សុន្ទរកថាឯកឧត្តមបណ្ឌិតសភាចារ្យ សុខ អាន តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន ក្នុងពិធីបើកបុណ្យសមុទ្រ
ចេញផ្សាយថ្ងៃ: ( ០៨ - ធ្នូ - ២០១៣ )
នៅខេត្តកែប ថ្ងៃទី០៧ ខែធ្នូ ឆ្នាំ២០១៣
- ឯកឧត្តម ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មការអន្តរក្រសួងរៀបចំពិធីបុណ្យសមុទ្រ
- ឯកឧត្តម Galip Gur ប្រធានក្លឹបឆ្នេរសមុទ្រស្អាតបំផុតលើពិភពលោក
- ឯកឧត្តមប្រធានគណៈប្រតិភូមកពីក្រសួងទេសចរណ៍នៃប្រទេស CLMV និងប្រទេសមហាអនុតំបន់មេគង្គ )GMS(
- ឯកឧត្តម កែន សត្ថា អភិបាលនៃគណៈអភិបាលខេត្តកែប
- ឯកឧត្តម លោកជំទាវ ឯកអគ្គរាជទូត ឯកអគ្គរដ្ឋទូត និងតំណាងអង្គទូត
- ឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិនិងអន្តរជាតិទាំងអស់ជាទីមេត្រី!
នារាត្រីដ៏ត្រកាលនេះ ខ្ញុំនិងភរិយា មានសេចក្តីសោមនស្សរីករាយក្រៃលែង ចូលរួមជាមួយ ឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិនិងអន្តរជាតិទាំងអស់ ក្នុងឱកាសបើកពិធីបុណ្យសមុទ្រដ៏មហោឡារិកនាពេលនេះ។
ខ្ញុំសូមស្វាគមន៍ និងថ្លែងអំណរគុណយ៉ាងជ្រាលជ្រៅ ចំពោះគណៈប្រតិភូក្លឹបឆ្នេរសមុទ្រស្អាតបំផុតលើពិភពលោក និងគណៈប្រតិភូមកពីក្រសួងទេសចរណ៍នៃប្រទេស CLMV និងប្រទេសមហាអនុតំបន់មេគង្គ ដែលបានឆ្លៀតឱកាសដ៏មមាញឹក ចូលរួមក្នុងពិធីបុណ្យសមុទ្រ បន្ទាប់ពីមហាសន្និបាតលើកទី៩នៃក្លឹបឆ្នេរសមុទ្រស្អាតបំផុតលើពិភពលោក កិច្ចប្រជុំរដ្ឋមន្រ្តីទេសចរណ៍នៃប្រទេស CLMV និងកិច្ចប្រជុំក្រុមការងារទេសចរណ៍នៃប្រទេសមហាអនុតំបន់មេគង្គ ជាពិសេសសន្និសីទអន្តរជាតិស្តីពី សមុទ្រខៀវស្រងាត់ ទីក្រុងបៃតង (Blue Sea, Green City) ដែលបានប្រព្រឹត្ត ទៅនៅរមណីយដ្ឋានឋានសួគ៌បូកគោកាលពីម្សិលម៉ិញនិងព្រឹកនេះ។ នេះគឺជាការផ្តល់កិត្តិយសយ៉ាងធំធេង និងការលើកទឹកចិត្តយ៉ាងខ្លាំង ដល់កម្ពុជាដែលជាម្ចាស់ផ្ទះ និងញ៉ាំងឱ្យអង្គពិធីទាំងមូលកាន់តែមានភាពអធិកអធមថែមទៀត។
ឆ្លៀតក្នុងឱកាសនេះ ខ្ញុំសូមបញ្ជាក់ផងដែរថា នាពេលថ្មីៗនេះ កម្ពុជាបានរៀបចំសន្និសីទអន្តររដ្ឋាភិបាលលើកទី៣ស្តីពីអង្គរ នៅខេត្តសៀមរាប ប្រកបដោយភាពជោគជ័យ។ សន្និសីទនេះ បានប្រារព្ធឡើងជាលើកដំបូងបង្អស់នៅទីក្រុងតូក្យូ ក្នុងខែតុលា ឆ្នាំ១៩៩៣ ក្រោមគំនិតផ្តួចផ្តើមរបស់ប្រទេសជប៉ុន ឆ្លើយតបនឹងព្រះរាជបំណងដ៏ខ្ពង់ខ្ពស់របស់ព្រះករុណាព្រះបាទសម្តេច នរោត្តម សីហនុ ព្រះមហាវីរក្សត្រ ព្រះវររាជបិតាជាតិខ្មែរ ព្រះបរមរតនកោដ្ឋ ជាទីគោពសក្ការៈដ៏ខ្ពង់ខ្ពស់បំផុត ដែលពេលនោះព្រះអង្គទ្រង់បានគង់ជាព្រះប្រធាននៃឧត្តមក្រុមប្រឹក្សាជាតិជាន់ខ្ពស់នៃកម្ពុជា និងលើកទី២ បានប្រារព្ធធ្វើឡើងក្នុងខែវិច្ឆិកា ឆ្នាំ២០០៣ នៅទីក្រុងប៉ារីស ក្រោមគំនិតផ្តួចផ្តើមរបស់ប្រទេសបាំង។
ឯកឧត្តម លោកជំទាវ អស់លោក លោកស្រី
រាជរដ្ឋាភិបាលកម្ពុជា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្រេចបានសមិទ្ធផលធំៗជាច្រើន តាមរយៈការដាក់ចេញនូវផែនការនិងយុទ្ធសាស្រ្តសំខាន់ៗក្នុងការអភិវឌ្ឍសេដ្ឋកិច្ចសង្គម សំដៅលើកកម្ពស់ជីវភាពរស់នៅ និងការកាត់បន្ថយភាពក្រីក្ររបស់ប្រជាពលរដ្ឋ ដែលជាក់ស្តែងអត្រាភាពក្រីក្របានថយចុះពី១០០% ក្នុងឆ្នាំ១៩៧៩ មកត្រឹម១៩%នាពេលថ្មីៗនេះ។ ជាមធ្យម អត្រាភាព ក្រីក្រធ្លាក់ចុះយ៉ាងហោចណាស់១% ជារៀងរាល់ឆ្នាំ។
តាមរយៈយុទ្ធសាស្ត្រសំខាន់ៗទាំងនេះ កម្ពុជាសម្រេចបានកំណើនសេដ្ឋកិច្ចយ៉ាងខ្ពស់ ដែលកំណើននេះអាស្រ័យជាចម្បងលើវិស័យជាអាទិភាពមួយចំនួន ជាអាទិ៍ វិស័យកសិកម្ម ទេសចរណ៍ កាត់ដេរ និងសំណង់ ដែលក្នុងនោះវិស័យទេសចរណ៍ត្រូវបានរាជរដ្ឋាភិបាលកម្ពុជាយកចិត្តទុកដាក់ជាវិស័យអាទិភាព ក្នុងការជំរុញកំណើនសេដ្ឋកិច្ចជាតិ ហើយបានចាត់ទុកវិស័យនេះជាមាសបៃតង។ ការអភិវឌ្ឍវិស័យទេសចរណ៍ ជាមួយនឹងសម្បត្តិធម្មជាតិនិងវប្បធម៌ដ៏សម្បូរបែប កម្ពុជារក្សាបានកំណើនភ្ញៀវទេសចរអន្តរជាតិគួរឱ្យកត់សម្គាល់ ពីចំនួនប្រមាណ១១៨.០០០នាក់ ក្នុងឆ្នាំ១៩៩៣ ដល់ចំនួន៣,៥៨លាននាក់ក្នុងឆ្នាំ២០១២។ ហើយក្នុងរយៈពេល១០ខែដំបូងក្នុងឆ្នាំ២០១៣ យើងទទួលបានភ្ញៀវទេសចរអន្តរជាតិជាង៣,៣លាននាក់ ក្នុងអត្រាកំណើន១៨,២% ធៀបនឹងរយៈពេលដូចគ្នាក្នុងឆ្នាំ២០១២។ កម្ពុជារំពឹងថានឹងទទួលបានភ្ញៀវទេសចរអន្តរជាតិប្រមាណ ៤,៥លាននាក់ នៅឆ្នាំ២០១៥ និងប្រមាណ៧លាននាក់ នៅឆ្នាំ២០២០។
តាងនាមរាជរដ្ឋាភិបាល និងក្នុងនាម សម្តេចតេជោនាយករដ្ឋមន្ត្រី ខ្ញុំសូមថ្លែងនូវការកោតសរសើរចំពោះក្រសួងទេសចរណ៍ ក្រសួងវប្បធម៌និងវិចិត្រសិល្បៈ សាលាខេត្តកែប និងគណៈកម្មការអន្តរក្រសួង ដែលបានខិតខំរួមសហការគ្នា រៀបចំពិធីបុណ្យសមុទ្រនេះឡើងបានយ៉ាងល្អប្រសើរ និងជាពិសេស សូមកោតសរសើរចំពោះក្រសួងទេសចរណ៍ ដែលបានខិតខំអនុវត្តភារកិច្ចរបស់ខ្លួនប្រកបដោយការទទួលខុសត្រូវខ្ពស់ ក្នុងការរៀបចំគោលនយោបាយ និងយុទ្ធសាស្ត្រអភិវឌ្ឍ ទេសចរណ៍ ពិសេសការធ្វើពិពិធកម្មផលិតផលទេសចរណ៍ និងការតភ្ជាប់តំបន់ប៉ូលទេសចរណ៍ សំខាន់ៗនៅទូទាំងប្រទេស។ ជាក់ស្តែង តំបន់ទេសចរណ៍សៀមរាបអង្គរ ត្រូវបានតភ្ជាប់មកតំបន់ឆ្នេរភូមិភាគនិរតី ដែលជាជំហាននៃការរីកចម្រើនថ្មីមួយទៀត។ ការហោះហើរតភ្ជាប់អង្គរជាមួយតំបន់ឆ្នេរដែលត្រូវបានសម្រេចកាលពីឆ្នាំ២០១១ ដោយមានក្រុមហ៊ុនអាកាសចរជាតិ (Cambodia Angkor Air) ជាប្រតិបត្តិករក្នុងការតភ្ជាប់ បានផ្តល់ជម្រើសនិងភាពងាយស្រួលជូនភ្ញៀវទស្សនាតំបន់វប្បធម៌ និងតំបន់ឆ្នេរសមុទ្រព្រមគ្នា។ ការតភ្ជាប់នេះ ក៏បានផ្ដល់ភាពងាយស្រួលដល់ភ្ញៀវទេសចរដែលចូលមកកាន់កម្ពុជាតាមរយៈនាវាទេសចរណ៍ផងដែរ។
ឯកឧត្តម លោកជំទាវ អស់លោក លោកស្រី
ការអនុញ្ញាតរបស់រាជរដ្ឋាភិបាល ឱ្យមានការរៀបចំពិធីបុណ្យសមុទ្រជារៀងរាល់ឆ្នាំនៅខេត្តតំបន់ឆ្នេរទាំងបួន គឺខេត្តព្រះសីហនុ កែប កោះកុង និងកំពត ដោយធ្វើការឆ្លាស់វេនគ្នាសបញ្ជាក់ឱ្យឃើញពីការគាំទ្ររបស់រាជរដ្ឋាភិបាល ក្នុងការជំរុញកិច្ចអភិវឌ្ឍតំបន់ឆ្នេរសមុទ្រកម្ពុជាទាំងទីក្រុង និងលើផ្ទៃសមុទ្រ ដែលបាននិងកំពុងដើរតួនាទីយ៉ាងសំខាន់ជាប៉ូលសេដ្ឋកិច្ចក្នុងការទាក់ទាញវិនិ-យោគសម្រាប់ជំរុញកំណើនសេដ្ឋកិច្ចជាតិ។ តំបន់ឆ្នេរកម្ពុជាត្រូវបានចាត់ទុកថាជាគោលដៅទេសចរណ៍ដ៏មានភាពទាក់ទាញ និងកំពុងមានការវិវត្ត ប្រែប្រួលមុខមាត់ថ្មី ស័ក្តិសមជា តារារះនាទិសនិរតី និងជាសមាជិកក្លឹបឆ្នេរសមុទ្រស្អាតបំផុតលើពិភពលោក។
ខ្ញុំមានសុទិដ្ឋិនិយមថា ការរៀបចំពិធីបុណ្យសមុទ្រលើកទី២នេះ ពិតជារួមចំណែកដ៏សំខាន់ក្នុងការអភិវឌ្ឍទេសចរណ៍នៅតំបន់ឆ្នេរសមុទ្រកម្ពុជា និងផ្តល់ផលប្រយោជន៍ជាច្រើនដល់ការផ្សព្វផ្សាយអំពីសក្តានុពលទេសចរណ៍នៃតំបន់ឆ្នេរសមុទ្រកម្ពុជា។ ព្រឹត្តិការណ៍នេះនឹងជួយជំរុញការអភិវឌ្ឍហេដ្ឋារចនាសម្ព័ន្ធ ការជំរុញការយកចិត្តទុកដាក់កាន់តែខ្ពស់ពីគ្រប់ភាគីពាក់ព័ន្ធនានា ក្នុងការអភិរក្សនិងថែរក្សាធនធានធម្មជាតិនិងវប្បធម៌នៅតំបន់ឆ្នេរសមុទ្រដ៏ស្រស់ស្អាតនៃយើង ក៏ដូចជាការលើកកម្ពស់សមត្ថភាពនិងគុណភាពសេវាកម្មក្នុងវិស័យទេសចរណ៍ និងការយល់ដឹងជាសាធារណៈ សំដៅជំរុញការលើកទឹកចិត្តថែមទៀតក្នុងការថែរក្សាតំបន់ឆ្នេរសមុទ្ររបស់យើង។
ឆ្លៀតក្នុងឱកាសនេះ ខ្ញុំសូមវាយតម្លៃខ្ពស់ចំពោះប្អូនៗយុវជនរបស់សហភាពសហព័ន្ធយុវជនកម្ពុជា ដែលបានចូលរួមក្នុងសកម្មភាពបញ្ជ្រាបការយល់ដឹងឱ្យកាន់តែច្បាស់ថែមទៀតអំពីការសម្អាតឆ្នេរ និងការធ្វើអនាម័យក្នុងខេត្តកែប និងខេត្តកំពត ទាំងមុននិងក្នុងអំឡុងពិធីបុណ្យសមុទ្រនេះ។
ឯកឧត្តម លោកជំទាវ អស់លោក លោកស្រី
ជាថ្មីម្តងទៀត ខ្ញុំសូមវាយតម្លៃខ្ពស់ចំពោះក្រសួងទេសចរណ៍ ក្រសួងស្ថាប័នពាក់ព័ន្ធ និងផ្នែកឯកជន ដែលបាននិងកំពុងជំរុញការផ្សព្វផ្សាយយ៉ាងសកម្ម និងបង្កើតព្រឹត្តិការណ៍នានា ដើម្បីទាក់ទាញភ្ញៀវទេសចរនិងអ្នកវិនិយោគ ជាពិសេសយុទ្ធនាការផ្សព្វផ្សាយទេសចរណ៍ “កម្ពុជា៖ ព្រះរាជាណាចក្រអច្ឆរិយៈ (Cambodia - Kingdom of Wonder)” ”ឆ្នេរសមុទ្រកម្ពុជា៖ តារារះនាទិសនិរតី” និងចលនាប្រឡងប្រណាំង “ទីក្រុងស្អាត រមណីយដ្ឋានស្អាត សេវាល្អ”។ ខ្ញុំសូមអំពាវនាវផងដែរដល់ក្រសួងស្ថាប័នពាក់ព័ន្ធ អាជ្ញាធរមូលដ្ឋាន ធុរជន និងបងប្អូនប្រជាពលរដ្ឋ សូមយកចិត្តទុកដាក់អនុវត្តឱ្យបានខ្ជាប់ខ្ជួននូវតួនាទីនិងភារកិច្ចរបស់ខ្លួន ប្រកបដោយការទទួលខុសត្រូវខ្ពស់ក្នុងការរួមចំណែកអភិវឌ្ឍនិងថែរក្សាតំបន់ឆ្នេរ ធ្វើយ៉ាងណាធានាឱ្យបាននូវការអភិវឌ្ឍបៃតងនៅតំបន់នេះប្រកបដោយចីរភាព និងចូលរួមប្រឡងប្រណាំងឆ្នេរស្អាត។
មុននឹងបញ្ចប់ ខ្ញុំសូមថ្លែងអំណរគុណចំពោះក្លឹបឆ្នេរសមុទ្រស្អាតបំផុតលើពិភពលោក ដែល បានផ្តល់ជំនឿចិត្តលើឆ្នេរសមុទ្រកម្ពុជា និងបានដាក់បញ្ចូលឆ្នេរសមុទ្រកម្ពុជាទាំងមូលជាសមាជិកពេញសិទ្ធិរបស់ក្លឹបនេះកាលពីឆ្នាំ២០១១។
ខ្ញុំសូមជូនសព្វសាធុការពរជ័យឱ្យពិធីបុណ្យសមុទ្រនេះ ក្លាយទៅជាការលើកកម្ពស់ថែមទៀតនូវស្មារតីសាមគ្គីភាព មិត្តភាព និងកិច្ចសហប្រតិបត្តិការលើគ្រប់ផ្នែក ដើម្បីគោលដៅរួមរបស់យើងគឺសេចក្តីថ្កុំថ្កើង រុងរឿង សុខសន្តិភាព ស្ថិរភាព និងការអភិវឌ្ឍកម្ពុជា និងតំបន់ឆ្នេរសមុទ្រកម្ពុជាក្នុងឆ្នាំ២០១៣ និងបណ្ដាឆ្នាំខាងមុខនេះ ប្រកបដោយនិរន្តរភាព។
នៅទីបញ្ចប់នេះ ជាមួយនឹងការប្រកាសបើកពិធីបុណ្យសមុទ្រ នៅពេលនេះ ខ្ញុំសូមជូនពរឯកឧត្តម លោកជំទាវ អស់លោក លោកស្រី អ្នកនាងកញ្ញាដែលជាភ្ញៀវជាតិនិងអន្តរជាតិទាំងអស់សូមជួបប្រទះតែនឹងសេចក្ដីសុខ ជ័យជំនះគ្រប់ភារកិច្ច និងសុភមង្គលក្នុងក្រុមគ្រួសារ។
ខ្ញុំសូមប្រកាសបើកពិធីបុណ្យសមុទ្រលើកទី២ ឆ្នាំ២០១៣ នៅខេត្តកែប ចាប់ពីពេលនេះតទៅ។
សូមអរគុណ!