពេលវែងមួយ ដោយបានរៀបចំផែនការអនុវត្តរយៈពេល ៣ឆ្នាំម្តងៗ ដើម្បីការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ។ បច្ចុប្បន្ន កំណែទម្រង់នេះកំពុងស្ថិតក្នុងឆ្នាំទី៣ នៃផែនការអនុវត្តរយៈពេល៣ឆ្នាំដំបូងនៃកម្មវិធីជាតិរយៈពេល១០ឆ្នាំ។ ជាលទ្ធផល រចនាសម្ព័ន្ធនិងប្រព័ន្ធគ្រប់គ្រងនៅរដ្ឋបាលថ្នាក់ក្រោមជាតិ ត្រូវបានរៀបចំឡើងវិញដើម្បីកំណត់តួនាទី ភារកិច្ច និងការទទួលខុសត្រូវរបស់មន្រ្តីជាប់ឆ្នោតនិងមន្រ្តីតែងតាំងថ្មី ចំពោះប្រជាជន និងរាជរដ្ឋាភិបាល។ ជាក់ស្តែង មន្រ្តីរាជការស៊ីវិលប្រមាណ១០.០០០នាក់ ដែលបម្រើការងារនៅសាលារាជធានី ខេត្ត ក្រុង ស្រុក ខណ្ឌ ត្រូវបានធ្វើសមាហរណកម្មចូលទៅក្នុងរចនាសម្ព័ន្ធនិងប្រព័ន្ធគ្រប់គ្រងថ្មីនេះ។
ក្រៅពីសមិទ្ធផលដែលសម្រេចបាននៅក្នុងប្រទេស កម្ពុជាក៏ទទួលបានជោគជ័យធំៗគួរឱ្យកត់សម្គាល់នៅលើឆាកអន្តរជាតិផងដែរ។ ជាក់ស្តែង នៅឆ្នាំ២០១២ ក្នុងឋានៈជាប្រធានអាស៊ាន កម្ពុជាបានរៀបចំកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ ដោយទទួលបាននូវការកោត សរសើរពីមជ្ឈដ្ឋានជាតិនិងអន្តរជាតិ។ លើសពីនេះ ក្នុងនាមជាប្រធានគណៈកម្មាធិការបេតិកភណ្ឌពិភពលោក កម្ពុជានឹងធ្វើជាម្ចាស់ផ្ទះរៀបចំកិច្ចប្រជុំពេញអង្គលើកទី៣៧ នៃគណៈកម្មាធិការបេតិកភណ្ឌពិភពលោក នៅក្នុងខែមិថុនាខាងមុខ ដោយមានការចូលរួមពីបណ្តារដ្ឋភាគីទាំង១៩០ប្រទេស នៃអនុសញ្ញាបេតិកភណ្ឌពិភពលោក១៩៧២។
ឯកឧត្តម លោកជំទាវ អស់លោក លោកស្រី!
ក្នុងនាមរាជរដ្ឋាភិបាល ខ្ញុំសូមស្នើដល់ឯកឧត្តមអភិបាល អភិបាលរងខេត្ត អភិបាលក្រុងអភិបាលស្រុកទាំងអស់នៃខេត្តតាកែវរបស់យើង ដែលត្រូវបានតែងតាំងឱ្យបន្តការងារក្នុងអាណត្តិទី២នេះ រួមទាំងក្រុមប្រឹក្សា មន្រ្តីរាជការ កងកម្លាំងប្រដាប់អាវុធ និងកងកម្លាំងមានសមត្ថកិច្ចគ្រប់លំដាប់ថ្នាក់ ត្រូវរួមសហការគ្នាអនុវត្តការងារសំខាន់ៗជាអាទិភាពមួយចំនួនដូចខាងក្រោម៖
ទីមួយ៖ ត្រូវបន្តរួមគ្នាថែរក្សាការពារសុខសន្តិភាព ស្ថិរភាពនយោបាយ សណ្តាប់ធ្នាប់សង្គមឱ្យបានល្អប្រសើរ ដើម្បីបង្កបរិយាកាសឱ្យការបោះឆ្នោតជ្រើសតាំងតំណាងរាស្រ្តនីតិកាលទី៥ ដែលនឹងប្រព្រឹត្តទៅនៅថ្ងៃទី២៨ ខែកក្កដា ឆ្នាំ២០១៣ ខាងមុខ ប្រកបដោយលក្ខណៈសេរី ត្រឹមត្រូវ យុត្តិធម៌និងមានសុវត្ថិភាព ហើយត្រូវប្រកាន់ខ្ជាប់នូវអព្យាក្រឹត្យភាព ក្នុងការអនុវត្តតួនាទីភារកិច្ចរបស់ខ្លួន និងត្រូវគោរពឱ្យបានខ្ជាប់ខ្ជួននូវគោលការណ៍ច្បាប់ បទបញ្ជា នីតិវិធី និងក្រមសីលធម៌នៃការបោះឆ្នោត។
ទីពីរ៖ ត្រូវបន្តខិតខំលើកកម្ពស់ការថែរក្សាសន្តិសុខ សណ្តាប់ធ្នាប់សាធារណៈនៅទូទាំងខេត្តឱ្យកាន់តែប្រសើរឡើងថែមទៀត តាមរយៈការជំរុញ និងលើកទឹកចិត្តឱ្យគ្រប់ភាគីពាក់ព័ន្ធទាំងអស់ជាពិសេសប្រជាពលរដ្ឋក្នុងមូលដ្ឋាន បានចូលរួមអនុវត្តគោលនយោបាយភូមិឃុំមានសុវត្ថិភាព។ ទន្ទឹមនឹងការខិតខំបង្ការ ទប់ស្កាត់ និងបង្រ្កាបសកម្មភាពល្មើសច្បាប់និងក្រុមជនទំនើង អាជ្ញាធរមានសមត្ថកិច្ចត្រូវបង្កើនការផ្សព្វផ្សាយច្បាប់ស្តីពីចរាចរណ៍ជើងគោក និងពង្រឹងការអនុវត្តច្បាប់នេះឱ្យបានម៉ឺងម៉ាត់ ដើម្បីកាត់បន្ថយគ្រោះថ្នាក់ចរាចរណ៍។
ទីបី៖ ត្រូវបន្តការលើកកម្ពស់ការគ្រប់គ្រងច្រកទ្វារព្រំដែន ច្រករបៀង និងសកម្មភាពចេញចូលឆ្លងដែន សំដៅរួមគ្នាបង្ការ ទប់ស្កាត់ និងបង្រ្កាបឱ្យបានទាន់ពេលវេលា និងមានប្រសិទ្ធភាពនូវបទល្មើសឆ្លងដែនគ្រប់ប្រភេទ ហើយក៏ត្រូវបន្តខិតខំបង្កើនកិច្ចសហប្រតិបត្តិការឱ្យបានល្អជាមួយអាជ្ញាធរនិងកម្លាំងមានសមត្ថកិច្ចនៅតាមតំបន់ព្រំដែននៃប្រទេសជិតខាង ដើម្បីអភិវឌ្ឍតំបន់ព្រំដែនឱ្យមានការរីកចម្រើនថែមទៀត។
ទីបួន៖ ត្រូវបន្តជំរុញឱ្យបានខ្លាំងក្លានូវការអនុវត្ត «នយោបាយចាស់សកម្មភាពថ្មី» លើវិស័យដីធ្លីដោយអនុវត្តឱ្យបានម៉ឺងម៉ាត់នូវបទបញ្ជារបស់រាជរដ្ឋាភិបាល និងសេចក្តីណែនាំរបស់ក្រសួងរៀបចំ ដែនដី នគរូបនីយកម្ម និងសំណង់ ហើយក៏ត្រូវខិតខំចាត់វិធានការប្រកបដោយប្រសិទ្ធភាពដើម្បីបង្ការ ទប់ស្កាត់ និងបង្រ្កាបឱ្យបានទាន់ពេលវេលា និងម៉ឺងម៉ាត់បំផុតចំពោះសកម្មភាពទន្ទ្រានកាន់កាប់ដីថ្មីៗបន្ថែមទៀត ក៏ដូចជាបទល្មើសនេសាទ។
ទីប្រាំ៖ ត្រូវបន្តធ្វើការបណ្តុះបណ្តាលកសាងសមត្ថភាពធនធានមនុស្ស និងការអភិវឌ្ឍស្ថាប័នគ្រប់ជាន់ថ្នាក់នៅរដ្ឋបាលថ្នាក់ក្រោមជាតិ ដើម្បីពង្រឹងរបៀបរបបការងារឱ្យកាន់តែមានប្រសិទ្ធភាពខ្ពស់ និងប្រកបដោយការទទួលខុសត្រូវ។
ជារួម ក្នុងឋានៈជារដ្ឋបាលដែលនៅជាប់នឹងប្រជាជន រួមសុខរួមទុក្ខជាមួយប្រជាជន អាជ្ញាធរដែនដី ត្រូវប្រកាន់ខ្ជាប់នូវជំហរជាអ្នកការពារ និងបម្រើប្រជាជន តាមរយៈការធានាឱ្យបាននូវសន្តិសុខ សណ្តាប់ធ្នាប់ សុវត្ថិភាព ស្ថិរភាពសង្គម ការអភិវឌ្ឍក្នុងមូលដ្ឋាន និងអភិបាលកិច្ចល្អ ជាពិសេសការទប់ស្កាត់ឱ្យបានទាន់ពេលវេលារាល់ទង្វើអសកម្ម ដែលប៉ះពាល់ដល់សុខុមាលភាពរបស់ប្រជាជន។ ជាងនេះទៅទៀត អាជ្ញាធរដែនដីគ្រប់លំដាប់ថ្នាក់ត្រូវបន្តយកចិត្តទុកដាក់ ធ្វើយ៉ាងណាឱ្យប្រជាជន ក្នុងមូលដ្ឋានមានជំនឿទុកចិត្តលើរដ្ឋបាលរបស់ខ្លួន ហើយក៏ត្រូវបន្តបំផុសចលនាមហាជនឱ្យយល់ដឹងកាន់តែស៊ីជម្រៅថែមទៀត អំពីតួនាទីរបស់បងប្អូនប្រជាពលរដ្ឋ ក្នុងការចូលរួមជាមួយរាជរដ្ឋាភិបាល ក្នុងកិច្ចអភិវឌ្ឍសង្គមជាតិលើគ្រប់វិស័យ។
ជាថ្មីម្តងទៀត ក្នុងនាមរាជរដ្ឋាភិបាល និងក្នុងនាមខ្ញុំផ្ទាល់ ខ្ញុំសូមសម្តែងនូវការអបអរសាទរចំពោះឯកឧត្តម លោកជំទាវ អស់លោក លោកស្រី ក្នុងគណៈអភិបាលខេត្ត គណៈអភិបាលក្រុងនិងស្រុក ដែលត្រូវបានតែងតាំងឱ្យបម្រើការងារក្នុងអាណត្តិទី២ ជាបន្តទៀត ហើយជាមួយគ្នានេះដែរ ខ្ញុំក៏សូមសម្តែងនូវការកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងមិនខ្លាចនឿយហត់របស់អាជ្ញាធរមានសមត្ថកិច្ចគ្រប់លំដាប់ថ្នាក់នៃខេត្តតាកែវ ក្នុងការបំពេញតួនាទីជាអ្នកការពារ និងបម្រើប្រជាជន និងប្រទេសជាតិ ប្រកបដោយជោគជ័យ។
ជាទីបញ្ចប់ ខ្ញុំសូមប្រសិទ្ធពរជូន ឯកឧត្តម លោកជំទាវ អស់លោក លោកស្រី ជាថ្នាក់ដឹកនាំនិងសមាជិកនៃក្រុមប្រឹក្សានិងគណៈអភិបាល ក៏ដូចជាមន្រ្តីរាជការ កងកម្លាំងប្រដាប់អាវុធ និងបងប្អូនប្រជាពលរដ្ឋក្នុងខេត្តតាកែវទាំងអស់ សូមមានសុខភាពល្អ ទទួលបានជោគជ័យគ្រប់ភារកិច្ច និងមានសុភមង្គលក្នុងក្រុមគ្រួសារ៕
សូមអរគុណ!