មតិសំណេះសំណាល ឯកឧត្តម បណ្ឌិតសភាចារ្យ សុខ អាន ក្នុងពិធីបិទសន្និបាតបូកសរុបលទ្ធផលការងារ របស់ក្រុមប្រឹក្សាខេត្តតាកែវអាណត្តិទី១ និងបូកសរុបលទ្ធផលការងារប្រចាំ ឆ្នាំ២០១៣ និងទិសដៅការងាររបស់រដ្ឋបាលខេត្ត
ពិធីបិទសន្និបាតបូកសរុបលទ្ធផលការងារ របស់ក្រុមប្រឹក្សាខេត្តតាកែវអាណត្តិទី១ និងបូកសរុបលទ្ធផលការងារប្រចាំ ឆ្នាំ២០១៣ និងទិសដៅការងាររបស់រដ្ឋបាលខេត្ត និងពិធីប្រកាសផ្ទេរភារកិច្ចតែងតាំង មុខតំណែង អភិបាល អភិបាលរងខេត្ត និងអភិបាលក្រុង ស្រុកមួយចំនួននៃខេត្តតាកែវ
ខេត្តតាកែវ ថ្ងៃទី ១៨ ខែមីនាឆ្នាំ២០១៤
- ឯកឧត្តម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ
- ឯកឧត្តម លោកជំទាវ សមាជិក សមាជិកានៃរដ្ឋសភានិងរាជរដ្ឋាភិបាល
- ឯកឧត្តម លោកជំទាវ អស់លោក លោកស្រី ថ្នាក់ដឹកនាំ មន្រ្តីរាជការនិងកងកម្លាំងប្រដាប់អាវុធទាំងអស់ជាទីមេត្រី!
ថ្ងៃនេះ ខ្ញុំមានសេចក្តីសោមនស្សរីករាយ ចូលរួមជាមួយ ឯកឧត្តម លោកជំទាវ អស់លោក លោកស្រី ក្នុងពិធីបិទសន្និបាតបូកសរុបលទ្ធផលការងាររបស់ក្រុមប្រឹក្សាខេត្តតាកែវអាណត្តិទី១ ពិធីបូកសរុបលទ្ធផលការងារប្រចាំឆ្នាំ២០១៣ និងទិសដៅការងាររបស់រដ្ឋបាលខេត្ត និងពិធីប្រកាសផ្ទេរភារកិច្ចតែងតាំងមុខតំណែងនៃអភិបាល អភិបាលរងខេត្ត និងអភិបាលក្រុង ស្រុកមួយចំនួន នៃខេត្តតាកែវ។
ឆ្លៀតក្នុងឱកាសនេះ ខ្ញុំសូមកោតសរសើរ និងវាយតម្លៃខ្ពស់ចំពោះលទ្ធផលការងាររបស់ក្រុមប្រឹក្សាខេត្តតាកែវអាណត្តិទី១ លទ្ធផលការងារប្រចាំឆ្នាំ២០១៣និងទិសដៅការងាររបស់រដ្ឋបាលខេត្ត ដូចដែលបានលើកឡើងក្នុងរបាយការណ៍របស់ឯកឧត្តម ស្រី បេន។ លទ្ធផលទាំងនេះ គឺជាកិច្ចខិតខំប្រឹងប្រែងរួមរបស់ថ្នាក់ដឹកនាំខេត្ត មន្រ្តីរាជការគ្រប់លំដាប់ថ្នាក់និងកងកម្លាំងប្រដាប់អាវុធទាំងអស់ ដែលយកអស់កម្លាំងកាយចិត្ត និងប្រាជ្ញាស្មារតីក្នុងការបន្តបំពេញតួនាទី ភារកិច្ច និងកាតព្វកិច្ច ដើម្បីបម្រើ និងការពារជាតិមាតុភូមិ និងប្រជាពលរដ្ឋក្នុងដែនសមត្ថកិច្ចរបស់ខ្លួនប្រកបដោយស្មារតីទទួលខុសត្រូវខ្ពស់។
រដ្ឋបាលថ្នាក់ក្រោមជាតិ មិនត្រឹមតែមានតួនាទីជាអ្នកការពារសន្តិភាព សុវត្ថិភាពនិងសណ្តាប់ ធ្នាប់សាធារណៈជូនប្រជាពលរដ្ឋប៉ុណ្ណោះទេ ប៉ុន្តែថែមទាំងមានតួនាទីជាអ្នកផ្តល់សេវាសាធារណៈនិងជាសេនាធិការផ្ទាល់ និងជាតំណាងរបស់រាជរដ្ឋាភិបាលក្នុងមូលដ្ឋានទៀតផង។ ក្នុងន័យនេះ រដ្ឋបាលថ្នាក់ក្រោមជាតិ ដែលរួមមានក្រុមប្រឹក្សាខេត្ត គណៈអភិបាលខេត្ត ក្រុង ស្រុក និងក្រុមប្រឹក្សាឃុំ សង្កាត់ ត្រូវយកចិត្តទុកដាក់ខ្ពស់លើការលើកកម្ពស់ការផ្តល់សេវាសាធារណៈជូនប្រជាពលរដ្ឋ ដោយស្មារតីម្ចាស់ការ ភក្តីភាព សីលធម៌វិជ្ជាជីវៈ និងវប្បធម៌សេវាសាធារណៈ ក្នុងគោលដៅធ្វើយ៉ាងណាគឺ “បម្រើប្រជាពលរដ្ឋឱ្យបានកាន់តែប្រសើរឡើង”។ ដើម្បីសម្រេចបាននូវវត្ថុបំណងនេះ រដ្ឋបាលថ្នាក់ក្រោមជាតិដែលជាអ្នកផ្តល់សេវាសាធារណៈ ត្រូវមានទស្សនាទានប្រែក្លាយរដ្ឋបាលសាធារណៈពី “អ្នកគ្រប់គ្រងនិងអនុវត្តវិធាននិងនីតិវិធី” ឱ្យទៅជា “អ្នកផ្តល់សេវាជូនប្រជាពលរដ្ឋ” គឺ មន្រ្តីដែលជាអ្នកផ្ដល់សេវាត្រូវផ្លាស់ប្តូរឥរិយាបថនិងផ្នត់គំនិតពី “ភាពជាអ្នកត្រួតត្រា” ទៅជា “អ្នកផ្តល់សេវា” ហើយប្រជាពលរដ្ឋដែលពីមុនត្រូវបានចាត់ទុកថាជា “អ្នកត្រូវគេត្រួតត្រា” ឱ្យទៅជា “អ្នកប្រើប្រាស់សេវា”។ ទាំងនេះជាទស្សនាទានដ៏សំខាន់សម្រាប់មន្រ្តីរាជការគ្រប់រូប ដែលត្រូវប្រកាន់យកនៅក្នុងបរិការណ៍នយោបាយបច្ចុប្បន្ន ក៏ដូចជាទៅអនាគត។
ទស្សនាទានខាងលើនេះ បានរួមចំណែកយ៉ាងសំខាន់ក្នុងការអនុវត្តគោលនយោបាយនៃប្រជាធិបតេយ្យភាវូបនីយកម្ម ដែលត្រូវបានដាក់ឱ្យដំណើរការដោយរាជរដ្ឋាភិបាលកម្ពុជាក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជា ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា រហូតដល់ថ្នាក់មូលដ្ឋាន តាមរយៈការបោះឆ្នោតដោយផ្ទាល់ក្នុងការជ្រើសរើសក្រុមប្រឹក្សាឃុំ សង្កាត់ ដែលត្រូវបានជ្រើសរើសដោយប្រជាពលរដ្ឋនៃឃុំ សង្កាត់របស់ខ្លួន តាមរយៈការបោះឆ្នោតទូទៅ សកល សេរី ត្រឹមត្រូវ និងយុត្តិធម៌ ដោយស្មើភាព ចំពោះ និងសម្ងាត់ និងការបោះឆ្នោតក្រុមប្រឹក្សារាជធានីខេត្តដែលត្រូវបានជ្រើសរើសឡើងដោយការបោះឆ្នោតអសកល មិនចំពោះ ដោយសេរី ត្រឹមត្រូវនិងយុត្តិធម៌ ផងដែរ។ ដូច្នេះ ក្រុមប្រឹក្សាខេត្ត ក្រុង ស្រុក និងក្រុមប្រឹក្សាឃុំ សង្កាត់ ក៏ដូចជាគណៈអភិបាលខេត្ត ក្រុង ស្រុក ត្រូវចងចាំថា ខ្លួនជារដ្ឋបាលរបស់ប្រជាពលរដ្ឋ កើតឡើងដោយប្រជាពលរដ្ឋ និងធ្វើអ្វីៗដើម្បីប្រជាពលរដ្ឋ។
តាមពិត លទ្ធិប្រជាធិបតេយ្យគ្រាន់តែជាគោលការណ៍ទូទៅ ដែលបញ្ជាក់ថាប្រជាពលរដ្ឋជា ម្ចាស់អំណាច ក៏ប៉ុន្តែក្នុងសកលលោកយើងនេះ មិនមានគំរូនៃលទ្ធិប្រជាធិបតេយ្យណាមួយ ដែលអាចយកទៅអនុវត្តបានគ្រប់ប្រទេសបានឡើយ។ ប្រជាធិបតេយ្យភាវូបនីយកម្មត្រូវអនុវត្ត ដោយស្របតាមស្ថានភាពនយោបាយទូទៅ កាលៈទេសៈ វប្បធម៌ ប្រពៃណី សាសនា និងចំណេះដឹងទូទៅរបស់ប្រជាពលរដ្ឋផងដែរ។ ដូច្នេះ ព្រះរាជាណាចក្រកម្ពុជា ក៏មានលទ្ធិប្រជាធិបតេយ្យខ្លួនដែលអាចអនុវត្តបាននៅក្នុងដែនដីអធិបតេយ្យរបស់យើងផងដែរ ដែលយើងទាំងអស់គ្នាត្រូវរួមគ្នាការពារ ពង្រឹង និងកែទម្រង់ឱ្យកាន់តែប្រសើរជាងនេះទៀត។
ជាមួយគ្នានេះដែរ គោលយោបាយកំណែទម្រង់វិមជ្ឈការនិងវិសហមជ្ឈការរបស់រាជរដ្ឋាភិបាលសម្រេចបាននូវសមិទ្ធផលជាច្រើន។ ជាក់ស្តែង ការបោះឆ្នោតជ្រើសរើសក្រុមប្រឹក្សាឃុំសង្កាត់ជាបន្តបន្ទាប់ ព្រមទាំងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុមប្រឹក្សាក្រុងស្រុក ខណ្ឌ បានប្រព្រឹត្តទៅយ៉ាងរលូន ហើយលទ្ធផលនៃការបោះឆ្នោតនេះក៏បានជំរុញឱ្យដំណើរការកែទម្រង់វិមជ្ឈការនិងវិសហមជ្ឈការនេះមានលក្ខណៈល្អប្រសើរ និងកាន់តែស៊ីជម្រៅជាងមុនថែមទៀត។
ឆ្លៀតក្នុងឱកាសនេះ ខ្ញុំសូមកោតសរសើរ និងអបអរសាទរចំពោះសមិទ្ធផលការងារជាច្រើនរបស់ក្រសួងមហាផ្ទៃ ក្រោមការដឹកនាំរបស់ឯកឧត្តមឧបនាយករដ្ឋមន្រ្តី ស ខេង ជាពិសេស ជោគជ័យ ក្នុងការដ្ឋាននៃកំណែទម្រង់វិមជ្ឈការនិងវិសហមជ្ឈការ ការអនុវត្តគោលនយោបាយភូមិឃុំមានសុវត្ថិភាព ការពារសន្តិសុខ សណ្តាប់ធ្នាប់ និងរបៀបរៀបរយសាធារណៈ ជូនសង្គមជាតិទាំងមូល។
ឯកឧត្តម លោកជំទាវ អស់លោក លោកស្រី !
ថ្មីៗនេះ ក្នុងគោលបំណងពង្រឹងអភិបាលកិច្ចល្អ និងបម្រើប្រជាពលរដ្ឋឱ្យបានកាន់តែ ប្រសើរឡើងថែមទៀត រាជរដ្ឋាភិបាលបានបង្កើតក្រុមការងារថ្នាក់ជាតិចុះមូលដ្ឋាន ដើម្បីត្រួតពិនិត្យ និងគាំទ្រ ការអនុវត្តកម្មវិធីនយោបាយ និងយុទ្ធសាស្រ្តចតុកោណដំណាក់កាលទី៣របស់រាជរដ្ឋាភិបាល នៅគ្រប់រាជធានីខេត្តទូទាំងប្រទេស។ ចំពោះខេត្តតាកែវយើងនេះ រាជរដ្ឋាភិបាលបានសម្រេចឱ្យខ្ញុំទទួលបន្ទុកជាប្រធានក្រុមការងារថ្នាក់ជាតិនេះ ព្រមទាំងមានសមាជិកសមាជិកា រាជរដ្ឋាភិបាលនិងឥស្សរជន ជាច្រើនរូបទៀតចូលរួមផងដែរ។ ក្រុមការងារថ្នាក់ជាតិនេះនឹងជំរុញ លើកកម្ពស់កិច្ចសហការសម្របសម្រួលក្នុងការដោះស្រាយបញ្ហានានា និងលើកកម្ពស់ការទទួលខុសត្រូវរបស់ក្រសួងស្ថាប័ន ក៏ដូចជារដ្ឋបាលថ្នាក់ក្រោមជាតិ ដើម្បីបម្រើផលប្រយោជន៍ប្រជាពលរដ្ឋនៅមូលដ្ឋាន។ ក្រុមការងារក៏នឹងមានការរៀបចំវេទិកាសាធារណៈ ដើម្បីស្តាប់សំណូមពរ និងបញ្ហានានារបស់មូលដ្ឋាន ជាពិសេស គឺស្តាប់សំឡេង និងតម្រូវការពិតប្រាកដរបស់ប្រជាពលរដ្ឋ មូលដ្ឋាន ហើយយកចិត្តទុកដាក់ដោះស្រាយនូវរាល់សំណូមពរដោយផ្អែកលើច្បាប់ និងលិខិត បទដ្ឋានគតិយុត្តជាធរមាន។ ប៉ុន្តែក្រុមការងារពុំមានតួនាទី និងសម្រេចជំនួសក្រសួងស្ថាប័នមាន សមត្ថកិច្ចឡើយ ហើយក៏មិនចាត់ចែងកិច្ចការជំនួសរដ្ឋបាលថ្នាក់ក្រោមជាតិ និងអាជ្ញាធរមានសមត្ថកិច្ចនានាឡើយ។ ព្រមជាមួយគ្នានេះ ក្រុមការងារថ្នាក់ជាតិនេះនឹងមានតួនាទីផ្សព្វផ្សាយ ឱ្យកាន់តែទូលាយនូវគោលនយោបាយ កម្មវិធីនយោបាយ យុទ្ធសាស្រ្ត ផែនការអភិវឌ្ឍជាតិ គោលនយោបាយភូមិឃុំមានសុវត្ថិភាព ក៏ដូចជាសភាពការណ៍រួមរបស់ប្រទេសជាតិ ដោយផ្សារភ្ជាប់ជាមួយនឹងសភាពការណ៍នៅមូលដ្ឋាន។ ក្នុងស្ថានភាពនយោបាយបច្ចុប្បន្ន ការចោទប្រកាន់នានាដោយគ្មានភស្តុតាងសមស្របរបស់គណបក្សប្រឆាំង ក៏ដូចជាអង្គការមិនមែនរដ្ឋាភិបាលនានាមួយចំនួនតូច ទៅលើការរៀបចំការបោះឆ្នោតសកលជ្រើសតាំងតំណាងរាស្ត្រនីតិកាលទី៥ នៃរដ្ឋសភា នៅតែជាប្រធានបទស្រួចស្រាល់ ដែលបានប៉ះពាល់យ៉ាងធ្ងន់ធ្ងរដល់កិត្តិនាមនៃស្ថាប័ន កំពូលៗរបស់ជាតិមានជាអាទិ៍ ស្ថាប័នព្រះមហាក្សត្រ រដ្ឋសភា ក្រុមប្រឹក្សាធម្មនុញ្ញ រាជរដ្ឋាភិបាល គណៈកម្មាធិការជាតិរៀបចំការបោះឆ្នោត និងឥស្សរជនមួយចំនួន។ ឆ្លៀតក្នុងឱកាសដ៏មហោឡារិកនេះ ខ្ញុំសូមជម្រាបជូន ឯកឧត្តម លោកជំទាវ អស់លោក លោកស្រី សូមយកចិត្តទុកដាក់និងឆ្លើយបំភ្លឺ ចំពោះការលើកឡើងនានាដែលទាក់ទងនឹងបញ្ហានេះ។ ចំពោះការស្រាយបំភ្លឺឆ្លើយតបនឹងបញ្ហាទាំងនេះ រាជរដ្ឋាភិបាលបានចេញឯកសារគោលពីរ គឺ សៀវភៅសស្តីពីការបោះឆ្នោតសកលជ្រើសតាំងតំណាងរាស្ត្រនីតិកាលទី៥ នៃរដ្ឋសភា នៃព្រះរាជាណាចក្រកម្ពុជាឆ្នាំ២០១៣ និងការស្រាយបំភ្លឺរបស់អង្គភាពព័ត៌មាននិងប្រតិកម្មរហ័សចំពោះរបាយការណ៍រួមស្តីពីការរៀបចំការបោះឆ្នោតនៅក្នុងប្រទេសកម្ពុជាឆ្នាំ២០១៣របស់សម្ព័ន្ធកំណែទម្រង់ការបោះឆ្នោត។
ឯកឧត្តម លោកជំទាវ អស់លោក លោកស្រី!
ខ្ញុំសូមយកឱកាសនេះ សំដែងនូវការកោតសរសើរ និងវាយតម្លៃខ្ពស់ផងដែរ ចំពោះសមិទ្ធផល នានារបស់ខេត្តតាកែវ ក្រោមការដឹកនាំរបស់ឯកឧត្តម ស្រី បេន អតីតអភិបាលនៃគណៈអភិបាលខេត្តតាកែវ និងខ្ញុំសូមរំឭក ដល់ឯកឧត្តម លោកជំទាវ អស់លោក លោកស្រី ជាសមាជិក សមាជិកានៃក្រុមប្រឹក្សាខេត្ត ឯកឧត្តមអភិបាលនៃគណៈអភិបាលខេត្ត អភិបាលរងខេត្ត និងក្រុង ស្រុកដែលទទួលការតែងតាំង មុខតំណែងថ្មី ក៏ដូចជាឯកឧត្តម លោកជំទាវ អស់លោក លោកស្រី ជាអភិបាលរងខេត្ត អភិបាលក្រុង អភិបាលស្រុកទាំងអស់ នៃខេត្តតាកែវ ព្រមទាំងមន្រ្តីរាជការ កងកម្លាំងប្រដាប់អាវុធ និងអាជ្ញាធរមានសមត្ថកិច្ចគ្រប់លំដាប់ថ្នាក់ ឱ្យបន្តរួមសហការគ្នាពង្រឹងការអនុវត្តគោលនយោបាយអភិវឌ្ឍសេដ្ឋកិច្ចសង្គម តាមវិស័យរបស់ក្រសួងស្ថាប័ននានា ព្រមទាំងផ្តោតការយកចិត្តទុកដាក់លើការផ្តល់ សេវាសាធារណៈជូនប្រជាពលរដ្ឋ ជាអាទិភាព។ ជាមួយគ្នានេះដែរ ត្រូវបន្តរួមគ្នាថែរក្សាការពារសុខសន្តិភាព ស្ថិរភាពនយោបាយ សណ្តាប់ធ្នាប់សង្គម ឱ្យបានល្អនៅទូទាំងខេត្តឱ្យកាន់តែប្រសើរឡើងថែមទៀត តាមរយៈការជំរុញនិងលើកទឹកចិត្តឱ្យគ្រប់ភាគីពាក់ព័ន្ធទាំងអស់ ជាពិសេស ប្រជាពលរដ្ឋក្នុងមូលដ្ឋានឱ្យចូលរួមអនុវត្តគោលនយោបាយភូមិឃុំមានសុវត្ថិភាព។ ទន្ទឹមនឹងនេះ ត្រូវបន្តទប់ស្កាត់ការជួញដូរ និងការប្រើប្រាស់គ្រឿងញៀនគ្រប់ប្រភេទ ការលេងល្បែងស៊ីសង សកម្មភាពក្មេងទំនើង ដែលអាចជះឥទ្ធិពលអាក្រក់ដល់សង្គមជាតិ និងជាពិសេសដល់ក្មួយៗយុវជន ព្រមទាំងត្រូវលើកកម្ពស់ការគ្រប់គ្រងច្រកទ្វារព្រំដែនច្រករបៀងរួមគ្នាបង្ការទប់ស្កាត់ និងបង្រ្កាបឱ្យបានទាន់ពេលវេលា និងមានប្រសិទ្ធភាពនូវបទល្មើសឆ្លងដែនគ្រប់ប្រភេទ ហើយក៏ត្រូវបន្តខិតខំបង្កើនកិច្ចសហប្រតិបត្តិការឱ្យបានកាន់ល្អថែមទៀតជាមួយអាជ្ញាធរ និងកម្លាំងមានសមត្ថកិច្ចនៅតាមតំបន់ព្រំដែននៃប្រទេសជិតខាង ដើម្បីអភិវឌ្ឍតំបន់ព្រំដែនឱ្យមានការរីកចម្រើនថែមទៀត។ លើសពីនេះទៀត ដើម្បីពង្រឹងរបៀបរបបការងារឱ្យកាន់តែមានប្រសិទ្ធភាពខ្ពស់ និងប្រកបដោយការទទួលខុសត្រូវ ត្រូវយកចិត្តទុកដាក់លើការកសាងសមត្ថភាពធនធានមនុស្សនិងការអភិវឌ្ឍស្ថាប័នគ្រប់ជាន់ថ្នាក់នៅរដ្ឋបាលថ្នាក់ក្រោមជាតិ។
ជារួម ក្នុងឋានៈជារដ្ឋបាលដែលនៅជាប់នឹងប្រជាពលរដ្ឋរួមសុខរួមទុក្ខជាមួយប្រជាពលរដ្ឋ អាជ្ញាធរថ្នាក់ក្រោមជាតិត្រូវប្រកាន់ខ្ជាប់នូវជំហរជាអ្នកការពារនិងបម្រើប្រជាពលរដ្ឋ តាមរយៈការ ធានាឱ្យបាននូវសន្តិសុខ សណ្តាប់ធ្នាប់ សុវត្ថិភាព ស្ថិរភាពសង្គម ការអភិវឌ្ឍក្នុងមូលដ្ឋាន និង អភិបាលកិច្ចល្អ ជាពិសេសការទប់ស្កាត់ឱ្យបានទាន់ពេលវេលារាល់ទង្វើអសកម្មដែលប៉ះពាល់ដល់ សុខុមាលភាពរបស់ប្រជាពលរដ្ឋ។ ជាងនេះទៅទៀត អាជ្ញាធរដែនដីគ្រប់លំដាប់ថ្នាក់ ត្រូវបន្តយកចិត្តទុកដាក់ធ្វើយ៉ាងណា ឱ្យប្រជាពលរដ្ឋក្នុងមូលដ្ឋានមានជំនឿទុកចិត្តលើរដ្ឋបាលរបស់ខ្លួន ហើយក៏ត្រូវបន្តបំផុសចលនាមហាជនឱ្យយល់ដឹងកាន់តែស៊ីជម្រៅថែមទៀតអំពីតួនាទីរបស់បងប្អូនប្រជាពលរដ្ឋ ក្នុងការចូលរួមជាមួយរាជរដ្ឋាភិបាល ក្នុងកិច្ចអភិវឌ្ឍសង្គមជាតិលើគ្រប់វិស័យ។
ជាថ្មីម្តងទៀត ខ្ញុំសូមអបអរសាទរចំពោះឯកឧត្តម ឡាយ វណ្ណៈ ដែលទទួលបានការទុកចិត្តពីក្រសួងមហាផ្ទៃ និងរាជរដ្ឋាភិបាល តែងតាំងជាអភិបាលនៃគណៈអភិបាលខេត្តតាកែវ នាពេលនេះ ព្រមទាំងអភិបាលរងខេត្ត និងអភិបាលក្រុង ស្រុក ដែលទទួលការតែងតាំងមុខតំណែងថ្មី ដូចសុភាសិតខ្មែរបានពោលថា «ទំពាំងស្នងឫស្សី»។ ខ្ញុំក៏សូមកោតសរសើរ និងវាយតម្លៃខ្ពស់ផងដែរចំពោះកិច្ចខិតខំប្រឹងប្រែងមិនខ្លាចនឿយហត់របស់អាជ្ញាធរមានសមត្ថកិច្ចគ្រប់លំដាប់ថ្នាក់ នៃខេត្តតាកែវក្នុងការបំពេញតួនាទីជាអ្នកការពារ និងបម្រើប្រជាពលរដ្ឋ និងប្រទេសជាតិប្រកបដោយជោគជ័យ។
ជាទីបញ្ចប់ ខ្ញុំសូមប្រសិទ្ធពរជូនឯកឧត្តមឧបនាយករដ្ឋមន្រ្តី ឯកឧត្តម លោកជំទាវ អស់ លោក លោកស្រី ថ្នាក់ដឹកនាំ និងសមាជិក សមាជិកានៃក្រុមប្រឹក្សា គណៈអភិបាល ក៏ដូចជា មន្រ្តីរាជការ កងកម្លាំងប្រដាប់អាវុធ និងបងប្អូនប្រជាពលរដ្ឋក្នុងខេត្តតាកែវទាំងអស់ សូមមានសុខភាពល្អ ទទួលបានជោគជ័យគ្រប់ភារកិច្ច និងមានសុភមង្គលក្នុងក្រុមគ្រួសារ៕
សូមអរគុណ!