បទសម្ភាសន៍លោកបណ្ឌិត ឈឹម ផលវរុណ ប្រធានវិទ្យាស្ថានពលរដ្ឋវិជ្ជា ជាមួយលោក សត្យា រក្ស ទូរទស្សន៍បាយ័ន ស្តីពី ចរឹតនយោបាយក្អេងក្អាង របស់គណបក្សប្រឆាំង
ថ្ងៃទី ០៦ ខែសីហា ឆ្នាំ២០១២
លោក សត្យា រក្ស
សំណួរ៖ បន្ទាប់ពីគណបក្សប្រឆាំងនៅកម្ពុជា បង្កើតព្រឹត្តិការណ៍មួយ គឺចលនាប្រជាធិបតេយ្យដើម្បីសង្រ្គោះជាតិរបស់គេនោះយើងឃើញថា ពួកគណបក្សប្រឆាំងនេះ គឺតែងតែយកឈ្មោះចលនានេះដើម្បីលើកតម្កើងខ្លួនហើយបន្តុះបង្អាប់អ្នកដទៃ។តើចរឹតអ្នកនយោបាយបែបនេះ លោកបណ្ឌិតយល់ឃើញយ៉ាងណា សូមជួយបំភ្លឺជូនជនរួមជាតិរបស់យើង?
លោកបណ្ឌិត ឈឹម ផលវរុណ
ចម្លើយ៖ ដូចបងប្អូនប្រជាពលរដ្ឋបានស្វែងយល់ជាច្រើនហើយថាគណបក្សប្រឆាំង នៅកម្ពុជានេះពុំមែនជាគណបក្សប្រឆាំង ដែលមានឥរិយាបថប្រជាធិបតេយ្យដូចគណបក្សប្រឆាំងនៅបណ្តាប្រទេសនានានៅលើសកលលោកនេះទេ។ ប៉ុន្តែគឺមានលក្ខណៈសម្បត្តិជាគណបក្សបង្ករឿង
ដោយគ្មានមូលដ្ឋាននយោបាយក្នុងការធ្វើនយោបាយប្រកួតប្រជែងជាមួយនឹងគណបក្សដទៃទេ ជាពិសេសជាមួយគណបក្សគ្រប់គ្រងរដ្ឋាភិបាលនៅកម្ពុជាយើងនេះ។ យើងឃើញថា ទាំងគណបក្សសម រង្ស៊ី ទាំងគណបក្ស កឹម សុខា
គេគ្មានគោលនយោបាយ និងកម្មវិធីនយោបាយទេ។ ហើយដោយសារតែគេគ្មានគំនិត គ្មានទស្សនៈវិស័យនយោបាយហ្នឹងហើយ បានជាគេធ្វើនយោបាយគ្រាន់តែបន្លឺសម្លេង ហើយនិងធ្វើនយោបាយគ្រាន់តែដាក់ឈ្មោះឲ្យពិរោះ ហើយរបៀបនយោបាយរបស់គេហ្នឹង គឺជារបៀបនយោបាយទូងៗដូចស្គរ ហើយស្គរដែលគេវាយឲ្យលាន់ឮសម្លេងទូងៗហ្នឹង គឺមានតែពីរចរឹតទេ។ ចរឹតទីមួយ យកស្គរទូងឲ្យឮ ដើម្បីពញ្ញាក់ស្មារតីប្រជាពលរដ្ឋ ញុះញង់អុចអាលប្រជាពលរដ្ឋឲ្យចងកំហឹងវណ្ណៈក្នុងសង្គម រវាងអ្នកមាន និងអ្នកក្រ គឺគេគោះឲ្យមានកំហិង។ នយោបាយមួយទៀត គឺគេគោះឲ្យមានកំហឹងជាតិនិយមរវាងកម្ពុជា និងបណ្តាប្រទេសជិតខាង ជាពិសេសវៀតណាម។ អញ្ចឹងការបញ្ឆេះកំហឹងទាំងពីរ ទាំងក្នុងប្រទេស និងក្រៅប្រទេសនេះ គឺគេពុំអាចមានគំនិតជាការតាក់តែង ដើម្បីអភិវឌ្ឍសង្គមជាតិ ឬក៏សម្រាប់អធិបតេយ្យភាព បូរណភាពទឹកដីទេ។ ប៉ុន្តែគេចូលចិត្តប្រើពាក្យស្នេហាជាតិ ពាក្យអ្នកប្រជាធិបតេ្យរួបរួមគ្នាហ្នឹងឯង។ ប៉ុន្តែការពិតចរឹតលក្ខណៈ សារជាតិរបស់ពួកគេនេះមិនអាចរួមគ្នាបានទេ។ ដោយសារដូចអ្វីដែលបានបញ្ជាក់អំម្បាមិញ គឺដោយសារពួកគេគ្មានឆន្ទៈជាតិ គ្មានឆន្ទៈប្រជាធិបតេយ្យ គ្មានឆន្ទៈអភិវឌ្ឍសង្គមទេ ហើយនិងគ្មានឆន្ទៈ និងសមត្ថភាពចូលរួម គ្រប់ចលនានយោបាយ
និន្នាការនយោបាយក្នុងការអភិវឌ្ឍសង្គមជាតិទេ។
គេមានតែសមត្ថភាពនៃការស្រែកបន្តុះបង្អាប់ហើយបង្ករឿង សូម្បីតែសមត្ថភាពនៃការរួបរួមគ្នាហ្នឹងក៏គ្មានផង កុំនិយាយដល់ទូទាំងប្រទេស។ នេះហើយគឺជាចំណុចខ្សោយរបស់គណបក្ស សម រង្ស៊ី និង គណបក្ស កឹម សុខា។ បើយើងគិតពីបរាជ័យភាព របស់គណបក្សទាំងពីរនេះ ក្នុងការរួបរួមគ្នាហ្នឹង
វាពីរដងហើយ ហើយឥលូវនេះ យើងឃើញថាជាលើកទីបី ដែលយើងកំពុងតែឃើញសញ្ញានៃការប្រេះស្រាំហ្នឹង កំពុងតែកើតមានជាបន្តបន្ទាប់ ថ្វីត្បិតតែពួកគេបំពងសម្លេង ដើម្បី បិតបាំងនូវការបែកបាក់ផ្ទៃក្នុងរបស់គេយ៉ាងណាក្តី។
លោក សត្យា រក្ស
សំណួរ៖សូមលោកបណ្ឌិតជួយបញ្ជាក់អំពីចរឹតរបស់គណបក្សប្រឆាំងនៅកម្ពុជា និងចរឹតគណបក្សប្រឆាំងនៅបណ្តាប្រទេសប្រជាធិបតេយ្យ។យើងឃើញថា ដូចជានៅសហរដ្ឋអាមេរិក ក៏គេមានគណបក្សប្រឆាំងហើយ និងគណបក្សកាន់អំណាចដូចគ្នាដែរ ក៏ប៉ុន្តែជាទូទៅយើងឃើញថាគណបក្សទាំងពីរនៅសហរដ្ឋអាមេរិកនេះមានការបណ្តំ បន្សងគ្នា។ ជួនកាលគណបក្សប្រឆាំងឡើងដឹកនាំប្រទេស ហើយគណបក្សដែលដឹកនាំប្រទេសហ្នឹង
គឺក្លាយជាគណបក្សប្រឆាំងវិញ។ បើយើងធៀបមកកម្ពុជាយើងឃើញថា គណបក្សប្រឆាំងនៅកម្ពុជានេះ គឺបានតស៊ូមតិអស់រយៈពេល បី បួន អាណត្តិមកហើយ យើងឃើញថា បែរទៅជាគណបក្សប្រឆាំងហ្នឹងកាន់តែថយចុះនូវសម្លេងគាំទ្រ។ តើភាពខុសគ្នានេះ បណ្តាលមកពីមូលហេតុអ្វីដែរទៅ?
លោកបណ្ឌិត ឈឹម ផលវរុណ
ចម្លើយ៖ ទីមួយ ស្ថានភាពនៅកម្ពុជា ហើយនិងសមត្ថភាពនយោបាយរបស់គណបក្សប្រឆាំងនៅកម្ពុជា
គឺប្រជាពលរដ្ឋមិនទទួលយកឲ្យគណបក្សប្រឆាំងមកកាន់អំណាចទេ។ ខុសគ្នានឹងគណបក្សប្រឆាំងនៅបណ្តាប្រទេសនានា។ ខុសគ្នានៅត្រង់ថា គណបក្សប្រឆាំងនៅអាមេរិក
គណបក្សប្រឆាំងនៅអាល្លឺម៉ង់ នៅបារាំង។ ឧទាហរណ៍ដូចនៅ អាមេរិកបច្ចុប្បន្ននេះគណបក្សប្រឆាំងនេះគឺ គណបក្សសាធារណរដ្ឋ
ហើយនៅបារាំង នៅអាល្លឺម៉ង់ គណបក្សផ្សេងអីចឹងទៅ។ ឯនៅកម្ពុជា គណបក្សប្រឆាំងគឺ សម រង្ស៊ី កឹម សុខា ។ប៉ុន្តែខុសគ្នានៅត្រង់ថា បើយើងចង់ទៅរកគោលនយោបាយ និងកម្មវិធីនយោបាយរបស់គណបក្សសាធារណរដ្ឋ
នៅអាមេរិក យើងចង់រកពេលណាក៏បានដែរ
គេមានកម្មវិធីនយោបាយរបស់គេច្បាស់លាស់ណាស់។ តែងាកមកគណបក្សសម រង្ស៊ី និងគណបក្ស កឹម សុខា ទៅរកមើលគឺគ្មានមួយសន្លឹកទេ។ តែបើស្តាប់សម្លេង គឺសម្បូរវិញ ហើយសម្លេងនោះគឺដឹងតែពីសម្លេងជេរ។ ត្រង់នេះហើយដែលជាការខុសគ្នា គឺវាខុសគ្នាត្រង់ចរឹតនយោបាយហ្នឹងឯង គឺខុសគ្នាដូចមេឃនិងដីហើយសមត្ថភាពនយោបាយហ្នឹង
វាអត់មាននិយាយពីកម្មវិធីនយោបាយរបស់ខ្លួនទេ សូម្បីតែការងារ
គណបក្សប្រឆាំង ខ្ញុំលើកនៅអាមេរិកទៅចុះ កុំថា អាល្លឺម៉ង់ បារាំង ក្រែងគេមិនចូលចិត្តអឺរ៉ុប។ ឥឡូវនៅអាមេរិក ព្រោះគេមួយម៉ាត់ណាក៏អាមេរិកដែរ។ បើយើងមើលសមាជិករដ្ឋសភា សមាជិកព្រឹទ្ធសភា
របស់គណបក្សសាធារណរដ្ឋ ដែលជាគណបក្សប្រឆាំងហ្នឹង សួរថា តើគេទំនេរដូចពួកគណបក្សប្រឆាំងនៅកម្ពុជាឬទេ? គេទៅធ្វើនយោបាយអាវ៉ាសែឬទេ? គឺគេធ្វើការសភា
ហើយការងារសភារបស់គេមានពីរប្រភេទ គឺការងារសភាក្នុងក្របខណ្ឌជាព្រឹទ្ធសភា និងការងារសភាក្នុងក្របខណ្ឌជាសភាតំណាងរាស្ត្រ។ ហើយការងារគេរវល់ណាស់
គេគ្មានពេលធ្វើនយោបាយអាឡិអាឡក់អាវ៉ាសែ និងគ្មានពេលទៅស្រែករញ៉េរញ៉ៃនៅក្នុងប្រព័ន្ធផ្សព្វផ្សាយទេ ព្រោះគេតាក់តែងគំនិត
គេធ្វើទំនាក់ទំនងជាមួយប្រជាពលរដ្ឋ។ ឯ កឹម សុខា វិញទំនាក់ទំនងដែរ តែទំនាក់ទំនងទៅញុះញង់គេឲ្យធ្វើនយោបាយអាវ៉ាសែ។ ពួកគេទៅជួបប្រជាពលរដ្ឋហ្នឹង គឺមិនមែននិយាយអំពីកិច្ចការសភាដែលគណបក្សគេធ្វើទេ គឺគេទៅញុះញង់ប្រជាពលរដ្ឋឲ្យស្រែកអាឡេអាឡូ ដើម្បីយកមកផ្សាយនៅវិទ្យុ។
ឯ
សម រង្ស៊ី វិញការងារសភាអត់ធ្វើទេ គិតតែពីរកវិធីយ៉ាងណា វាយប្រហាររដ្ឋាភិបាល ហើយជួនកាល គ្រាន់តែពិធីបុណ្យកឋិន ឬក៏ធ្វើស្អី ខ្លួនក៏បង្កើតរឿងទៅ។ ទាំង សម រង្ស៊ី ទាំង កឹម សុខា បើទ្រឹស្តីរូបវិទ្យាគេហៅថា
អុបទិច បំភ័ន្តភ្នែក បើនយោបាយគេហៅថា ធ្វើនយោបាយបំភ័ន្តប្រជាពលរដ្ឋ។ នយោបាយបំភ័ន្តហ្នឹង គឺគេចង់បំភ័ន្តឲ្យយើងមើលឃើញថាពួកគេប្រឆាំងស្រួចស្រាវ។ ប៉ុន្តែនៅក្នុងប្រជាធិបតេយ្យ ពាក្យប្រឆាំងគេមិនមែនធ្វើដូច
កឹម សុខា និង សម រង្ស៊ី ទេ។ ប្រឆាំងក្នុងន័យប្រជាធិបតេយ្យ បានន័យថា គេគិត គេគូ ថាតើគណបក្សគេមានគោលគំនិតអីខ្លះ? ចំពោះបរិបទនានាក្នុងវិស័យសង្គម ហើយគេអាចយកទៅពិនិត្យហេតុអ្វីបានជានៅក្នុងសង្គមមានបញ្ហា?។ ខ្ញុំលើកឧទាហរណ៍នៅអាមេរិក ហេតុអីបានជាគណបក្សសាធារណរដ្ឋ គណបក្សប្រជាធិបតេយ្យ នយោបាយការបរទេសរបស់គេខុសគ្នា។គឺ ដោយសារនយោបាយពីរហ្នឹង វាមានគោលជំហរខុសគ្នា គឹឥទ្ធិពលអាមេរិកជាមហាអំណាចតាមបែបសាធារណរដ្ឋផ្សេង
តាមបែបគណបក្សប្រជាធិបតេយ្យផ្សឹង។ ប៉ុន្តែពីរហ្នឹង អត់យកគ្នាជាសត្រូវនោះទេ គ្រាន់តែគេបង្ហាញថា
នយោបាយការបរទេស ដើម្បីលើកស្ទួយឥទ្ធិពលប្រទេសមហាអំណាច ដោយក្នុងនយោបាយបច្ចុប្បន្ន ខាងសាធារណរដ្ឋចង់ធ្វើអញ្ចេះ
ពួកប្រជាធិបតេយ្យចង់ធ្វើអញ្ចុះ។ ចំណែក សម រង្ស៊ី កឹម សុខា អត់ទេ មានតែថា រដ្ឋាភិបាលធ្វើខុស គណបក្សប្រជាជនធ្វើខុស។ ចំណែកខ្លួនឯងដែលថាខ្លួនត្រូវ ឬក៏មានតែគំនិតហ្នឹង តើគំនិតអី? គឺអត់មាន។ ដើម្បីដោះស្រាយបញ្ហាសង្គម ឧទាហរណ៍បញ្ហាដីធ្លី គណបក្សប្រជាជនគេមានគោលនយោបាយ រដ្ឋាភិបាលគេមានវិធានជាក់ស្តែងផ្សេងៗទៀត ដើម្បីអនុវត្តឲ្យត្រូវនឹងកំរិតជាក់ស្តែងដែលកើតមាន។ចំណែក សម រង្ស៊ី អត់ទេ គឺគាត់បញ្ជូនលោកប្រុស លោកស្រីទៅធ្វើតួឯកនៅកន្លែងមានរឿងទំនាស់ដីធ្លីទៅវិញ។ សួរថា បើសិនជាអ្នកឯងវិញ
ទំនាស់ដីធ្លីនៅទីណាមួយ អ្នកធ្វើយ៉ាងម៉េច? ឥលូវយើងនិយាយអំពីបឹងកក់ អ្នកនឹងយករឿងនេះទៅជជែកក្នុងសភាដោយវិធីណា? គឺអត់ទេ។ គេអត់ប្រើសភាក្នុងការងារសភាទេ គេយកលុយសភាយកមកធ្វើអីផ្សេង ដោយប្រើប្រព័ន្ធផ្សព្វផ្សាយ។ ឧទាហរណ៍ប្រព័ន្ធផ្សព្វផ្សាយណា ដែលបម្រើឲ្យឆន្ទៈនៃការញុះញង់ អុចអាលគឺគេបំពងសម្លេងយកតែម្តង។ នេះមិនមែនជានយោបាយទេ រឿងបែបនេះកូនក្មេងក៏វាចេះធ្វើដែរ គឺនៅពេលដែលវាឈ្លោះគ្នាវាអុចអាល វាប្រាប់ម៉ែវា ថាអានេះអាក្រក់ អានោះអាក្រក់។ អញ្ចឹងមាយាទរបស់គណបក្សប្រឆាំង គឺជានយោបាយកូនក្មេងអាឡិកអាឡក់ ដែលគ្មានសមត្ថភាព។
តាមធម្មតា គណបក្សប្រឆាំង គឺគេត្រូវរវល់ច្រើនជាងគណបក្សដឹកនាំរដ្ឋាភិបាល
ដោយសារអ្វី? គឺគណបក្សប្រឆាំងរវល់នឹងការគិត ដើម្បីតាក់តែងនូវគំនិតរីឯគណបក្សដឹកនាំរដ្ឋាភិបាល គេរវល់មួយបែបផ្សេង គឺរវល់អំពីការប្រតិបត្តិ
ពីព្រោះគេចង់ដឹងថាតើការប្រតិបត្តិហ្នឹង គេអាចធ្វើឲ្យបានសម្រេចប៉ុន្មានភាគរយ? រំកិលទៅរកអតិបរិមាយ៉ាងណា? ហើយគេរវល់នឹងពិនិត្យមើល
តើវាមានភាពអសកម្ម នៅក្នុងរចនាសម្ព័ន្ធប្រតិបត្តិរបស់រដ្ឋាភិបាលអ្វីខ្លះ? នេះជាការរវល់របស់រដ្ឋាភិបាល
និងគណបក្សដឹកនាំរដ្ឋាភិបាល ពីព្រោះរវាងគណបក្សដឹកនាំរដ្ឋាភិបាល និងរដ្ឋាភិបាលផ្ទាល់គឺមានទំនាក់ទំនងគ្នា។
ជាទូទៅនៅបណ្តាប្រទេសណាក៏ដោយគេអត់រវល់នឹងការប្រតិបត្តិទេ ប៉ុន្តែគេត្រូវរវល់ក្នុងការស្វែងយល់អំពីបរិបទសង្គមដែលកើតមានដើម្បីគេយកមូលដ្ឋាននៃបញ្ហានោះ យកមកសិក្សាបង្កើតបានជាគោលគំនិតនយោបាយរបស់គេ ទៅតតាំងជាមួយគោលគំនិតនយោបាយគណបក្សដឹកនាំរដ្ឋាភិបាល។ ប៉ុន្តែយើងមើលតំណាងរាស្ត្រគណបក្សប្រឆាំងសព្វថ្ងៃហ្នឹងគឺអត់មានធ្វើអ្វីទេ។ តំណាងរាស្ត្ររបស់ សម រង្ស៊ី
មាន ២៦ នាក់ ក្នុង ២៦ នាក់ ហ្នឹង តើមានបែងចែកតំណាងរាស្ត្រណា ត្រូវយកចិត្តទុកដាក់លើការងារនយោបាយផ្សេងៗឬទេគឺអត់មានទេ ឧទាហរណ៍នយោបាយកសិកម្ម ឬតំណាងរាស្ត្រម្នាក់ទៀត ត្រូវយកចិត្តទុកដាក់ទៅនឹងនយោបាយសន្តិសុខជាតិ ឬអ្នកតំណាងរាស្ត្រម្នាក់ទៀត ត្រូវយកចិត្តទុកដាក់ ឬ ទទួលបន្ទុកនយោបាយឧស្សាហកម្ម និងថាមពល ឬអ្នកតំណាងរាស្ត្រម្នាក់ទៀត ត្រូវយកចិត្តទុកដាក់ ចំពោះនយោបាយសេដ្ឋកិច្ច ឬមួយទៀត នយោបាយពាណិជ្ជកម្ម ។ល។គឺអត់មានទេ។ អញ្ចឹង ២៦ នាក់ហ្នឹង វាត្រូវតែបែងចែកឲ្យមានការទទួលខុសត្រូវ តែគណបក្ស សម រង្ស៊ី ដែលមានអសនៈ ២៦ គ្មានបែងចែកការងារទេ។ ដូច្នេះហើយ តើមានសមត្ថភាពឯណា ទៅថាក្រសួងកសិកម្មធ្វើអត់ត្រូវ មានសមត្ថភាពឯណាទៅថា ក្រសួងដែនដីនគររូបនីយកម្មធ្វើអត់ត្រូវ មានសមត្ថភាពឯណាទៅចាត់ទុកថា
ក្រសួងហិរញ្ញវត្ថុអនុវត្តអត់សមស្រប វាអត់ ពីព្រោះខ្លួនឯង អត់មានការងារនយោបាយជាក់លាក់ដើម្បីធ្វើទេ អញ្ចឹងមានតែស្រែកទៅ ស្រែកតាមប្រជាពលរដ្ឋ តាមតៀមកាហ្វេហ្នឹងទៅ។ ឮប្រជាពលរដ្ឋនិយាយយ៉ាងម៉េច ឬ ឮវិទ្យុណាគេនិយាយយ៉ាងម៉េចខ្លួនឯងស្រែកបន្ទរតាម ហើយចុងក្រោយថា រដ្ឋាភិបាលអាក្រក់អញ្ចេះ អាក្រក់អញ្ចុះ
តែខ្លួនឯងអត់ឃើញធ្វើអីទាំងអស់។ ខ្ញុំធ្លាប់ឃើញតំណាងរាស្ត្រគណបក្សប្រឆាំង នៅបណ្តាប្រទេសដទៃទៀត គេរវល់ណាស់
ហើយតំណាងរាស្ត្រគណបក្សប្រឆាំងយើងនេះ មានពេលធ្វើនយោបាយអាវ៉ាសែ ដូចបននយោបាយរបស់ កឹម សុខា ៣ នាក់
ដែលធ្វើជាតំណាងរាស្ត្រ គឺធ្វើនយោបាយអាវ៉ាសែ តែម្តង។ សូម្បីតែភាសានិយាយ គួរតែហៅពួកនេះថាជាអ្នកនយោបាយ យូកូង ពីព្រោះបើភាសានិយាយរបស់ពួកគាត់គឺយូកូងសុទ្ធតែម្តង។
យើងមើលបននយោបាយម្នាក់របស់
កឹម សុខា មកពីអាមេរិក គឺបែបយូកូងមកពីអាមេរិកទៅ បននយោបាយម្នាក់ទៀតមកពីបារាំង គឺបែបយូកូងមកពីបារាំងទៅ តែរបស់ល្អនៅអាមេរិក របស់ល្អនៅបារាំង ពួកគេអត់នាំយកមកទេ។ នៅទីនោះគឺមានចំណុចល្អរបស់គេចំណុចត្រឹមត្រូវរបស់គេ តែវាអភ័ព្វត្រង់បននយោបាយរបស់ កឹម សុខា
យកភាពយូកូងនៅអឺរ៉ុប យកមកដាក់នៅកម្ពុជា។ ឯបននយោបាយ កឹម សុខា ម្នាក់ទៀតនៅអាមេរិក ធ្វើរបៀបយូកូងនៅអាមេរិកតែម្តង។ ពួកគេមិនព្រមយកគំរូដែលល្អនៅអាមេរិក គំរូដែលល្អនៅបារាំងមកទេ គឺមានតែមកភូត បោកប្រាស់ប្រជាពលរដ្ឋទៅវិញ។
លោក សត្យា រក្ស
សំណួរ៖ បននយោបាយរបស់ សម រង្ស៊ី និងបននយោបាយរបស់
កឹម សុខា បានអះអាងថា ការដែលរដ្ឋាភិបាលមិនអនុញ្ញាត្តិឲ្យ សម
រង្ស៊ី ចូលស្រុក ដើម្បីចូលរួមប្រកួតប្រជែងការបោះឆ្នោតឆ្នាំ២០១៣ គឺដោយសារតែ សម្តេចអគ្គមហាសេនាបតីតេជោ ហ៊ុន សែន ខ្លាចប្រជាប្រិយភាពរបស់ លោក សម រង្ស៊ី ។ ជុំវិញការអះអាងនេះ សម្រាប់លោកបណ្ឌិត តើលោកយល់ឃើញយ៉ាងម៉េច?
លោកបណ្ឌិត ឈឹម ផលវរុណ
ចម្លើយ៖ ទាំងនេះគឺជានយោបាយបំភ័ន្តភ្នែកប្រជាពលរដ្ឋ ដើម្បីកុំឲ្យប្រជាពលរដ្ឋមើលឃើញការពិត។ រឿងពិតរបស់លោក សម រង្ស៊ី គឺមិនមែនជារឿងនយោបាយ ហើយក៏មិនមែនជារឿងជាតិនិយមនោះទេ។ រឿងដែលលោក សម រង្ស៊ីទៅដកតម្រុយបង្គោលព្រំដែន គឺជារឿងរបស់គាត់ ដែលចង់ទាញប្រជាប្រិយភាពនយោបាយសម្រាប់បក្សរបស់គាត់ និងសម្រាប់ខ្លួនគាត់ផ្ទាល់ គឺមិនមែនជារឿងនយោបាយរបស់ប្រទេសជាតិទេ។ដូច្នេះទង្វើរបស់លោក សម រង្ស៊ី ត្រូវជួបនូវការទទួលខុសត្រូវចំពោះមុខច្បាប់។ ហើយការទទួលខុសត្រូវនេះមិនមែនសំដៅទៅលើសំណងរដ្ឋប្បវេណីចំពោះបង្គោលដែលគេដាំ ហើយត្រូវគាត់ដកចេញនោះទេ ព្រោះនៅក្នុងរូបភាពជាមេដឹកនាំនយោបាយម្នាក់ ដែលធ្វើនយោបាយអាវ៉ាសែ របៀបនេះ គឺជះឥទ្ធិពលដល់ប្រជាពលរដ្ឋដ៏ទៃទៀត និងបង្កចលាចល និងគំរូអាក្រក់ដល់អ្នកផ្សេង។ បើ សម រង្ស៊ី អាចដកបាន អញ្ចឹងនរណាក៏អាចដកបានដែរ។ ដូចនេះ គឺវាមិនមែនជារឿងនៃតម្លៃបង្គោលនោះទេ តែវាជារឿងនៃវិធានដោះស្រាយនយោបាយក្នុងការធានាការពារអធិបតេយ្យភាព និងការកំណត់ខ្សែរបន្ទាត់ព្រំដែន។ ក្នុងតួនាទី សម រង្ស៊ី ជាតំណាងរាស្ត្រ គឺនៅពេលដែលគាត់ទៅឃើញទិដ្ឋភាពជាក់ស្តែង គាត់អាចយកបញ្ហានេះមកបំភ្លឺនៅរដ្ឋសភា ដើម្បីជជែកជាមួយរដ្ឋាភិបាលពាក់ព័ន្ធក្នុងរឿងព្រំដែន ដើម្បីបំភ្លឺ។ប៉ុន្តែ គាត់អត់ព្រមធ្វើ អញ្ចឹងការដែលគាត់ប្រព្រឹត្តិកន្លងមកនោះ គឺមិនមែនជានយោបាយដើម្បីជាតិទេ
តែជារឿងនយោបាយរបស់គាត់ ហើយគាត់បានប្រព្រឹត្តិល្មើសនឹងច្បាប់ ដូច្នេះគាត់ត្រូវទទួលខុសត្រូវ។
ចំណុចមួយទៀតគឺ នៅពេលដែលគាត់ក្លាយជាទណ្ឌិតពាក់ព័ន្ធនឹងទង្វើខុសច្បាប់ គាត់បែរជាខំបំភ័ន្តប្រជាពលរដ្ឋថាគាត់ជាប់គុគដោយសាររឿងជាតិទៅវិញ។ ប៉ុន្តែគ្មាននរណាគេជឿគាត់ទេ។ រហូតមកដល់ពេលនេះគឺ២ ទៅ៣ឆ្នាំហើយ ហើយបរទេសក៏គេខ្ពើមស្តាប់គាត់ដែរ។ គាត់តែងតែសន្យាថា អាមេរិក នឹងដាក់សម្ពាធមកលើកម្ពុជាដើម្បីយក សម រង្ស៊ី មកវិញ ដូច្នេះភាសាបោកប្រាស់នេះត្រូវបានគេខ្ពើមទាំងថ្នាក់ជាតិ និងថ្នាក់អន្តរជាតិ។
ឥឡូវនេះពួកបក្សប្រឆាំងគេលែងប្រើភាសាថា សម រង្ស៊ី ជាប់គុគដោយសារស្នេហាជាតិដូចមុនហើយ គេប្រើភាសាថ្មីទៀតថា ដើម្បីឲ្យការបោះឆ្នោតមួយមានប្រជាធិបតេយ្យទាល់តែឲ្យប្រធានបក្សប្រឆាំងមក និងលើកទៀតថា បើគ្មានប្រធានបក្សប្រឆាំងមកទេ គ្មានប្រជាធិបតេយ្យទេ។ ថ្មីៗនេះ គេបានលេងល្បែងមួយទៀត ដើម្បីបំភ័ន្តប្រជាពលរដ្ឋ ដោយចោទប្រកាន់ថា គណបក្សដឹកនាំរដ្ឋាភិបាល ជាពិសេសសម្តេចប្រមុខរដ្ឋាភិបាល ខ្លាចរអា នឹងប្រជាប្រិយភាពរបស់ សម រង្ស៊ី គឺគេបំភ័ន្តរឿងជាបន្តបន្ទាប់។
លោក សម រង្ស៊ី គាត់គ្មានប្រជាប្រិយភាពទេ។ ប្រជាប្រិយភាពរបស់ សម រង្ស៊ី នៅពេលនេះ មិនស្មើនឹងប្រជាប្រិយភាពនៅពេលដែលគាត់នៅជាមួយនឹង ហ៊ុនស៊ីនប៉ិច កាលនៅជាមួយសម្តេចក្រុមព្រះ ទេ។ ពេលនោះប្រជាពលរដ្ឋនៅភ្នំពេញ និងអាជីវករអូឡាំពិក នៅភ្នំពេញបានឲ្យតម្លៃលោក សម រង្ស៊ី ជាងសម្តេចក្រុមព្រះទៅទៀត ប៉ុន្តែក្រោយមក សម រង្ស៊ី មិនអាចយកសម្លេងគាំទ្រពីអ្នក អូឡាំពិកបានទៀតទេ។ សូម្បីតែសម្លេងក្រុមប្រឹក្សាឃុំ សង្កាត់ ក៏អត់បានដែរ ដូច្នេះប្រជាប្រិយភាពរបស់ សម រង្ស៊ី
គឺធ្លាក់ខ្លាំងណាស់។ អញ្ចឹងឯណាទៅដែលចាត់ទុកថា គណបក្សប្រជាជន ខ្លាចប្រជាប្រិយភាព លោក សម រង្ស៊ី ? សូម្បីតែ លោក កឹម សុខា ក៏និយាយថា សម រង្ស៊ី បាត់ប្រជាប្រិយភាពដែរ។ ដូច្នេះ ទោះបីជាពួកគេលេងនយោបាយបំភ័ន្តប្រជាពលរដ្ឋយ៉ាងណាក៏ដោយ ក៏គ្មានប្រសិទ្ធិភាពដែរ ពីព្រោះកម្រិតរីកចម្រើនជាក់ស្តែងរបស់កម្ពុជាមកដល់ពេលនេះ គឺប្រជាពលរដ្ឋកំពុងតែសកម្មក្នុងការស្វែងរកជីវភាពឲ្យកាន់តែធូរធារជាលំដាប់ ហើយរាជរដ្ឋាភិបាល កំពុងរៀបចំនូវបរិស្ថានសង្គមទូទៅមួយដើម្បីភាពសុខក្សេម្ភក្សាន្តទាំងអស់គ្នាគ្រប់និន្នាការនយោបាយ។
សរុបសេចក្តីទៅ រាល់ការបោះឆ្នោតរដ្ឋសភា រៀងរាល់៥ឆ្នាំម្តងកន្លងមក លោក សម រង្ស៊ី មិនដែលធ្វើអ្វីបានសម្រាប់ប្រជាពលរដ្ឋទេ គឺមានតែការបង្ករឿង និងរត់ទៅក្រៅប្រទេស ហើយនៅពេលដែលលោក សម រង្ស៊ី រត់ទៅក្រៅគឺគណបក្សនេះលែងទៅមុខ។ តើដោយសារអ្វី? ពីព្រោះគណបក្សនេះជាគណបក្សដែលរស់ដោយសារដង្ហើមរបស់លោក សម រង្ស៊ី ដូច្នេះបើពួកគេនៅតែមិនពង្រឹងគណបក្សនេះទេ ពួកគេនឹងធ្លាក់ដុនដាប។
លោកសត្យា
រក្ស
សំណួរ៖ ក្រោយពេលដែលគណបក្ស កឹម សុខា និងគណបក្ស
សម រង្ស៊ី បង្កើតបាននូវសំបកចលនាប្រជាធិបតេយ្យសង្គ្រោះនេះមក ពួកគេបានដើរបោកប្រាស់ប្រជាពលរដ្ឋថាពួកគេបានប្រមូលអ្នកវីរៈជនមកជុំគ្នាអស់ហើយដើម្បីរួមគ្នាយកឈ្នះគណបក្សផ្សេង។តើការលើកឡើងបែបនេះ វាដូចការអះអាងរបស់បននយោបាយប្រឆាំងទាំងនោះឬទេ?
លោកបណ្ឌិតឈឹម ផលវរុណ
ចម្លើយ៖ ការលើកឡើងរបស់ពួកគេថាជាការប្រមូលពួកវីរៈជននោះ តើវីរៈជនទាំងនោះជាអ្វី? ធ្លាប់បានធ្វើអ្វីខ្លះ? តើពួកគេបានអភិវឌ្ឍស្អីខ្លះ? លើកជាឧទាហរណ៍ ប្រាប់ប្រជាពលរដ្ឋទៅ តែកុំភូត។ ហើយសូមបងប្អូនប្រជាពលរដ្ឋគ្រប់និន្នាការ ពិសេសបងប្អូនប្រជាពលរដ្ឋដែលធ្លាប់គាំទ្រ កឹម សុខា និង សម រង្ស៊ី តាមដានមើលទៅថាតើអ្វីដែលកម្មវិធីយើងលើកមកនេះជាការពិតឬទេ? បើសិនជាពិតមែន ឬក៏នៅមានមន្ទិល សូមតាមដានមើលឥរិយាបថរបស់ លោក កឹម សុខា និងលោក សម រង្ស៊ី បន្តទៀតមើលថាតើ សម្ព័ន្ធភាពដែលទើបបង្កើតបានជាស្រោមមួយហៅថាប្រជាធិបតេយ្យសង្គ្រោះជាតិ ហើយដាក់អង្គធាតុពីរនោះចូលក្នុងស្រោមនោះ តើនឹងអាចបំលែងជាស្រោមគណបក្សបាននៅពេលណា? ហើយរបស់ដែលធ្លាប់សន្យាជាច្រើនដងមកហើយនោះ តើគេអាចបំពេញបំណងបងប្អូនបានដែរឬទេ? ហើយពាក្យដែលគេនិយាយថាគិតជាតិនោះ តើជាការពិតឬក៏ពួកគេគិតពីប្រយោជន៍ផ្ទាល់ខ្លួនក្នុងការបែងចែកតួនាទីនៅក្នុងស្រោមថ្មីនោះ? កម្មវិធីយើងនឹងបំភ្លឺជូនបងប្អូនជាបន្តបន្ទាប់ ដើម្បីជាការដឹង ការយល់ ដើម្បីពិចារណាសម្រេចខ្លួនឯង៕
សម្រង់ព័ត៌មាន៖ លោក នូ សាវុធឌី