សម្តេចតេជោនាយករដ្ឋមន្រ្តី អញ្ជើញទស្សនានិងដាក់កម្រងផ្កា នៅវិមានយុទ្ធជនពលី - ទស្សនាតំបន់ពាណិជ្ជកម្ម និងឧស្សាហកម្ម ក្នុងទីក្រុងដាកា - ទស្សនាវត្តបុរាណក្នុងទីក្រុងដាកា
នៅរសៀលថ្ងៃទី១៦មិថុនា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជា ណាចក្រកម្ពុជា អញ្ជើញទស្សនានិងដាក់កម្រងផ្កា នៅវិមានយុទ្ធជនពលី ក្នុងទីក្រុងដាកា នៃសាធារណរដ្ឋ ប្រជាមានិតបង់ក្លាដែស។ វត្តមាននៃការអញ្ជើញដល់របស់សម្តេចតេជោនាយករដ្ឋមន្រ្តី និងគណៈប្រតិភូ ត្រូវបានទទួលការធ្វើគារវកិច្ចស្វាគមន៍យ៉ាងស្និតស្នាល ពីសំណាក់ឯកឧត្តមរដ្ឋមន្រ្តីទទួលបន្ទុកកិច្ចការសង្រ្គាម ដើម្បីរំដោះជាតិ និងឯកឧត្តមរដ្ឋមន្រ្តីទទួលបន្ទុកកិច្ចការលំនៅដ្ឋាន និងសាធារណការ។ នៅក្នុង អក្សរពណ៌មាសដែលមានអត្ថន័យថា សូមគោរពដឹងគុណយ៉ាងជ្រាលជ្រៅបំផុត ជូនចំពោះយុទ្ធជនបង់ក្លា ដែស ដែលបានបូជាជីវិតក្នុងបុព្វហេតុការពារជាតិមាតុភូមិ សម្តេចអគ្គមហាសេនាបតីតេជោ ហ៊ុន សែន និងឥស្សរជនជាន់ខ្ពស់រាជរដ្ឋាភិបាលកម្ពុជាទាំងអស់ បានលំអោនកាយវាចាចិត្តគោរពដឹងគុណយ៉ាងស្មោះ ស្ម័គ្រ ជូនចំពោះយុទ្ធជនបង់ក្លាដែសគ្រប់រូប ដែលបានបូជាអាយុជីវិតសាច់ស្រស់ឈាមស្រស់ ក្នុងបុព្វហេតុការពារជាតិមាតុភូមិ រហូតរំដោះប្រទេសជាតិទទួលបាននូវឯករាជ្យយ៉ាងពេញលេញ នៅថ្ងៃទី២៦ ខែ មីនាឆ្នាំ១៩៧១។ នៅក្នុងឱកាសដ៏វិសេសវិសាលនោះ សម្តេចអគ្គមហាសេនាបតីតេជោ ហ៊ុន សែន បាន អញ្ជើញចុះហត្ថលេខាលើសៀវភៅក្រាំងមាស ដើម្បីទុកជាអនុស្សាវរីយ៍ជាប្រវត្តិសាស្រ្ត នៅក្នុងវិមានយុទ្ធជនពលី ដូចគ្នានិងបណ្តាថ្នាក់ដឹកនាំពិភពលោកនានា ដែលបានអញ្ជើញមកបំពេញទស្សនកិច្ច និងអញ្ជើញដាក់កម្រងផ្កាគោរពវិញ្ញាណក្ខន្ធ នៅវិមានយុទ្ធជនពលីក្នុងទីក្រុងដាកា នៃសាធារណរដ្ឋប្រជាមានិត បង់ក្លាដែស។ ជាមួយគ្នានេះសម្តេចតេជោនាយករដ្ឋមន្រ្តី ក៏បានអញ្ជើញដាំកូនឈើទុកជាអនុស្សាវរីយ៍នៅ ក្នុងវិមានយុទ្ធជនពលីក្នុងទីក្រុងដាកា នៃសាធារណរដ្ឋប្រជាមានិតបង់ក្លាដែសផងដែរ។
បន្ទាប់មកនៅរសៀលថ្ងៃដដែលនោះដែរ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី
នៃព្រះរាជាណាចក្រកម្ពុជា និងគណៈប្រតិភូជាន់ខ្ពស់រាជរដ្ឋាភិបាលកម្ពុជា អញ្ជើញទស្សនាតំបន់ ពាណិជ្ជកម្ម និងឧស្សាហកម្ម ក្នុងទីក្រុងដាកា។ វត្តមាននៃការអញ្ជើញរបស់សម្តេចតេជោនាយករដ្ឋមន្រ្តី និងគណៈប្រតិភូត្រូវ ត្រូវបានការគារវកិច្ចពីសំណាក់ថ្នាក់ដឹកនាំ និយោជក់ កម្មករ នៃតំបន់ពាណិជ្ជកម្ម និង ឧស្សាហកម្មក្រុងដាកាជាច្រើនរូប។ នៅក្នុងបទឧទ្ទសនាមរបស់ខ្លួន តំណាងថ្នាក់ដឹកនាំតំបន់ពាណិជ្ជកម្ម និងឧស្សាហកម្មកាដាបានឲ្យដឹងថា តំបន់ពាណិជ្ជកម្ម និងឧស្សាហកម្មនេះត្រូវបានឡើងដោយរដ្ឋាភិបាល បង់ក្លាដែរ រហូតមកដល់បច្ចុប្បន្ននេះមានក្រុមហ៊ុនបរទេសជាច្រើន កំពុងបណ្តាក់ទុនវិនិយោគនៅក្នុងតំបន់ ដ៏មានសក្តានុពលនេះ។
សូមបញ្ជាក់ដែរថា សាធារណរដ្ឋប្រជាមានិតបង់ក្លាដែស ស្ថិតនៅក្នុងឧបទ្វីបឥណ្ឌា មានព្រំប្រទល់ ខាងលិច ខាងជើង និងខាងកើតជាប់និងប្រទេសឥណ្ឌា ខាងអាគ្នេយ៍ជាប់និងប្រទេសមីយ៉ាន់ម៉ារ និងខាង ត្បូងជាប់និងឈូងសមុទ្របឹងហ្គាល់ មានផ្ទៃដីទំហំ១៤៧ពាន់៥៧០គីឡូម៉ែត្រការ៉េ និងមានប្រជាជនរស់នៅ សរុបប្រមាណជាង១៥០លាននាក់ក្នុងឆ្នាំ២០១១ ជាប់លំដាប់លេខរៀងទី៨ នៃប្រទេសដែលមានប្រជាជនច្រើនជាងគេ លើពិភពលោក។ សាធារណរដ្ឋប្រជាមានិតបង់ក្លាដែសបានទទួលឯករាជ្យ
ពីសាធារណឥណ្ឌា នៅថ្ងៃទី២៦ខែមីនាឆ្នាំ១៩៧១ និងជាប្រទេសប្រកាន់របបនយោបាយប្រជាធិបតេយ្យអាស្រ័យសភា។ កំណើនផលិតផលក្នុងស្រុកសរុប (GDP)ឆ្នាំ២០១២ មានកំណើន៦,៣២% ក្នុងនោះ GDP សំរាប់មនុស្សម្នាក់មានចំនួន ៧៧២ដុល្លាអាមេរិក។ GDP តាមវិស័យគិតជាភាគរយក្នុងឆ្នាំ២០១៣
វិស័យកសិកម្មមាន១៧,២%
វិស័យឧស្សាហកម្មស្មើនិង២៨,៩%
និងវិស័យសេវាកម្មស្មើនិង ៥៣,៩%។ ការនាំចេញសំខាន់ៗរបស់បង់ក្លាដែសរួមមានសំលៀកបំពាក់ ក្រណាត់ បង្គ ស្បែក តែ សេរ៉ាមិច។ លើទំនាក់ទំនងសេដ្ឋកិច្ច និងពាណិជ្ជកម្មនៃប្រទេសទាំងពីរកម្ពុជា-បង់ក្លាដែស ក្នុងឆ្នាំ២០១១ មានទឹកប្រាក់ទំហំ៦លាន១សែន៤ម៉ឺនដុល្លាអាមេរិក ឆ្នាំ២០១២មានទឹកប្រាក់៨លាន៨សែនដុល្លា និងឆ្នាំ២០១៣ មានទឹកប្រាក់ទំហំ ៥លាន៣សែន៣ម៉ឺន៤ពាន់២៤០ដុល្លាអាមេរិក។ នៅក្នុងកិច្ចសហប្រតិបត្តិការលើកការអភិវឌ្ឍជនបទនិងវិស័យយោធា កម្ពុជាបានបញ្ជូនកងយោធពលខេមរៈភូមិន្ទ ទៅចូលរួមហ្វឹកហ្វឺនទីលានលំហាត់យោធា
សំរាប់គាំទ្រប្រតិបត្តិការសន្តិភាពពហុជាតិសាសន៍ នៅសាធារណរដ្ឋប្រជាមានិតបង់ក្លាដែស ពីថ្ងៃទី៦ដល់ថ្ងៃទី២០ខែមេសាឆ្នាំ២០០៨។ ជាមួយគ្នានេះកាលពីថ្ងៃទី២២ដល់ថ្ងៃទី២៥ខែធ្នូឆ្នាំ២០១០ បង់ក្លាដែសបានបញ្ជូនគណៈប្រតិភូទីស្តីការនាយករដ្ឋមន្រ្តីបង់ក្លាដែស មកធ្វើទស្សនកិច្ចសិក្សានៅកម្ពុជា ដើម្បីស្វែងយល់ពីទស្សនវិស័យនៃការកាត់បន្ថយភាពក្រីក្រ និងការលើកកម្ពស់ជីវភាពរស់នៅរបស់ប្រជាជននៅតំបន់ជនបទ និងជាមួយគ្នានេះពីថ្ងៃទី៣០មិថុនាដល់ថ្ងៃទី៤ កក្កដា ឆ្នាំ២០១៣ បង់ក្លាដែសក៏បានបញ្ជូនគណៈប្រតិភូមកធ្វើទស្សនកិច្ចសិក្សានៅកម្ពុជា ដើម្បីចែករំលែកបទពិសោធន៍ ស្តីពីការកាត់បន្ថយភាពក្រីក្រ លើគំរោងសាងសង់លំនៅដ្ឋានសំរាប់គ្រួសារក្រីក្រ និងគំរោងគ្រប់គ្រងដីធ្លីនៅកម្ពុជា។ សូមបញ្ជាក់ដែរថា គណៈប្រតិភូជាន់ខ្ពស់រាជរដ្ឋាភិបាលកម្ពុជា អញ្ជើញអមដំណើរសម្តេចតេជោនាយករដ្ឋមន្រ្តី អញ្ជើញបំពេញទស្សនកិច្ចផ្លូវការនៅទីក្រុងដាកា សាធារណរដ្ឋប្រជាមានិតបង់ក្លាដែសនៅពេលនេះរួមមាន ឯកឧត្តម ហោ ណាំហុង
ឧបនាយករដ្ឋមន្រ្តី និងជារដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ ឯកឧត្តម អ៊ុក រ៉ាប៊ុន រដ្ឋមន្រ្តីក្រសួងកសិកម្មរុក្ខាប្រមាញ់ និងនេសាទ លោកជំទាវ ភឿង សកុណា រដ្ឋមន្រ្តីក្រសួងវប្បធម៌និងវិចិត្រសិល្បៈ ឯកឧត្តម សុខ ចិន្តាសោភា រដ្ឋមន្រ្តីប្រតិភូអមនាយករដ្ឋមន្រ្តី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា ឯកឧត្តម ស្រីុ ថាមរុង្គ រដ្ឋមន្រ្តីប្រតិភូអមនាយករដ្ឋមន្រ្តី ឯកឧត្តម កៅ គឹមហួន
រដ្ឋមន្រ្តីប្រតិភូអមនាយករដ្ឋមន្រ្តី ឯកឧត្តម ឡុង វិសាលោ រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ លោកជំទាវ យស់ ម៉ាកាណា ឯកអគ្គរាជទូតវិសាមញ និងពេញសមត្ថភាពរបស់ព្រះរាជាណាចក្រកម្ពុជា ប្រចាំសាធារណរដ្ឋប្រជាមានិតបង់ក្លាដែស ព្រមទាំងឯកឧត្តម លោកជំទាវ ជាឥស្សរជនជាន់ខ្ពស់រាជរដ្ឋាភិបាលកម្ពុជា និងគណៈប្រតិភូអមដំណើរជាច្រើនរូបទៀត។
បន្ទាប់មកនៅរសៀលថ្ងៃដដែលនោះដែរ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី
នៃព្រះរាជាណាចក្រកម្ពុជានិងគណៈប្រតិភូជាន់ខ្ពស់ អញ្ជើញថ្វាយបង្គុំព្រះសង្ឃ និងទស្សនាវត្តបុរាណ មានឈ្មោះ Dharmajika ដែលជាវត្តមានវ័យចំណាស់ជាងគេបង្អស់ ក្នុងទីក្រុងដាកា នៃសាធារណរដ្ឋប្រជា មានិតបង់ក្លាដែស។ ព្រះចៅអធិការវត្តមានសង្ឃដិកាថា ទីអារាមនេះមានអាយុកាលដ៏យូរយង់ណាស់មក ហើយ ពោលគឺក្រោយពីទទួលបានឯករាជ្យមកថ្នាក់ដឹកនាំបង់ក្លាដែរ ក្នុងនោះរួមទាំងលោកជំទាវនាយករដ្ឋ មន្រ្តី ហ្សេក ហាស៊ីណាផងនោះ បានរួមចំណែកផ្តល់នូវថវិកាជាច្រើនក្នុងការកសាងទីអារាមនេះឡើងវិញ ជាមួយគ្នានេះ ទីអារាមនេះទទួលបាននូវការជួយឧបត្ថម្ភគាំទ្រទាំងស្មារតី និងសម្ភារៈពីសំណាក់រដ្ឋាភិបាល ឥណ្ឌា ក្នុងការជួយកសាងឡើងវិញ។ ព្រះគ្រួចៅអធិការមានសង្ឃដិកាដែរថា មកដល់បច្ចុប្បន្នទីអារាមនេះ មានព្រះសង្ឃគង់ប្រថាប់សិក្សារៀនសូត្រចំនួនជាង៦៧០អង្គ ដែលជាព្រះសង្ឃក្រីក្រ រួមទាំងកុមារកំព្រាក្រី ក្រជាច្រើននាក់ផងដែរ។ ព្រះគ្រួចៅអធិការមានសង្ឃដិកាសំដែងនូវការធ្វើគារវកិច្ចស្វាគមន៍យ៉ាងកក់ក្តៅ បំផុតចំពោះវត្តមានដ៏ឧត្តុង្គឧត្តមរបស់សម្តេចតេជោនាយករដ្ឋមន្រ្តី និងគណៈប្រតិភូទាំងអស់ ដែលបានចំណាយពេលវេលាដ៏មានតំលៃអញ្ជើញមកទស្សនាទីអារាមដ៏មានវ័យចំណាស់នេះ។ ព្រះគ្រួចៅអធិការមានសង្ឃដិការបន្តថា វត្តមានដ៏ថ្លៃថ្លាបំផុតរបស់សម្តេចតេជោនៅពេលនេះ គឺមិនគ្រាន់តែដើម្បីរិតចំណង ក្នុងផ្នែករដ្ឋាភិបាលប៉ុណ្ណោះទេ ប៉ុន្តែបានរួមចំណែកយ៉ាងធំធេងក្នុងការជំរុញទំនាក់ទំនងខាងផ្នែកសាសនា ជាមួយនិងព្រះសង្ឃគង់នៅទីក្រុងដាកាផងដែរ។ ព្រះគ្រូចៅអធិការមានសង្ឃដិការជំរាបជូនសម្តេចតេជោ នាយករដ្ឋមន្រ្តីផងដែរថា កាលពីពេលកន្លងទៅព្រះអង្គបាននិមន្តទៅកាន់ប្រទេសវៀតណាម ប៉ុន្តែនៅពេល ខាងមុខព្រះអង្គនិងនិមន្តទៅកាន់ប្រទេសកម្ពុជា ដែលជាប្រទេសមួយមានការគោរពប្រតិបត្តិយ៉ាងខ្លាំង ចំពោះព្រពុទ្ធសាសនា ដែលជាព្រះបរមគ្រូនៃយើង។ សូមបញ្ជាក់ដែរថា សាធារណរដ្ឋប្រជាមានិតបង់ក្លាដែស
ប្រជាពលរដ្ឋមានជំនឿសាសនាគោរពប្រតិ បត្តិទៅលើសាសនាចំនួន៤ផ្សេងគ្នា គឺសាសនាអីុស្លាម ហិនឌូ ព្រះពុទ្ធ និងសាសនាគ្រឹៈ។ សម្តេចតេជោនាយករដ្ឋមន្រ្តីមានប្រសាសន៍ទូលព្រះគ្រូចៅអធិការ និង មន្រ្តីសង្ឃក៏ដូចជាថ្នាក់ដឹកនាំសាសនានៃទីក្រុងដាកាថា សម្តេចមានការសប្បាយរីករាយខ្លាំងណាស់ដោយ បានអញ្ជើញមកទស្សនាទីអារាមដ៏មានវ័យចំណាស់បុរាណនេះ។ ជាមួយនិងការអញ្ជើញមកទស្សនានេះ សម្តេចសូមនូវការវាយតំលៃខ្ពស់ និងកោតសរសើរចំពោះថ្នាក់ដឹកនាំបង់ក្លាដែស ពិសេសព្រះគ្រូចៅអធិការ និងមន្រ្តីសង្ឃគ្រប់អង្គ ដែលបានខិតខំថែរក្សានិងអភិរក្សទីគោរពសក្ការៈនេះ ដើម្បីទុកឲ្យមនុស្សជំនាន់ក្រោយបានសិក្សាស្វែងយល់ ពិសេសជាទីអារាមមួយដែលមានប្រវត្តិដ៏យូរលង់របស់ប្រទេសបង់ក្លាដែស។ នៅក្នុងឱកាសនៃការអញ្ជើញទស្សនាទីអារាមជាទីគោរពសក្ការៈនោះ សម្តេចតេជោនាយករដ្ឋមន្រ្តីបានប្រគេននូវបច្ច័យចំនួន ១ម៉ឺនដុល្លាអាមេរិក ដល់ព្រះគ្រូចៅអធិការដើម្បីទុកកសាងសមិទ្ធផលនានា ក្នុងទីអារាមជាទីគោរពសក្ការៈនោះ។ ព្រះគ្រូចៅអធិការមានសង្ឃដិកាសំដែងនូវហឬទ័យរីរាយបំផុត ជូនចំពោះសម្តេចតេជោនាយករដ្ឋមន្រ្តី ដែលជាថ្នាក់ដឹកនាំជាទីគោរពស្រឡាញ់របស់ប្រជាជនកម្ពុជា និងប្រជាជនបង់ ក្លាដែស ដែលបានឧបត្ថម្ភនូវថវិកាដ៏មានតំលៃបំផុត ក្នុងការជួយកសាងសមិទ្ធផលក្នុងទីអារាមនេះបន្តទៀត។ ក្នុងនាមព្រះសង្ឃក្នុងទីអារាមជាទីសក្ការៈនេះ ព្រះអង្គបានបូងសួងដល់វត្ថុសិក្តិសិទ្ធក្នុងទីអារាមវត្ត Dharmajika តាមជួយបីបាច់ថែរក្សាការពារសម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិ ព្រឹទ្ធបណ្ឌិត ប៊ុន រ៉ានី ហ៊ុនសែន សូមជួបប្រទះតែពុទ្ធពរបួនប្រការដើម្បីបន្តស្ថិតនៅជាអ្នកដឹកនាំដ៏ឆ្នើមសំរាប់ប្រជាជនកម្ពុជា និងនិយាយដោយឡែកសំរាប់ចំណង់សាមគ្គីភាពនិងកិច្ចសហប្រតិបត្តិការដ៏យូរអង្វែង សំរាប់ថ្នាក់ដឹកនាំនិងប្រជាជនបង់ក្លាដែរ ក៏ដូចជាការគោរពស្រឡាញ់ដោយស្មោះស្ម័គ្របំផុត សំរាប់ ព្រះសង្ឃទាំងអស់ ដែលគង់ប្រថាប់នៅសាធារណរដ្ឋប្រជាមានិតបង់ក្លាដែស។