ទស្សនកិច្ចលើកទី៣ ទៅខេត្តទិសឦសាន ដែលជាសក្ខីកម្មរស់ដោយប្រជាពលរដ្ឋ អំពីការពិតនៃការគ្រប់គ្រង ការការពារទឹកដី របស់រាជរដ្ឋាភិបាលកម្ពុជា នឹងចាប់ផ្តើមនៅថ្ងៃទី២១ ខែកញ្ញា ស្អែកនេះ
ឯកឧត្តម បានបញ្ជាក់បន្ថែមថា សម្រាប់ដំណើរទស្សនកិច្ចថ្ងៃទី២១ ខែកញ្ញា ខាងមុខនេះ ក្រុមអ្នករៀបចំបានកំណត់រួចហើយនូវចំនួនអ្នកត្រូវទៅចូលរួមទាំង ២០០នាក់ សម្រាប់ទស្សនកិច្ចលើកទី៣ ក្នុងក្របខណ្ឌនៃការរៀបចំដំណើរទស្សនកិច្ចពលរដ្ឋរយៈពេល១ថ្ងៃ ដោយឥតគិតថ្លៃ ក្នុងតម្រាយផ្លូវចេញពីរាជធានីភ្នំពេញឆ្ពោះទៅកាន់ខេត្តត្បូងឃ្មុំ ក្រចេះ និងមណ្ឌលគិរី រួចវិលត្រលប់មករាជធានីភ្នំពេញវិញនៅថ្ងៃដដែល។ បញ្ជីឈ្មោះប្រជាពលរដ្ឋទាំង២០០នាក់ ត្រូវបានក្រុមការងាររៀបចំរួច និងអញ្ជើញចូលរួមប្រជុំកិច្ចប្រជុំនារសៀលនេះដើម្បីទទួលព័ត៌មានស្តីពីកម្មវិធីធ្វើដំណើរ ការសម្របសម្រួលការត្រៀមរៀបចំសម្រាប់ដំណើរទស្សនកិច្ច និងព័ត៌មានសំខាន់ៗពាក់ព័ន្ធនឹងការងារព្រំដែន សម្រាប់ជាការយល់ដឹងបន្ថែម និងឈ្វេងយល់ឱ្យស៊ីជម្រៅទៀតជុំវិញការគ្រប់គ្រងតំបន់ក្រវាត់ព្រំដែន និងការការពារអធិបតេយ្យជាតិ បូរណភាពទឹកដីកម្ពុជា។
ការចូលរួមចុះឈ្មោះដ៏ច្រើនកុះកររបស់បងប្អូនប្រជាពលរដ្ឋក្នុងដំណើរទស្សនកិច្ចនេះ គឺជាសក្ខីកម្មរស់ដោយប្រជាពលរដ្ឋ ដែលបានមើលឃើញដោយផ្ទាល់អំពីការពិតនៃការគ្រប់គ្រង ការការពារទឹកដី របស់រាជរដ្ឋាភិបាលកម្ពុជា។ ប្រជាពលរដ្ឋដែលបានទៅដល់តំបន់ក្រវាត់ព្រំដែនរួចហើយ បានចែករំលែកបទពិសោធន៍ល្អដែលបានទទួលពីការរៀបចំដំណើរទស្សនកិច្ចនៅប៉ែកឦសាននេះ ដែលមានការចូលរួមពីថ្នាក់ដឹកនាំក្រសួងព័ត៌មាន អង្គភាពអ្នកនាំពាក្យរាជរដ្ឋាភិបាល រដ្ឋលេខាធិការដ្ឋានទទួលបន្ទុកកិច្ចការព្រំដែន ព្រមមានការចូលរួមពីថ្នាក់ដឹកនាំខេត្ត និងអាជ្ញាធរដែនដី ព្រមទាំងមន្ត្រីជំនាញខាងព្រំដែនផងដែរ ដើម្បីផ្តល់ជូនដល់ប្រជាពលរដ្ឋនូវបទពិសោធន៍ដំណើរទស្សនកិច្ចមួយដែលពោរពេញដោយចំណេះដឹង និងភាពសប្បាយរីករាយ ជាពិសេសបង្កឱកាសក្នុងការកសាងបន្ថែមនូវសាមគ្គីភាពជាតិកម្ពុជាតែមួយរឹងមាំ សម្រាប់ចូលរួមថែរក្សាបូរណភាពទឹកដីឱ្យស្ថិតនៅគង់វង្សជាដរាបមិនឱ្យបាត់សូម្បី ១មីលីម៉ែត្រឡើយ។
ជាងនេះទៀតប្រជាពលរដ្ឋបានចូលរួមផ្សព្វផ្សាយយ៉ាងទូលំទូលាយអំពីសកម្មភាពនានានៃទស្សនកិច្ចទាំងពីរលើកកន្លងទៅ ដែលបានប្រព្រឹត្តទៅប្រកបដោយជោគជ័យ និងទទួលបានការសាទរពីប្រជាពលរដ្ឋ និងយុវជនទាំងអស់ដែលបានចូលរួមក្នុងដំណើរទស្សនកិច្ចប្រភេទនេះ ដែលជាទស្សកិច្ចពលរដ្ឋលើកដំបូងបង្អស់សម្រាប់កម្ពុជា ឬអាចថាក្នុងតំបន់ទាំងមូលក៏ថាបាន។ ចំណុចដែលពិសេសនោះគឺការបង្ហាញនូវទឹកចិត្តពិតរបស់ប្រជាពលរដ្ឋដោយប្រជាពលរដ្ឋខ្លួនឯងផ្ទាល់ ស្តីពីភាពពិត និងស្ថានភាពជាក់ស្តែងពាក់ព័ន្ធនឹងការគ្រប់គ្រងព្រំដែន ការការពារអធិតេយ្យភាពជាតិ និងបូរណភាពទឹកដីដោយរាជរដ្ឋាភិបាលកម្ពុជា ក៏ដូចជាពីភាពរីកចម្រើនជាក់ស្តែងយ៉ាងច្រើនខាងផ្នែកសង្គម-សេដ្ឋកិច្ច ទាំងការអភិវឌ្ឍផ្នែកជីវភាពរស់នៅ សុខសុវត្ថិភាពក្នុងសហគមន៍មូលដ្ឋាន និងការរីកចម្រើនខាងវិស័យហេដ្ឋារចនាសម្ព័ន្ធនានា នៅក្នុងតំបន់ក្រវាត់ព្រំដែន ក៏ដូចជាក្នុងខេត្តត្បូងឃ្មុំ ក្រចេះ និងមណ្ឌលគិរី ផងដែរ។
ដំណើរទស្សនកិច្ចពលរដ្ឋនេះបានក្លាយជាទឡ្ហីករណ៍រស់ដ៏សំខាន់បញ្ជាក់ពីភាពច្បាស់លាស់ប្រាកដប្រជា និងឆន្ទៈមុះមុតរបស់រាជរដ្ឋាភិបាលកម្ពុជាក្នុងការបន្តបេសកកម្មការពារអធិបតេយ្យភាព បូរណភាពទឹកដី និងបន្តធានាសុខសន្តិភាព និងស្ថិរភាពសង្គមសម្រាប់ជាប្រយោជន៍ដល់ជាតិ និងប្រជាជនកម្ពុជាទាំងអស់។ ដំណើរទស្សនកិច្ចនេះក៏បានបង្កើតនូវរូបភាពវិជ្ជមានមួយបន្ថែមទៀតសម្រាប់ជាតិកម្ពុជាទាំងមូល និងដើម្បីបង្ហាញដល់សកលលោកឱ្យបានដឹងថាកម្ពុជាមានសាមគ្គីភាពរឹងមាំជាធ្លុងមួយក្នុងភាពជាម្ចាស់ប្រទេស ដោយមិនអនុញ្ញាតឱ្យបាត់បង់ទឹកដីសូម្បីមួយមីលីម៉ែត្រ សោះឡើយ ហើយប្រជាជនកម្ពុជានឹងបន្តរួមកំលាំងសាមគ្គីគ្នាដើម្បីចូលរួមជាមួយរាជរដ្ឋាភិបាលក្នុងសកម្មភាពអភិវឌ្ឍនានា ព្រមទាំងចូលរួមប្រឆាំងព័ត៌មានក្លែងក្លាយ និងបំផ្លាញចោលរាល់ការបំភ្លៃការពិតពីសំណាក់ក្រុមជ្រុលនិយមក្រៅច្បាប់មួយក្តាប់តូច ដើម្បីរួមចំណែកថែរក្សាស្ថិរភាពក្នុងសង្គម និងចូលរួមក្នុងសកម្មភាពដើម្បីកំណើនសេដ្ឋកិច្ច។
សូមរំលឹកជូនផងដែរថា ទស្សនកិច្ចនេះបើកទូលាយសម្រាប់សាធារណជនទូទៅទាំងអស់ ហើយថវិកាសម្រាប់ការចំណាយគឺជាការឧបត្ថម្ភដោយ សម្ដេចធីបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ។ ថវិកានេះជាថវិកាផ្ទាល់របស់សម្តេចធិបតី និងលោកជំទាវ ព្រមទាំងសប្បុរសជន ដែលជាថវិកាដោយឡែក មិនពាក់ព័ន្ធនឹងថវិកាជាតិ ឬមូលនិធិកសាងហេដ្ឋារចនាសម្ព័ន្ធក្រវាត់ព្រំដែនឡើយ។
ដោយ ផែន រតនៈ
