មេដឹក​នាំពិភព​លោក​ដែល​និយាយ​វែង​ហើយ​មិន​សំរាក​បត់​ជើង​តូច

ភ្នំពេញ : មេដឹកនាំពិភពលោកមួយចំនួនដែលជាប់ឯកត្តកម្មខាងនិយាយវែងហើយមិនឈប់សំរាក​បត់ជើង​តូចគឺជា​ប្រធាន​បទមួយដែលត្រូវបានលើកយកនិយាយនៅក្នុងវគ្គបណ្តុះបណ្តាលពត័មានពិសេសដែលរៀប​ចំឡើង​ដោយ​លោក​ពុយ គានិងសហការីរបស់គាត់។

នៅក្នុងបទបង្ហាញរយៈពេលជាងមួយម៉ោងទៅដល់សិក្ខាកាមចំនួនជិត១០០នាក់មកពីស្ថាប័នសារពត័មាន ក្រសួង​មន្ទី​រ​រដ្ធ ក្រុមហ៊ុន និងសង្គមស៊ីវិល លោក ពុយ គា បានរំលេចទៅដល់រឿងរ៉ាវយ៉ាងច្រើននិងប្លែកៗជុំវិញអាជីពជាអ្នកសារពត័មាន មានរឿងកំសត់ រឿងមាក់ងាយដល់អ្នកកាសែត ល្បិចរបស់អ្នកកាសែត និងកំណត់ត្រារបស់អ្នកកាសែតជុំវិញមេដឹកនាំពិភពលោកមួយចំនួនដែលជាប់ឯកត្តកម្មខាងនិយាយវែងហើយមិនឈប់សំរាកបត់ជើងតូច។

យោងតាមបទបង្ហាញរបស់លោក ពុយ គា អតីតប្រធានាធិបតីនៃប្រទេស Venezuela ហ៊ូហ្គោ ឆាវេស (Hugo Chavez) បានបំបែកឯកគត្តកម្មពិភពលោក ដែលបានថ្លែងសុន្ទរកថាអស់៩ម៉ោងកន្លះ យូរជាងគេនៅលើពិភពលោកក្នុងកិច្ចប្រជុំសភានៅថ្ងៃទី១៣ ខែមករា ឆ្នាំ២០១២។ តែអ្វីដែលគួរចាប់អារម្មណ៏នោះគឺការថ្លែងសុន្ទរកថារយៈពេលជាង៩ម៉ោងរបស់លោក Chavez មិនបានបត់ជើងតូចសូម្បីតែម្តងសោះ។ ការនិយាយដ៏វែងនោះ បានរំលោភ​ទៅនឹង​វេជ្ជ​បញ្ជា​ដែលហាម​ប្រាមលោកមិនឲ្យថ្លែងសុន្ទរកថាលើសពី៣ម៉ោងដោយសារតែលោកមានជំងឺមហារីក។ ការនិយាយ​យូរបែប​នេះត្រូវបានបុរសដែលកាន់សាសនាគ្រឹស្តHugo Chavez រូបនោះគិតថាជាសិល្បិ៍វិធីដើម្បីបញ្ជាក់ថា «ជាមនុស្ស​ខ្លាំង​អស្ចារ្យនិងធ្វើឲ្យអ្នកនៅក្រោមបង្គាប់ខ្លាចរអារ» ។


ចំណែកឯកត្តកម្មទី២បានទៅលើលោក Fidel Castro មេដឹកនាំកំពូលនៃប្រទេស គុយបា ដែល​បានថ្លែង​សុន្ទរកថា​អស់​៧ម៉ោង​១០នាទីកាលពីឆ្នាំ១៩៨៦។ ក្នុងនោះ លោក ពុយ គាក៏បានរំលឹកដល់មេដឹកនាំកម្ពុជាមួយរូបផង​ដែរគឺ​នាយក​រដ្ធ​មន្រ្តី ហ៊ុន សែន ដែលបានថ្លែងសុន្ទរកថាអស់៥ម៉ោងនិង២០នាទីនៅថ្ងៃទី០៩ ខែសីហា ឆ្នាំ២០១២ នៅវិមាន​រដ្ឋសភា​ជាតិអំពី​បញ្ហាព្រំដែនជាមួយប្រទេសជិតខាង។ អ្វីដែលជាការចាប់អារម្មណ៏ដែរនោះគឺលោកហ៊ុន សែន មិនឈប់​សំរាក​បទជើត​តូច និយាយក្នុងឆ្នាំតែមួយជាមួយលោក Hugo Chavez ហើយក៏ជាឆ្នាំដែលលោកហ៊ុន សែននិយាយ​វែងបំផុត​លើក​ទីមួយគំរប់២៧ឆ្នាំនៃការកាន់អំណាចរបស់លោក។

វគ្គបណ្តុះបណ្តាលពត័មានពិសេសរយៈពេល៣៦ម៉ោងត្រុវបានរៀបចំឡើងដោយលោពុយ គា និងសហការីរបស់គាត់ គឺលោក ហ្សង់ ហ្រ្វង់ស័រតាន់ និងលោក ប៉ែន បូណា នៅសាកលវិទ្យាល័យអាមេរិកាំងភ្នំពេញ (American University of Phnom Penh (AUPP) ដែលជាសាកលវិទ្យាល័យរបស់អាមេរិកទីមួយនៅកម្ពុជា៕