សុន្ទរកថាឯកឧត្តមបណ្ឌិតសុភាចារ្យ សុខ អាន ក្នុងពិធីបើកកិច្ចប្រជុំមហាសន្និបាត EATOF និងវេទិកាទេសចរណ៍អន្តរតំបន់អាស៊ីបូព៌ាលើកទី១២
សុន្ទរកថា
ឯកឧត្តមបណ្ឌិតសុភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី និងជាតំណាងដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងពិធីបើកកិច្ចប្រជុំមហាសន្និបាត EATOF និងវេទិកាទេសចរណ៍អន្តរតំបន់អាស៊ីបូព៌ាលើកទី១២
‑ ឯកឧត្តម ថោង ខុន រដ្ឋមន្ត្រីក្រសួងទេសចរណ៍
‑ ឯកឧត្តម ស៊ូ ភិរិន្ទ អភិបាលខេត្តសៀមរាប
‑ ឯកឧត្តម លោកជំទាវ លោក លោកស្រី ភ្ញៀវកិត្តិយសជាតិ និងអន្តរជាតិ
ជាបថម តាងនាម សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
ខ្ញុំសូមស្វាគមន៍យ៉ាងកក់ក្តៅដល់ប្រតិភូទាំងអស់មកកាន់ខេត្តសៀមរាប
‑អង្គរ ដែលជារមណីយដ្ឋានបេតិកភ័ណ្ឌពិភពលោក
និងជាទីក្រុងវប្បធម៌នៃអាស៊ីបូព៌ាឆ្នាំ២០១២។
ខ្ញុំមានបេតិសោមនស្សរីករាយ និងកិត្តិយសចូលរួមពិធីបើកមហាសន្និបាត
និងវេទិការទេសចរណ៍អន្តរតំបន់អាស៊ីបូព៌ាលើកទី១២។
ក្នុងឱកាសនេះ ខ្ញុំសូមសំដែងនូវការកោតសរសើរដោយស្មោះ
ចំពោះគណៈកម្មាការអន្តរក្រសួង
ពិសេសមន្ត្រីរាជការខេត្តសៀមរាបក្នុងការរៀបចំព្រឹតិ្តការណ៍នេះ។
ខ្ញុំសូមអរគុណដោយស្មោះចំពោះឯកឧត្តម អស់លោក លោក លោកស្រី
ក្នុងការចូលរួមដ៏សកម្មក្នុងវេទិការនេះ។
ការជួបជុំនេះគឺប្រព្រឹត្តិទៅស្របពេលដែលយើងទាំងអស់គ្នាជាប្រជាពលរដ្ឋ
ខ្មែរមានទុក្ខយ៉ាងក្រៀមក្រំដោយអតីតព្រះវរៈបីតាជាតិខ្មែរ ព្រះបាទសម្តេចព្រះ នរោត្តម សីហនុ ព្រះរាជបីតាឯករាជជាតិ បូរណភាព និងឯកភាពជាតិខ្មែរ សោយទីវង្គត្ស។
ប្រធានបទនៃវេទិការនាថ្ងៃនេះ គឺ “អាស៊ីបូព៌ាធ្វើបសិដ្ឋកម្មទេសចរណ៍បៃតងប្រកបដោយចិរភាព” ដែល
ពិតជាមានសារៈសំខាន់ និងទាន់ពេលវេលា
ដោយឆ្លុះបញ្ចាំងពីបញ្ហានាពេលបច្ចុប្បន្ននៃអត្ថប្រយោជន៍ក្នុង
តំបន់ក៏ដូចជាសាកលលោក
ជាពិសេសការធ្វើឲ្យប៉ះពាល់អវិជ្ជមាននៃវិស័យទេសចរណ៍មានកម្រិត
អប្បបរិមាដល់វប្បធម៌ សង្គម និងបរិស្ថាន។
ការយល់ដឹងអំពីផលប៉ះពាល់ទាំងនោះកំពុងត្រូវបានពង្រីកសម្រាប់ការ
អភិវឌ្ឍន៍ប្រកបដោយចិរភាព។ទេសចរណ៍បៃតង ក៏ជំរុញ
ទ្រទ្រង់ដល់កិច្ចអភិរក្សវប្បធម៌
និងសុចរិតភាពរបស់ប្រជាពលរដ្ឋនៅមូលដ្ឋាន និងរួមចំណែក
ដល់កិច្ចការពារ និងអភិរក្សបេតិកភ័ណ្ឌ។ បន្ថែមពីលើនេះទៀត
ការវាយតម្លៃនៃកត្តាបរិស្ថាន
និងវប្បធម៌ជាផ្នែកសមាហរណកម្មនៃទេសចរណ៍បៃតង
គឺជាការផ្សព្វផ្សាយការប្រើប្រាស់ឡើងវិញអត្ថប្រយោជន៍នៃថាមពល
ការអភិរក្សទឹក និងការបង្កើតកាលានុវត្តភាពសេដ្ឋកិច្ច
សម្រាប់សហគមន៍មូលដ្ឋាន។ ការអភិរក្ស និងការដាំដើមឈើ ពិសេសទស្សនទាន "ទេសចរម្នាក់ ដើមឈើមួយដើម” ឬ “ការដាំដើមឈើផ្តើមចេញពីអ្នក”
នឹងរួមចំណែកយ៉ាងសំខាន់ដល់ការផ្សព្វផ្សាយ
និងទ្រទ្រង់ដល់ទេសចរណ៍បៃតង។ យើងក៏ជំរុញយុទ្ធនាការកាត់បន្ថយការ
ប្រើប្រាស់ថង់ប្លាស្ទីកតាមរូបមន្ត 3Rs (Reduce, Reuse, Recycle)
“កាត់បន្ថយការប្រើប្រាស់ ប្រើប្រាស់ឲ្យបានច្រើនដង
និងកែច្នៃប្រើប្រាស់ឡើងវិញ”
និងប្តេជ្ញាលប់បំបាត់ថង់ប្លាស្ទីកហើរតាមខ្យល់ឲ្យបានមុន
ឆ្នាំ២០១៥
ដែលនេះគឺជាអនុសាសន៍ដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី
យើងខ្ញុំ។
ប្រធានបទសម្រាប់ពិភាក្សា និងការជ្រើសរើសខេត្តសៀមរាប
ជាកន្លែងសម្រាប់កិច្ចប្រជុំនេះ
គឺពិតជាសក្តិសមណាស់ជាទីក្រុងដែលឡោមព័ទ្ធដោយធម្មជាតិ
បរិស្ថានដែលគ្មានការបំពុល
និងជារមណីយដ្ឋានបេតិកភ័ណ្ឌវប្បធម៌ដ៏មានតម្លៃជាប្រវត្តិសាស្ត្រ។
តាមរយៈការរៀបចំទទួលជាម្ចាស់ផ្ទះនៃវេទិការដ៏មានសារៈសំខាន់នេះ
កម្ពុជាមានកិត្តិយសសូមយកឱកាសនេះដើម្បីជំរុញលើកកម្ពស់កិត្យានុភាព
ជាតិនៅលើឆាកអន្តរជាតិបន្ថែមទៀត។
‑ ឯកឧត្តម អស់លោក លោកស្រី
យើងពិតជាមានភព្វសំណាងដោយទទួលនូវមរតកបេតិកភ័ណ្ឌវប្បធម៌ ធម្មជាតិ
និងប្រវត្តិសាស្ត្រ ជាពិសេសប្រាង្គប្រាសាទអង្គរ។
សម្រាប់យើងជាប្រជាពលរដ្ឋខ្មែរ អង្គរនៅតែជាអត្តសញ្ញាណ
និងដួងប្រលឹងដ៏សំខាន់ ហើយនៅតែបន្តសារៈសំខាន់នេះដល់វប្បធម៌
និងអរិយធម៌ដ៏មហស្ចារ្យរបស់យើង។
ប្រាង្គប្រាសាទអង្គរវត្តត្រូវបានរំលេចអំពីសារៈសំខាន់នេះនៅលើ
ទង់ជាតិ។ គំនូរអង្គរវត្តត្រូវបានគេប្រទះឃើញនៅគ្រប់ទិសទី
ក្នុងព្រះរាជាណាចក្រកម្ពុជា រួមទាំងអគារសាធារណៈ ការិយាល័យ
និងតាមគេហដ្ឋានរបស់ប្រជាពលរដ្ឋ។
កម្ពុជាមានរមណីយដ្ឋានទេសចរណ៍ជាច្រើនដែលសក្តិសមសម្រាប់ទេសចរណ៍
វប្បធម៌។
កម្ពុជាប្រកបដោយទាយជ្ជទានដ៏សម្បូរបែបមានការទាក់ទាញខាងធម្មជាតិ
និងបរិស្ថានធម្មជាតិដ៏ស្រស់ត្រកាលរួមមាន ព្រៃ ស្ទឹង ទន្លេ បឹងបួរ
ឆ្នេរសមុទ្រខ្នាតអន្តរជាតិ កោះ និងសត្វព្រៃ
ជាពិសេសសត្វផ្សោតមេគង្គដ៏កម្រ។ ប្រទេសយើងមានប្រវត្តិយូរអង្វែង
ប្រកបដោយវប្បធម៌ និងអរិយធម៌ដ៏មហស្ចារ្យ។
បុព្វបុរសខ្មែរបានបន្សល់ទុកឲ្យយើងនូវបេតិកភ័ណ្ឌរូបីយ
និងអរូបីយជាអាទិ៍ ប្រាង្គប្រាសាទ សិល្បៈ និងរបាំបុរាណ។
សម្បត្តិទាំងនេះ
កម្ពុជាមានឧត្តមភាពប្រៀបធៀបដ៏ខ្លាំងខ្លាក្នុងវិស័យទេសចរណ៍ដែលបន្ត
រីកត្រសំត្រសាយ និងរួមចំណែកដល់កិច្ចអភិវឌ្ឍន៍នៃឧស្សាហកម្ម
សេវាកម្ម។ ការទាក់ទាញខាងវប្បធម៌
និងធម្មជាតិមានសណ្ឋាគារខ្នាតអន្តរជាតិធំៗជាច្រើនចាប់ពីផ្កាយ៣
រហូតដល់ផ្កាយ៥ (រួមមានប្រមាណ ៤៥០សណ្ឋាគារនៅទូទាំងប្រទេស និងនៅដោយឡែកនៅខេត្តសៀមរាបមានជាង ១០០សណ្ឋាគារ)
រមណីយដ្ឋាន ព្រមទាំងនយោបាយបើកចំហរជើងមេឃ
ដែលជានយោបាយផ្តួចផ្តើមដោយសម្តេចតេជោនាយករដ្ឋមន្ត្រី
ភ្ញៀវទេសចរអន្តរជាតិជាច្រើនបានកើនឡើងរហូតដល់២,៨៨លាននាក់ក្នុង
ឆ្នាំ២០១១ ដែលឆ្នាំ១៩៩៣
យើងទទួលបានភ្ញៀវទេសចរអន្តរជាតិចំនួន ១១៨ ០០០ នាក់តែប៉ុណ្ណោះ។ ក្នងរយៈពេល១០ខែ ឆ្នាំ២០១២នេះ
កម្ពុជាទទួលបានភ្ញៀវទេសចរអន្តរជាតិចំនួន ២,៨លាននាក់ក្នុងកំណើន ២៣,៧%
ក្នុងនោះខេត្តសៀមរាបទទួលបានទេសចរអន្តរជាតិចំនួន ១,៦ លាននាក់
ក្នុងកំណើន ៥៧,៤% ធៀបរយៈពេលដូចគ្នាក្នុងឆ្នាំ២០១១។
យើងរំពឹងទុកថានៅក្នុងឆ្នាំ២០១២នេះ យើងទទួលបានទេសចរចំនួន
៣,៣លាននាក់ ក្នុងនោះសៀមរាបនឹងបានចំនួនប្រមាណ ២លាននាក់។ នៅថ្ងៃទី០៣
ខែធ្នូ ឆ្នាំ២០១២នេះ
យើងនឹងប្រារព្ធពិធីអបអរសាទរការមកដល់នៃភ្ញៀវលើកទី២លាននាក់
មកកាន់ខេត្តសៀមរាបតាមផ្លូវអាកាស។ ជាមួយនឹងបេតិភ័ណ្ឌវប្បធម៌
ធម្មជាតិសម្បូរណ៍បែប អរិយធម៌ដ៏រុងរឿង ស្ថិរភាពនយោបាយ សុខសន្តិភាព
សុវត្ថិភាពទូទាំងប្រទេស យើងរំពឹងថានឹងទទួលបានទេសចរអន្តរជាតិប្រមាណ
៤,៥លាននាក់នៅឆ្នាំ២០១៥ និងប្រមាណ ៧លាននាក់នៅឆ្នាំ២០២០
ក្នុងនោះខេត្តសៀមរាបនឹងទទួលបានប្រមាណ ៤លាននាក់។
ទន្ទឹមនឹងចំនួនទេសចរដែលនឹងមកដល់ដ៏ច្រើននេះ
រាជរដ្ឋាភិបាលកម្ពុជាបានរៀបចំផែនការយុទ្ធសាស្ត្រ
ពិសេសការពង្រីកគោលដៅទេសចរណ៍
និងការធ្វើពិពិធកម្មពីតំបន់សៀមរាបអង្គរទៅកាន់តំបន់បឹងទន្លេសាប
តំបន់ប្រាសាទព្រះវិហារដែលជាគោលដៅទេសចរណ៍បេតិកភ័ណ្ឌទី២
តំបន់អេកូទេសចរណ៍
និងតំបន់ឆ្នេរសមុទ្រដែលត្រូវបានទទួលស្គាល់ថាជាសមាជិកក្លិប
ឆ្នេរសមុទ្រដ៏ស្អាតបំផុតលើពិភពលោក និងត្រូវបានប្រសិទ្ធនាមថាជា
“តារារះនាទិសនិរតី” ។ ម្យ៉ាងទៀត
យើងយកចិត្តទុកដាក់ខ្ពស់ដល់ការអភិវឌ្ឍបៃតង
និងការរៀបចំសណ្តាប់ធ្នាប់ របៀបរៀបរយ និងសោភ័ណ្ឌភាពទីក្រុង
ទីប្រជុំជននៅតំបន់ទេសចរណ៍។
រាជរដ្ឋាភិបាលបានដាក់ចេញនូវយុទ្ធនាការប្រលងប្រណាំង “ទីក្រុងស្អាត
រមណីយដ្ឋានស្អាត សេវាល្អ”
ពិសេសការដាក់ចេញនូវស្តង់ដារទីក្រុងទេសចរណ៍ស្អាតកម្ពុជា
ដែលអាស៊ានបានយកជាគំរូក្នុងការរៀបចំស្តង់ដារទីក្រុងទេសចរណ៍ស្អាត
អាស៊ាន។ យើងក៏យកចិត្តទុកដាក់ផងដែរក្នុងការរៀបចំទីក្រុងបៃតង
“Eco-City” ដោយរៀបចំឲ្យមានផ្លូវថ្មើរជើង ផ្លូវជិះកង់
ការប្រើបច្ចេកវិទ្យាបៃតង និងថាមពលកកើតឡើងវិញ។
‑ ឯកឧត្តម អស់លោក លោកស្រី
វេទិការទេសចរណ៍អន្តរតំបន់អាស៊ីបូព៌ាបានបង្កើតកាលពី១២ឆ្នាំមុន
ហើយគឺជាវេទិការមួយដ៏សុក្រិត្យដើម្បីពង្រឹងពង្រីកកិច្ច
សហប្រតិបត្តិការតំបន់
និងជំរុញឲ្យមានសង្គហៈទៅវិញទៅមកនៅក្នុងវិស័យជាច្រើន។
ក្នុងឆ្នាំ២០០៩ កម្ពុជាបានក្លាយទៅជាសមាជិកនៃវេទិការនេះ។
តាំងពីពេលនោះមក កិច្ចសហប្រតិបត្តិការរវាងប្រទេសជាសមាជិកត្រូវបានពង្រឹង
និងពង្រីកយ៉ាងស៊ីជម្រៅ។ ក្នុងចំណោមវិស័យ
កិច្ចសហប្រតិបត្តិការសេដ្ឋកិច្ចសង្គម និងអភិវឌ្ឍន៍
វិស័យទេសចរណ៍បានដើរតួនាទីយ៉ាងសំខាន់ក្នុងការនាំ
និងទំនាក់ទំនងពលរដ្ឋ និងពលរដ្ឋ ពីផ្នែកផ្សេងៗគ្នានៃពិភពលោក ។
ដើម្បីពង្រឹង និងពង្រីកទំនាក់ទំនង កិច្ចខិតខំប្រឹងប្រែង
និងការផ្តួចផ្តើមបន្ថែមទៀតត្រូវតែជំរុញលើកទឹកចិត្ត
ដើម្បីរៀបចំវេទិការទេសចរណ៍
និងព្រឹត្តិការណ៍វប្បធម៌ឲ្យបានច្រើនថែមទៀត។ លើសពីនេះទៀត
គឺតម្រូវឲ្យមានកិច្ចសហប្រតិបត្តិការឲ្យកាន់តែខ្លាំងក្លាជាងមុន
ដើម្បីការពារ អភិរក្ស និងផ្សព្វផ្សាយអំពីបេតិកភ័ណ្ឌវប្បធម៌រូបីយ
និងអរូបីយ ក៏ដូចជាធានាបាននូវការអភិវឌ្ឍទេសចរណ៍ប្រកបដោយចិរភាព។
វេទិការនេះក៏ឆ្លុះបញ្ចាំងពីការខិតខំប្រឹងប្រែងដោយមិនខ្លាចនឿយហត់
និងការប្តេជ្ញាចិត្តដ៏រឹងមាំរបស់ប្រទេសដែលចូលរួមក្នុងការជំរុញ
អភិវឌ្ឍន៍ប្រកបដោយចិរភាពនៃទេសចរណ៍បៃតង។ ស្របជាមួយគ្នានេះដែរ
កិច្ចប្រជុំពាក់ព័ន្ធដូចជាគណៈកម្មាធិការអចិន្ត្រៃយ៍
និងសន្និបាតអភិបាលខេត្តក៏ត្រូវបានប្រព្រឹត្តិទៅសំដៅទាញយក
និងបង្កើតយុទ្ធសាស្រ្តដ៏សមរម្យដើម្បីជំនះនូវបញ្ហាប្រឈមនានាក្នុង
វិស័យទេសចរណ៍រៀងៗខ្លួនក្នុងទីផ្សារទេសចរណ៍ប្រកបដោយការប្រកួតប្រជែង។
ដោយមានវត្តមាននៃអ្នកជំនាញក្នុងវិស័យនេះ
ខ្ញុំសង្ឃឹមថាព្រឹត្តិការណ៍រយៈពេលពីរថ្ងៃនេះ នឹងមានគំនិត យោបល់
និងបទពិសោធន៍នានានៃប្រទេសនិមួយៗនឹងត្រូវបានផ្លាស់ប្តូរ
និងចែករំលែងដើម្បីការពារ និងអភិរក្សរមណីយដ្ឋានវប្បធម៌ និងធម្មជាតិ
ខណៈពេលដែលកំពុងស្រូបយកអត្ថប្រយោជន៍ពីវិស័យទេសចរណ៍ សំដៅជំរុញ
ទ្រទ្រង់ ការអភិវឌ្ឍសេដ្ឋកិច្ចប្រកបដោយចិរភាព។ ជាមួយគ្នានេះដែរ
ខ្ញុំយល់ឃើញថា
វេទិការនេះនឹងពិភាក្សាអំពីប្រធានបទដែលពាក់ព័ន្ធទៅនឹងការសម្រប
សម្រួលការធ្វើដំណើរក្នុងប្រទេសជាសមាជិក
បសិដ្ឋកម្មនៃគុណភាពផលិតផលទេសចរណ៍
ជំរុញផ្សព្វផ្សាយពាណិជ្ជកម្មក្នុងសេវាកម្ម
និងវិនិយោគទេសចរណ៍ក៏ដូចជាកិច្ចសហការជិតស្និតក្នុងវិស័យទេសចរណ៍តាម
រយៈសកម្មភាពរួមគ្នា។
ដើម្បីទទួលបាននូវសមិទ្ធិផលនេះតម្រូវឲ្យមានការចូលរួមពីវិស័យ
ផ្សេងៗដូចជា ការគ្រប់គ្រងសម្បទា និងធនធាន។
សហគមន៍មូលដ្ឋានអាចរួមចំណែកដោយក្លាយទៅជាម្ចាស់នៃសម្បទាបៃតងដោយ
ខ្លួនឯង។ ភាគីពាក់ព័ន្ធ រដ្ឋាភិបាល ផ្នែកឯកជន សង្គមស៊ីវិល យុវជន
គួរធ្វើការឲ្យបានជិតស្និតជាមួយគ្នាថែមទៀត
ដើម្បីធានាបាននូវតុល្យភាពមួយដ៏ត្រឹមត្រូវរវាងកិច្ចអភិរក្ស
លទ្ធភាពទទួល និងកាលានុវត្តភាពធុរកិច្ច។
‑ ឯកឧត្តម អស់លោក លោកស្រី
តាងនាមឲ្យរាជរដ្ឋាភិបាលកម្ពុជា ជាថ្មីម្តងទៀត
ខ្ញុំសូមសំដែងអំណរគុណចំពោះគណៈកម្មាធិការអន្តរក្រសួងរៀបចំវេទិការ
ដ៏មានសារៈសំខាន់នេះ។ ខ្ញុំសូមជំរុញឲ្យអ្នកចូលរួមជាតិ
និងអន្តរជាតិព្រមទាំងអ្នកជំនាញការធ្វើការផ្លាស់ប្តូរគំនិត
និងបទពិសោធន៍។
ការស្រាវជ្រាវពាក់ព័ន្ធទៅនឹងការផ្សព្វផ្សាយទេសចរណ៍បៃតងប្រកបដោយ
ចិរភាព ត្រូវបានជំរុញលើកទឹកចិត្តជាពិសេស
ដោយត្រូវបានបោះពុម្ភផ្សាយនៅក្នុងកំណត់ត្រាទនានុប្បវត្តជំនាញសម្រាប់
អ្នកសិក្សា។ ក្នុងន័យនេះ
យើងសូមស្វាគមន៍ចំពោះការបង្កើតឲ្យមានមជ្ឈមណ្ឌលស្រាវជ្រាវ
និងអប់រំ EATOF ។
ខ្ញុំសូម ឯកឧត្តម អស់លោក លោកស្រី
យកចិត្តទុកដាក់ពិភាក្សាប្រកបដោយផ្លែផ្កា
និងសូមរីករាយស្នាក់នៅក្នុងខេត្តសៀមរាប
ដែលជាទីក្រុងសម្បូរណ៍ទៅដោយបេតិកភ័ណ្ឌវប្បធម៌ និងធម្មជាតិ។
កម្ពុជាជាពិសេសខេត្តសៀមរាប នឹងមានឱកាសស្វាគមន៍ឯកឧត្តម អស់លោក លោកស្រី
ជាថ្មីទៀតនៅពេលអនាគតដ៏ខ្លីខាងមុខនេះ។
ខ្ញុំសូមប្រកាសបើកវេទិការទេសចរណ៍អន្តរតំបន់អាស៊ីបូព៌ា និងមហាសន្និបាតទេសចរណ៍អន្តរតំបន់អាស៊ីបូព៌ាលើកទី១២ចាប់ពីពេលនេះតទៅ!
សូមអរគុណ!