នៅក្នុងសេចក្តីថ្លែងការណ៍ជាសាធារណៈនាព្រឹកថ្ងៃទី២៦ ខែមិថុនា ឆ្នាំ២០១៤ ជាមួយនឹងការប្រកាសឲ្យដឹងអំពីលិខិតដែលឯកឧត្តម ប្រាយុទ្ធ ចាន់អូចា ផ្ញើមកដើម្បីពន្យល់ពីសភាពការណ៍របស់ប្រទេសថៃ ដែលទាក់ទិនដល់ការបញ្ជូនពលករបរទេសចេញ សម្តេចអគ្គមហាសេនាបតីតេជោ ហ៊ុន សែន បានស្នើឯកឧត្តម ប្រាយុទ្ធ ចាន់អូចា ពិនិត្យមើលលទ្ធភាពផ្តល់ការលើកលែងទោសចំពោះការចោទប្រកាន់ដល់ពលរដ្ឋខ្មែរចំនួន ១០នាក់ ដែលត្រូវអាជ្ញាធរថៃចាប់ខ្លួន ហើយឃុំនៅពន្ធនាគារក្នុងខេត្ដស្រះកែវ ដោយចោទប្រកាន់ពួកគេថា ឆ្លងដែនខុសច្បាប់។
ក្នុងឱកាសអញ្ជើញចូលរួមជាអធិបតី ក្នុងទិវាអន្តរជាតិប្រយុទ្ធ ប្រឆាំងគ្រឿងញៀននៅសាលមហោស្រពកោះពេជ្រ ដែលមានវត្តមាន ឯកអគ្គរាជទូតថៃប្រចាំព្រះរាជាណាចក្រកម្ពុជា ចូលរួមផងដែរ សម្ដេចតេជោនាយករដ្ឋមន្ត្រី បានមានប្រសាសន៍ពន្យល់ថា « ធ្វើម៉េច? សូម្បីតែខ្មែរក៏ មានបញ្ហា! សូម្បីតែហត្ថលេខារបស់ខ្ញុំ, ត្រារបស់ខ្ញុំ គង់មានគេបន្លំបាន ចុះទម្រាំពលករប៉ុន្មាននាក់ទៅធ្វើលិខិតអស់លុយហើយ លិខិតនោះក្លែងក្លាយរដ្ឋបាលថៃចាប់! អ៊ីចឹងទេ បើសិនជាលើកលែងការចោទប្រកាន់បាន ខ្ញុំអរគុណចំពោះថ្នាក់ដឹកនាំថៃ! សូមឯកឧត្ដមបញ្ជូនរឿងហ្នឹងជូនឯកឧត្ដម ប្រាយុទ្ធ ចាន់អូចា»។ ទាក់ទិននឹងពលករដែលត្រូវចាប់នោះ សម្ដេចតេជោលើកឡើងថា «...គ្នាអត់ទាំងចេះអក្សរថៃផង មិនដឹងថាណាពិត ណាក្លែងក្លាយ! ទៅធ្វើអស់លុយហើយក្លែងក្លាយទៀត! ត្រូវគេចាប់! ចាប់ហើយ ដោះលែង...ដូចជានៅសល់១៣នាក់, បើសិនជាថ្នាក់ដឹកនាំថៃ មិនចោទប្រកាន់ទេ តុលាការគេក៏មិនកាត់ដែរ ខ្ញុំសុំស្នើលើរឿងហ្នឹង!...។
សម្ដេចតេជោនាយករដ្ឋមន្ត្រីក៏បានស្នើផងដែរ តាមរយៈឯកអគ្គរាជទូតថៃ ឱ្យខាងភាគីថៃ មើលថែទាំងសុខភាពពលករដែល នៅសេសសល់ ដែលដឹកមកជា ហូរហែ ព្រមទាំងជួយបង្កលក្ខណៈចំពោះពលករ ខ្មែរស្របច្បាប់ ដែលត្រូវត្រឡប់ទៅធ្វើការនៅប្រទេសថៃវិញរាប់ទាំងពលករខ្មែរ ប៉ុន្មានពាន់អ្នកដែលបានសុំទិដ្ឋាការ។ សម្ដេចតេជោនាយករដ្ឋមន្ត្រីបានបញ្ជាក់នូវការគាំទ្រចំពោះសកម្មភាព ដែលក្រុមប្រឹក្សារក្សាសន្តិភាព និងសណ្ដាប់ធ្នាប់ជាតិថៃ នឹងចាត់វិធានការ ដើម្បីធានាថា សិទ្ធិ និងសុខុមាលភាព របស់ពលករអន្តោប្រវេសន៍ ត្រូវបានការពារនៅក្នុងប្រទេសថៃនោះ។ សម្ដេចតេជោនាយករដ្ឋមន្ត្រីលើកឡើងថា កន្លងមកដោយសារខាងក្រុមហ៊ុនសហគ្រាសមួយចំនួននៅប្រទេសថៃចេះ តែយកពលករខ្មែរខុសច្បាប់ទៅធ្វើការ ដែលជាហេតុនាំឱ្យពួកអ្នករត់ការបោកប្រាស់ពលលករ បោកទាំងរដ្ឋាភិបាលថៃ បោកទាំងពលរដ្ឋកម្ពុជា យកទៅធ្វើការក្នុងប្រទេសថៃ។
ក្នុងបញ្ហាបញ្ជូនពលករបរទេសចេញពីប្រទេសថៃនេះ សម្ដេចតេជោបានមានប្រសាសន៍ឱ្យ ដឹងអំពីទំនាក់ទំនងរវាងសម្តេច និងឯកឧត្តមប្រាយុទ្ធ ថា៖ «លោក ប្រាយុទ្ធ ចាន់អូចា ដែល កំពុង ដឹកនាំប្រទេសថៃសព្វថ្ងៃនេះ ក្នុងឋានៈជាប្រធានក្រុមប្រឹក្សាជាតិ រក្សាសន្តិភាព និងសណ្ដាប់ធ្នាប់ និងជាអគ្គបញ្ជាការកងទ័ពថៃ ជាមេបញ្ជាការកងទ័ពជើងគោកនោះ បានផ្ញើលិខិតឱ្យខ្ញុំពីរមួយលិខិត ថ្ងៃទី១២ខែមិថុនា ដើម្បីពន្យល់ពីសភាពការណ៍ ក្នុងប្រទេសថៃ ឯមួយទៀត គឺនៅថ្ងៃទី១៨មិថុនា ឯកឧត្ដម ប្រាយុទ្ធ ចាន់ អូចា ក៏បានសរសេរលិខិត ឱ្យខ្ញុំមួយទៀតបញ្ជាក់ពីបញ្ហាទាក់ទិនជាមួយនឹងពលករ ហើយចំណុចនេះខ្ញុំគិតថា ជាចំណុចដើរ ស្របគ្នា រវាងយើងជាមួយនឹងថៃហើយ ដែលត្រូវធ្វើការ ព្រោះកន្លងទៅ ដោយសារភាគីថៃមិនហ្មត់ចត់ធ្វើឱ្យក្រុមជួញដូរមនុស្ស យកពលករទៅធ្វើការខុសច្បាប់ ចេះតែមានឱកាស។
សម្ដេចតេជោនាយករដ្ឋមន្ត្រីបានពន្យល់ពីមូលហេតុ ដែលរាជរដ្ឋាភិបាលកម្ពុជា ត្រូវគាំទ្រនូវវិធានការ របស់ក្រុមអ្នកដឹកនាំនៅក្នុងប្រទេសថៃបច្ចុប្បន្ន ដោយមូលហេតុថា មុននេះ ត្រូវបានក្រុមអ្នករត់ការ ឬមេខ្យល់ បោកប្រាស់ទាំងនៅក្នុងប្រទេសថៃ និងគេបោកប្រាស់ ទាំងពលករចេញពីកម្ពុជា ពីមីយ៉ាន់ម៉ា និងពីឡាវតាមរយៈនៃការ ទៅធ្វើការអត់ច្បាប់។ សម្ដេចលើកឡើងថា «ឥឡូវនេះទាន់អ្នកដឹកនាំថៃកំពុងបញ្ចេញសកម្មភាពធ្វើឱ្យអ្នកមិនស្របច្បាប់ក្លាយជាស្របច្បាប់ យើងត្រូវប្រើប្រាស់ឱកាស នេះ ដើម្បី បង្កើតស្ថានភាពស្របច្បាប់ឱ្យ ពលរដ្ឋរបស់យើង ដែលទៅរកការងារនៅ ក្នុងប្រទេសថៃ។
ទាក់ទិនអំពីបញ្ហាពលករកម្ពុជា ដែលថៃចាប់បញ្ជូនវិលត្រឡប់មកកម្ពុជាវិញនោះ សម្តេចតេជោ បានចាត់ទុកសភាពការណ៍នេះបានធ្វើឡើង «ស្រប ពេលដែល World Cup បានចាប់ផ្ដើម ធ្វើឲ្យកម្ពុជាបានជួបនូវបញ្ហាធ្ងន់ធ្ងរ ដែលប្រៀបដូចជាទឹកជំនន់មួយដែលបក់បោកយ៉ាងខ្លាំងមកលើ ដែលនេះគឺជាជំនន់មនុស្ស ដោយសារអាជ្ញាធរប្រទេសថៃ បន្ទាប់ពីការធ្វើរដ្ឋប្រហារ គេបានអនុវត្តនូវច្បាប់អាជ្ញាសឹក បានបង្កើតឡើងនូវស្ថានភាពមួយ ដែល យើងមិននឹកស្មានដល់»។ សម្តេចតេជោបានមានប្រសាសន៍ឲ្យដឹងថា បើតាមតួលេខ នៃក្រសួងការងារ និងបណ្តុះបណ្តាលវិជ្ជាជីវៈ គិតត្រឹមថ្ងៃទី២៣ ខែមិថុនា ពលករខ្មែរ ដែលថៃចាប់បញ្ជូមមក វិញ មានចំនួនជាង២៤ម៉ឺននាក់ ហើយបើ គិតមកដល់ពេល នេះគឺប្រហែលកើនឡើង ជិតដល់ ២៥ម៉ឺននាក់ហើយ។ នេះជាចំនួនមួយដ៏ច្រើនដែលយើងត្រូវទទួលបន្ទុកដោះស្រាយភ្លាមៗ នៅនឹងកន្លែង ដោយមិនរង់ចាំលិខិតស្នាមអ្វីទាំងអស់។
ក្នុងនាមរាជរដ្ឋាភិបាលសម្តេចតេជោនាយករដ្ឋមន្ត្រីបានកោតសរសើរ ចំពោះអាជ្ញាធរតាម បណ្តោយព្រំដែន កម្ពុជា-ថៃទាំងអស់ រាប់ទាំងសមត្ថកិច្ច កងកម្លាំងប្រដាប់អាវុធ ស្ថាប័នពាក់ព័ន្ធ ដែលធ្វើកិច្ចការងារទទួល និងសំរួលការធ្វើដំណើរត្រឡប់ទៅស្រុកកំណើតវិញរបស់ពលករ ដោយសម្ដេចចាត់ទុកថា គឺជាស្ថានភាពមួយដែលធំខ្ពស់ជាងអ្វីដែលធ្លាប់ជួបប្រទះ។ សម្ដេចតេជោបានមានប្រសាសន៍បញ្ជាក់ថា ការដោះស្រាយកត្តាចៃដន្យនេះ គឺបង្ហាញពីសមត្ថភាព និងការទទួលខុសត្រូវ របស់មន្ត្រីទាំងថ្នាក់ជាតិនិងថ្នាក់ក្រោមជាតិ។ សម្តេចបាន រម្លឹកថា៖ មានថ្ងៃខ្លះ មានរហូតដល់៤ម៉ឺន នាក់ នៃចំនួនពលកររបស់យើង ដែលភាគី ថៃបានបញ្ជូនមកកម្ពុជាវិញ ដូច្នេះយើងត្រូវ តែ យកចិត្តទុកដាក់ដោះស្រាយនូវជនរួមជាតិរបស់យើង ទោះបីគាត់បានឆ្លងកាត់ ទៅធ្វើការដោយខុសច្បាប់នៅប្រទេសថៃ ក៏ដោយ, ប៉ុន្តែក្នុងឋានៈជាសាច់ឈាម របស់យើង, យើងត្រូវទទួលបន្ទុកដោះស្រាយលើបញ្ហានេះ ដោយប្រតិបត្តិការ ដ៏ឆាប់រហ័សតាមមធ្យោបាយសរុបវិធាន ការសរុប គឺយើងបានដោះស្រាយលើបញ្ហានេះ តាំងពីដើមរហូតចប់។ សម្ដេចបញ្ជាក់ឱ្យដឹងថា ក្នុងការធ្វើសកម្មភាពដោះស្រាយនេះ បានប្រើប្រាស់រថយន្ត សរុបជាង៣០០គ្រឿង ហើយរថយន្តនីមួយៗ បានរត់រាប់ពាន់គីឡូម៉ែត្រ ក្នុងការដឹក ជញ្ជូនពលករ ទៅកាន់គ្រប់ទីកន្លែងនោះ។
ទាក់ទងនឹងការស្វែងរកការងារជូនប្រជាពលរដ្ឋធ្វើ សម្ដេចតេជោបានមានប្រសាសន៍ពន្យល់ថា នៅក្នុងកិច្ចដំណើរការកសាងប្រទេសរបស់យើងទីផ្សារការងារនៅក្រៅ ប្រទេសក៏ជាកិច្ចការងារមួយដែរ ដែលយើងត្រូវបើកទូលាយ ប៉ុន្តែអ្វីដែលខ្ញុំចង់លើកមកបញ្ជាក់នៅទីនេះ និងអំពាវនាវដល់ប្រជាពលរដ្ឋរបស់យើងមានចំណុចសំខាន់ធំពីរយ៉ាងគឺ ទីមួយ ត្រូវខិតខំរកការងារក្នុងស្រុកដើម្បីធ្វើ ។ ចំណុចនេះសម្តេចតេជោបានមានប្រសាសន៍ឲ្យដឹងថា នៅតាមខេត្តមួយចំនួនកំពុងប្រឹងប្រែង ដោះស្រាយបញ្ហានេះ តាមរយៈនៃការចុះឈ្មោះស្វែងរកទាក់ទងយកពលករដែលទៅធ្វើការនៅប្រទេស ថៃដោយខុសច្បាប់ឲ្យមកបម្រើការក្នុងសេចក្ដីត្រូវការនៃការងាររបស់ ខ្លួន ក្នុងនោះក៏មានមួយផ្នែកធំជាពលករដែលស្ថិតនូវជាកសិករ ហើយដែលបានធ្វើចំណាកស្រុកក្នុងរយៈពេលខ្លីទៅរកការងារធ្វើក្នុង រដូវប្រាំងកន្លងទៅបានវិលត្រឡប់មកវិញនៅក្នុងពេលរដូវវស្សាបានមកដល់ ដែលចាំបាច់ត្រូវបង្កបង្កើនផលនៅក្នុងវិស័យកសិកម្មរបស់គ្រួសារ ។
ទាក់ទិននឹងតម្លៃពលកម្មនៅក្នុងប្រទេសមានតម្លៃថោកជាងនៅក្រៅប្រទេស សម្តេចតេជោបានមានប្រសាន៍ពន្យល់ថា ការងារនៅមានច្រើនក្នុងប្រទេសរបស់យើងពិតមែនថា ប្រាក់កម្រៃដែល យើងទទួលបានគឺមានចំនួនថោកជាងតិចជាងនៅក្នុងប្រទេសថៃ ក៏ប៉ុន្តែបើយើងប្រៀបធៀប អំពីការចំណាយ ដែលពលករត្រូវបានបង់ថ្លៃ តាមរយៈការធ្វើការខុសច្បាប់នៅក្នុងប្រទេសគេ ការធ្វើការនៅក្នុងប្រទេសយើងមានសុវត្ថិភាពជាង ប្រាក់ចំណូលបើកាត់កងទូទាត់រវាងប្រាក់ចំណាយគឺយ៉ាងណាក៏វាមិន ខុសគ្នាប៉ុន្មានដែរ ។
ម្យ៉ាងទៀត នៅលើទឹកដីរបស់យើងៗ មានសិទ្ធិសេរីភាពគ្រប់បែបយ៉ាង ខុសគ្នាជាមួយនឹងការទៅធ្វើការខុសច្បាប់នៅក្នុងប្រទេសគេ ដែលខ្ញុំមិននិយាយដល់ការធ្វើការងារស្របច្បាប់ទេ តែខ្ញុំសុំនិយាយអំពីការងារខុសច្បាប់ទៅក្នុងប្រទេសគេដែលគេអាច ចោទយើងអំពីអ្វីក៏បានដែរ ។ សម្រាប់ការរកទីផ្សារការងារជូនប្រជាពលរដ្ឋធ្វើក្នុងស្រុក សម្តេចតេជោបានមានប្រសាសន៍ផ្តល់ជាអនុសាសន៍ថា ព័ត៌មានស្ដីពីទីផ្សារការងារត្រូវ តែជាប្រធានបទដ៏សំខាន់មួយ ហើយក្រសួងការងារ និងបណ្ដុះបណ្ដាលវិជ្ជាជីវៈត្រូវធ្វើកិច្ចការ ងារនេះតាមរយៈនៃការចូលរួមសហការពីផ្នែកពាក់ព័ន្ធនានា។ សម្រាប់ទីផ្សារការងារនៅក្រៅប្រទេស ដែលកន្លងមករាជរដ្ឋាភិបាលបានខិតខំស្វែងរក ដែលក្នុងនោះក៏មានប្រទេសថៃផងដែរ សម្តេចតេជោបានមានប្រសាសន៍បញ្ជាក់ថា “ ខ្ញុំសូមបញ្ជាក់ដែលមានអ្នកលើកឡើងថា លោក ហ៊ុន សែន បរាជ័យក្នុងការដោះស្រាយបញ្ហាការងារហើយបានជាមានពលករទៅក្រៅប្រទេស។ ខ្ញុំសុំទទួលយក ប៉ុន្តែ សូមអ្នកគិតឲ្យបានច្បាស់ថា តើទីផ្សារការងារក្នុងប្រទេសរបស់យើងមានប៉ុន្មាន ហើយទាក់ទិននឹងការងារទៅក្រៅប្រទេសនេះ តើមានតែកម្ពុជាឬដែលបញ្ជូនពលករទៅក្រៅប្រទេស។ ខ្ញុំសុំបញ្ជាក់នៅក្នុងបណ្ដាប្រទេសអាស៊ាន ប្រទេសហ្វីលីពីនគឺជាប្រទេសដែលធំជាងគេខាងនាំចេញពលករទៅទីផ្សារ ហុងកុង ឥណ្ឌូណេស៊ីក៏បញ្ជូនពលករទៅក្រៅប្រទេសដែរ ប្រទេសថៃខ្លួនឯងក៏បញ្ជូនពលករទៅក្រៅប្រទេសដែរគឺមជ្ឈិមបូព៌ា និងកោះតៃវ៉ាន់ទៅរកប្រាក់ឈ្នួលដែលខ្ពស់ជាង ដូច្នេះធ្វើឲ្យប្រទេសថៃប្រឈម នឹងការកង្វះពលកម្ម។ នៅក្នុងចំណោមប្រទេសអាស៊ាន ប្រទេសដែលមិនបញ្ជូនពលករចេញ ប៉ុន្តែបែរជារកពលករមកធ្វើ ការគឺមានតែម៉ាឡេស៊ី សិង្ហបុរី និងព្រុយណេ ដែលគាត់មិនបញ្ជូនពលករចេញ ក៏ប៉ុន្តែគាត់ត្រូវការពលករ”។
ពាក់ព័ន្ធនឹងការបញ្ជូនពលករខ្មែរចេញពីប្រទេសថៃជាគំហុកនេះ សម្ដេចតេជោបានមានប្រសាសន៍បញ្ជាក់ថា «យើងត្រូវប្រែក្លាយ ពីការលំបាកនេះ ឱ្យទៅជា កាលានុវត្តភាពថ្មីវិញ, ការបញ្ជូនមកក្នុងគ្រាដំបូង ពិតជាមានកំហុសពីផ្នែកភាគីថៃ បញ្ជូនមករាប់ទាំង ការបំពានសិទ្ធិ ប៉ុន្តែនៅពេលដែលមានអន្តរាគមន៍ភ្លាមៗ របស់ស្ថានទូតកម្ពុជានៅទីក្រុងបាងកក, អន្តរាគមន៍ពីក្រសួងការបរទេស និងផ្នែកពាក់ព័ន្ធដទៃទៀតរបស់កម្ពុជា ក៏បានសម្រួលជាបន្តបន្ទាប់នៃការគោរពសិទ្ធិ ក្នុងការបញ្ជូនមក។
ចំពោះកិច្ចការនេះសម្ដេចតេជោបានបញ្ជាក់នូវជំហានដែលត្រូវដើរ ដោយត្រូវខិតខំដោះស្រាយបញ្ហា ត្រូវកែលំអទាំងខាងភាគីកម្ពុជា និងទាំងខាងភាគីថៃដែល មុននេះមាន ចំណុចខ្វះខាត។ ទាក់ទិននឹងបញ្ហាខាងលើនេះដែរ ក្នុង នោះក្នុងចំណុចទាក់ទិននឹង លិខិតឆ្លង ដែន សម្ដេចតេជោ គូសបញ្ជាក់ថា៖ ចំពោះ ពលករដែលត្រូវទៅធ្វើការនៅក្រៅប្រទេស និងនិស្សិតទៅរៀននៅក្រៅប្រទេស នឹង ត្រូវបានផ្ដល់លិខិតឆ្លងដែនដោយមិនយកប្រាក់ ដោយនិស្សិត ឬ ពលករម្នាក់ៗ ត្រូវចេញតែថ្លៃរូបថត៤ដុល្លារប៉ុណ្ណោះ៕