សុន្ទរកថា ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី ក្នុងពិធីបញ្ចុះបឋមសិលា កសាងអគារសិក្សាឥស្លាម៥ខ្នង សាងសង់ផ្ទះ៤ខ្នង ជូនគ្រួសារក្រីក្រ និងជីកអណ្តូងទឹកស្អាតចំនួន៣ នៅខេត្តតាកែវ
តាកែវ ថ្ងៃទី២២ ខែកញ្ញា ឆ្នាំ២០១២
- ឯកឧត្តម ឌឿរ៉ា ណាសៀរ អាប់ឌុល-ទូវ៉ាច់រី ឯកអគ្គរាជទូតរដ្ឋគុយវែតប្រចាំកម្ពុជា
- ឯកឧត្តម ស្រី បេន អភិបាលនៃគណៈអភិបាលខេត្តតាកែវ
- ឯកឧត្តម មូហាំម៉ាត់ ហ្វូអាត តំណាងសហគមន៍សម្របសម្រួលសង្គមរដ្ឋគុយវែត
- ឯកឧត្តម លោកជំទាវ លោកឧកញ៉ា អស់លោក លោកស្រី ភ្ញៀវកិត្តិយសជាតិ និងអន្តរជាតិ
- បងប្អូនខ្មែរឥស្លាម លោកគ្រូ អ្នកគ្រូ និងក្មួយៗសិស្សានុសិស្សទាំងអស់ជាទីស្រឡាញ់!
ថ្ងៃនេះ ខ្ញុំមានសេចក្តីសោមនស្សរីករាយចូលរួមជាមួយ ឯកឧត្តម លោកជំទាវ លោកឧកញ៉ា អស់លោក លោកស្រី ភ្ញៀវកិត្តិយសជាតិនិងអន្តរជាតិ បងប្អូនខ្មែរឥស្លាម លោកគ្រូ អ្នកគ្រូ និងក្មួយៗសិស្សានុសិស្សទាំងអស់ ក្នុងពិធីបញ្ចុះបឋមសិលាកសាងអគារសិក្សាឥស្លាម៥ខ្នង សាងសង់ផ្ទះ៤ខ្នង ជូនគ្រួសារក្រីក្រ និងជីកអណ្តូងទឹកស្អាតចំនួន៣ ដែលជាអំណោយរបស់សមាគមសម្របសម្រួល សង្គមនៃរដ្ឋគុយវែត សហការជាមួយសមាគមសប្បុរសធម៌ដើម្បីអភិវឌ្ឍន៍កម្ពុជា នៅខេត្តតាកែវ នាពេលនេះ។
ឆ្លៀតក្នុងឱកាសនេះ ខ្ញុំសូមសម្តែងនូវការកោតសរសើរនិងវាយតម្លៃខ្ពស់ចំពោះគណៈដឹកនាំជាន់ខ្ពស់នៃសាសនាឥស្លាមកម្ពុជា ឯកឧត្តម លោកជំទាវ អស់លោក លោកស្រី ថ្នាក់ដឹកនាំសាសនាឥស្លាម ដែលបានខិតខំប្រឹងប្រែងដឹកនាំកិច្ចការសាសនាឥស្លាម និងសហគមន៍ សាសនិកឥស្លាមនៅក្នុងព្រះរាជាណាចក្រកម្ពុជា ឱ្យមានទំនាក់ទំនងល្អក្នុងរង្វង់ផ្ទៃក្នុងសាសនាឥស្លាម ទាំងក្នុងនិងក្រៅប្រទេស ក៏ដូចជាទំនាក់ទំនងល្អជាមួយសាសនាដទៃ ដើម្បីសុខដុមនីយកម្មនិងការអភិវឌ្ឍប្រទេសជាតិ។ ជាមួយគ្នានេះដែរ ខ្ញុំសូមថ្លែងអំណរគុណចំពោះរាជរដ្ឋាភិបាល និងប្រជាជន គុយវែត ក៏ដូចជាសមាគមសម្របសម្រួលសង្គមនៃរដ្ឋគុយវែត និងសមាគមសប្បុរសធម៌ដើម្បីអភិវឌ្ឍន៍កម្ពុជា ដែលបានផ្ដល់ការគាំទ្រ និងជំនួយឧបត្ថម្ភក្នុងវិស័យសិក្សាធិការនិងសង្គមកិច្ច សំដៅរួមចំណែកដល់ការស្ដារនិងអភិវឌ្ឍសង្គមជាតិ។
ឯកឧត្តម លោកជំទាវ លោកឧកញ៉ា អស់លោក លោកស្រី ភ្ញៀវកិត្តិយសជាតិ និងអន្តរជាតិ!
ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាយើងជាប្រជាពលរដ្ឋខ្មែរមានមោទនភាពចំពោះនយោបាយឈ្នះ-ឈ្នះ របស់សម្តេចដែលបានធ្វើឱ្យមាតុភូមិរបស់យើងទទួលបានសន្តិភាពពេញបរិបូណ៌ ដែលនេះជាមូលដ្ឋាន គ្រឹះសម្រាប់ការអភិវឌ្ឍសេដ្ឋកិច្ចសង្គម។ លើសពីនេះទៀត ប្រជាជាតិយើងមិនដែលមានជម្លោះ ឬអំពើហឹង្សា ដែលពាក់ព័ន្ធនឹងសាសនាដែរ ពីព្រោះប្រជាពលរដ្ឋយើងប្រកាន់ខ្ជាប់នូវវប្បធម៌សន្តិភាព មិត្តភាព ភាតរភាព។
ការជួបជុំគ្នានៅថ្ងៃនេះ គឺជាសក្ខីភាពបញ្ជាក់អំពីស្មារតីសាមគ្គីភាព ទឹកចិត្តស្រលាញ់រាប់អាន និងការគោរពឱ្យតម្លៃនិងជួយគ្នាទៅវិញទៅមក ដោយមិនប្រកាន់រើសអើងជំនឿសាសនាឡើយ។ ព្រឹត្តិការណ៍ នេះក៏ឆ្លុះបញ្ចាំងអំពីសេរីភាពក្នុងការគោរពប្រតិបត្តិតាមជំនឿសាសនារៀងៗខ្លួន នៅក្នុងព្រះរាជាណាចក្រ កម្ពុជាផងដែរ។ ជាក់ស្តែង បងប្អូនខ្មែរឥស្លាមទាំងអស់សុទ្ធតែមានសិទ្ធិសេរីភាពពេញលេញក្នុងការគោរពប្រតិបត្តិយតាមជំនឿសាសនារបស់ខ្លួន ដូចជាសិទ្ធិគ្របក្បាលតាមប្រពៃណីសាសនាឥស្លាមនៅតាមទីសាធារណៈ សិទ្ធិថ្វាយបង្គំគ្រប់ទីកន្លែង សិទ្ធិប្រារព្ធពិធីសូត្រគម្ពីរគូរអានជាលក្ខណៈជាតិនិងអន្តរជាតិ និងសិទ្ធិប្រារព្ធពិធីបុណ្យទានផ្សេងៗតាមប្រពៃណីសាសនាឥស្លាម។
រាជរដ្ឋាភិបាលបើកទូលាយឱ្យបងប្អូនខ្មែរឥស្លាមអាចកសាងហេដ្ឋារចនាសម្ព័ន្ធរូបវន្តនានា ដើម្បីទ្រទ្រង់ជីវភាពសង្គម និងផ្តល់នូវភាពងាយស្រួលក្នុងការគោរពប្រតិបត្តិតាមជំនឿសាសនារបស់ខ្លួន ក៏ដូចជាការសិក្សារៀនសូត្រ។ កន្លងមក បងប្អូនខ្មែរឥស្លាមបានកសាងសមិទ្ធផលយ៉ាងច្រើនសម្រាប់ បំពេញតម្រូវការរបស់បងប្អូន ហើយថ្ងៃនេះ យើងមានមោទនភាពក្រៃលែងដោយបងប្អូនទទួលបាន ជំនួយឧបត្ថម្ភពីសមាគម សម្របសម្រួលសង្គមនៃរដ្ឋគុយវែត ដែលបានសហការជាមួយសមាគម សប្បុរសធម៌ដើម្បីអភិវឌ្ឍន៍កម្ពុជា ក្នុងគម្រោងសាងសង់អគារសិក្សា លំនៅដ្ឋាន អណ្តូងទឹកស្អាត និង គម្រោងទ្រទ្រង់ជីវភាពសង្គមមួយចំនួនទៀត។ បន្តិចទៀតនេះ យើងនឹងបញ្ចុះបឋមសិលា ដើម្បីជា និម្មិតរូបនៃការកសាងអគារសិក្សាឥស្លាមចំនួន៥ខ្នង សាងសង់លំនៅដ្ឋានចំនួន៤ខ្នងជូនគ្រួសារក្រីក្រ និងជីកអណ្តូងទឹកស្អាតចំនួន៣ជូនបងប្អូនខ្មែរឥស្លាមនៅក្នុងខេត្តតាកែវយើងនេះ។ ទីតាំងជាក់ស្តែងរបស់ អគារសិក្សាទាំង៥ខ្នងនេះនឹងត្រូវចែកទៅតាមភូមិចំនួន៥ ដូចខាងក្រោម៖
- ភូមិត្រពាំងលើ់ក ឃុំស្មោង ស្រុកទ្រាំង ទទួលបានអគារចំនួន ១ខ្នង
- ភូមិពោធិ៍ខ្វិត ឃុំព្រះបាតជាន់ជុំ ស្រុកគិរីវង្ស ទទួលបានអគារចំនួន ១ខ្នង
- ភូមិកំពុងយោល ឃុំគោកពោធិ៍ ស្រុកបុរីជលសារ ទទួលបានអគារចំនួន ១ខ្នង
- ភូមិអង្គក្រូច ឃុំបុរីជលសារ ស្រុកបុរីជលសារ ទទួលបានអគារចំនួន ១ខ្នង
- ភូមិសំរោង ឃុំរមេញ ស្រុកកោះអណ្តែត ទទួលបានអគារចំនួន ១ខ្នង។
បន្ថែមពីលើនេះទៀត សមាគមសម្របសម្រួលសង្គមនៃរដ្ឋគុយវែត ក៏មានគម្រោងចំនួនពីរទៀត ដែលក្នុងនោះ គម្រោងទី១មានគោលដៅលើកស្ទួយជីវភាពបងប្អូនតាមរយៈការផ្តល់គោចិញ្ចឹមយកកូន ទូកនេសាទ និងម៉ូតូឌុប ហើយគម្រោងទី២មានគោលដៅជួយផ្នែកសង្គមកិច្ចសម្រាប់ប្រជាពលរដ្ឋក្រីក្រ និស្សិតក្រីក្រ និងកុមារកំព្រា។
ឯកឧត្តម លោកជំទាវ លោកឧកញ៉ា អស់លោក លោកស្រី ភ្ញៀវកិត្តិយសជាតិ និងអន្តរជាតិ!
ក្នុងឱកាសដ៏វិសេសវិសាលនេះ ខ្ញុំសូមសម្តែងនូវការអបអរសាទរចំពោះបងប្អូនខ្មែរឥស្លាម ដែលនឹងទទួលបានអគារសិក្សា លំនៅដ្ឋាន និងអណ្តូងទឹកស្អាត ព្រមទាំងគម្រោងលើកស្ទួយជីវភាព ក៏ដូចជាគម្រោងផ្នែកសង្គមកិច្ច ដែលសរុបជាទឹកប្រាក់ចំនួន ១១៦ ៨០០ ដុល្លារអាមេរិក សម្រាប់ ជាប្រយោជន៍ចំពោះប្រជាពលរដ្ឋនៅក្នុងស្រុកទ្រាំង គិរីវង្ស បុរីជលសារ និងកោះអណ្តែត ក៏ដូចជា ប្រជាពលរដ្ឋក្នុងខេត្តតាកែវទាំងមូលរបស់យើងនេះ។ សមិទ្ធផលនិងគម្រោងទាំងនេះ នឹងរួមចំណែកដល់ការកសាងធនធានមនុស្ស ការលើកស្ទួយជីវភាពរស់នៅរបស់បងប្អូនប្រជាពលរដ្ឋ និងការកាត់បន្ថយភាពក្រីក្រនៅកម្ពុជា។ ឆ្លៀតឱកាសនេះ ខ្ញុំសូមអំពាវនាវដល់បងប្អូនខ្មែរឥស្លាម ដែលនឹងទទួល បានប្រយោជន៍ពីគម្រោងទាំងនេះ សូមប្រើប្រាស់សមិទ្ធផលទាំងនេះឱ្យចំគោលដៅ ដើម្បីជាប្រយោជន៍ រួមក្នុងសហគមន៍របស់ខ្លួន និងជួយថែរក្សាសម្បត្តិទាំងនេះសម្រាប់ជាមរតកដល់កូនចៅជំនាន់ក្រោយ។
ជាថ្មីម្តងទៀត ខ្ញុំសូមសម្តែងនូវអំណរគុណយ៉ាងជ្រាលជ្រៅចំពោះថ្នាក់ដឹកនាំសមាគមសម្រប សម្រួលសង្គមនៃរដ្ឋគុយវែត ដែលបានសហការជាមួយសមាគមសប្បុរសធម៌ដើម្បីអភិវឌ្ឍន៍កម្ពុជាក្នុង ការធ្វើឱ្យជំនួយ និងគម្រោងទាំងនេះលេចចេញជារូបរាងឡើង។ ទឹកចិត្តដ៏ប្រពៃថ្លៃថ្លារបស់រាជរដ្ឋាភិបាល និងប្រជាជនគូវ៉ែតនាពេលនេះ មិនត្រឹមតែរួមចំណែកដល់ការលើកកម្ពស់ជីវភាពរស់នៅរបស់បងប្អូនខ្មែរឥស្លាមនៅកម្ពុជាប៉ុណ្ណោះទេ ប៉ុន្តែថែមទាំងបានរួមចំណែកយ៉ាងសំខាន់ ក្នុងការរឹតចំណងមិត្តភាពសាមគ្គីភាព និងសហប្រតិបត្តិការរវាងប្រជាជននិងប្រទេសទាំងពីរ កម្ពុជា-គុយវែតឱ្យកាន់តែរឹងមាំ និង ស្ថិតស្ថេរគង់វង្សជានិរន្តរ៍។
ជាមួយគ្នានេះដែរ ខ្ញុំសូមយកឱកាសនេះអំពាវនាវដល់ដៃគូអភិវឌ្ឍន៍ និងសប្បុរសជនទាំងក្នុងនិង ក្រៅប្រទេសសូមបន្តជួយឧបត្ថម្ភគាំទ្រ និងរួមចំណែកជាមួយរាជរដ្ឋាភិបាលក្នុងការបង្កើនការអភិវឌ្ឍសង្គមជាតិ និងមាតុភូមិជាទីស្នេហានៃយើងបន្ថែមទៀត។
ជាទីបញ្ចប់ ខ្ញុំសូមជូនពរ ឯកឧត្តម លោកជំទាវ លោកឧកញ៉ា អស់លោក លោកស្រី ភ្ញៀវកិត្តិយសជាតិនិងអន្តរជាតិទាំងអស់ សូមប្រកបដោយសុខភាពល្អ ទទួលបានជោគជ័យលើគ្រប់ភារកិច្ច និងមានសុភមង្គលក្នុងក្រុមគ្រួសារ៕
សូមអរគុណ!