សម្តេចតេជោ ហ៊ុន សែន អញ្ជើញកាត់ខ្សែបូណ៍សម្ពោធពន្លាជាតិកម្ពុជា និងជួបសំណេះសំណាលជាមួយអាជីវករ ពាណិជ្ជករខ្មែរ ដែលបាននាំយកផលិតផលខ្មែរ
បន្ទាប់ពីបានអញ្ជើញចូលរួមបើកពិធីតាំងពិពណ៍ចិនអាស៊ាននៅណាននីងរួចមក នាព្រឹកថ្ងៃទី១១ ខែកញ្ញា ឆ្នាំ២០១៦ ដដែលនេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញកាត់ខ្សែបូណ៍សម្ពោធពន្លាជាតិកម្ពុជា និងជួបសំណេះសំណាលជាមួយអាជីវករ ពាណិជ្ជករខ្មែរ ដែលបាននាំយកផលិតផលខ្មែរ មកតាំងពិព័រណ៍ នៅទីក្រុងណាននីង ខេត្តក្វាងស៊ី ប្រទេសចិន។
សម្តេចតេជោ បានកោតសរសើរដល់ក្រុមហ៊ុនជាតិ និងអន្តរជាតិដែលកំពុងវិនិយោគលើវិស័យកសិកម្ម និងដំណាំកសិផលនានា ដែលបានយកទំនិញកម្ពុជាមកចូលរួមបង្ហាញ និងដាក់លក់នៅក្នុងប្រទេសចិន។ សម្តេចតេជោ ហ៊ុន សែនបន្តខិតខំដើម្បីពង្រីកទីផ្សារនៅប្រទេសចិនអោយបានទូលាយ ដើម្បីកម្ពុជា យើងអាចនាំចូលនូវផលិតផលកសិម្ម និងទំនិញជាច្រើនមុខថែមទៀតមកកាន់ទីផ្សារមិត្តចិន ក្នុងនោះរួមមានទាំងការអនុគ្រោះលើកលែងពន្ឋជាដើម។
សូមបញ្ជាក់ថា ពិព័រណ៌ពាណិជ្ជកម្មចិន-អាស៊ាន ត្រូវបានរៀបចំឡើងជាលើកដំបូងនៅឆ្នាំ២០០៤ នៅទីក្រុងណាននីងខេត្តក្វាងស៊ី តាមគំនិតផ្តួចផ្តើមនិងស្នើឡើងដោយឯកឧត្តមវេន ជាបាវ អតីតនាយករដ្ឋមន្រ្តីចិន នាសម័យប្រជុំកំពូលអាស៊ាន-ចិន លើកទី៧ឆ្នាំ២០០៣ នៅកោះបាលីប្រទេសឥណ្ឌូនេស៊ី ដោយទទួលបានការស្វាគមន៍ ពីថ្នាក់ដឹកនាំនៃបណ្តាប្រទេសជាសមាជិកអាស៊ាន។ ចាប់ផ្តើមការរៀបចំពិព័រណ៌លើកទី១ នៅឆ្នាំ២០០៤ រហូតដល់លើកទី១៣ ឆ្នាំ២០១៦ នេះ កម្ពុជាបានចូលរួមដោយបំពេញការងារនិងគាំទ្រយ៉ាងសកម្ម ចំពោះពិព័រណ៌ ចិន-អាស៊ាន ដែលបានប្រារព្ធធ្វើជារៀងរាល់ឆ្នាំ នៅទីក្រុងណាននីង ខេត្តក្វាងស៊ី។ នៅក្នុងឱកាសពិព័រណ៌ ចិន-អាស៊ានលើកទី១ ឆ្នាំ២០០៤ កម្ពុជាមានក្រុមហ៊ុនចូលរួមតាំងបង្ហាញចំនួន២៣ និងមានស្តង់សរុបចំនួន២៦។ ចំនួនក្រុមហ៊ុនចូលរួមតាំងបង្ហាញ និងចំនួនស្តង់របស់កម្ពុជា ត្រូវបានកើនឡើងជាបន្តបន្ទាប់រហូតដល់ឆ្នាំ២០១៣ កម្ពុជាមានក្រុមហ៊ុនចូលរួមតាំងបង្ហាញចំនួន៩០ និងមានស្តង់សរុបចំនួន១១០។ ជាមួយគ្នានេះក្រៅពីការចូលរួមតាំងបង្ហាញនិងផ្សព្វផ្សាយ កម្ពុជាមានក្រុមហ៊ុនចូលរួមស្វែងរកដៃគូពាណិជ្ជកម្ម និងវិនិយោគជារៀងរាល់ឆ្នាំចំនួនប្រមាណ១០០ក្រុមហ៊ុន។ នៅក្នុងឱកាសនៃការចូលរួមពិព័រណ៌ចិន-អាស៊ានកន្លងមក កម្ពុជាមានកិច្ចសន្យា និងអនុស្សារណៈសរុបចំនួន ៣៣ត្រូវបានចុះហត្ថលេខា ដោយមានទឹកប្រាក់សរុប ១ពាន់៧៦០លាន៦៣០ពាន់ដុល្លា។
ពិព័រណ៌ចិន-អាស៊ានលើកទី១៣ឆ្នាំ២០១៦ គឺជាព្រឹត្តិការណ៍អន្តរជាតិដ៏ធំ ដើម្បីធ្វើការផ្លាស់ប្តូរសេដ្ឋកិច្ចនិងពាណិជ្ជកម្ម ដែលនឹងត្រូវធ្វើឡើងពីថ្ងៃទី១១ដល់ថ្ងៃទី១៤កញ្ញា នៅសាលសន្និសីទអន្តរជាតិ និងមជ្ឈមណ្ឌលពិព័រណ៌ទីក្រុងណាននីង នៃសាធារណរដ្ឋប្រជាមានិតចិន។ ពិព័រណ៌ចិន-អាស៊ានលើកទី១៣ឆ្នាំ២០១៦នេះ មានស្តង់អន្តរជាតិចំនួន ៤ពាន់៦០០ចូលរួម ក្នុងនោះរួមមាន កន្លែងតាំងពិព័រណ៌ធំមាន៣ពាន់៤០០ ក្នុងនោះផ្នែកខាងក្នុងមាន២ពាន់៨០០ និងផ្នែកខាងក្រៅមាន៦០០ស្តង់។ កន្លែងតាំងពិព័រណ៌រណបមាន៦០០ស្តង់ និងតាំងពិព័រណ៌រណបសំរាប់ឧស្សាហកម្មធុនស្រាលមាន៦០០ស្តង់។ គ្រប់ការតាំងពិព័រណ៌ចិន-អាស៊ាន នៅណាននីង សម្តេចអគ្គមហាសេនាបតីតេជោ ហ៊ុន សែន បានអញ្ជើញចូលរួមចំនួន៩លើករួចមកហើយ។ ជោគជ័យផ្ទួនៗអស់រយៈពេល១៣លើកកន្លងទៅនេះ ពិព័រណ៌ចិន-អាស៊ានបានក្លាយទៅជាវេទិកាសំខាន់មួយ សម្រាប់ការផ្លាស់ប្តូរប្រកបដោយមិត្តភាព កិច្ចសហប្រតិបត្តិការពាណិជ្ជកម្ម និងសហប្រតិបត្តិការទ្វេភាគីនៅគ្រប់វិស័យទាំងអស់ រវាងចិននិងអាស៊ាន និងត្រូវបានចាត់ទុកជាគំរូមួយ នៃកិច្ចសហប្រតិបត្តិការចិននិងអាស៊ាន។ ពិព័រណ៌ចិន-អាស៊ាន១៣លើកកន្លងទៅមានប្រមុខរដ្ឋ ប្រមុខរដ្ឋាភិបាល ចំនួន៥២រូប ចូលរួមនិងរដ្ឋមន្រ្តី អនុរដ្ឋមន្រ្តីជាង២ពាន់៤០នាក់ ដែលបានផ្តល់នូវការធានាខាងនយោបាយដល់កិច្ចសហប្រតិបត្តិការសេដ្ឋកិច្ច និងពាណិជ្ជកម្មទ្វេភាគី។ ជាងនេះទៅទៀតពិព័រណ៌ចិន-អាស៊ាន១០លើកកន្លងទៅ បានទាក់ទាញអ្នកតាំងពិព័រណ៌ និងអ្នកទស្សនាចំនួន៣៩៨ពាន់នាក់។
ពិព័រណ៌ពាណិជ្ជកម្មចិន-អាស៊ានលើកទី១៣នេះ ត្រូវបានរៀបចំធ្វើឡើងពីថ្ងៃទី១១ដល់ថ្ងៃទី១៤ ខែកញ្ញាឆ្នាំ២០១៦។ គោលបំណងនៃការចូលរួមរបស់ព្រះរាជាណាចក្រកម្ពុជា គឺដើម្បីផ្សព្វផ្សាយអំពីផលិតផលសក្តានុពលរបស់កម្ពុជា។ ការស្វែងរកទីផ្សារនាំចេញទំនិញពីកម្ពុជានិងពង្រឹងភាពជាម្ចាស់នៃវិស័យឯកជនឲ្យមានបណ្តាញអន្តរជាតិ។ ទាក់ទាញវិនិយោគិនបរទេសឲ្យចូលមកកម្ពុជា តាមរយៈការរៀបចំវេទិកាធុរកិច្ចនិងកិច្ចពិភាក្សាធុរកិច្ច។ ពង្រឹងកិច្ចសហប្រតិបត្តិការល្អលើវិស័យសេដ្ឋកិច្ច ពាណិជ្ជកម្ម ការទូតរវាងកម្ពុជា-ចិន និងរវាងកម្ពុជាជាមួយប្រទេសនានាក្នុងតំបន់ ជាពិសេសបណ្តាប្រទេសអាស៊ាន ការផ្សព្វផ្សាយវប្បធម៌ និងទាក់ទាញអ្នកទេសចរណ៍។ ចាប់តាំងពីឆ្នាំ២០០៧មក ប្រទេសអាស៊ានទាំងអស់ត្រូវបានទទួលធ្វើជាប្រធានកិត្តិយស ក្នុងព្រឹត្តិការណ៍នេះ ដែលរៀបចំតាមលំដាប់អក្សរ។ ប្រទេសកម្ពុជាត្រូវបានជ្រើសរើសជាប្រទេសកិត្តិយសម្តងរួចហើយនៅឆ្នាំ២០០៨។ ឆ្នាំ២០១៦នេះ ប្រទេសវៀតណាមត្រូវបានជ្រើសរើសជាប្រទេសកិត្តិយស។ តាមវេននៃលំដាប់អក្សរកម្ពុជានឹងត្រូវទទួលធ្វើជាប្រទេសកិត្តិយសជាថ្មីម្តងទៀត នៅឆ្នាំ២០១៨។ ការចូលរួមរបស់កម្ពុជាពីមួយឆ្នាំទៅមួយឆ្នាំ មានការកើនឡើងទាំងចំនួនក្រុមហ៊ុន ទាំងពាណិជ្ជករ និងអាជីវករ។ កម្ពុជាបានចូលរួមព្រឹត្តិការណ៍នេះជារៀងរាល់ឆ្នាំ និងទទួលបានការគាំទ្រពីថ្នាក់ដឹកនាំប្រទេសចិន ហើយ ផលិតផលកម្ពុជាត្រូវបានគេទទួលស្គាល់ក្នុងទីផ្សារអន្តរជាតិ។ ជាមួយគ្នានោះក្រុមហ៊ុនកម្ពុជាមួយចំនួនមានភាពម្ចាស់ការជាបណ្តើរៗ តាមរយៈការចូលរួមបីព្រឹត្តិការដ៏មានសារៈសំខាន់នេះ។ ដោយឡែកសិល្បៈនិងវប្បធម៌ដ៏ប្រពៃរបស់កម្ពុជា ក៏ត្រូវបានផ្សព្វផ្សាយផងដែរ តាមរយៈការសម្តែងនិងការបង្ហាញនៅពន្លាជាតិរបស់ខ្លួន។ សម្តេចតេជោនាយករដ្ឋមន្រ្តីបានអញ្ជើញចូលរួមព្រឹត្តិការណ៍នេះ ចំនួន៨លើករួចមកហើយ ដោយឡែកនេះគឺជាលើកទី៩ក្នុងឆ្នាំ២០១៦នេះ ដែលសម្តេចតេជោបានអញ្ជើញចូលរួមដោយផ្ទាល់។ កម្ពុជាបានរៀបចំពន្លាជាតិរបស់ខ្លួន លើផ្ទៃដីទំហំ៧ម៉ែត្រគុណនិង៣៣ម៉ែត្រដោយជ្រើសរើសខេត្តកោះកុងជាទីក្រុងដ៏ស្រស់ប្រិមប្រិយ របស់ព្រះរាជាណាចក្រកម្ពុជា។
