ថ្ងៃទី២៥ ខែកុម្ភះ ឆ្នាំ២០១៣
លោក សត្យា រក្ស
សំណួរ៖ បច្ចុប្បន្ននេះ ជនរួមជាតិបានជ្រាបហើយថា គណបក្សប្រឆាំង
កំពុងតែប្រើនយោបាយញុះញង់ អុចអាល និងនយោបាយបំភ្លើស បំភ្លៃការពិត
ធ្វើយ៉ាងណាដើម្បីឲ្យប្រជាពលរដ្ឋ ភន្ត័ច្រឡំ។ ប៉ុន្ដែជាលទ្ធផល
ដែលគណបក្សប្រឆាំងទទួលបាននោះ យើងឃើញថាអ្នកដែលភន្ត័ច្រឡំហ្នឹង
គឺមានតិចតួចប៉ុណ្ណោះ ដោយសារតែសកម្មភាពរបស់គាត់ដដែលៗ។
យើងឃើញថា បីអាណត្ដិមកហើយ ចាប់ពីអាណត្តិទីពីរ ទីបី ទីបួន
មកគឺគណបក្សប្រឆាំងបានទទួលបរាជ័យក្នុងការប្រកួត
ប្រជែងនៃការបោះឆ្នោតជាបន្តបន្ទាប់។ មួយវិញទៀត យើងឃើញថា
គណបក្សប្រឆាំងនៅកម្ពុជានេះ មិនមែនថា ជាគណបក្សដែលថ្មី
ហើយមិនធ្លាប់ចាញ់នោះទេ
គឺសុទ្ធតែជាគណបក្សដែលធ្លាប់ភ្លក់នៅសង្វៀននៃការប្រកួតប្រជែងតាមរយៈ
សន្លឹកឆ្នោត ហើយជាលទ្ធផលនោះ គឺបរាជ័យ។ ម្យ៉ាងទៀត
ចរឹតរបស់ពួកគាត់ទាំងបួនអាណត្តិមកនេះ នៅពេលដែលគាត់ចាញ់ឆ្នោត
គឺគាត់តែងតែនិយាយថា គ្មានប្រជាធិបតេយ្យ គ្មានតម្លាភាព
គេលួចអីជាដើមទៅ។
ឥឡូវនេះ អ្វីដែលយើងចាប់អារម្មណ៍បំផុតនោះ គឺនៅត្រង់ថា នៅពេលដែល សម រង្ស៊ី
ដែលជាប្រធានគណបក្ស សម រង្ស៊ី នេះ កំពុងតែជាប់ទោសទណ្ឌ
ហើយនៅប៉ុន្មានថ្ងៃខាងមុខនេះ គឺនឹងមានការកាត់ទោសឡើងវិញ នៅសាលាឧទ្ធរណ៍
ដែលទាក់ទងទៅនឹងបទបរិហារកេរ្តិ៍និងរឿងរ៉ាវផ្សេងៗទៀត
ដែលជាផ្នែកមួយធ្វើឲ្យលោក សម រង្ស៊ី
កាន់តែឃ្លាតឆ្ងាយជាមួយនិងការវិលវិញ។ ការឃ្លាតឆ្ងាយ
គឺជាការសម្រេចចិត្តរបស់ខ្លួនគាត់ទេ មិនមែនមានន័យថា
អ្នកណាមិនឲ្យមកនោះទេ។ ហើយអ្វីដែលយើងឮពីបនប្រឆាំងទាំងឡាយ
គឺគេបាននិយាយថាបើគ្មាន សម រង្ស៊ី មកចូលរួមប្រកួតប្រជែងការបោះឆ្នោតទេ
ការបោះឆ្នោតនោះ នឹងគ្មានតម្លៃ មិនអាចទទួលយកបាន ។ល។
ប៉ុន្ដែចំណុចនេះ ជនរួមជាតិក៏បានជ្រាប
ហើយលោកបណ្ឌិតក៏បានលើកឡើងជាច្រើនដងហើយដែរ។
ឥឡូវនេះ គឺខ្ញុំសុំឲ្យលោកបណ្ឌិតជួយពន្យល់ និងបំភ្លឺបន្ដិច
ដែលទាក់ទងទៅនឹងគណបក្សប្រឆាំង ដែលយើងឃើញថា បក្សទាំងពីរនេះ គឺកាលពីដើមឡើយ
គឺមានប្រវត្តិនៅក្នុងការប្រកាប់ប្រចាក់គ្នា យ៉ាងស្រួចស្រាវបំផុត
ដោយម្នាក់ៗ តាំងខ្លួនថា ជាអ្នកល្អរៀងៗខ្លួន។ លោក សម រង្ស៊ី ចោទលោក កឹម
សុខា ថាជាគណបក្សឆ្កែនោមដាក់
ជាគណបក្សកូនមាន់ដែលរំខានទៅដល់អ្នកប្រជាធិបតេយ្យអីជាដើម។ ហើយសម្រាប់លោក
កឹម សុខា វិញ ក៏បានលើកឡើងយ៉ាងច្បាស់ថា លោក សម រង្ស៊ី នេះ
គឺជាគណបក្សបុគ្គលនិយម គ្រួសារនិយម បក្ខពួកនិយម សូម្បីតែឈ្មោះបក្សហ្នឹង
ក៏ជាឈ្មោះរបស់ខ្លួនដែរ។ ដែលគាត់បានអះអាងថា
គាត់មិនអាចប្រឡាក់ប្រឡូកខ្លួនគាត់ជាមួយនឹងលោក សម រង្ស៊ី
ដែលជាបុគ្គលបក្ខពួកនិយម គ្រួសារនិយមនោះទេ។
ឥឡូវនេះ សូមលោកបណ្ឌិតប្រៀបធៀបមើល
ថាតើប្រជាពលរដ្ឋអាចជឿពួកគាត់បានឬទេ? បើកាលពីគាត់នៅដាច់ដោយឡែកពីគ្នា
គាត់ចោទគ្នាថា សុទ្ធតែជាមនុស្សបែបនេះ មនុស្សបែបនោះ ប៉ុន្ដែឥឡូវនេះ
គ្រាន់តែមានសញ្ញាបន្ដិចថា នឹងទោរទន់ដាក់គ្នាបន្ដិចហ្នឹង
គេបែរជាសរសើរថា ពួកគេហ្នឹងសុទ្ធតែជាអ្នកប្រជាធិបតេយ្យ
អ្នកស្នេហាជាតិជាដើម។ អញ្ចឹងចំណុចនេះ
លោកបណ្ឌិតមានអ្វីដើម្បីទុកជាការពន្យល់ជូនប្រជាពលរដ្ឋ?
លោកបណ្ឌិត ឈឹម ផលវរុណ
ចម្លើយ៖ បើនិយាយឲ្យខ្លី ដើម្បីឲ្យបងប្អូនប្រជាពលរដ្ឋយល់គឺ ក្រុមលោក
សម រង្ស៊ី ក្ដី ក្រុមលោក កឹម សុខា ក្ដី គឺជាក្រុមអ្នកចាញ់ ប៉ុន្ដែអួតថា
ឈ្នះ តែពួកគាត់មិនដែលបានឈ្នះទេ។ ហើយ ពួកគាត់អួតទាំងអស់គ្នា
សូម្បីតែលោក សម រង្ស៊ី គាត់ស្រមៃតាំងពីរដ្ឋាភិបាលគណបក្សសម រង្ស៊ី
ហ្នឹងឃើញថា ឈ្នះតែម្តង។ អត់ហ៊ានថា បើសិនជាឈ្នះទេ
សុទ្ធតែនិយាយថាឈ្នះតែម្តង។ ចំណែកលោក កឹម សុខា នោះ កាន់តែជាងលោក
សម រង្ស៊ី ទៅទៀត គឺខ្លួនគាត់ធ្លាប់ចាញ់តាំងពីកាលជំនាន់លោកតា
សឺន សាន មកម្លេះ គឺបានតែ ១០ កៅអីទេ តែហ៊ានបំផ្លោងថា
ប្រជាពលរដ្ឋកាលឆ្នាំ ១៩៩៣ បោះឆ្នោតឲ្យពួកសេរី។ លើកពីពួកសេរី
តែគាត់បានតែ ១០ កៅអីទេ ហើយពេលនោះសេរីមែនទែនផង
សេរីលេងៗផង។បើខាងហ៊្វុនស៊ីនប៉ិចមានទៅសេរីអីគាត់ គឺរាជានិយមទេ
ហើយគណបក្សប្រជាជនក៏ជាគណបក្សគ្រប់គ្រងប្រទេសផ្អែកទៅនឹងលក្ខខណ្ឌជាក់
លាក់របស់ប្រជាជននៅកម្ពុជាយើងដែរ។ ហើយសេរីបែបស្ដាំនិយមដូចលោកតា
សឺន សាន គឺបានតែ ១០ កៅអីទេ។ អញ្ចឹងហើយរហូតដល់អាណត្តិទី២ ហ្នឹង
ពួកស្ដាំនិយមបែបលោកតា សឺន សាន គឺរលាយខ្សុលអស់តែម្តង។ បានន័យថា
ប្រជាជនកម្ពុជា អត់ត្រូវការអ្នកសេរីអាឡិអាឡក់អញ្ចឹងទេ សេរីអត់បែបបទ
គឺយើងត្រូវការប្រជាធិបតេយ្យពិតប្រាកដ ដើម្បីសណ្ដាប់ធ្នាប់
និងសុខដុមរមនានៃប្រជាជនកម្ពុជាទាំងមូល។
មិនមែនចង់បានស្ដាំនិយមដូចកាលពីណាពីណីនោះទេ។ យើងមើលប្រវត្តិកម្ពុជា
នយោបាយស្ដាំនិយមដូចជាពុំទាន់ជាស៊ីចង្វាក់ជាមួយវត្ថុបំណងរបស់
កម្ពុជាទេ។ កាលជំនាន់លោក លន់ នល់ ក្រុមលោកតា សឺន សាន ហ្នឹង
គឺបានរុញច្រានឲ្យប្រទេសជាតិជួបវិនាសកម្មទៅវិញទេ។ ប៉ុន្ដែយើងឃើញលោក
កឹម សុខា អស់គណបក្សមួយហើយ តែគាត់ពូកែអួត។
គាត់អត់ទទួលស្គាល់ខ្លួនឯងចាញ់ទេខ្លួនឯងចាញ់ហើយ ទៅអួតថា ខ្លួនឯងឈ្នះ
អស់ត្រឹមតែ ៥៨ ទៅជាង ៦០ បានមកត្រឹម ៣ ក៏គាត់ថា គាត់ឈ្នះដែរ។
អញ្ចឹងបានន័យថា ទាំងក្រុមលោក សម រង្ស៊ី ទាំងក្រុមលោក កឹម សុខា
ជាក្រុមអ្នកចាញ់ ប៉ុន្ដែមិនទទួលស្គាល់ថាចាញ់ទេ
នៅតែអួតថាឈ្នះដដែល។ ត្រង់ហ្នឹងជាវិធីសាស្ដ្រមួយផងដែរ
ប្រជាពលរដ្ឋត្រូវគិតថា ហេតុអីបានជាគេចាញ់
ឬក៏គេល្អិតកាន់តែស្រែកកាន់តែខ្លាំង? បានន័យថា
ជាចិត្តសាស្ដ្រនៃការឆបោក។ ខ្មែរយើងធ្លាប់និយាយហើយ
ខ្លួនកាន់តែល្អិតស្រែកកាន់តែឮ ហើយ កឹម សុខា មិនមែនស្រែកកាន់តែឮទេ
ស្រែកផងលោតយកដៃបក់ទៀត ដើម្បីឲ្យគេមើលឃើញ ឮទាំងសម្លេង។
អញ្ចឹងកាន់តែល្អិតកាន់តែខ្ទរខ្លាំង
ដូចយើងហៅថាក្អាត់ក្នុងក្អមអញ្ចឹង។ ប៉ុន្ដែបងប្អូនពិចារណា
ហេតុអីបានជាគេខំធ្វើអញ្ចឹង? ត្រង់នេះសំខាន់ណាស់
រឿងឥរិយាបថរបស់ពួកគាត់ ត្រង់ហ្នឹងជាវិធីសាស្ដ្រ
ប៉ុន្ដែហេតុអីបានគាត់ធ្វើអញ្ចឹង? ពីព្រោះជាសម្រែកបរាជ័យបាត់ទៅហើយ។
មនុស្សយើង កាលណាយើងអត់ទទួលស្គាល់ចំណុចខ្សោយរបស់ខ្លួន
ហើយខ្លួនបរាជ័យហើយ ហើយនៅតែស្រែកថា ឈ្នះៗទៀត គណបក្សបែបហ្នឹង
អ្នកនយោបាយបែបហ្នឹង ឬក៏បននយោបាយបែបហ្នឹង គ្មានឱកាសនឹងរៀបចំខ្លួនទេ។
ឧទាហរណ៍ ដូចកាលគណបក្សលោកតា សឺន សាន ចាញ់អត់បានមួយកៅអី នៅឆ្នាំ១៩៩៨
មិនព្រមរៀបគណបក្សនេះទេ គឺសុខចិត្តរំលាយគណបក្សចោល។ ដល់លោក សម រង្ស៊ី
អញ្ចឹងដែរ គណបក្សបានស្ទុះពី ១៥ ទៅ ២៤ មកទ្រឹងនៅត្រឹម ២៦
មិនព្រមសិក្សាពីកំហុស និងចំណុចខ្សោយគណបក្សខ្លួនទេ
ហាក់ទៅជាទទួលស្គាល់ថា ខ្លួនអត់ទៅមុខ ហើយទៅចាប់ដៃរកជំនួយជាមួយ កឹម
សុខា ដើម្បីជាការបង្ហាញ បញ្ឆោតប្រជាពលរដ្ឋទៅវិញ។
-មតិលោក សត្យា រក្ស
ត្រង់ចំណុចនេះ ខ្ញុំចង់ឲ្យលោកបណ្ឌិតផ្ដោតទៅលើបញ្ហាមួយ
ដែលទាក់ទងទៅនឹង មុនពេលដែលគណបក្សប្រឆាំងទាំងពីរហ្នឹង
ងាកមកចាប់ដៃគ្នា។ ប៉ុន្ដែសម្រាប់អ្វីដែលយើងប្រមើលមើលឃើញគឺថា
ពួកគេកំពុងតែប្រេះឆានឹងគ្នាហើយ ការចាប់ដៃហ្នឹង។ និយាយឲ្យចំ
មិនទាន់ទាំងហុចដៃដល់គ្នាផង ហើយឥឡូវកំពុងតែនាំគ្នាដកដៃចេញវិញហើយ។
រឿងដែលសំខាន់ ដែលខ្ញុំចង់ពន្យល់ និងបំភ្លឺជូនប្រជាពលរដ្ឋ គឺត្រង់ថា កាលនោះ
គឺនរណាក៏ដឹងដែរថា កឹម សុខា នេះ គឺជាអាយ៉ងរបស់គណបក្សប្រជាជនកម្ពុជា។ លោក
សម រង្ស៊ី ក៏ធ្លាប់មានប្រសាសន៍ពីបញ្ហានេះ លោក គង់ គាំ
ក៏ធ្លាប់ពន្យល់ប្រជាពលរដ្ឋ
អ្នកគាំទ្ររបស់គាត់ពីបញ្ហាភាពជាអាយ៉ងរបស់គណបក្សប្រជាជនកម្ពុជា
នៃក្រុម កឹម សុខា ហ្នឹង។ ហើយសូម្បីតែ សម្ដេចអគ្គមហាសេនាបតីតេជោ ហ៊ុន
សែន ផ្ទាល់ ក៏លោកធ្លាប់បានមានប្រសាសន៍ហើយ
បានលើកពីមនុស្សពិតទៅទៀត។ ដូចជាលោក កឹម សុខា នេះ
គឺសម្ដេចលោកបានមានប្រសាសន៍ថា គណបក្សហ្នឹង គឺធ្លាប់សុំយោបល់លោក
ហើយលោកបានរៀបចំទាំងមនុស្សឲ្យចូលរួម ធ្វើជាអនុប្រធានផង គឺឯកឧត្តម
កែវ រ៉េមី ហើយនិងមានរឿងរ៉ាវច្រើនទៀត
រួមជាមួយនឹងភស្ដុតាងចុងក្រោយដែលបែកធ្លាយនូវឯកសារសំងាត់
នៃកិច្ចសន្ទនាហ្នឹង គឺកាន់តែច្បាស់។ ហើយគណបក្ស សម រង្ស៊ី
គឺតែងតែលើកយកបញ្ហានេះ ដើម្បីពន្យល់ជូនក្រុមរបស់ខ្លួន
អ្នកគាំទ្ររបស់ខ្លួន ហើយទះដៃហ៊ោក្រេវៗតែម្ដង
នូវអ្វីជាការពន្យល់ជុំវិញរឿងរ៉ាវរបស់ កឹម សុខា ហ្នឹង។
លោក សត្យា រក្ស
សំណួរ៖ ឥឡូវនេះ គឺគណបក្សទាំងពីរហ្នឹង ដូចជាទោរទន់នឹងគ្នា
ខ្ញុំបារម្ភត្រង់ចំណុចថា បើសិនជា គណបក្ស សម រង្ស៊ី នេះ
ត្រូវបែកប្រេះឆាជាមួយ កឹម សុខា ឬក៏ថា ដឹកដៃគ្នាឆ្ពោះទៅរកការបោះឆ្នោត
ប៉ុន្ដែទទួលបានលទ្ធផលមិនសមតាមអ្វីដែលខ្លួនស្រមើរស្រមៃនោះ
គឺបក្សទាំងពីរនេះ អាចនឹងចោទថា កឹម សុខា នេះ គឺជាមនុស្សរបស់សម្ដេច ហ៊ុន
សែន បញ្ជូន ឲ្យទៅបំបែកគណបក្ស សម រង្ស៊ី។ អញ្ចឹងត្រង់ចំណុចនេះ
ខ្ញុំចង់ឲ្យលោកបណ្ឌិតជួយពន្យល់ ទៅដល់គណបក្សសម រង្ស៊ី ផង
និងទៅដល់អ្នកគាំទ្របក្ស សម រង្ស៊ី ផង
ដើម្បីទុកជារបងការពារឲ្យហើយ?
លោកបណ្ឌិត ឈឹម ផលវរុណ
ចម្លើយ៖ ត្រង់ចំណុចហ្នឹង បងប្អូនប្រជាពលរដ្ឋអាចមើលឃើញហើយ ហេតុអីបានលោក
សម រង្ស៊ី បំរុងកន្លែងវិលត្រឡប់វិញ? បើត្រឹមតែរក្សាគណបក្ស សម រង្ស៊ី
ដើម្បីទុកពេលវេលាឲ្យចប់អាណត្តិទាំងស្រុងនៃសមាជិកព្រឹទ្ធសភា
ក៏ដូចជាសមាជិកក្រុមប្រឹក្សាខេត្ត ក្រុង រាជធានី រហូតទៅដល់ស្រុក
ខណ្ឌ ហើយនិងឃុំ សង្កាត់ នឹងវាអត់អីទេ វាដើម្បីបំពេញលក្ខខណ្ឌនៃច្បាប់
ត្រង់ហ្នឹងយើងទទួលយកហើយ។ ប៉ុន្ដែវាចាំបាច់អីដែល លោក សម រង្ស៊ី
ត្រូវរក្សាបន្ទប់ចាស់សម្រាប់គាត់វិលមកវិញនេះ។
នេះដែលជាចំណុចបង្ហាញឲ្យឃើញថា លោក សម រង្ស៊ី ក៏គិតទុករួចស្រេចហើយ ថា
ការរួមគ្នាហ្នឹង ក៏អាចនឹងប្រេះឆាវិញក្នុងពេលណាមួយ
ដែលមិនអាចមានសុដ្ឋិនិយមថា នឹងធ្វើដំណើរទៅជុំគ្នាបានទេ
អញ្ចឹងហើយគាត់បម្រុងទុក។
ងាកមកលោក កឹម សុខា ក៏ដូចគ្នាដែរ កឹម សុខា ក៏បម្រុងទុកដែរ
ប៉ុន្ដែមិនមែនបម្រុងទុកដូចលោក សម រង្ស៊ី ទេ បម្រុងទុកបែបផ្សេង
គឺបម្រុងទុកបែបពេលវេលា បានសេចក្ដីថា លោក កឹម សុខា
មិនទាន់ចាកចេញពីគណបក្សសិទ្ធិមនុស្សទេ។
ដោយខ្លាចក្រែងនៅពេលដែលចុងខែមេសា និងពាក់កណ្ដាលខែឧសភា
ដែលជាពេលវេលានៃការកំណត់ការរៀបចំបញ្ជីបេក្ខជនគណបក្សឈរឈ្មោះនោះ ទៅ
គ.ជ.ប ។ ពេលហ្នឹង ទំនាស់រវាង កឹម សុខា និង សម រង្ស៊ី
ក្នុងការរៀបផលប្រយោជន៍លំដាប់លេខល្អៗ វាទៅអត់រួច
វាត្រូវផ្ទុះអញ្ចឹងគេមានកន្លែងបម្រុងទុក។ ត្រង់ហ្នឹងមួយ
ដែលជាទឡ្ហីករណ៍ដែលបញ្ជាក់ថា ពួកគាត់អត់ទាន់ជាក់លាក់ថាទៅមុខរួចទេ។
ទីពីរ នយោបាយឆបោកនេះ ឬក៏នយោបាយបោកប្រាស់នេះ
បងប្អូនប្រជាពលរដ្ឋអាចមើលឃើញខ្លះៗហើយ។
ពិតមែនគេពូកែស្ពិនភ្នែកតាមរូបភាពនៃឈ្មោះពិរោះ
ឬតាមរូបភាពនៃពាក្យរួបរួមគ្នាក្តី
តែយើងមើលតែសាវតាគាត់ឈ្លោះគ្នាបាត់ទៅហើយ វាពិបាកនឹងជួបគ្នាណាស់។
ឥឡូវយើងមិនចាំបាច់និយាយសាវតាទេ
គឺបងប្អូនប្រជាពលរដ្ឋធ្លាប់ដឹងហើយ យើងក៏បានបកស្រាយរួចហើយ។
ឥឡូវយើងមើលរូបភាពគណបក្សវិញម្តង។ សា្លកសញ្ញាគណបក្ស
ហើយនិងការតាំងរូបភាពគណបក្សនៅតាមដងវិថី។ បងប្អូនប្រជាពលរដ្ឋមើលទៅ
សូម្បីគំនូរព្រះអាទិត្យរះហ្នឹង ក៏ខុសគ្នាដែរ។ មានគំនូរមុននោះ
គំនូរហ្នឹងប្រហែលគូរដោយខាងក្រុម កឹម សុខា ឬក៏យ៉ាងណា យើងមិនដឹងទេ
គឺព្រះអាទិត្យរះដូចត្រឡប់ធាតុ។ តាមធម្មតាព្រះអាទិត្យគេរះពីខាងកើត។
ព្រះអាទិត្យដែលរះផុតមក គឺត្រូវក្រហមខាងលើ វាមិនអាចក្រហមខាងក្រោមទេ។
វាត្រូវពពកដែលនៅពីលើព្រះអាទិត្យហ្នឹង វាត្រូវក្រហម។
បើថ្ងៃលិចហ្នឹងវាផ្សេង រះឡើងវាត្រូវក្រហម
ឬក៏មានពន្លឺចាំងពីព្រះអាទិត្យហ្នឹង វាត្រូវក្រហមព្រឿងៗអីខ្លាំងណាស់។
តែគំនូរគណបក្សគេហ្នឹង បែរទៅជាក្រហមនៅខាងក្រោម ដូចពងទារផុសឡើង។
ខាងក្រោម សាច់ពណ៌ក្រហមរបស់ពងទារសាច់ពណ៌លឿងហ្នឹង។ ឥឡូវយើងផ្ទៀងមើលទៅ
ហើយសូម្បីតែផ្ទៃក៏ពណ៌ផ្សេងដែរ ហើយឥឡូវមានរូបផ្សេងទៀត
រូបដែលគេទើបធ្វើថ្មីហ្នឹង ដែលជារូបមានលោក កឹម សុខា និង លោក សម រង្ស៊ី
ហើយពេលហ្នឹង រូបដែលមានពីរនាក់ឈរនៅក្នុងរូបហ្នឹង
គឺស្រាប់តែព្រះអាទិត្យរះហ្នឹង ហាក់ដូចជាមានផុសមក
មានលក្ខណៈខុសពីព្រះអាទិត្យរះកាលពីមុននេះ។ អញ្ចឹងបានន័យថា
វាមិនទាន់មានការចុះសម្រុងគ្នានៅក្នុងរូបភាពផង។ ត្រង់ហ្នឹង
បងប្អូនអាចតាមមើលឃើញហើយ យើងបានពិនិត្យមើលហើយ។ ហើយចំណុចអស់នេះ
មិនមែនមានន័យថា គេគូសច្រឡំទេ ត្រង់ហ្នឹងហើយភាពមិនឯកភាពគ្នា
មិនបានចុះសម្រុងគ្នា ហើយធ្វើអ្វីៗដោយបង្ខំនោះ
វាអាចប្រទាញប្រទង់គ្នាអញ្ចឹងឯង។
របៀបគេបោកប្រាស់មួយទៀត ដូចដែលខ្ញុំចង់និយាយ គឺគេយកតួអង្គរូប កឹម សុខា
និង សម រង្ស៊ី មកបង្ហាញ។
ប៉ុន្ដែបងប្អូនមើលទៅអ្នកទាំងពីរហ្នឹងមានសារធាតុធ្វើការជាមួយគ្នាម្ដង
ហើយឬនៅ? បើមានសារធាតុធ្លាប់ជេរគ្នាមានមែន
តែអ្នកទាំងពីរហ្នឹងមានធ្លាប់ធ្វើការជាមួយគ្នាម្ដងហើយឬនៅ? កាលលោក
សម រង្ស៊ី នៅ ហ៊្វុនស៊ីនប៉ិច កឹម សុខា នៅគណបក្សលោកតា សឺន សាន
ពីរនាក់ហ្នឹង ក៏គ្មានសាវតានយោបាយជាមួយគ្នា ជាសហសេវឹក ឬក៏ជាដៃគូនយោបាយ
ក៏អត់ទេ។ រហូតដល់ កឹម សុខា ចូល ហ៊្វុនស៊ីនប៉ិច សម រង្ស៊ី
បង្កើតគណបក្សផ្សេង។ បើសិនអ្នកទាំងពីរហ្នឹងមានសាវតាដូចគ្នា ឬក៏ កឹម
សុខា មានសារធាតុដូច សម រង្ស៊ី វាគួរណាស់នៅពេលដែលគណបក្សលោកតា សឺន
សាន បានរលាយសូន្យសុង ក្លាយជាផេះផង់នោះ គួរណាស់មិនចាំបាច់គណបក្សលោកតា
សឺន សាន ទៅចូលគណបក្សហ៊្វុនស៊ីនប៉ិចទេ វាគួរតែមកចូលនឹងគណបក្ស សម
រង្ស៊ី ។ ពីព្រោះ កឹម សុខា អួតថា គណបក្សលោកតា សឺន សាន
ឬក៏ក្រុមនយោបាយរបស់ពួកគេវាសេរី ហើយលោក សម រង្ស៊ី ក៏ពួកសេរីដែរ។ លោក
សម រង្ស៊ី ក៏សាវតានយោបាយរបស់គាត់ ខាងស្ដាំនិយមដែរ
គាត់មិនមែនជាអ្នករាជានិយមទេ ប៉ុន្ដែនេះជាសិទ្ធិសេរីភាពនយោបាយ។
ប៉ុន្ដែបើសិនជា កឹម សុខា ជាអ្នកសេរីនិយម កឹម សុខា ត្រូវតែចូល សម រង្ស៊ី
ពីឆ្នាំ ១៩៩៨ ដែលចាញ់ឆ្នោត មិនបាច់ទៅចូលហ៊្វុនស៊ីនប៉ិចទេ។
លោក សត្យា រក្ស
សំណួរ៖ លោកបណ្ឌិតបានលើកឡើងអំពីសាវតា ឬក៏យើងហៅថា ប្រវត្តិនយោបាយរវាង
លោក សម រង្ស៊ី និង លោក កឹម សុខា ដែលយើងឃើញថា
សុទ្ធតែជាមនុស្សដែលឃ្លាតឆ្ងាយពីគ្នា ដែលមានទស្សនៈនយោបាយផ្សេងគ្នា
ហើយនិយាយឲ្យចំទៅ គឺថាដូចលេងបិទពួនគ្នាអញ្ចឹង។ កឹម សុខា នៅជាមួយ
លោកតា សឺន សាន រលាយ លោកតា សឺន សាន សូន្យសុងហើយក៏រត់ទៅចូល
ហ៊្វុនស៊ីនប៉ិច។ ហើយនៅពេលរត់ចូលហ៊្វុនស៊ីនប៉ិច គឺ សម រង្ស៊ី
ចេញពីហ៊្វិនស៊ីនប៉ិចទៅហើយ។ សម រង្ស៊ី កំពុងតែជេរ ហ៊្វុនស៊ីនប៉ិច ទៀត ថា
បក្ខពួកនិយម គ្រួសារនិយមអីជាដើម។
អញ្ចឹងយើងឃើញថា វាជារឿងមួយដែលផ្ទុយគ្នាស្រឡះតែម្ដង។ ចំណុចមួយទៀត
ដែលចូលក្នុងភាពផ្ទុយគ្នានោះដែរ គឺកាលពី កឹម សុខា
នៅក្នុងបក្សសិទ្ធិមនុស្ស ហើយដែលមិនទាន់ត្រូវរ៉ូវគ្នាហ្នឹង លោក
សម រង្ស៊ី ធ្លាប់ប្រមាថមាក់ងាយនូវនយោបាយសេដ្ឋកិច្ចរបស់ កឹម សុខា
រឿងនាំផ្កាស្នោ ផ្កាស្ដៅ ព្រលឹត ត្រកួន យកទៅលក់បរទេស។ កាលនោះក្រុម សម
រង្ស៊ី ថា នយោបាយ កឹម សុខា នេះ គឺនយោបាយ ឆ្កួតជ្រូក ជាដើម ។ល។
នេះគឺជាការប្រមាថពីគណបក្ស សម រង្ស៊ី ចំពោះនយោបាយផ្កាស្នោ ផ្កាស្ដៅ
របស់លោក កឹម សុខា។
ឥឡូវនេះ យើងឃើញថា ដំណើរនៃការចេញទៅបោកប្រជារាស្ដ្រ
តាមតំបន់ផ្សេងៗហ្នឹងឃើញថា គេដើរជាមួយគ្នា គឺក្រុមលោកម៉ីលោកថោងខាង សម
រង្ស៊ី ដែលដឹកនាំដោយ កឹម សុខា នាំគ្នាចេញទៅបោកប្រាស់ប្រជាពលរដ្ឋរួមគ្នា។
ហើយ កឹម សុខា បានប្រើប្រាស់នយោបាយផ្កាស្នោ ផ្កាស្តៅ សារជាថ្មី
ដោយការបោកប្រាស់លើកនេះ ខ្ញុំឃើញថា
មានចរឹតហាក់បីដូចជាព្រៃផ្សៃជាងមុនទៅទៀត ព្រៃផ្សៃខាងកុហក់ខាងភូត
តែម្តង។ គឺគាត់និយាយពីរឿងតម្លៃត្រប់ សូម្បីតែត្រប់ស្រួយ
ក៏ថាយកទៅលក់នៅស្រុកគេ បានរហូតទៅដល់ជាង ២០ ដុល្លារ ក្នុងមួយគីឡូក្រាម
ម្ទេសជាង ២០ ដុល្លារ ក្នុងមួយគីឡូក្រាម ត្រយូងចេកជិត ១០
ដុល្លារក្នុងមួយត្រយូងចេក ត្រកួនជាង ១០ដុល្លារ ក្នុងមួយគីឡូក្រាម
ហើយគាត់ពន្យុះឲ្យអ្នកស្រុកយើងនៅខាងព្រែកឯកនេះ ថាដាំឬមិនដាំ
អីជាដើម ។ល។
អញ្ចឹងត្រង់នេះ វាគឺដល់ដំណាក់កាលមួយដែលខ្ញុំគិតថា គណបក្សសម រង្ស៊ី
ប្រហែលជាទើសទាល់ជាមួយនឹងនយោបាយឡប់ឡែរបស់ កឹម សុខា
ដែលមិនបានលើកអីពីបញ្ហាធំដុំជាគោលនយោបាយជាតិ
ជាដំណោះស្រាយដើម្បីឲ្យប្រជាពលរដ្ឋមានបាននោះឡើយ។ ហើយរបៀបផ្កាស្នោ
ផ្កាស្ដៅ នេះ គឺធ្វើមាន ធ្វើបានតែជាសម្លេងទេ ត្រង់ហ្នឹងគេហៅថា
ភូតបានតែថាហ្នុងណា តែការពិតវាគ្មាន។
អញ្ចឹងខ្ញុំចង់ឲ្យលោកបណ្ឌិតជួយពន្យល់ត្រង់ចំណុចនេះ
ជូនទៅដល់ប្រជាពលរដ្ឋថាបើសិនណាជា កឹម សុខា
ពិតជាមានសុឆន្ទៈល្អចំពោះប្រជាពលរដ្ឋមែន
ចង់ឲ្យប្រជាពលរដ្ឋមានជីវភាពធូរធារ មានបានមែន តើ កឹម សុខា
គួរធ្វើយ៉ាងម៉េចជាមួយនឹងនយោបាយផ្កាស្នោ ផ្កាស្ដៅរបស់គាត់ហ្នឹង
លោកបណ្ឌិត?
លោកបណ្ឌិត ឈឹម ផលវរុណ
ចម្លើយ៖ កឹម សុខា ធ្លាប់និយាយថា កាលពីមុននៅអាមេរិកហ្នឹង
មេឃុំនៅអាមេរិកគេជិះយន្ដហោះដើររកទីផ្សារ គឺ កឹម សុខា
និយាយខ្លួនឯង។ ឥឡូវ កឹម សុខា បានមេឃុំ ១៨
ហើយម៉េចមិនជិះយន្ដហោះដើររកទីផ្សារ ឲ្យឃុំដែលខ្លួនឈ្នះឆ្នោតទៅ?
ចាំបាច់ដល់បោះឆ្នោតជាតិឈ្នះអី រកទីផ្សារឲ្យហើយទៅ។
តែគ្រាន់តែយើងចាប់អារម្មណ៍ត្រង់អញ្ចេះ
សូមបងប្អូនប្រជាពលរដ្ឋតាមដានជាមួយគ្នា
តើបងប្អូនដែលឮមន្ដ្រីរបស់គណបក្សសម រង្ស៊ី និយាយផ្កាស្នោ
ផ្កាកំប្លោកទេ ចាប់តាំងពីគេរួមគ្នាជាសំបកនោះ។ គេទៅជាមួយ កឹម សុខា
ទៅធ្វើនយោបាយអាវ៉ាសែ នៅតាមទីសាធារណៈក៏ពិតមែន
ប៉ុន្ដែចំណុចរឿងនយោបាយសេដ្ឋកិច្ចឡប់ឡែរបស់ កឹម សុខា
មិនដែលឮចេញពីបបូរមាត់របស់ក្រុម សម រង្ស៊ី ទេ។ វាគួរណាស់បើអ្នកហ្នឹង
អ្នកទាំងពីរហ្នឹងរួមគ្នាមែន បើ កឹម សុខា បន្ដនិយាយនយោបាយស្លឹកចេក
នយោបាយត្រយូងចេកអីទាំងអស់ហ្នឹង វាគួរតែក្រុមលោក សម រង្ស៊ី
ត្រូវនិយាយដែរតែអត់ឮសោះ។ ហើយវាគួរតែខាងក្រុមលោក សម រង្ស៊ី
និយាយច្រើនជាង ព្រោះខាងក្រុមលោក សម រង្ស៊ី ម្នាក់ៗគេថា ដោយសារលោក សម
រង្ស៊ី ជាអ្នកសេដ្ឋកិច្ច ហើយ កឹម សុខា អ្នកគីមីទេ
គឺអ្នកជួយថែរស្លឹកចេកកុំឲ្យវាឆាប់ខូច ដែលអ្នកសេដ្ឋកិច្ចវាគិតថា
យកស្លឹកចេកហ្នឹងចំណេញឬអត់? ឥឡូវយើងគណនាទាំងអស់គ្នា។ ឥឡូវថា
ត្រប់ស្រួយ លក់បាន ១០ ដុល្លារ ឥឡូវយើងឲ្យ ៣០ ដុល្លារទៀតចុះ
មួយគីឡូក្រាម។ តើនយោបាយសេដ្ឋកិច្ចរបស់ កឹម សុខា អាចលក់ត្រប់ស្រួយហ្នឹង
ក្នុងមួយឆ្នាំបាន ១០ តោន ទេ? តើលក់បានទេ ១ម៉ឺនគីឡូក្រាម? បើ
១ម៉ឺនគីឡូក្រាម យើងឲ្យអំបាញ់មិញមួយគីឡូក្រាម ៣០ ដុល្លារ ១ម៉ឺនគីឡូក្រាម
គុណនឹង ៣០ ទើបបាន ៣០ ម៉ឺន អត់ទាន់បាន ១ លានដុល្លារទេ។ ហើយ ៣០ ម៉ឺន
ហ្នឹង គិតថ្លៃដើមថ្លៃអីទាំងអស់។ ឥឡូវក្នុង ៣០ ដុល្លារ
ថាចំណេញឲ្យពាក់កណ្ដាលទៀតទៅចុះ ឲ្យចំណេញដល់ ២០ ដុល្លារទៀតចុះ
វាមហាចំណេញចុះ រកស៊ីឲ្យតែចំណេញ ២០ ភាគរយគេអរទៅហើយ ឥឡូវឲ្យ កឹម សុខា
ចំណេញ ៥០ ភាគរយទៅចុះ។ បានន័យថា លក់ត្រប់ស្រួយមួយគីឡូក្រាម បាន៣០ ដុល្លារ
ចំណេញ២០ ដុល្លារ។ ហើយ ២០ ដុល្លារ មួយឆ្នាំ លក់បានតែ ១០ តោន គឺ មួយម៉ឺន
គីឡូក្រាម។ ដូច្នេះ ២០ គុណនឹងមួយម៉ឺន ទើបបាន ២០ ម៉ឺនហ្នឹង
ហើយសេដ្ឋកិច្ចជាតិ មិនមែនទៅយកប្រាក់ចំណេញហ្នឹងទេ
គឺគិតទៅលើអត្រានៃប្រាក់ចំណេញទៅវិញទេ ព្រោះបង់ពន្ធគយបង់អី
អញ្ចឹងប្រជាពលរដ្ឋ បានមួយចំណែក ក្រុមហ៊ុនឯកជនក៏ត្រូវបានមួយចំណែក
ហើយធ្លាក់មករដ្ឋបន្ដិចហ្នឹង។ រកចំណេញរស់ដែរឬអត់ បើធ្វើអញ្ចឹង?
សេដ្ឋកិច្ចហ្នឹង គឺសេដ្ឋកិច្ចនយោបាយបំផ្លាញជាតិ សុទ្ធសាធតែម្ដង។ ប៉ុន្ដែ
ហេតុអីបានលោក សម រង្ស៊ី អត់ត? គឺដូចលោក សត្យារក្ស
បាននិយាយប្រហែលជាគាត់ទើសទាល់ចង់ថប់ដង្ហើមម្ដងៗ រឿងកឹម សុខា
ល្ងង់ខាងសេដ្ឋកិច្ច ហើយធ្វើអាឡិអាឡក់អញ្ចឹង។ ប៉ុន្ដែ គេហៅកត្តាបរាជ័យ
ចេះតែអត់ធ្មត់ទៅដើម្បីយ៉ាងហោចណាស់ក៏ស្រោចស្រង់ខ្លួនឯងបាន។ មួយទៀត
យើងគិតទៅឥឡូវថា អំបាញ់មិញ ម្ទេស ឲ្យ ៣០ ទៀត តើ កឹម សុខា មួយឆ្នាំ
ទូទាំងប្រទេសខ្មែរអាចនាំម្ទេសបាន ១០ តោនឬទេ?
តើអាចរកទីផ្សារនៅពិភពលោកត្រូវការ ១០ តោនម្ទេសទេ? បើស្រូវអីរាប់រយតោន
ដល់លានតោនក៏បានដែរ ហ្នឹងគឺផលិតកម្ម សេចក្ដីត្រូវការវាខុសគ្នា
ប៉ុន្ដែម្ទេសហ្នឹង នរណាត្រូវការម្ទេសដល់រាប់តោន។
តែបើយកម្ទេសស្រស់គឺខ្ទេចតែម្ដង អញ្ចឹង១០ តោន ១គីឡូក្រាមចំណេញ ២០ ដុល្លារ
ប៉ុន្តែជាក់ស្ដែងវាអត់ចំណេញដល់អញ្ចឹងទេ។
លោក សត្យា រក្ស
សំណួរ៖ ឧទាហរណ៍ថា កឹម សុខា ធ្វើបានទៅចុះ ដោយគាត់ទិញត្រកួន
១គីឡូក្រាម ជាង១០ ដុល្លារ ម្ទេស ១គីឡូក្រាម ជាង២០ ដុល្លារ
ហើយលុយខ្យល់ដែលគាត់ថាជាងៗនោះ ទុកឲ្យគាត់ចំណេញទៅចុះ
ហើយទិញពីប្រជាពលរដ្ឋគឺត្រកួនតែ១០ ដុល្លារ ឬម្ទេសតែ ២០
ដុល្លារបានហើយ។ តាមពិតទៅគឺវាមិនអាចទៅរួចទេ
តែយើងលើកតាមសម្តីគាត់ភូតភរមកបង្ហាញប្រជាពលរដ្ឋតែប៉ុណ្ណោះ
ពីព្រោះសម្តីភូតភរនេះយើងមិនអាចទទួលយកបាន
ហើយដែលយើងលើកយកមកជូនបងប្អូនយើងដើម្បីពិចារណាទាំងអស់គ្នា។
ប្រសិនបើករណីរបស់គាត់នោះវាអញ្ចឹងមែន
តើប្រជាពលរដ្ឋខ្មែរនៅក្នុងប្រទេស
អាចមានលុយឯណាដើម្បីទិញទទួលទានទៅ បើ១គីឡូក្រាមជាង១០
ដុល្លារទៅហើយ? បើគិតពីប្រាក់ខែរបស់ កឹម សុខា
ដែលសន្យាថានឹងឡើងឲ្យ១៥០ ដុល្លារវិញ
គឺយកទៅទិញត្រកួនមិនបាន១៥គីឡូក្រាមផង។តើរឿងនេះវាពិតដូចការសន្យា
របស់ កឹម សុខា ដែរឬទេ?សូមលោកបណ្ឌិតជួយពន្យល់?
លោកបណ្ឌិត ឈឹម ផលវរុណ
ចម្លើយ៖ ប្រសិនបើលោក កឹម សុខា គាត់មើលឃើញការចំណេញពិតមែននោះ
គឺគាត់ច្បាស់ជាឲ្យប្រពន្ធគាត់រកស៊ីរឿងនេះហើយ។ការនាំប្រជាពលរដ្ឋ
ឲ្យរកស៊ីបែបនេះគឺជាការបំផ្លាញសេដ្ឋកិច្ចគ្រួសាររបស់ប្រជាពលរដ្ឋ
យ៉ាងពិតប្រាកដ គឺមិនចាំបាច់និយាយទៅដល់សេដ្ឋកិច្ចជាតិនោះទេ។
ឥឡូវនេះ
ប្រសិនបើគាត់ធ្វើបានមែនគឺប្រជាពលរដ្ឋមិនទាន់យកលុយពីគាត់ភ្លាមទេ
គឺយើងឲ្យគាត់ជំពាក់លុយ១ខែមុន ហើយប្រជាពលរដ្ឋប្រមូលផ្កាស្នោរ
ស្លឹកចេក ឬត្រយូងចេក ត្រប់ ឬម្ទេសទៅលក់ឲ្យ កឹម សុខា នៅភ្នំពេញនេះ
ហើយឲ្យ លោក កឹម សុខា ធ្វើកិច្ចសន្យានាំចេញទៅលក់នៅក្រៅប្រទេសទៅ
ហើយពេលលក់បានត្រូវសងលុយមកកសិករវិញ។
ពេលនោះច្បាស់ជាសេដ្ឋកិច្ចគ្រួសាររបស់ កឹម សុខា រលាយជាមិនខាន
គឺមិនបាច់និយាយទៅដល់សេដ្ឋកិច្ចជាតិទេ។
ទាក់ទងទៅនឹងរឿងសន្យាខ្យល់មួយទៀត គឺរឿង ៤ម៉ឺន យើងឃើញថា បើ កឹម សុខា
ហ៊ានទិញត្រកួន១គីឡូក្រាមរហូតទៅដល់១០ ដុល្លារ ទៅហើយ អញ្ចឹងគឺរឿង
៤ម៉ឺន សម្រាប់ចាស់ៗនោះ គឺគាត់អាចចែកគ្រាប់ត្រកួនតែមួយក្តាប់ទៅ
គឺចាស់ៗអាចបានច្រើនជាង១០ ដុល្លារដែល កឹម សុខា សន្យា ចិញ្ចឹមទៅទៀត។
ដូច្នេះ នយោបាយភូតសុទ្ធសាធរបស់ កឹម សុខា នេះ
គឺជានយោបាយបំផ្លាញសេដ្ឋកិច្ចគ្រួសារ
និងបំផ្លាញសេដ្ឋកិច្ចជាតិទាំងស្រុង
ពីព្រោះគាត់ធ្វើឲ្យប្រជាពលរដ្ឋមានអារម្មណ៍រំភើបជ្រុលហួសហេតុ
ហួសពីការពិត ដោយការកុហក់របស់គាត់។
នយោបាយបំផ្លាញសេដ្ឋកិច្ចគ្រួសារ របស់ កឹម សុខា
នេះគឺមិនចុះសម្រុងគ្នាជាមួយនឹងក្រុមលោក សម រង្ស៊ី រួចទៅហើយ
ពីព្រោះគាត់ភូតខ្លាំងពេក។ហើយបងប្អូនចាំតាមដានមើលទៅ
ថាតើក្រុមលោក សម រង្ស៊ី មាននិយាយពីនយោបាយលក់ផ្កាត្រកួន
ផ្កាស្នោរ នេះដែរឬទេ? គឺអត់មានទេ។
លោក សត្យា រក្ស
សំណួរ៖ ត្រង់ចំណុចនេះ ចំពោះក្រុមរបស់ លោក សម រង្ស៊ី
ដែលមានតួនាទីតូចតាចនៅតាមខេត្ត ឬក៏សកម្មជនរបស់ សម រង្ស៊ី
នោះគឺកំពុងតែបានបន្លឺពាក្យ ដោយសង្ស័យថា តើ កឹម សុខា
ដែលកំពុងតែនិយាយពាក្យទាក់ទងទៅនឹងកសិកម្ម
នយោបាយសេដ្ឋកិច្ចកសិកម្មរបស់គាត់នោះ
គឺជាការមួយធ្វើឲ្យអាប់ឱនដល់គណបក្ស សម រង្ស៊ី ដែរ។ ដូច្នេះ
សកម្មជនទាំងនោះកំពុងតែឆ្ងល់ថា ប្រហែលជា កឹម សុខា
គឺជាមនុស្សរបស់ សម្តេចអគ្គមហាសេនាបតីតេជោ ហ៊ុន សែន
ឲ្យទៅបំផ្លាញគណបក្ស សម រង្ស៊ី មែនដែរឬទេ?
លោកបណ្ឌិត ឈឹម ផលវរុណ
ចម្លើយ៖ ត្រង់នេះ ខ្ញុំឃើញមន្ត្រីគណបក្ស សម រង្ស៊ី
ដែលទៅចូលរួមក្នុងវេទិកា អាវ៉ាសែជាមួយ កឹម សុខា គឺហៅ កឹម សុខា
ថាសុទ្ធតែលោកប្រធានៗ។
ការលើកបែបនេះគឺមានលក្ខណៈដូចជាការបញ្ចើចបញ្ចើរ
ពីព្រោះតាំងពីដើម
រហូតមកដល់ពេលនេះគឺពួកគេមិនដែលត្រូវគ្នាទេ។
ប៉ុន្តែនៅពេលដែលគេលើក បែបនេះគឺ កឹម សុខា
ហាក់បីដូចជាជោរតាមគេដែរ។ អញ្ចឹង យើងឃើញថា អ្នកទាំងពីរនេះគឺ
សម រង្ស៊ី និង កឹម សុខា សុទ្ធតែសាកចិត្តគ្នាទៅវិញទៅមក។
ដូច្នេះ ខ្លឹមសារនយោបាយរបស់ក្រុមលោក សម រង្ស៊ី
គឺសឹងតែគ្មានអ្វីដែលអភិវឌ្ឍល្អជាងទេ រីឯខាង កឹម សុខា
គឺគ្របដណ្តប់ទៅដោយសម្តីអួតក្អេងក្អាង។ ដូច្នេះ
ទាំងពីរនាក់នោះកំពុងតែបាត់អត្តសញ្ញាណហើយ ពិសេសគឺខាងក្រុមលោក សម រង្ស៊ី
តែម្តង។ ប៉ុន្តែ តាមពិតគឺពួកគេកំពុងតែបោកគ្នាទៅវិញទៅមក។ សម រង្ស៊ី
កំពុងតែរុញមន្ត្រីរបស់គាត់ឲ្យបញ្ចើចបញ្ចើរ កឹម សុខា
ដើម្បីបន្លំប្រជាពលរដ្ឋថា ក្រុម សម រង្ស៊ី ពិតជាចង់រួបរួមជាមួយ កឹម
សុខា ពីព្រោះនៅពេលបោះឆ្នោត ក្រុមប្រឹក្សាឃុំ សង្កាត់ គឺខាង កឹម សុខា
បានចោទថាគឺខាង សម រង្ស៊ី ទេដែលមិនព្រមរួបរួម។ ប៉ុន្តែឥឡូវនេះ គឺខាង
សម រង្ស៊ី ព្រមរួបរួមហើយ
និងបានធ្វើជាប្រធានបក្សថ្មីជាផ្លូវការទៅហើយ ចំណែក កឹម សុខា
គឺមិនទាន់ចេញពីបក្សចាស់របស់ខ្លួនទេ។ ម៉្យាងទៀត លោក សម
រង្ស៊ី មិនដែលនិយាយអំពីរបៀបរៀបចំគណបក្សថ្មីនោះទេ
ហើយគ្រាន់តែបញ្ជាឲ្យមន្ត្រីរបស់ខ្លួនទៅតែជាមួយ កឹម សុខា បានហើយ។
ចំណុចនេះ សូមបងប្អូនពិចារណា។ បើតាមការវិភាគរបស់ខ្ញុំ គឺមន្ត្រីរបស់
សម រង្ស៊ី កំពុងតែប្រើប្រាស់ កឹម សុខា
ដើម្បីទទួលបានការគាំទ្រពីប្រជាពលរដ្ឋមកលើគណបក្ស សម រង្ស៊ី
ត្រឡប់មកវិញ ពីព្រោះ កឹម សុខា ពេលមុនបានទាញយកសកម្មជនរបស់គណបក្ស សម
រង្ស៊ី អស់មួយចំនួន។ ចំណុចនេះ កឹម សុខា មិនបានមើលឃើញទេ
ដោយសារតែក្រុមលោក សម រង្ស៊ី តែងតែលើក កឹម សុខា ថាលោកប្រធានៗ
ហើយពួកគេមិនបានលើកអំពីនយោបាយ ផ្កាស្នោរ ផ្កាកំប្លោក ដូច កឹម សុខា ទេ
គឺគេលើកតែការទាញយកប្រជាប្រិយភាពពីអតីតសកម្មជនរបស់ខ្លួនដែលបាន
បាត់បង់ពីមុនតែប៉ុណ្ណោះ។ រឿងនេះខ្ញុំជឿថា នៅចុងខែ មេសា
ឬដើមខែឧសភា ពេលនោះរឿងរ៉ាវបែកបាក់វានឹងផ្ទុះឡើង
ឬដោយសារភាពមិនចុះសម្រុងគ្នាមិនអាចទៅរួច គឺ សម រង្ស៊ី
នឹងប្រើឥទ្ធិពលគណបក្សថ្មី
ដើម្បីគ្របដណ្តប់ទៅលើគណបក្សក្នុងនាមខ្លួនជាប្រធាន។
ទោះបីជាមានការឯកភាពគ្នាថាការសម្រេចអ្វីៗ
គឺត្រូវសម្រេចជាឯកច្ឆន្ទក៏ដោយ ក៏រឿងនេះមិនអាចទៅរួចទេ
ពីព្រោះគណបក្ស កឹម សុខា គឺជាគណបក្សតូចតាចប៉ុណ្ណោះ គឺបីអាសនៈ
ទល់នឹង២៣។ អញ្ចឹង យើងឃើញថាលោក សម រង្ស៊ី
គាត់គ្មានសង្ឃឹមក្នុងការប្រមូលយកអ្នកបោះឆ្នោតពីគណបក្សប្រជាជន
កម្ពុជានិងគណបក្ស ហ៊្វុនស៊ីនប៉ិច ទេ។ គណបក្សប្រជាជនកម្ពុជា
អាចយកសម្លេងគាំទ្រថែមទៅវិញទេ រីឯ គណបក្ស សម រង្ស៊ី
គឺពិបាកក្នុងការទប់កុំឲ្យអ្នកដែលធ្លាប់បោះឆ្នោតឲ្យគណបក្ស សម
រង្ស៊ី រត់ទៅបោះឆ្នោតឲ្យគណបក្សប្រជាជន
ឬក៏ងាកបន្តិចបន្តួចទៅបោះឆ្នោតឲ្យគណបក្ស ហ៊្វុនស៊ីនប៉ិច
ឬក៏ចំនួនបន្តិចបន្តួចមួយទៀតទៅបោះឲ្យ កឹម សុខា។ ប៉ុន្តែ សម រង្ស៊ី
មិនអាចទប់ចរន្តនេះទេ គឺ សម រង្ស៊ី ខ្លាចចរន្តទាំងអស់នេះរត់ទៅគាំទ្រ
កឹម សុខា អញ្ចឹងហើយទើបប្រើវិធីរួបរួមហ្នឹង
ដោយយ៉ាងហោចណាស់សង្ឃឹមថាខ្លួនអាចធានានូវការគាំទ្រអប្បបរមាក្នុងការ
រក្សាអាសនៈ ៤ ទៅ ១០ កៅអីតទៅទៀត។ ចំណែក កឹម សុខា ដឹងថាខ្លួនទៅអត់រួច
អញ្ចឹងហើយទើបខំប្រឹងទាញសម្លេងឆ្នោតពី សម រង្ស៊ី
ដូចកាលពីការបោះឆ្នោតឃុំ សង្កាត់ អញ្ចឹងដែរ
ពីព្រោះបើមិនទាញសម្លេងពី សម រង្ស៊ី គឺ កឹម សុខា មិនដឹងទាញពីណាទេ។
ដូច្នេះហើយ គឺ កឹម សុខា
ត្រូវតែធ្វើដូចការធ្លាប់ទាយទុករបស់ខ្ញុំថាត្រូវតែទៅចូលរួម
ជាមួយ លោក សម រង្ស៊ី ។ ប៉ុន្តែ
នៅខណៈចុងក្រោយនៃការធ្វើបញ្ជីបេក្ខជនឈរឈ្មោះ
គឺជាពេលដែលបញ្ជាក់ថា តើនរណាចាញ់ នរណាឈ្នះ រវាង កឹម សុខា និង សម
រង្ស៊ី ជាមិនខាន
គឺនៅថ្ងៃចុងក្រោយនៃការសម្រេចដាក់បញ្ជីបេក្ខជនឈរឈ្មោះទៅ គ ជ ប ។
លោក សត្យា រក្ស
សំណួរ៖ រឿងរៀបលេខរៀងឈរឈ្មោះតាមលំដាប់នេះ
គឺនៅតាមខេត្តខ្លះមានសញ្ញាធ្លាយចេញខ្លះៗដែរ ឬប្រហែលជា កឹម សុខា
ច្រឡំមាត់ដោយសារគាត់មានកំហឹងក្នុងចិត្តទប់មិនបានក៏ធ្លាយមាត់ចេញមក
នូវសញ្ញាមិនល្អ ដោយទី១គឺបញ្ហាលេខរៀង គឺ កឹម សុខា
បានលើកថាគណបក្សសិទ្ធិមនុស្សរបស់គាត់ដែលមករួបរួមជាមួយគណបក្ស សម
រង្ស៊ី មិនដែលចង់បានលេខរៀង ឬក៏លេខល្អអីនោះទេ
គឺគាត់ចង់តែមករួបរួមទេ។ ប៉ុន្តែ
ជាក់ស្តែងដែលលោកបណ្ឌិតធ្លាប់ធ្វើការជាមួយ កឹម សុខា
នៅក្នុងអង្គការសិទ្ធិមនុស្សជាមួយគាត់កាលពីមុនមកនោះ
តើលោកបណ្ឌិតយល់ថាចរឹតរបស់ កឹម សុខា គឺជាមនុស្សដែលគិតពីបញ្ហាជាតិ
ជាងបញ្ហាបុគ្គលអញ្ចឹងមែន ឬយ៉ាងម៉េច?
លោកបណ្ឌិត ឈឹម ផលវរុណ
ចម្លើយ៖ កាលពីនៅជាមជ្ឍមណ្ឌលសិទ្ធិមនុស្សកម្ពុជា លោក កឹម សុខា
គ្មានខួរក្បាលជាមួយនឹងអង្គការក្រៅរដ្ឋាភិបាលទេ
គឺគាត់ធ្លាប់បានជជែកជាមួយខ្ញុំថាគាត់យកមុខរបរនយោបាយចិញ្ចឹមជីវិត
និងប្រពន្ធកូនគាត់ហ្នឹងឯង។ នៅក្នុងគណបក្ស សម រង្ស៊ី
ក៏មានក្រុមរបស់គាត់នៅក្នុងហ្នឹងដែរ អញ្ចឹងគាត់មានផ្លូវពីរ
គឺទី១ត្រូវជ្រៀតចូលទៅក្នុងគណបក្ស សម រង្ស៊ី
និងទី២បើជ្រៀតចូលមិនបានគឺត្រូវបង្កើតគណបក្សខ្លួនឯង។ ដូច្នេះ
ចុងក្រោយ គាត់ក៏បង្កើតគណបក្សខ្លួនឯង។ ប៉ុន្តែ កឹម សុខា
មានមហិច្ឆតាគ្រាន់តែចង់ធ្វើត្រឹមជាតំណាងរាស្ត្រប៉ុណ្ណោះ
គឺគ្រប់គ្រាន់ហើយ គឺមិនអាចទៅធ្វើអ្វីផ្សេងទៀតបានទេ
ពីព្រោះសមត្ថភាពបានត្រឹមប៉ុណ្ណឹង។
ហើយនៅអាណត្តិក្រោយនេះគឺចង់បានធ្វើតំណាងរាស្ត្រខ្លួនឯងផង
និងប្រពន្ធខ្លួនឯងផង ដោយធ្វើម៉េចកុំឲ្យរំលងអ្នកទាំងពីរនេះ។
កាលពីអាណត្តិមុន គឺជាការសំណាងណាស់ដែលជាប់បាន៣កៅអី កាលពីឆ្នាំ២០០៨
មានដោយ កឹម សុខា មួយដែរ។ ប្រសិនបើជាប់៣កៅអីដែរ តែអត់មានជាប់ កឹម សុខា
ប្រហែលជានយោបាយរបស់គណបក្ស កឹម សុខា ត្រូវស្លាប់បាត់ទៅហើយ ។
ឥឡូវនេះ គាត់មិនចង់ដណ្តើមធ្វើបេក្ខជននាយករដ្ឋមន្ត្រីទេ
ប៉ុន្តែដើម្បីជាមុខមាត់របស់គណបក្សគាត់ គឺចេះតែឈរទៅ
ដើម្បីកុំឲ្យគេថាខ្លួនអន់ ពីព្រោះ សម រង្ស៊ី នៅក្រៅហើយ។
គាត់ថែមទាំងបានដឹងថា ក្រុមរបស់លោក សម រង្ស៊ី
មិនព្រមឲ្យគាត់ឈរឈ្មោះជាបេក្ខជននាយករដ្ឋមន្ត្រីទេ ចំណែក កឹម
សុខា
ដោយសារខ្លួនដណ្តើមមិនបានក៏ត្រូវធ្វើលក្ខខណ្ឌថ្នូរ
ដោយឲ្យប្រពន្ធគាត់បានឈរលេខល្អ។ រឿងនេះ គឺវាមានតែប៉ុណ្ណឹងទេ
ហើយបងប្អូនប្រជាពលរដ្ឋចាំមើលទៅ។ នៅក្នុងគណបក្ស កឹម សុខា
ពេលនេះគឺមានទំនាស់ផ្ទៃក្នុងរវាងលោក កឹម សុខា
និអគ្គលេខាធិការខ្លួនឯងហើយ
គឺទំនាស់ដោយសារការលុកលុយចូលក្នុងនយោបាយរបស់ប្រពន្ធ កឹម សុខា ។
ទំនាស់នេះជាទំនាស់ធ្ងន់ធ្ងរ គឺមិនដូចការលើករបស់ កឹម សុខា
ដែលថាមិនគិតអំពីលេខលំដាប់នោះទេ។ ឧទាហរណ៍ នៅខេត្តព្រៃវែង
ប្រសិនបើប្រពន្ធ កឹម សុខា ទៅដណ្តើមឈរលេខរៀងល្អជាង
អ្នកនយោបាយក្តាមគ្រោងមកពីបារាំងនោះ គឺប្រាកដជាផ្ទុះទំនាស់ហើយ។
ឧទាហរណ៍មួយទៀត ប្រសិនបើប្រពន្ធលោក កឹម សុខា
ទៅឈរលេខល្អនៅខេត្តកណ្តាលលើអ្នកនយោបាយ ដែលមកពីអាមេរិកមួយពូជនោះ
ក៏ប្រាកដជាមានរឿងជាមិនខាន។ ដូច្នេះ កឹម សុខា
មិនអាចឲ្យប្រពន្ធរបស់ខ្លួន
ទៅឈរឈ្មោះនៅកន្លែងណាផ្សេងបានទេក្រៅពីកន្លែងទាំងបីនោះ ពីព្រោះ
កឹម សុខា បានយកខេត្តកំពង់ចាមហើយ អញ្ចឹងប្រពន្ធ កឹម សុខា
បើមិនយកខេត្តកណ្តាល គឺត្រូវយកខេត្តព្រៃវែង។ ប៉ុន្តែ
បើទាមទារទៅឈរឈ្មោះនៅកន្លែងផ្សេងទៀតនោះ សម រង្ស៊ី មិនឲ្យទេ។ គេអាចឲ្យឈរ
ប៉ុន្តែនៅលេខរៀងខាងក្រោមគេ។ អញ្ចឹង សម រង្ស៊ី មិនអនុញ្ញាត្តិឲ្យខាង
កឹម សុខា មានលទ្ធភាព ហើយខាង សម រង្ស៊ី ខ្លួនឯងអត់លទ្ធភាពបានទេ។
នេះគ្រាន់តែជាការប្រមើលមើលប៉ុណ្ណោះ ហើយរឿងពិតយើងនឹងឃើញនៅដើមខែមេសា
ជាមិនខាន។
ចំពោះក្រដាសលំដាប់លេខរៀងបេក្ខជន ដែល កឹម សុខា
យកទៅលក់ដើម្បីដូរឡាននោះ គឺនៅជំពាក់ការសន្យានៅឃុំ
សង្កាត់មិនទាន់ដោះចេញនៅឡើយទេ។ ការដែល កឹម សុខា ទៅបារាំងលើកនេះ លោក សម
រង្ស៊ី លែងល្ងង់ទៀតហើយ ដោយមិនឲ្យ កឹម សុខា យកឈ្មោះការចូលរួមជាមួយ សម
រង្ស៊ី ដើម្បីទៅប្រមូលលុយមន្ត្រី សម រង្ស៊ី នៅក្រៅប្រទេស
ដើម្បីយកមកដោះពាក្យសន្យា របស់ កឹម សុខា កាលពីបោះឆ្នោតឃុំ សង្កាត់
ឆ្នាំ២០១២ នោះទៀតទេ។ ដូច្នេះហើយ ក្រោយពី កឹម សុខា
ត្រឡប់មកពីបារាំងវិញគឺនៅសល់លុយតែ៨០០ អឺរ៉ូ ប៉ុណ្ណោះ។ ឥឡូវនេះ
ឮថាកំពុងចង់ទៅអាមេរិកដើម្បីរកលុយទៀតហើយ។ អញ្ចឹងហើយ កឹម សុខា
នៅជំពាក់ការសន្យាកាលពីឆ្នាំ២០១២ ហើយនៅឆ្នាំ២០១៣នេះ សម រង្ស៊ី
កំពុងគៀប កឹម សុខា មិនឲ្យរើខ្លួនរួចឡើយ។
សរុបមក កម្មវិធីរបស់យើង
តែងតែលើកយកនូវខ្លឹមសារខុសឆ្គងមួយចំនួនដែលគណបក្សប្រឆាំងកំពុង
តែសាបព្រោះទាំងងងឹតងងល់ដល់ប្រជាពលរដ្ឋ
ដើម្បីឆ្លុះបញ្ចាំងអំពីទង្វើខុសឆ្គងទាំងនោះ
ដើម្បីឲ្យអ្នកនយោបាយប្រឆាំងត្រូវកែខ្លួនធ្វើនយោបាយឲ្យមានប្រយោជន៍
សម្រាប់សង្គម
ហើយបើធ្វើនយោបាយចាញ់ត្រូវចាញ់ក្នុងសេចក្តីថ្លៃថ្នូរ
បើឈ្នះត្រូវឈ្នះក្នុងសេចក្តីថ្លៃថ្នូរ ដើម្បីជាប្រយោជន៍ ជាតិ សាសនា
ព្រះមហាក្សត្រ ដែលយើងកំពុងដង្ហែរតាម
ហើយយើងទាំងអស់គ្នាក៏កំពុងតែអបអរសាទរនឹងសមិទ្ធផលជាតិ
ដែលកំពុងតែរីកដុះដាល
ក្រោមការដឹកនាំរបស់រាជរដ្ឋាភិបាលបច្ចុប្បន្ន៕
សម្រង់ព័ត៌មាន៖ លោក នូ សាវុធឌី