ក្នុងឱកាសអញ្ជើញចូលរួមជាអធិបតីកាត់ខ្សែបូរសម្ពោធដាក់ឲ្យប្រើប្រាស់
នូវសមិទ្ធផលជាច្រើននៅក្នុងខេត្តប៉ៃលិន នាថ្ងៃទី៣ ខែមករា ឆ្នាំ២០១៣
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
ស្ថាបនិកនៃនយោបាយឈ្នះឈ្នះ ដែលអមដំណើរដោយលោកជំទាវកិត្តិព្រឹទ្ធបណ្ឌិត ប៊ុន រ៉ានី បានសម្តែងការរីករាយ
ចំពោះការអភិវឌ្ឍន៍រីកចម្រើនរបស់ខេត្តប៉ៃលិន ដែលជាខេត្តមួយស្ថិតនៅភូមិភាគពាយព្យជាប់ព្រំដែនថៃ និងជាអតីតតំបន់ខ្មែរក្រហម ដែលបានធ្វើសមាហរណកម្មទ្រង់ទ្រាយធំលើកដំបូងជាមួយរាជរដ្ឋាភិបាលកាលពីឆ្នាំ១៩៩៦
ដែលជាជំហានឆ្ពោះទៅរកការដួលរលំនៃពួកខ្មែរក្រហម ទាំងអង្គការចាត់តាំងនយោបាយ និងយោធានៅឆ្នាំ១៩៩៨។
សម្តេចតេជោនាយករដ្ឋមន្ត្រីបានមានប្រសាសន៍ថា ខ្ញុំពិតជាមានការរីករាយ ដោយសារតែប៉ៃលិនបច្ចុប្បន្ន
មិនមែនជាក្រុងប៉ៃលិនកាលពីអតីតកាល ដែលសង្គ្រាមបានផ្ទុះឡើងក្រោយពីរដ្ឋប្រហារថ្ងៃទី១៨
ខែមីនា ឆ្នាំ១៩៧០។ បន្ទាប់មកនៅក្នុងដំណាក់កាល១៩៧០-៧៥ គ្មានទេសេចក្តីសុខសម្រាប់កុមារ ដែលបានកើតនៅក្រោយរដ្ឋប្រហារឆ្នាំ១៩៧០
និងបន្ទាប់មកទៀតកុមារដែលរស់នៅក្នុងជំនាន់ ប៉ុល ពត ៣ឆ្នាំ ៨ខែ ២០ថ្ងៃ ក្នុងចន្លោះឆ្នាំ១៩៧៥-១៩៧៩ ក៏គ្មានទេនូវសេចក្តីសុខ។
សម្តេចតេជោបានមានប្រសាសន៍បញ្ជាក់ថា មិនគ្រាន់តែតំបន់នេះទេ ប៉ុន្តែនៅទូទាំងប្រទេសរបបប្រល័យពូជសាសន៍មួយ បានកាប់សម្លាប់ប្រជាពលរដ្ឋរបស់យើង ហើយបន្តមកទៀត តំបន់នៃសង្គ្រាមនេះ គឺគ្មានទេសេចក្តីសុខសម្រាប់កុមារ និងយុវជនដែលកើតក្នុងតំបន់នេះ។
សម្តេចតេជោដែលធ្លាប់បានអញ្ជើញមកដោយផ្ទាល់កាលពីអំឡុងឆ្នាំ១៩៩៦
ទទួលស្វាគមន៍បងប្អូនកម្លាំងប្រដាប់អាវុធខ្មែរក្រហម
ដែលផ្តាច់ខ្លួនមកធ្វើសមាហរណកម្មជាមួយរដ្ឋាភិបាលមានប្រសាសន៍ឲ្យដឹងដែរថា សម្រាប់យុវជនដែលកើតនៅក្រោយរដ្ឋប្រហារឆ្នាំ១៩៧០ មកទល់នឹងពេលធ្វើសមាហរណកម្មឆ្នាំ១៩៩៦ គឺមានរយៈពេល២៦ឆ្នាំ
ទើបពួកគេទទួលនូវសមិទ្ធផលពីសន្តិភាពតាមរយៈនៃនយោបាយឈ្នះឈ្នះ ដែលខ្ញុំបានដាក់ចេញ និងដឹកនាំអនុវត្តន៍។
សម្តេចតេជោសែនមានប្រសាសន៍ថា ខ្ញុំពិតជាមានមោទនភាពដែលបានកើតនៅលើទឹកដីខ្មែរ ហើយដែលបានរួមចំណែកជាមួយជនរួមជាតិរបស់យើងអនុវត្តនូវនយោបាយឈ្នះឈ្នះ
នាំមកនូវសន្តិភាពទាំងស្រុងជូនជាតិមាតុភូមិរបស់យើង ហើយអ្វីដែលខ្ញុំរីករាយបំផុតនៅត្រង់ថាសមិទ្ធផលដែលបានមកពីនយោបាយឈ្នះឈ្នះ
ដែលបានចាប់សាកល្បងនៅដើមឆ្នាំ១៩៩៦ នៅតំបន់ឱរ៉ាល់ បន្ទាប់មកឆ្នួនផ្ទុះសន្តិភាពមួយបានកើតលើទឹកដីប៉ៃលិន។
ទាក់ទងនឹងការអនុវត្តន៍នយោបាយឈ្នះឈ្នះ
លុបបំបាត់ចោលអង្គការចាត់តាំងយោធា និងនយោបាយរបស់ខ្មែរក្រហម សម្តេចតេជោបានមានប្រសាសន៍លើកជាសំណួរថា
តើអ្នកប៉ៃលិនខាត ឬចំណេញ ដែលយើងបានអនុវត្តន៍នយោបាយឈ្នះឈ្នះ បញ្ចប់នូវសង្គ្រាមដែលអ្នកជំនាន់មុនបានផ្តើម
បានសាងឡើង ជាពិសេសរដ្ឋប្រហារ ថ្ងៃទី១៨ ខែមីនា ឆ្នាំ១៩៧០?។ សូម្បីតែអ៊ុនតាក់ ដែលបានចំណាយទឹកប្រាក់អស់ប្រមាណ
២០០០លានដុល្លារសហរដ្ឋអាមេរិកក៏មិនអាចដោះស្រាយបានដែរ។ សម្តេចតេជោបញ្ជាក់ថា
ប្រធាន អនុប្រធានអ៊ុនតាក់ មេបញ្ជាការយោធារបស់អ៊ុនតាក់…មកដល់ប៉ៃលិនអត់ហ៊ានចូលទេ ប៉ុន្តែ ហ៊ុន សែន អាចចូលក្នុងប៉ៃលិនបាន ហើយប្រជាពលរដ្ឋកម្ពុជាទូទាំងប្រទេស ពិសេសប្រជាពលរដ្ឋនៅប៉ៃលិនសុទ្ធតែបានទទួលផលប្រយោជន៍ ដោយគ្មានអ្នកណាមួយចាញ់នៅក្នុងល្បែងនៃនយោបាយឈ្នះឈ្នះទេ។
សម្តេចតេជោនាយករដ្ឋមន្ត្រីមានប្រសាសន៍ថា សម្រាប់បញ្ហាក្តីក្តាំនៅតុលាការឧក្រិដ្ឋកម្ម គឺជា
រឿងមួយ ប៉ុន្តែសម្រាប់ប្រជាជននៅទូទាំងប្រទេសត្រូវទទួលស្គាល់ថា ផលប្រយោជន៍ដែលទទួលបាន មកពីឆ្នួនផ្ទុះសន្តិភាពនៅតំបន់ប៉ៃលិន។
និយាយជារួមបើយើងមិនដាក់ចេញនយោបាយឈ្នះឈ្នះ សេចក្តីសុខមិនមែនត្រឹមតែគ្មានសម្រាប់អ្នកប៉ៃលិនទេ អ្នកនៅបាត់ដំបង អ្នកនៅទូទាំងប្រទេសក៏អត់មានសេចក្តីសុខដែរ ដោយសារត្រូវបញ្ជូនភស្តុភារ និងថវិកាមករ៉ាប់រង សង្គ្រាមនៅតំបន់ប៉ៃលិននេះ។
សម្តេចតេជោ
ហ៊ុន សែន មានប្រសាសន៍បញ្ជាក់ថា ខ្ញុំគិតថា
សន្តិភាពដែលបានកើតក្រោមនយោបាយឈ្នះឈ្នះ ចាប់ពីតំបន់ប៉ៃលិនទៅតំបន់ដទៃទៀតនៅទូទាំងប្រទេស វាបានផ្តល់នូវ សេចក្តីសុខសម្រាប់យើងទាំងអស់គ្នា ហើយសមិទ្ធផលទាំងឡាយដែលបានកើតនៅក្នុងខេត្តប៉ៃលិន និងនៅទូទាំងប្រទេស ប្រាកដណាស់ គឺកើតមកពីនយោបាយឈ្នះឈ្នះ
នេះឯង។
សម្តេចតេជោនាយករដ្ឋមន្ត្រីបានរំលឹកពីអតីតកាល
នៃការអនុវត្តន៍នយោបាយបង្រួបបង្រួមជាតិរបស់សម្តេចថា ខ្ញុំបានមើលឃើញច្បាស់តាំងពីការចាប់ផ្តើមនៃតួនាទីជារដ្ឋមន្ត្រីការបរទេស
និងបន្ទាប់ទៅជានាយករដ្ឋមន្ត្រី ខ្ញុំមិនដែលជឿថា នឹងយកសង្គ្រាមដើម្បីបញ្ចប់សង្គ្រាមទេ ដូច្នេះបានជាខ្ញុំត្រូវចរចាសន្តិភាព
ដែលជំហានដំបូងថ្ងៃ២ ខែធ្នូ ឆ្នាំ១៩៨៧
នៅហ្វ៊ែរអង់តាឌឺន័រ ជាមួយសម្តេចព្រះនរោត្តម សីហនុ។ បន្ទាប់មកទៀតបានសាកល្បងនៅឱរ៉ាល់នៃនយោបាយឈ្នះឈ្នះ រុញច្រានសភាពការណ៍មកដល់ប៉ៃលិន។
សូមបញ្ជាក់ថា
នយោបាយឈ្នះឈ្នះ មាន ៣ចំណុច ដែលផ្តល់ផលប្រយោជន៍ដល់បងប្អូនអតីតខ្មែរក្រហម ដែលបានផ្តាច់ខ្លួនធ្វើសមាហរណកម្មជាមួយសង្គមជាតិគឺ ទី១-ធានាអាយុជីវិត
និងសុវត្ថិភាពរូបកាយ។ ទី២-ធានាអាជីព និងមុខរបរ
និងទី៣-ធានាសន្តិសុខលើទ្រព្យសម្បត្តិ
ទាំងអចលនទ្រព្យ និងចលនទ្រព្យ។
ទាក់ទងនឹងបញ្ហានេះសម្តេចតេជោសែនមានប្រសាសន៍ថា
នយោបាយឈ្នះឈ្នះ ដែលមានចំណុចទាំង៣ នេះ បានធ្វើឲ្យអង្គការចាត់តាំងនយោបាយ
និងយោធាមួយត្រូវរលំរលាយ ហើយខ្ញុំបានសិក្សាពីចិត្តសាស្ត្ររបស់បងប្អូនច្បាស់ណាស់ ហើយយើងអាចធ្វើបានដោយមិនបានចំណាយគ្រាប់កាំភ្លើងសូម្បីមួយគ្រាប់នោះឡើយ។
ក្នុងឱកាសអញ្ជើញចូលរួមជាអធិបតីកាត់ខ្សែបូរសម្ពោធដាក់ឲ្យប្រើប្រាស់
នូវសមិទ្ធផលជាច្រើននៅក្នុងខេត្តប៉ៃលិន ដោយមានការចូលរួមអបអរសាទរ ពីសំណាក់អភិបាលខេត្តច័ន្ទបូរី
អភិបាលស្រុកពោងណាំរុន អភិបាលរងស្រុក លោកឧត្តមនាវាទោ ល ស៊ុនថៃ លោក យ៉ាណយ ឆៃយ៉ា មេបញ្ជាការកងកម្លាំងការពារព្រំដែននៃព្រះរាជាណាចក្រថៃផង
ម្តេចតេជោ នាយករដ្ឋមន្រ្តីនៃព្រះរាជាណាចក្រកម្ពុជា បានធ្វើការអំពាវនាវទៅភាគីថៃ កុំឲ្យបិទទ្វារព្រំដែនរវាងប្រទេសទាំងពីរ
(ជាឯកតោភាគី) ច្រើនដងពេក ប្រយ័ត្នខាតបង់អត្ថប្រយោជន៍ច្រើនផ្នែកពាណិជ្ជកម្ម ព្រោះក្នុងមួយឆ្នាំថៃ នាំចូលកម្ពុជាជាង ២.០០០លានដុល្លារ។
ដោយចាត់ទុកថា
កិច្ចសហប្រតិបត្តិការរវាងប្រទេសទាំងពីរទទួលបានផលប្រយោជន៍ល្អ សម្តេចតេជោបានស្នើឲ្យខេត្តទាំងពីរ
(ប៉ៃលិន-ច័ន្ទបូរី) និងខេត្តដទៃដែលជាប់ព្រំដែនកម្ពុជា-ថៃ ត្រូវមានការសហការគ្នាឲ្យបានល្អ ក្នុងការអនុវត្តន៍នូវគោលនយោបាយរបស់រាជរដ្ឋាភិបាលនៃប្រទេសទាំងពីរ
ចៀសវាងការបិទច្រកព្រំដែនច្រើនដង ដែលនាំឲ្យខាតបង់ផលប្រ យោជន៍ផ្នែកពាណិជ្ជកម្មរបស់ប្រទេសថៃ។
សមិទ្ធផលនានាជាសំណង់ប្រវត្តិសាស្ត្រ
ដែលប្រារព្ធពិធីសម្ពោធដាក់ឲ្យដំណើរការ ដោយសម្តេចតេជោ
និងលោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន នៅពេលនេះ រួមមានសំណង់រូបសំណាកលោកយាយយ៉ាតឆ្លាក់ពីថ្លើមថ្មភ្នំព្រះវិហារមានកំពស់
៣,៩ម៉ែត្រ ភ្នែន ២,៤ម៉ែត្រ មានទម្ងន់ ៣០តោន ចំណាយអស់ថវិកា
១៥១ ៥០០ដុល្លារអាមេរិក។ ព្រះពុទ្ធរូបផ្ចាញ់មារ
កំពស់ ២៧ម៉ែត្រស្ថិតនៅលើកំពូលភ្នំយ៉ាត ចំណាយអស់ថវិកា ៩៤
១០០ដុល្លារអាមេរិក រូបសំណាកហ្លួងព្រះស្តេចកន ចំណាយអស់ថវិកា ១៥៦
៥០០ដុល្លារអាមេរិក សួនឧស្យាន និងទីកន្លែងសំរាប់ហាត់ប្រាណ ចំណាយអស់ថវិកា
២២ ៥០០ដុល្លារអាមេរិក រូបសំណាកសេះមាសចំនួន៨ ចំណាយអស់ថវិកា ២៦ ៧៥០ដុល្លារអាមេរិក ពិសេសការកសាងសំណង់ប្រវត្តិសាស្ត្រវិមានឯករាជ្យ
ដែលជាសមិទ្ធផលដ៏ថ្លៃថ្លាបំផុតសំរាប់ថ្នាក់ដឹកនាំ និងប្រជាពលរដ្ឋខេត្តប៉ៃលិន ដែលបានកសាងឡើងនៅថ្ងៃទី១៥
ខែធ្នូ ឆ្នាំ២០១១ និងបញ្ចប់ការសាងសង់នៅថ្ងៃទី១៥ ខែធ្នូ ឆ្នាំ២០១២ ចំណាយអស់ថវិកា ២៨១ ៦៨៨ដុល្លារអាមេរិក រួមទាំងសមិទ្ធផលនានា
ដូចជាផ្លូវស្ពានចំនួន១៧ ទៀតក្នុងខេត្តប៉ៃលិន។
ឯកឧត្តម នាយឧត្តមសេនីយ៍
អ៊ី ឈាន អភិបាលខេត្តប៉ៃលិនរាយការណ៍ថា ចាប់តាំងពីការធ្វើ
សមាហរណកម្មនៅថ្ងៃទី១៥ ខែសីហា ឆ្នាំ១៩៩៦ ដែលក្នុងរយៈពេលនេះ ក្រោមនយោបាយអនុគ្រោះសណ្តោសប្រណី
ពីសំណាក់រាជរដ្ឋាភិបាល ជាពិសេស ពីសំណាក់សម្តេចតេជោ ហ៊ុន សែន
ខេត្តប៉ៃលិនបានទទួលការអភិវឌ្ឍលើគ្រប់វិស័យ ដែលជាកត្តាដ៏សំខាន់ក្នុងការរុញច្រានខេត្តឲ្យរីកចំរើន ប្រែមុខមាត់ថ្មី និងប្រែខ្លួនពីសំណល់ខ្ទេចខ្ទាំនៃសង្គ្រាមពីទីរហោដ្ឋានគួរឲ្យខ្លាច
មកជាទីកន្លែងទាក់ទាញ គួរឲ្យចង់រស់នៅ។
ឯកឧត្តម អភិបាលខេត្តថ្លែងបញ្ជាក់ថា ទាំងអស់នោះ គឺជាលទ្ធផលផ្លែផ្កាពិតប្រាកដនៃនយោបាយឈ្នះឈ្នះ របស់សម្តេចតេជោនាយករដ្ឋមន្ត្រី គឺពីបែកបាក់វេទនា មកសប្បាយ ពីឃ្លាត ឆ្ងាយមកជួបជុំ ពីទ្រហោយំ មកក្អាកក្អាយ
ពីអន្តរាយមករុងរឿង ដូចប៉ៃលិនក្នុងពេលបច្ចុប្បន្ន
ដែលកំពុងរីកស្រស់បំព្រង។ អ្វីដែលប្រជាពលរដ្ឋខេត្តប៉ៃលិនកាន់តែដឹងគុណ
ហើយចងចាំក្នុងក្រអៅបេះដូងមិនអាចបំភ្លេចបាននោះ គឺទឹកចិត្តដ៏ថ្លៃថ្លារបស់សម្តេចតេជោ និងលោកជំទាវកិត្តិព្រឹទ្ធបណ្ឌិត ដែលមិនត្រឹមតែផ្តល់នូវទំនុកចិត្ត ដើមទុន និងលទ្ធភាពក្នុងការអភិវឌ្ឍខេត្តឲ្យរីកចំរើនប៉ុណ្ណោះទេ ប៉ុន្តែសម្តេចតេជោ និងលោកជំទាវ ថែមទាំងបានផ្តល់នូវកិត្តិយសជាប្រវត្តិសាស្ត្របន្ថែមទៀត
ដោយបានប្រទានកិត្តិនាមដល់ខេត្តប៉ៃលិនថា ជាប៉ៃលិនឆ្នួនផ្ទុះនៃសន្តិភាព៕