សុន្ទរកថា លោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា ក្នុងកម្មវិធីសម្ពោធន៍ដាក់ឲ្យប្រើប្រាស់ជាផ្លូវការស្នាក់ការ ស.ស.យ.ក ខេត្តតាកែវ
ថ្ងៃទី ១៣ ខែមីនា ឆ្នាំ២០១៤
-សូមក្រាបថ្វាយបង្គំ ព្រះថេរានុត្ថេរៈ គ្រប់ព្រះអង្គជាទីគោរពសក្ការៈ!
-សូមគោរព ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី និងជារដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី!
-សូមគោរព ឯកឧត្តម សុខ ពុទ្ធិវុធ ប្រធានសហភាពសហព័ន្ធយុវជនកម្ពុជាខេត្តតាកែវ!
- លោក លោកស្រី ប្រធានសហព័ន្ធយុវជនខេត្ត អាន យ៉ាង និងខេត្តគៀនយ៉ានសាធារណរដ្ឋសង្គមនិយមវៀតណាម
- ឯកឧត្តម លោកជំទាវ លោក លោកស្រី និងសមាជិក សមាជិកា សហភាពសហព័ន្ធ យុវជនកម្ពុជា ទាំងអស់ដែលមានវត្តមាននៅទីនេះ!
ថ្ងៃនេះ តាងនាមសហភាពសហព័ន្ធយុវជនកម្ពុជា និងក្នុងនាមខ្ញុំផ្ទាល់ ខ្ញុំសូមសម្តែងនូវសេចក្តីសោមនស្សរីករាយឥតឧបមាជាមួយនឹងវត្តមានដ៍ខ្ពង់ខ្ពស់របស់ ឯកឧត្តមបណ្ឌិតសភាចារ្យ សុខ អានព្រមជាមួយ ឯកឧត្តម លោកជំទាវ លោក លោកស្រី និង សមាជិក សមាជិកាសហភាពសហព័ន្ធយុវជនកម្ពុជាទាំងអស់ ក្នុងកម្មវិធីសម្ពោធដាក់ឲ្យប្រើប្រាស់ជាផ្លូវការនូវទីស្នាក់ការ ស.ស.យ.ក ខេត្តតាកែវនាវេលាព្រឹកនេះ។
មុននឹងធ្វើសេចក្តីរាយការណ៍ជារួមអំពីសមិទ្ធិផលការងាររបស់សហភាពសហព័ន្ធយុវជនកម្ពុជា ខ្ញុំបាទសូមអនុញ្ញាតឯកឧត្តមបណ្ឌិតសភាចារ្យ ឯកឧត្តម លោកជំទាវ លោក លោកស្រី សម្តែងនូវការកោតសរសើរ និងការវាយតម្លៃខ្ពស់ចំពោះស្នាដៃ និងកិច្ចប្រឹងប្រែងរបស់សហភាពសហព័ន្ធយុវជនកម្ពុជាខេត្តតាកែវនៅក្នុងការបំពេញការងាររបស់ខ្លួនកន្លងមកក្នុងបុព្វហេតុជាតិមាតុភូមិ ។
ចាប់តាំងពីមហាសន្និបាតលើកទី៣ របស់សមាគមយុវជនកម្ពុជា នាថ្ងៃទី ២-៣ ខែ វិចិ្ឆកា ឆ្នាំ ២០១២ ដែលបានប្រែក្លាយមកជាសហភាពសហព័ន្ធយុវជនកម្ពុជារួចមក ស.ស.យ.ក ខេត្តតាកែវ នៅក្នុងចំណោមស.ស.យ.ក រាជធានី ខេត្តមួយចំនួនទៀត ដែលបានបង្ហាញពីកិច្ចខិតខំប្រឹងប្រែងរបស់ខ្លួនដោយមោះមុត និងជំនះឧបសគ្គទាំងឡាយដើម្បីពង្រឹង និងពង្រីកនូវអង្គការចាត់តាំងរបស់ខ្លួន ក៏ដូចជាការខិតខំបំពេញការងារដើម្បីជួយយុវជននៅក្នុងខេត្តរបស់ខ្លួនឲ្យទទួលបាននូវឱកាសផ្សេងៗ រួមទាំងឱកាសបន្តការសិក្សា តាមរយៈគម្រោងអាហារូបករណ៍ និងឱកាសចូលរួមនៅក្នុងកិច្ចការសង្គម និងមនុស្សធម៌ផ្សេងៗ ដូចដែលបានរៀបរាប់ជូននៅក្នុងរបាយការណ៍របស់ឯកឧត្តមប្រធានគណៈកម្មាធិការ ស.ស.យ.ក ខេត្ត អម្បាញ់មិញនេះ។
ជាក់ស្តែងនាថ្ងៃនេះ ក្នុងនាមគណៈកម្មាធិការកណ្តាល ស.ស.យ.ក ខ្ញុំមានមោទនភាពក្រៃលែង ដែលស.ស.យ.ក តាកែវ បានរៀបចំដាក់សម្ពោធន៍ជាផ្លូវការនូវទីស្នាក់ការរបស់ខ្លួន ដែលនេះជាសមិទ្ធផលមួយដ៏ថ្លៃថ្លា និងជាមូលដ្ឋានគ្រឹះដ៏សំខាន់ក្នុងការរៀបចំការងាររដ្ឋបាល និងសកម្មភាពប្រចាំថ្ងៃ ដើម្បីបង្កើននូវប្រសិទ្ធិភាពការងាររបស់ខ្លួនឲ្យកាន់តែល្អប្រសើរ ។
ខ្ញុំមានភាពជឿជាក់យ៉ាងមុតមាំថា ទីស្នាក់ការថ្មីនេះនឹងក្លាយជាមជ្ឍមណ្ឌលមួយយ៉ាងសំខាន់សម្រាប់យុវជនរបស់យើងប្រចាំនៅខេត្តតាកែវ ដែលនឹងក្លាយជាកន្លែងប្រមូលផ្តុំ យុវជន បណ្តុះបណ្តាលយុវជន និងឆ្លើយតបទៅនឹងតម្រូវការផ្សេងៗរបស់យុវជនយើង សំដៅធ្វើយ៉ាងណាឲ្យកិត្យានុភាពរបស់ ស.ស.យ.ក ជ្រាបចូលដល់បេះដូងនៃស្រទាប់យុវជនគ្រប់លំដាប់ថ្នាក់ និងគ្រប់និន្នាការ ទាំងនៅក្នុងខេត្តតាកែវ និងបណ្តាខេត្តជុំវិញនេះផងដែរ ។
ឯកឧត្តមបណ្ឌិតសភាចារ្យ ជាទីគោរព!
ឯកឧត្តម លោកជំទាវ លោក លោកស្រី ជាទីគោរពរាប់អាន!
ឆ្លៀតក្នុងឱកាសនេះ បន្ថែមទៅលើរបាយការណ៍ការងាររបស់ឯកឧត្តម សុខ ពុទ្ធិវុធ ប្រធានគណៈកម្មាធិការ ស.ស.យ.ក ខេត្តតាកែវ ខ្ញុំសូមការអនុញ្ញាតរាយការណ៍ជូនអំពីការងារដែលសហភាពសហព័ន្ធយុវជនកម្ពុជាថ្នាក់ជាតិបាន និងកំពុងរៀបចំធ្វើនាពេលកន្លងមក ក្នុងគោលដៅលើកស្ទួយនូវវិស័យសេដ្ឋកិច្ច សង្គម មនុស្សធម៌ វប្បធម៌ និងប្រវត្តិសាស្រ្តរបស់កម្ពុជា ដែលក្នុងនោះរួមមាន ៖
ការរៀបចំការប្រកួតបាល់ទាត់ Soccer League គឺមិនត្រឹមតែបង្កើតឱកាសឲ្យយុវជនរបស់យើងយកចិត្តទុកដាក់លើសុខភាពរបស់ខ្លួន និងជៀសវាងអំពើអបាយមុខតែប៉ុណ្ណោះទេ តែថែមទាំងផ្តល់ឱកាសឲ្យយុវជនស្គាល់គ្នា ពង្រឹងចំណងមិត្តភាព និងស្មារតីសាមគ្គីភាព។
“យុវជន និងទីក្រុងស្អាត” គឺដើម្បីឲ្យយុវជនយកចិត្តទុកដាក់ដល់បរិស្ថានស្អាត និងសោភណភាពទីក្រុង និងទីប្រជុំជនរបស់យើង ដែលអាចបង្កើននូវភាពទាក់ទាញនៃវិស័យទេសចរណ៍។
យុវជន និងសុវត្ថិភាពចរាចរណ៍ផ្លូវគោក គឺរៀបចំឡើងក្នុងគោលបំណងឲ្យយុវជនអាចចូលរួមក្នុងការផ្សព្វផ្សាយ និងទប់ស្កាត់នូវគ្រោះថ្នាក់ចរាចរណ៍ដែលបណ្តាលមកពីការមិនពាក់មួកសុវត្ថិភាព និងការបើកបរក្រោមឥទ្ធិពលនៃគ្រឿងស្រវឹង។
ការចូលរួមជាមួយរាជរដ្ឋាភិបាលកម្ពុជា ជាពិសេសគឺការទទួលបានការអនុញ្ញាតពីឯកឧត្តមបណ្ឌិតសភាចារ្យក្នុងឋានៈជាប្រធានគណៈកម្មាធិការរៀបចំកិច្ចប្រជុំពេញអង្គនេះក្នុងការរៀបចំ “កិច្ចប្រជុំពេញអង្គនៃគណៈកម្មាធិការបេតិកភណ្ឌពិភពលោក”គឺជាការផ្តល់ឱកាសឲ្យយុវជនជំនាន់ក្រោយអាចស្របយកបទពិសោធន៍ជាមន្រ្តីសម្របសម្រួល និងអាចឲ្យពួកគេមានឱកាសបង្ហាញសមត្ថភាពរបស់ខ្លួនលើឆាកអន្តរជាតិ។
ដូចគ្នាផងដែរ ការរៀបចំ “វេទិកាយុវជនអាស៊ី” គឺជាការអនុញ្ញាតឲ្យយុវជនកម្ពុជាអាចចូលរួមលើកស្ទួយកិត្យានុភាពរបស់ប្រទេសជាតិ តាមរយៈការបង្ហាញសក្តានុពលរបស់យុវជនយើងនៅលើឆាកអន្តរជាតិផងដែរ។
ការរៀបចំ “កម្មវិធីប្រគំតន្ត្រីយុវជនក្នុងបុព្វហេតុមាតុភូមិ” អបអរសារទរខួប ៣៥ ឆ្នាំនៃសហភាពសហព័ន្ធយុវជនកម្ពុជា គឺធ្វើឡើងក្នុងការអនុញ្ញាតឲ្យយុវជនជំនាន់ក្រោយចងចាំនូវប្រវត្តិសាស្រ្ត និងចូលរួមទាំងអស់គ្នារំលឹកនូវវីរៈភាពរបស់អតីតយុវជនសម័យ ២ ធ្នូ ១៩៧៨ដោយចូលរួមការពារនូវសមិទ្ធផលដែលសម្រេចបាន និងបន្តអភិវឌ្ឍកម្ពុជា ក្នុងស្មារតីខ្មែរតែមួយ អនាគតតែមួយ ។
បន្ថែមពីសកម្មភាពធំៗដែលបានរៀបរាប់បញ្ជាក់ខាងលើ និងការងារប្រចំាថ្ងៃទាក់ទង នឹងការងារអប់រំ សង្គម វប្បធម៌ សប្បុរធម៌ ដែលមិនអនុញ្ញាតឲ្យរូបខ្ញុំបាទអាចពិព័រណ៌នាឲ្យបានក្បោះក្បាយនាពេលនេះ ខ្ញុំបាទសូមបញ្ជាក់ជូន ឯកឧត្តមបណ្ឌិតសភាចារ្យ ឯកឧត្តម លោកជំទាវ លោក លោកស្រី ទាំងអស់មេត្តាជ្រាបថា សហភាពសហព័ន្ធយុវជនកម្ពុជាកំពុងនឹងរៀបចំកម្មវិធី “អង្គរសង្ក្រាន្ត” ២០១៤ ដែលជាកម្មវិធីដ៏ធំមួយដែលផ្តូចផ្តើមឡើងក្នុងគោលបំណងលើកស្ទួយ និងជំរុញនូវវប្បធម៌ជាតិ។ ព្រឹត្តិការណ៍នេះក៏់ជាឱកាសឲ្យយុវជនស្វែងយល់បន្ថែមអំពីរបាំប្រពៃណីខ្មែរ និងល្បែងប្រជាប្រិយ ដែលអាចធ្វើឲ្យពួកគាត់មានមោទនភាពចំពោះវប្បធម៌ អរិយធម៌ជាតិ ដែលជាកេរមរតកដូនតាបន្សល់ទុកឲ្យ។ បន្ថែមពីលើកត្តាអំណោយផលដែលកម្មវិធីនឹងលើកស្ទួយវិស័យទេសចរណ៍នៅកម្ពុជា“អង្គរសង្ក្រាន្ត" ក៏ជាឱកាសឲ្យយុវជន ក៏ដូចជាប្រជាពលរដ្ឋកម្ពុជាទូទាំងប្រទេសបានចូលរួមអបអរសាទរពិធីបុណ្យចូលឆ្នាំថ្មី ក្នុងនាមជាមហាគ្រួសារខ្មែរតែមួយ និងអនុញ្ញាតឲ្យយើងចូលរួបរួម សាមគ្គី ដើម្បីថែរក្សា និងលើកស្ទួយវប្បធម៌ជាតិបន្ថែមទៀតនៅលើឆាកអន្តរជាតិ។
ឆ្លៀតក្នុងឱកាសនេះខ្ញុំបាទ ក៏សូមគោរពថ្លែងអំណរគុណយ៉ាងជ្រាលជ្រៅចំពោះ ឯកឧត្តមបណ្ឌិតសភាចារ្យ ដែលតែងតែជួយគាំទ្រដល់គ្រប់សកម្មភាពរបស់សហភាពសហព័ន្ធ យុវជនកម្ពុជានាពេលកន្លងមក ជាពិសេស វត្តមានដ៏ថ្លៃថ្លារបស់ ឯកឧត្តមបណ្ឌិតសភាចារ្យ ក្នុងពិធីបើកព្រឹត្តិការណ៍អង្គរសង្រ្កាន្ត ឆ្នាំ ២០១៣ និងការឯកភាពយល់ព្រមជាថ្មីម្តងទៀតក្នុងការចូលរួមជាអធិបតីដ៍ខ្ពង់ខ្ពស់ក្នុងពិធីបើកព្រឹត្តិការណ៍អង្គរសង្រ្កាន្ត ឆ្នាំ២០១៤ នេះគឺជាកត្តារួមចំណែកជាសត្យានុម័តក្នុងការធ្វើឲ្យព្រឹត្តិការណ៍អង្គរសង្រ្កាន្តឆ្នាំ ២០១៤ កាន់តែទទួលបាននូវភាពជោគជ័យ និងអធិកអធមជាងឆ្នាំកន្លងមក។
មុននឹងបញ្ចប់ តាងនាមគណៈកម្មាធិការកណ្តាលសហភាពសហព័ន្ធយុវជនកម្ពុជា យើងខ្ញុំសូមគោរពកោតសរសើរជាថ្មីម្តងទៀតចំពោះសមិទ្ធផលទាំងឡាយរបស់ ស.ស.យ.ក ខេត្តតាកែវនាពេលកន្លងមក ក្រោមការដឹកនាំរបស់ឯកឧត្តម សុខ ពុទ្ធិវុធ ជាពិសេសគឺគំនិតផ្តួចផ្តើមក្នុងការជួសជុលទីស្នាក់ការថ្មីរបស់ខ្លួន ព្រមទាំងការបំពាក់នូវគ្រឿងបរិក្ខារ និងសម្ភារៈចាំបាច់នានាដើម្បីដំណើរការងាររដ្ឋបាលរហូតបានលេចចេញជារូបរាងនាពេលនេះ។ សហភាពសហព័ន្ធយុវជនកម្ពុជាថ្នាក់កណ្តាល គ្មានអ្វីក្រៅពីការគាំទ្រនូវសកម្មភាព និងគំនិតផ្តួចផ្តើមទាំងនេះ និងសូមសំណូមពរដល់ សមាជិក សមាជិកា ទាំងអស់ឲ្យបន្តសកម្មភាពដ៏ថ្លៃថ្លាទាំងអស់នេះ។
ជាការពិតណាស់ សហភាពសហព័ន្ធយុវជនកម្ពុជាមិនអាចនឹងសម្រេចនូវក្តីសង្ឃឹម និងតម្រូវការរបស់យុវជនយើងគ្រប់ចំនុចនោះទេ ប៉ុន្តែក្នុងនាមជាអង្គការ មហាជន ប្រមូល ផ្តុំដោយ មិន ប្រកាន់ នូវ និន្នាការ នយោបាយផ្សេងៗ សហភាពសហព័ន្ធយុវជនកម្ពុជានឹងខិតខំឲ្យអស់លទ្ធភាពរួបរួមជាមហាគ្រួសារធំមួយនៅទូទាំងប្រទេស ដើម្បីចូលរួមចំនែកតាមលទ្ធភាពរបស់ខ្លួន ជាមួយនឹងរាជរដ្ឋាភិបាលកម្ពុជា ក្នុងការលើកស្ទួយ និងផ្តល់ឱកាសឲ្យយុវជនយើង អាចរីកចម្រើន និងមានភាពរឹងមាំ សាកសមជាកម្លាំងបន្តវេនរបស់ប្រទេសជាតិ។ សកម្មភាពរបស់សមាជិក សមាជិកា ស.ស.យ.ក រាជធានីខេត្តទាំងអស់ គួបផ្សំនឹងសកម្មភាពរបស់ស.ស.យ.ក ថ្នាក់កណ្តាល នឹងបង្ហាញជាគម្រូមួយក្នុងនាមជាយុវជនជំនាន់ក្រោយ ក្នុងការទទួលស្គាល់នូវកាតព្វកិច្ចរបស់យើងទាំងអស់គ្នាចំពោះព្រះរាជាណាចក្រកម្ពុជា ក្នុងពេលបច្ចុប្បន្ន ក៏ដូចជាពេលអនាគត។ ឆន្ទៈដ៏មុះមុតទាំងនេះគឺស្តែងឡើងក្នុងស្មារតីតែមួយគត់គឺ យើងទាំងអស់គ្នាជាខ្មែរតែមួយ មានអនាគតមួយរួមគ្នា គឺអនាគតរបស់យើងទាំងអស់គ្នា។
ជាទីបញ្ចប់ខ្ញុំព្រះករុណាខ្ញុំ សូមប្រគេនពរថ្វាយព្រះថេរានុត្ថេរៈគ្រប់ព្រះអង្គ និងសូមគោរពជូនពរចំពោះ ឯកឧត្តមបណ្ឌិតសភាចារ្យ ឯកឧត្តម លោកជំទាវ លោក លោកស្រី សមាជិក សមាជិកាសហភាពសហព័ន្ធយុវជនកម្ពុជាទាំងអស់ជួបប្រទះតែពុទ្ធពរទាំង៤ប្រការ គឺអាយុ វណ្ណៈ សុខៈ និងពលៈកុំបីឃ្លៀងឃ្លាតឡើយ។