ជាការពិតណាស់ ទាំងសម រង្ស៊ី ទាំង កឹម
សុខា សុទ្ធតែធ្លាប់ជួបសន្ទនាដោយសម្ងាត់ ជាមួយ សម្តេចអគ្គមហាសេនាបតីតេជោ
ហ៊ុន សែន
ហេតុនេះទើបអាយ៉ងទាំង២ ស៊ីសាច់ហុតឈាមគ្នាដណ្ដើមយកឈ្មោះ
ជាអ្នកកៀកកិតបំផុត នឹងសម្ដេច ហ៊ុន សែន ដោយបិទបាំងពីភ្នែកប្រជាពលរដ្ឋ ។ ករណីនេះហើយទើបយើងឃើញ កឹម សុខា ថា សម
រង្ស៊ី ជាអាយ៉ង ចំណែក
សម រង្ស៊ី បានបញ្ជាក់យ៉ាងច្បាស់ថា កឹម សុខា ជាអាយ៉ងរបស់អាយ៉ង គឺអាយ៉ង២ជាន់
ប្រហែលជា សម
រង្ស៊ី ចង់បញ្ជាក់ថា
បើខ្លួនគាត់ (សម រង្ស៊ី)ជា អាយ៉ងសម្ដេច ហ៊ុន សែន ទៅហើយ តើ កឹម សុខា ធ្វើជា អាយ៉ង សម រង្ស៊ី អ្វីទៀត មានន័យថា កឹម សុខា ជាអាយ៉ងរបស់អាយ៉ង យ៉ាងពិតប្រាកដ
។ មិនខុសអីនឹងសម្ដីដែល សម
រង្ស៊ី ធ្លាប់បញ្ជាក់ថា៖ « គណបក្សតូចតាច
គណបក្សទើបបង្កើតក្រោយនោះ និងជាគណបក្សគេចិញ្ចឹម គេបង្កើតជាដៃជើងគេ
ជាអាយ៉ងគេ អាយ៉ងរបស់អាយ៉ង អាយ៉ង២ជាន់ណាបងប្អូន។ បងប្អូនគួរតែវិនិច្ឆ័យ
ថាគណបក្សណា ការពារប្រជារាស្ត្រ កុំគ្រាន់តែលើកនិយាយល្អម្សិលមិញ
ទើបតែចាប់ផ្តើមពីឆ្នាំទៅ នោះគឺមិនមែនទេបងប្អូន ត្រូវមើលទង្វើ
ការតស៊ូដែលគណបក្ស សម រង្ស៊ី តស៊ូ គឺ ១២ឆ្នាំហើយដែលហ៊ានចេញមុខប្រឆាំង » ។
ចំណែក កឹម សុខា
ឆ្លើយតបនឹងពាក្យ សម
រង្ស៊ី វិញទាំងញ័រមាត់ញ័រកចំពោះសេចក្ដីពន្យល់របស់សម រង្ស៊ីខាងលើនេះ ដោយ កឹម សុខា បានចាត់ទុក សម រង្ស៊ី ជាខ្មែរក្រហម
និងជាសម្ដីសម្លាប់ជីវិតនយោបាយរបស់ កឹម
សុខា ។ ព្រឹត្ដិការណ៍នេះ
កឹម សុខា ចង់ប្រាប់ទៅសកម្មជនគណបក្សសិទ្ធិមនុស្សថា
សម រង្ស៊ី ជាមនុស្សដែលមិនអាចទុកចិត្ដបានទេនិងមិនដែលគោរពពាក្យសន្យាម្ដងណាឡើយ។ដូចជាពាក្យកឹម សុខា ធ្លាប់និយាយថា៖ « គេថាគណបក្សសិទ្ធិមនុស្ស ហ៊ុន សែន បង្កើត
ប៉ុន្តែ គោលបំណងគណបក្ស សិទ្ធិមនុស្សដើម្បីដូរ ហ៊ុន សែន ចេញ
បើគេបង្កើតដើម្បីដូរគេ ក៏ព្រមដែរ » ។ កឹម សុខា បានបញ្ជាក់ទៀតថា “បើហ៊ុន សែន អ្នកបង្កើត ចុះបោះឆ្នោត ហើយ ម៉េចក៏គណបក្សសិទ្ធិមនុស្សមិនគាំទ្រលទ្ធផលបោះឆ្នោតហ្នឹង? ម៉េចក៏ប្រឆាំងលទ្ធផលបោះឆ្នោតហ្នឹង?
ប្រឆាំងហើយគេហៅចូលប្រជុំ ម៉េចក៏អត់ចូលប្រជុំ ដូច្នេះអាហ្នឹងគេឱ្យ
បង្កើតឬអត់? ករណីនេះកូនក្មេងក៏វាចេះគិតដែរ។ដូច្នេះសម្ដីនេះ សម រង្ស៊ី បាន ដើរលាបពណ៌គ្នា អត់ខុសពីខ្មែរក្រហមទេ ខ្មែរក្រហមដើរលាបពណ៌ ថាអានេះ សេអ៊ីអា អានេះ កាហ្សេបេ ដើម្បីខុសយកទៅសម្លាប់ ដូច្នេះប្រជាធិបតេយ្យដែរទេ? បើដើរលាបពណ៌គេបែបនេះ។ សូមឈប់ទៅអាល្បែងដើរលាបពណ៌គេ វាអាលាយខ្លួនឯងទេ សិទ្ធិមនុស្សអត់ អាលាយទេ មាសទឹកដប់អត់ខ្លាចភ្លើងទេ
” ។
មិនតែប៉ុណ្ណោះ កឹម សុខា បានផ្ញើសារជាបន្ទាន់មួយទៅ
សម រង្ស៊ី ឱ្យឈប់លើកយកការពិតមកនិយាយក្នុងទីសាធារណៈជាបន្ទាន់ បើមិនឈប់ទេ
រឿងអាស្រូវ របស់ សម រង្ស៊ី ជាច្រើននឹងត្រូវទម្លាយ ។
នេះបើតាមការបញ្ជាក់របស់ កឹម សុខា ៖ “ដូច្នេះហើយ
អ្នកដែលថាហ្នឹង ក្រែងលោៗ ជិតបោះឆ្នោតប្រយ័ត្ន បើនៅតែថាអញ្ចឹង ទៀត ប្រយ័ត្ន កឹម សុខា
បញ្ចេញមានរឿង ខ្លះ នេះគ្រាន់តែប្រាប់ឱ្យដឹងមុនទេ” ។
ឆ្លងតាមសម្ដីមេបក្សប្រឆាំងទាំង ២នេះ
បញ្ជាក់ឱ្យឃើញថា ពុំនោល « រនាបបាក់យករនាបជួស សម្ដីហួសគ្មានអ្វីជួសបាន » ពិតជាមានតម្លៃជាសកលសម្រាប់ការអប់រំមនុស្សឱ្យចេះប្រយ័ត្នសម្ដី
។ ដូចករណី កឹម សុខា បានលើកឡើងថា សម រង្ស៊ី ជាមនុស្សមិនស្មោះត្រង់
។ សម រង្ស៊ី មានរឿងស្អុយរលួយច្រើនដែល កឹម សុខា ជួយលាក់។ ឯសម រង្ស៊ី បានលើកឡើង កឹម សុខា ជាមនុស្សក្រឡេចក្រឡុច
ជាដៃជើង និងជាកូនបក្សតូចមួយដែលគណបក្សប្រជាជនកម្ពុជា ចិញ្ចឹម ។ ទាំងនេះគឺជាសម្ដីរបស់
កឹម សុខា និង សម រង្ស៊ី ដែលបាននិយាយ កាលពីឆ្នាំ២០០៨ តែពេលនេះទាំង
កឹម សុខា ទាំង សម រង្ស៊ី កំពុងតែបំភ្លេចសម្ដីរបស់ខ្លួនដែលបានបន្លឺឡើងក្ដែងៗនៅ
ចំពោះមុខប្រជាពលរដ្ឋ តើបងប្អូនអាចជឿជាក់លើសម្ដីរបស់មេបក្សប្រឆាំង ទាំងនេះបន្ដទៀតឬយ៉ាងណា?
តាមពិត មេបក្សប្រឆាំងទាំង២ កឹម សុខា
ក្ដី សម រង្ស៊ី ក្ដី សុទ្ធតែជាមនុស្ស ស៊ីលៀសរអៀសខ្លួន
ព្រោះអ្នកទាំង២ ពិតជាបានប្រាស្រ័យទាក់ទងជាមួយសម្ដេច
អគ្គមហាសេនាបតីតេជោ ហ៊ុន សែន យ៉ាងពិតប្រាកដ ។ មិនខុសអ្វីពីពុំនោលបុរាណពោលថា “គោដំបៅខ្នង ក្អែកហើរ រំលងរំសាយកន្ទុយ”
នោះឡើយ ។ ការចង្អុលដាក់គ្នាទៅវិញទៅមករបស់មេបក្សប្រឆាំងទាំង២
បានក្លាយជាប្រធានបទដ៏សំខាន់មួយសម្រាប់អ្នកគាំទ្របក្សប្រឆាំងទាំងសងខាង ។ អ្នកគាំទ្រ កឹម សុខា មើលឃើញយ៉ាងច្បាស់ថា សម
រង្ស៊ី គឺជាអាយ៉ងសម្ដេច ហ៊ុន សែន ដោយ ហេតុថា សម រង្ស៊ី ត្រូវបានសម្ដេចហ៊ុន
សែន អនុគ្រោះទោសកំហុសជាច្រើនលើក ច្រើនសារ ។
ការខំលាងជម្រះឱ្យស្អាតពីពាក្យ ថា
អាយ៉ងហ៊ុន សែន របស់ សម រង្ស៊ី និងកឹម សុខា បានច្រានមេបក្សប្រឆាំងទាំង២
ធ្លាក់ក្នុងភាពប្រកាប់ប្រចាក់គ្នាចាប់ពី ថ្នាក់លើដល់ថ្នាក់មូលដ្ឋាន
ដោយសារការរីករាលដាលនូវអំពើអនាធិបតេយ្យ
នៅតាមភូមិ ស្រុកមួយចំនួនរហូតកើតមានអំពើហិង្សាផងនោះ សម្ដេច ហ៊ុន សែន ប្រមុខគណបក្សប្រជាជនកម្ពុជាបានលាត ត្រដាងការពិតនូវ ទំនាក់ទំនង កឹម សុខា ជាមួយសម្ដេច
ហ៊ុន សែន ក្នុងន័យសុំឱ្យ កឹម សុខា ហ៊ានទទួលស្គាល់ការពិតនិង
ជាសារជូនដល់អ្នកគាំទ្រ កឹម សុខា ថាអ្វី ដែល សម រង្ស៊ី
និយាយនោះមិនជាខុស នោះទេ ។
សម្ដេចបានបញ្ជាក់យ៉ាងដូច្នេះថា “កឹម សុខា
មកសួរយោបល់ខ្ញុំថា តើឱ្យបន្ដធ្វើNGOតទៅទៀត ឬបង្កើតបក្សនយោបាយ? អញ្ចឹង សំណើសួរបែបនេះ តើខ្ញុំឆ្លើយថាម៉េចៗ ? ខ្ញុំមិនអាចបដិសេធបានទេ
គាត់សួរខ្ញុំតាមរយៈនៃអាជ្ញាកណ្ដាលមួយ គាត់សួរថា
តើឱ្យគាត់បន្ដធ្វើអង្គការសិទ្ធិមនុស្សតទៅទៀត ឬក៏បង្កើតបក្សនយោបាយ? ចម្លើយរបស់ខ្ញុំ បើខ្ញុំឆ្លើយថា
ឱ្យគាត់ធ្វើNGO មិនឱ្យធ្វើបក្សនយោបាយ
ដូចជាខ្លាចគាត់ អញ្ចឹងពេលនោះ ខ្ញុំឆ្លើយ គួរធ្វើបក្សនយោបាយតែម្ដងទៅ
បានវាតភាគ តរឿង តរ៉ាវ ហើយគាត់មួយភាគ ធ្វើការជាមួយឯកឧត្ដម ញឹម
វណ្ណដា គាត់មួយភាគធ្វើការជាមួយខ្ញុំអារឿងបង្កើតបក្សនេះ” ។
បន្ទាប់ពីសម្ដេចអគ្គមហាសេនាបតី តេជោ ហ៊ុន
សែន ប្រមុខគណបក្សប្រជាជនកម្ពុជាបានធ្វើសេចក្ដីបញ្ជាក់ពីទំនាក់ ទំនងដ៏ស៊ីជម្រៅរួចមក
គណបក្ស សម រង្ស៊ី បានយកប្រសាសន៍សម្ដេចតេជោ ហ៊ុន សែន
ធ្វើជាដើមទុនសម្រាប់វាយប្រហារលើ កឹម សុខា ជាហេតុធ្វើឱ្យ គណបក្សសម រង្ស៊ី មានប្រៀបលើ
កឹម សុខា ។ ក្នុងនោះ គង់ គាំ អនុប្រធានគណបក្សសម រង្ស៊ី ដែលកឹម សុខា
ហៅថា អនុប្រធានទីងមោង បានបញ្ជាក់ពី កឹម សុខា ជាអាយ៉ងសម្ដេច ហ៊ុន
សែន ប្រាប់ទៅអ្នកគាំទ្រ សម រង្ស៊ី យ៉ាងដូច្នេះ
“សម្ដេចតេជោគាត់ថា ខាអើយខា សមាជ បើកគណបក្សខាឯងដែលខ្ញុំជួយស្ដាតអូឡាំពិកនោះជោគជ័យល្អណាស់មែនទេ? ខា គេឆ្លើយថា
បាទសម្ដេច! សម្ដេចនោះ ក៏មាត់រអិលទៀត សួរថាអស់លុយប៉ុន្មាន?
បើអត់ជួយលុយគេផង ចាំសួរធ្វើអី? លុយហោប៉ៅគេសោះ ចង់សួរគេដែរ ។
ដល់មួយវគ្គទៀត សម្ដេចតេជោថា អើ ខាឯង មានបក្សហើយ បក្សខាឯងត្រូវអូសទាញ
កម្លាំងពី សម រង្ស៊ី ម៉ោ មើលប្រធានខេត្ដណា
ខ្លាំងៗ របស់សម រង្ស៊ី
ទាញម៉ោ ។ដល់នេះ ពេលខាសម្ភាសន៍ជាមួយអាស៊ីសេរី អញ្ចឹងមែនទេ លោក កឹម សុខា? លោក កឹម សុខា ថា ហ៊ុន សែន គំនិតអាក្រក់តែម្តងថតទុក។ខាថា គាត់មានគំនិតអាក្រក់គាត់ចេះតែថាទៅ ខ្ញុំ មានអ៊ឺអើជាមួយគាត់ឯណា...ប៉ិនមិនអឺអើមែន
ប៉ិនលួចធ្វើតាមសម្ដេចយក ម៉ៅ មុនីវណ្ណ ពីគណបក្ស សម រង្ស៊ីទៅបានហើយ សូមរាយការណ៍
ជូនសម្ដេច។
មិនបានថា តែធ្វើ កឹម សុខា ធ្វើ
ហើយឥឡូវហ្នឹង មើលចុះ អត់មានមួលបង្កាច់ អត់មានលាបពណ៌អ្វីទេ” ។
សេចក្ដីបញ្ជាក់របស់ គង់ គាំ ប្រៀប
បាននឹងយកដុំភ្លើងទៅញាត់មាត់កឹម សុខា ឱ្យឆេះរោលរាលគ្មានអ្វីត្រូវឆ្លើយតប
ឬពន្យល់ទៅអ្នកគាំទ្រគណបក្សសិទ្ធិមនុស្ស ឱ្យគេចផុតពីពាក្យថាអាយ៉ងសម្ដេច ហ៊ុន សែន
និងដោយសារ គង់ គាំ បានច្រានទ្រូងកឹម សុខា ផ្ទប់នឹងជញ្ជាំងទៅហើយ ហើយអ្វីដែលកឹម
សុខា ត្រូវដោះស្រាយនោះ
តើកឹម សុខា ជាអាយ៉ងសម្ដេចហ៊ុន សែន ពិតឬមិនពិត? កឹម សុខា បែរជាជេរប្រមាថ គង់ គាំ ថាជាទីងមោង
មានន័យថា មនុស្សល្ងង់ខ្លៅ
និងជាមនុស្សគេ ដាក់កន្ដ្រក មានន័យថា ជាជនបញ្ញើក្អែក
ខ្ចីដង្ហើមគេដក ។
សូមស្ដាប់សេចក្ដីបញ្ជាក់ ពី កឹម សុខា “មេបក្សខ្លះអួតថាប្រជាធិបតេយ្យ អនុប្រធានហ្នឹងដូចដាក់កន្ដ្រកស្ពាយតាមទេ គេអត់ឱ្យនិយាយអីទេ។ ដោយសារគេអត់នៅទេ ទើបគេឱ្យនិយាយយូរៗម្ដង
និយាយទៅខុសទៀត និយាយភ្លាវទៀត ដូច្នេះគេអត់ដែលឱ្យចេញមុខផងហ្នឹង
គេដាក់កន្ដ្រកតាមហ្នឹង ជាអនុប្រធានទីងមោងហ្នឹង
ដូច្នេះមកធ្វើឯងអួតខ្លាំងអី អនុប្រធានទីងមោងពេលគេនៅគេមិនឱ្យចេញធ្វើអីផងហ្នឹង” ។
ដោយសារ កឹម សុខា មិនព្រមសារភាព
បែរជាជេរប្រមាថគង់ គាំ ថាជាអ្នកខ្ចីដង្ហើមគេដក និងជាមនុស្សល្ងង់ខ្លៅ
មនុស្សទីង មោង គង់ គាំ បានប្រាប់ទៅអ្នកគាំទ្រ គណបក្សសម រង្ស៊ី ថា
កឹម សុខា ជាអា យ៉ងសម្ដេច ហ៊ុន សែន ដោយផ្អែកតាម សម្ដីដើមទាំងស្រុងក្នុងកិច្ចសន្ទនាតាមទូរស័ព្ទរវាងសម្ដេច ហ៊ុន សែន
នឹងកឹម សុខា ។
សូមស្ដាប់សម្ដីបញ្ជាក់របស់
គង់ គាំ ៖ “កឹម សុខា គេលែងជឿហើយ
ពីព្រោះ នៅក្នុងអាស្អី អាថកំបាំងសម្ងាត់អីហ្នឹង នៅមួយវគ្គទៀត សម្ដេចតេជោថា ខាយូរៗ
ខាឯងដាក់ខ្ញុំមួយក្ឌាំងទៅ ខ្ញុំដាក់ខាឯង ម៉ាក្ឌាំងទៅ
ដើម្បីឱ្យគេជឿថា ខាឯងនិង ខ្ញុំឈ្លោះគ្នា មិនមែនគ្នាឯងទេ តែការពិតគ្នាឯងសោះ
ដូច្នេះគាត់ដាក់អាខ្សែអាត់នោះម៉ាក្ឌាំងទៅដើម្បីជួយលាង
កឹម សុខា ថាមើលយើងឈ្លោះគ្នាមែនហ្នឹង មានត្រូវគ្នាឯណា”
។
ដូច្នេះការលាក់ លៀមរបស់ កឹម សុខា
មិនចង់ឱ្យអ្នកគាំ ទ្រដឹងពីទំនាក់ទំនងស៊ីជម្រៅជាមួយសម្ដេច ហ៊ុន សែន
ពិសេសខ្លាចសម រង្ស៊ី យកធ្វើ ជាគោលដៅនៃការវាយប្រហារ កឹម សុខា រឹតតែបង្កើនកំហឹងលើបក្សសម
រង្ស៊ី ទ្វេដងថែមទៀត ។
កឹម សុខា បានបញ្ជាក់ពីអសមត្ថភាពក្នុងការដឹកនាំបក្សរបស់លោក
សម រង្ស៊ី និងប្រវត្ដិនៃការចាញ់ឆ្នោតរបស់
សម រង្ស៊ី យ៉ាងដូច្នេះថា ៖ “ងាកទៅគណបក្សហ៊្វុនស៊ិនប៉ិច រាជានិយម អាលំអាលាយខ្ទេច ឥឡូវងាកមកសម រង្ស៊ី ដូចឯកឧត្ដម ម៉ៅ
មុនីវណ្ណថា អត់មានអ្នកចូល មានតែអ្នកចេញ។ អ្នកដែលនៅពីឆ្ងាយ មើលពីឆ្ងាយ ឃើញថាល្អ ស្រឡាញ់ណាស់ ស្រាប់តែទៅដល់ជិត ធំគ្មឹះៗ ថយចេញវិញ ចេះតែថយបន្ដបន្ទាប់ទៅ គេមិនចង់នៅក្រោមដំបូលរបស់បុគ្គលម្នាក់ ពីរនាក់នោះទេ ។ គេត្រូវនៅក្រោម ដំបូលប្រជាធិបតេយ្យ គេអ្នកមានឧត្ដមគតិជាតិ
គេមិនទៅបម្រើបុគ្គល
បម្រើគ្រួសារនោះទេ គេអួតថាមានតែ
សម រង្ស៊ី ទេ ជាជើងឯកប្រជាធិបតេយ្យនៅកម្ពុជា ជើងឯកអី គេទាត់ខ្ទាតអស់ហើយហ្នឹង
ឯកតែម្នាក់ឯងទៅ” ។
ការប្រទូស្ដរ៉ាយគ្នារវាងសម រង្ស៊ី នឹង
កឹម សុខា បានរុញច្រានមេបក្សប្រឆាំង ទាំង២ឱ្យធ្លាក់ពីគន្លងប្រជាធិបតេយ្យ
និងបាត់បង់ទាំងស្រុងនូវតម្លៃជាអ្នកនយោបាយ។ នេះហើយជាដើមហេតុនាំឱ្យអ្នកគាំទ្របក្សប្រឆាំងទាំង២ ដកការទុកចិត្ដពីមេបក្សប្រឆាំងមកគាំទ្រគណបក្សប្រជាជនកម្ពុជា ។ កឹម សុខា ដែលគេ
ដឹងគ្រប់គ្នាថា ជាមេបក្សតូចតាចហាក់ ចង់ប្រាប់មកសម្ដេចតេជោហ៊ុន
សែន ថាបើដឹងចំណុចខ្សោយខ្ញុំហើយ ម្ដេចមិនជួយ លាក់ផង
ចាំបាច់បញ្ចេញឯកសារសន្ទនានេះធ្វើអ្វី?
បើយោងតាមប្រសាសន៍របស់សម្ដេចតេ ជោ ហ៊ុន
សែន ប្រមុខគណបក្សប្រជាជនកម្ពុជា ការបែកធ្លាយរឿងឯកសារសន្ទនានេះ
មានដើមហេតុយ៉ាងដូច្នេះ “ប្រហែលជាអ្នកដែលបញ្ចេញឯកសារ ព្រោះឯកសារវានៅក្នុងសំណុំឯកសារ។ ឯកសារគេយកទៅរក្សាទុកនៅមួយកន្លែង
ប៉ុន្ដែប្រហែលជាបងប្អូនគេបញ្ចេញទៅ
ដោយសារតែគេខឹងឯកឧត្ដម កឹម សុខា ហ្នឹង តែងតែបដិសេធថា គ្មានទំនាក់
ទំនងអ្វីទេ គាត់តែងតែស្បថស្បែជាមួយ ខាងសម រង្ស៊ី នោះ។ ដល់អញ្ចឹងបងប្អូនប្រហែលជាធុញទ្រាន់ពេក ក៏រុញអាឯកសារហ្នឹងចេញទៅ អាហ្នឹងរឿងវាអញ្ចឹងទៅ ។ ប៉ុន្ដែទោះជាយ៉ាងណាក៏ដោយ នៅក្នុងហ្នឹង
ខ្ញុំបានណែនាំថា ខាអើយ ខ្ញុំហៅថាខាអញ្ចឹង
សួរតាំងពីកូនប៉ុន្មានអីប៉ុន្មាន។ ហើយគេចរាចរណ៍អាហ្នឹងលឿនណាស់ ហើយអ្នកចរាចរណ៍លឿនជាងគេ គឺខាងគណបក្ស សម រង្ស៊ី ចរាចរណ៍អាឯកសារហ្នឹង ព្រោះគណបក្សសម រង្ស៊ី សង្ស័យយូរហើយ” ។
សេចក្ដីបំភ្លឺរបស់សម្ដេចតេជោ ហ៊ុន សែន
ប្រមុខគណបក្សប្រជាជនកម្ពុជា ជុំវិញសំណុំរឿងឯកសារសន្ទនាតាមទូរស័ព្ទត្រូវបានគណបក្ស សម រង្ស៊ី ចាត់ ទុកថា
ជាភស្ដុតាងដ៏មានតម្លៃបំផុត
សម្រាប់បញ្ជាក់ទៅអ្នកគាំទ្រ សម រង្ស៊ី និងអ្នកគាំទ្របក្សសិទ្ធិមនុស្សថា
កឹម សុខា ជាមនុស្សរបស់សម្ដេចហ៊ុន សែន។ ក្នុងហេតុការណ៍នេះ
គង់ គាំ បានបញ្ជាក់ យ៉ាងឱឡារិកប្រាប់ទៅអ្នកគាំទ្រគណបក្សសម
រង្ស៊ី ឱ្យចាំទុកថា បើចូលជាមួយ កឹម សុខា ចូលជាមួយសម្ដេចហ៊ុន សែន តែម្ដងទៅ
។
នេះបើតាមការផ្ដាំរបស់ គង់ គាំ៖ “មកដល់ ធ្លាយឯកសារអាទិ៍កំបាំងអីម្ង៉ៃណោះទៀត ហ្នឹង កាន់តែធ្វើឱ្យខ្ញុំយល់ថា បើចូលជា មួយ កឹម សុខា ចូលជាមួយ ហ៊ុន សែន
តែម្ដងហើយនេះ” ។
ចំណែកលោក ថាច់ សេដ្ឋា មន្ត្រីគណបក្ស សម រង្ស៊ី ដែលស្អប់ខ្ពើមចរិត គ្មានអៀនខ្មាសរបស់ កឹម សុខា
បានសម្ដែងនូវក្ដីអស់សង្ឃឹមចំពោះអនាគតនៃជីវិតនយោបាយរបស់គណបក្ស
សម រង្ស៊ី ដែលចេះតែរួមតូចពីមួយថ្ងៃទៅមួយខែ ពីមួយខែទៅមួយឆ្នាំ
បានថ្លែងថា៖ “ចង់បាន រួបរួមគ្នា ប៉ុន្ដែទន្ទឹមនឹងចង់បានតែងតែរិះគន់ វាយប្រហារគ្នាឯង សូមឱ្យលោកទាំងអស់គ្នាពិចារណាទាំងអស់គ្នាមើល៍។ យើងដឹងហើយ កាលណាវ៉ៃគ្នាវាចំណេញអ្នកណា? វាមិនចំណេញគណបក្សកាន់អំណាច
អញ្ចឹង កាលណាយើងវ៉ៃគ្នាយើងខ្លាំងកាលណា
អាហ្នឹង គឺគេសប្បាយចិត្ដកាលហ្នឹង ហើយមិនមែនគណបក្សរបស់គាត់ផ្ទាល់ខ្លួនហ្នឹងចំណេញទេ ។
ទោះបីគាត់ឡើង៥ កៅអីក៏ដោយ ក៏មិនឈ្នះ។ ឯសម រង្ស៊ី ចុះ១០កៅអី ក៏នៅតែមិនឈ្នះ អាហ្នឹងនៅតែចំណេញគណបក្សប្រជាជនដដែលទេ
សូមឱ្យលោកទាំងអស់គិតពិចារណា
មិនមែនយើងគ្រាន់តែថាចង់ រួបរួម ប៉ុន្ដែលក្ខខណ្ឌយើងរាប់មិនអស់
គណបក្សសម រង្ស៊ី មានក្រុមប្រឹក្សាទាំងអស់ហើយធ្វើអីមិនកើត បានតែនិយាយ ហើយមិនព្រមធ្វើ
សុទ្ធតែគណបក្សបុគ្គលអី ខ្ញុំបានឮ ហើយខ្ញុំមិននិយាយទេ តែសុំឱ្យប្រជាពលរដ្ឋគិតថា រាល់ការលើកឡើង រាល់ការវាយប្រហារទាំងអស់ តើបានចំណេញ ទៅលើអ្នកណា? គិតតែប៉ុណ្ណឹងបានហើយ ហើយបើចំណេញឱ្យអ្នកណា
តើអ្នកនយោបាយទាំងអស់នោះបម្រើឱ្យនយោបាយគណបក្សណា? ថាខ្លួនឯងគ្រាន់បើទៀត
ថាខ្លួនឯងអ្នកសេហ្នាជាតិទៀត តាមពិតបំបែកកម្លាំងគ្នាសោះហ្នឹង” ។
សម្ដី ថាច់ សេដ្ឋា ដែលខំពន្យល់ ទៅ កឹម សុខា ឱ្យឈប់
ហែកហួរបក្សសម រង្ស៊ី មិនអាចពន្លត់ភ្លើងកំហឹងដែល ឆេះរោលរាលពេញទ្រូង
កឹម សុខា បាន ឡើយ ។ ផ្ទុយទៅវិញ ការឆ្លើយតបរបស់ ថាច់ សេដ្ឋា ប្រៀបបាននឹងយកសាំងទៅ
ជះលើភ្លើងឱ្យកាន់តែឆាបឆេះទ្វេដងថែមទៀត
។ អញ្ចឹងហើយ ទើបបុរាណផ្ដាំទុកថា “កុំពត់ ស្រឡៅ
កុំប្រដៅជនពាល” ។ សូមស្ដាប់ ការឆ្លើយតបរបស់
កឹម សុខា ដែលឋិតក្នុងភាពកំរោលចូលប្រៀបបាននឹងសម្ដីជនពាល ជ្រកក្រោមស្លាកសិទ្ធិមនុស្ស
បានដោះសារ ដូចតទៅនេះ ៖ “ឥឡូវនរណា
ថាគណបក្សសិទ្ធិមនុស្សអាយ៉ងបបួលទៅ ស្បថៗមើល៍ បើថាបក្សសិទ្ធិមនុស្ស អាយ៉ង សូមឱ្យបក្សសិទ្ធិមនុស្សរលាយ សូមឱ្យមេដឹកនាំបក្សសិទ្ធិមនុស្សវិនាស តែបើសិនណា អ្នកហ្នឹងបង្ខូចខ្ញុំទេ សូមឱ្យបក្សអ្នកឯងរលាយ ឱ្យមេដឹកនាំបក្សហ្នឹងខ្ចាត់ព្រាត់ តើមែនទេបងប្អូន? កុំឱ្យ ហួសហេតុពេក ។ បើមិនបានជួយចូក
ជួយចែវទេ មកយកជើងរា អាឯងគេវ៉ៃធ្លាក់ពីលើរេញអស់ហើយ ដល់វេនគ្នាឡើងវ៉ៃ ម្ដងហើយ ដល់វេនសិទ្ធិមនុស្សឡើងវ៉ៃ មិនបានជួយទះដៃទេ
មកចាប់ជើង តិចលោតែ គ្រវាសម៉ាជើងទៅត្រូវបាក់ធ្មេញថែមទៀត។ នៅឱ្យស្ងៀម ទៅប៉ង់សឺម៉ង់ទៅ
រៀបខ្លួនឯងឱ្យស្អាតទៅ បើចង់ឡើងវ៉ៃ ចាំ រៀបខ្លួនឲ្យស្រួលឡើងវៃវិញមក បើគេធាក់ធ្លាក់រេញ ហើយហ្នឹង។ យើងខ្ញុំវ៉ៃតែ២ទឹកទេ បើចាញ់
សុខចិត្ដចុះ មិនដូចអស់លោកទេ វ៉ៃម៉ាអាយ៉ូសហើយ ចាញ់ហើយ មិនព្រមចុះទៀត” ។
ឆ្លងតាមសម្រែកស្បត់ស្បែរ និងបណ្ដាសារដែល កឹម សុខា បានស្រែកក្ដែងៗ
អម្បាញ់មិញ អ្នកគាំទ្រ សម រង្ស៊ី និងអ្នកគាំទ្រ កឹម សុខា កំពុងសំឡឹងមើលថា តើរវាង កឹម
សុខា និងសម រង្ស៊ី មួយណា
ជាអ្នកចាញ់សម្បថ?
និងមួយណាជាអ្នក ត្រូវបណ្ដាសារ? ប៉ុន្ដែបុរាណបានពោលថា
“ទឹកហូរមិនដែលហត់
មនុស្សទ័លច្រកស្បថកុំឱ្យជឿ” ។
ចំណែកសម រង្ស៊ី ដែលយើងមើលឃើញថា បានជាន់កដកស្លាប កឹម
សុខា នោះ ក៏ត្រូវបានសម្ដេចតេជោ
ហ៊ុន សែន បង្ហើបឱ្យដឹងថា ធ្លាប់ជួបសន្ទនារយៈ ពេលបីម៉ោងជាមួយសម្ដេចដែរ
។
សម្ដេច លើកឡើងថា៖ “ ប៉ុន្ដែឯកឧត្ដម សម រង្ស៊ី
វិញក៏កុំភ្លេចថា ខ្លួនបាននិយាយអីខ្លះជាមួយខ្ញុំនោះ
ប្រយ័ត្នក្រែងលោវាឡងទៅ ឡងមក ។ អ្នកកាន់ឯកសារឥឡូវខ្ញុំឱ្យឃ្លុំ បេទុក។ ព្រោះជួបគ្នា៣ម៉ោង ហើយក្នុងបន្ទប់ ធម្មតាទេអាហ្នឹងនោះ ទៅស្រុកណាក៏គេធ្វើអញ្ចឹងដែរ
ទៅកន្លែងណាក៏គេធ្វើអញ្ចឹងដែរ។
ថ្ងៃហ្នឹងគេក៏ថត សំឡេងខ្ញុំទាំងអស់ដែរ។ និយាយចង់ខ្សឹបយ៉ាងម៉េចក៏គេនៅតែថតដែរ” ។
ការបង្ហើប
យ៉ាងដូច្នេះរបស់សម្ដេចបានធ្វើឱ្យ កឹម សុខា ស្រវេស្រវាក្រោកទាំងត្រដាបត្រដួស បន្ទាប់ពីដួលសន្លប់ដោយកណ្ដាប់ដៃ
សម រង្ស៊ី ។ តើមេបក្សប្រឆាំងទាំង២មាន ល្បិចអ្វីបោកសកម្មជនខ្លួនទៀត? ៕