ដោយៈរួម ជាតិ
៣៣ឆ្នាំ ក្រោយថ្ងៃរំដោះប្រជាពលរដ្ឋចេញពីមហាសោកនាដកម្មនៃបនប្រល័យពូជសាសន៍ប៉ុលពត ថ្ងៃ៧ ខែ មករា
ឆ្នាំ១៩៧៩ បាននាំឲ្យមានការចាប់ផ្តើមជាថ្មីនូវសិទិ្ធរស់រានមានជីវិត
និងសិទ្ធិដទៃជាច្រើនទៀត។ ទាំងនេះ គឺជាសក្ខីភាពនៃប្រវត្តិសាស្រ្តដែលមិនអាចបំភ្លេចបាន នៃគុណបំណាច់របស់ឥស្សរជនដែលជាថ្នាក់ដឹកនាំរបស់គណបក្សប្រជាជនកម្ពុជា
និងកងទ័ពស្ម័គ្រចិត្តវៀតណាមជាមិត្ត ដែលបានកំទេចនូវរបបដ៏សាហាវឃោរឃៅយង់ឃ្នង
ហើយបាននាំមកនូវដង្ហើមរស់មកដល់សព្វថ្ងៃ។
បន្ទាប់ពីនោះមក
ប្រមុខនៃរាជរដ្ឋាភិបាលកម្ពុជា បានខិតខំស្តារ កសាងហេដ្ឋារចនាសម្ព័ន្ធ ផ្លូវថ្នល់ ស្ពានតូចធំជាច្រើន
និងជាពិសេស សមិទ្ធផលថ្មីស្រឡាងដែលនឹងត្រូវសម្ពោធបើកឱ្យប្រើប្រាស់នៅថ្ងៃទី៦
ខែមករា ឆ្នាំ២០១២ ខាងមុខនោះ គឺស្ពានអាកាស៧មករា។
កាលពីថ្ងៃទី ២៨ ខែ ធ្នូ ឆ្នាំ ២០១១ នៅក្នុងឱកាសការផ្តល់សញ្ញាប័ត្រដល់និសិ្សតបញ្ចប់ការសិក្សា
របស់វិទ្យាស្ថានវ៉ាន់ដា
សម្តេចអគ្គមហាសេនាបតីតេជោ ហ៊ុន
សែន
នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា
« ស្ពានអាកាសថ្មីមានគន្លងផ្លូវបួនដែលស្ថិតលើចំណុចប្រសព្វនៃមហាវិថី
សហព័ន្ធរុស្សី និងមហាវិថីកម្ពុជាក្រោមនេះនឹងត្រូវដាក់ឈ្មោះថា ស្ពានអាកាស៧មករា ដើម្បីរំលឹកសមិទ្ធផលដែលកម្ពុជាសម្រេចបានចាប់តាំងពីឆ្នាំ១៩៧៩មក»។ សម្តេចតេជោ ហ៊ុន សែន បានមានប្រសាសន៍បន្ថែមទៀតថា« កាលពី៣៣ឆ្នាំមុន នៅពេលដែលប្រជាពលរដ្ឋត្រឡប់ចូលទីក្រុងវិញដោយស្លៀកពាក់អាវខ្មៅ និងមានពរកូនផងនោះ ពួកគេរងគ្រោះយ៉ាងខ្លាំង គឺស្ទើរតែស្លាប់ទៅហើយ។ ប៉ុន្តែរយៈពេល៣៣ឆ្នាំក្រោយមក ទីក្រុងនេះមានស្ពានអាកាសដល់ទៅពីរដែលសម្រួលការធ្វើដំណើរចូលពីភាគខាងកើត និងភាគខាងលិច»នៅក្នុងទីក្រុងភ្នំពេញ។
មុនពេលមកដល់សព្វថ្ងៃនេះ ប្រសិនបើយើងធ្វើការស្រម៉ៃនូវព្រឹត្តិការណ៍ខ្លះនៅក្នុងសម័យប៉ុលពត នោះ តើវាវេទនាយ៉ាងណាខ្លះ?ដែលរបបប៉ុលពតបានកំទេចចោលគ្មានសល់ ដូចជាស្ពាន ថ្នល់ សាលារៀន មន្ទីរពេទ្យ និងវត្តអារាម ជាពិសេស វប្បធម៌ប្រពៃណី និងសាសនាត្រូវបានបំបាត់ចោលកុំថាឡើយកសាងប្រទេសសូម្បីតែការរស់នៅ ហូបចុកមិនគ្រប់គ្រាន់
ហើយត្រូវបានប៉ុលពតបង្ខំប្រជាជនឲ្យធ្វើការជាទម្ងន់ ពេលឈឺគ្មានថ្នាំព្យាបាល
សូម្បីតែសិទ្ធិទំនាក់ទំនងគ្នាត្រូវបានកាត់ផ្តាច់ គ្មានសិទិ្ធសេរីភាព។ល។និង។ល។ ទាំងនេះបើរំលឹកវាឈឺចាប់ខ្លាំងណាស់មិនអាចបំភ្លេចទេ ប៉ុន្តែជាសំណាងល្អ ប្រជាពលរដ្ឋដែលបានរស់រានមានជីវិតរហូតមកដល់សព្វថ្ងៃ គឺដោយសារគុណបំណាច់របស់គណបក្សប្រជាជនកម្ពុជាដែលបានរំដោះប្រជាជនពលរដ្ឋទាន់ពេលវេលាគឺថ្ងៃ៧មករា ឆ្នាំ១៩៧៩។
របបប៉ុលពតលំបាកវេទនាជាទីបំផុត
ដូច្នេះ ប្រជាពលរដ្ឋខ្មែរស្អប់ខ្ពើមនូវរបបនោះ
និងមិនចង់ឲ្យរបបខ្មៅងងឹតនេះវិលត្រឡប់មកវិញទេ ប៉ុន្តែបែរជាក្រុមគណបក្សប្រឆាំងមួយចំនួនចង់បានរបបនេះឲ្យរស់សារជាថ្មី ។ ការអធិប្បាយបែបនេះ
ដោយយោងថា ថ្មីៗនេះ លោក កឹម សុខា បាននិយាយថា នៅសម័យ ប៉ុលពត គ្មានសង្រ្គាម គ្មានឮស្នូរកាំភ្លើងទេ។ ត្រង់ចំណុចនេះសូមប្រជាពលរដ្ឋ ពិចារណានូវសម្តីដែលរមិលគុណ សម្តីដែលគ្មានន័យមិនទទួលស្គាល់ការពិតនេះ។ សម័យប៉ុលពតថ្វីបើគ្មានស្នូរកាំភ្លើង ប៉ុន្តែកុំភ្លេចថាមានស្នូរត្បូងចបគ្រប់ទីកន្លែងទូទាំងប្រទេសកម្ពុជា រហូតដល់បណ្តាលឲ្យស្លាប់ប្រជាជនខ្មែរជិតបីលាននាក់។ របបប៉ុលពតបានបន្សល់ទុកនូវកូនកំព្រារាប់ពាន់នាក់ និងបន្សល់ទុកនូវស្ត្រីបុរសព្រាត់ប្រាស់ប្តីប្រពន្ធរាប់មិនអស់ ធ្វើឲ្យ ប្រទេសធ្លាក់ក្នុងភ្នួកផេះ ។
មកដល់សព្វថ្ងៃ ប្រទេសកម្ពុជា និងអង្គការសហប្រជាជាតិបានធ្វើកិច្ចព្រមព្រៀងជាមួយគ្នាក្នុងការនាំ មេដឹក នាំកំពូល និងប្រមុខរដ្ឋនៃរបបប៉ុលពតមកកាត់ទោសនៅអង្គជំនុំជម្រះវិសាមញ្ញ
នៃតុលាការកម្ពុជាដើម្បីបង្ហាញឲ្យអ្នកជំនាន់ក្រោយ ជៀសវាងប្រព្រឹត្តតាមគន្លងចាស់។
ក្រោមការដឹកនាំដ៏ឈ្លាសវៃរបស់ប្រមុខរាជរដ្ឋាភិបាល សម្តេចតេជោ ហ៊ុន សែន
បានស្តារប្រទេសកម្ពុជាឱ្យមានការរីកចំរើនយ៉ាងឆាប់រហ័ស និងល្បីរន្ទឺលើឆាកអន្តរជាតិ ដែលគេទទួលស្គាល់ថាកម្ពុជាមានការរីកចំរើនស្ទើរគ្រប់វិស័យ។ ដោយឡែកយោងតាមតួលេខរបស់ក្រសួងទេសចរណ៍បានឲ្យដឹងថា ចំនួនទេសចរណ៍មកទស្សនាប្រទេសកម្ពុជាបានកើនឡើង១៤ភាគរយ ដល់២,៥លាននាក់ នៅក្នុងរយៈពេល ១១ខែ ដំបូង នៃឆ្នាំ២០១១ បើប្រៀបធៀបទៅនឹងរយៈពេលដូចគ្នាកាលពីឆ្នាំមុន ។
ទិន្នន័យនេះបង្ហាញថា ភ្ញៀវទេសចរដែលធ្វើដំណើរតាមយន្តហោះ បានកើនឡើង ៥១ភាគរយ នៅក្នុង រយៈពេលនេះ រីឯទេសចរណ៍ធ្វើដំណើរផ្លូវគោកឬផ្លូវទឹកបានកើនឡើង៤៩ភាគរយ។ បើយោង តាមប្រសាសន៍របស់លោក គង់ ភារៈ ប្រធាននាយកដ្ឋានស្ថិតិនៃក្រសួងទេសចរណ៍ បានឲ្យដឹង បន្ថែមទៀតថា ប្រទេសកម្ពុជា ពិតជានឹងសម្រេចបានគោលដៅរបស់ខ្លួនថា នឹងមានភ្ញៀវទេសចរណ៍ មកទស្សនាចំនួន ២,៨លាននាក់ មុនបំណាច់ឆ្នាំនេះ ជាពិសេសបន្ទាប់ពីក្រុមហ៊ុនអាកាសចរណ៍ កម្ពុជា អង្គរអ៊ែរ បានចាប់ផ្តើមបើកដំណើការ ជើងយន្តហោះ ជាទៀងទាត់ពីក្រុងព្រះសីហនុ មកកាន់ខេត្តសៀមរាប កាលពីដើមខែនេះ។ លោក គង់ ភារៈ ក៏បានមានប្រសាសន៍បន្ថែមទៀតថា រដ្ឋាភិបាលសង្ឃឹមថា នឹងមានភ្ញៀវទេសចរណ៍ អន្តរជាតិ មក ទស្សនា ប្រទេសកម្ពុជា៣,១លាននាក់ ។
ម្យ៉ាងវិញទៀតប្រទេសកម្ពុជា បាន និងកំពុងតែធ្វើឱ្យពិភពលោកវាយតំលៃខ្ពស់ថាជាប្រទេសអច្ឆរិយៈ ហើយបានធ្វើជាប្រធានអាស៊ាននាដើមឆ្នាំ២០១២ខាងមុខ ដែលមានប្រធានាធិបតីសហរដ្ឋអាមេរិក លោកអូបាម៉ា នាយករដ្ឋមន្រ្តីចិន វេនជាបាវ
នាយករដ្ឋមន្រ្តីរុស្សីលោក ពូទីន និងឥស្សរជនកំពូលៗនៅ អាស៊ាន ជាច្រើនបានចូលរួម
នេះសបញ្ជាក់ឲ្យឃើញពីភាពរីកចំរើននៃប្រទេសកម្ពុជាដែលយើងជាប្រជាពលរដ្ឋ កម្ពុជាគួរតែមានមោទភាពជាតិ។
ជារួមប្រទេសកម្ពុជា ៣៣ឆ្នាំ ក្រោយថ្ងៃរំដោះ៧ មករា ឆ្នាំ ១៩៧៩ មកដល់សព្វថ្ងៃ គឺមានការ រីក ចំរើនយ៉ាងខ្លាំង មានអគារខ្ពស់ៗ សណ្ឋាគារទំនើបៗ
ជាពិសេសស្ពានអាកាស៧មករានេះជាតឹកតាង។ ស្ពានអាកាស៧មករា ពិតជាបានបង្ហាញពីការផ្សាភ្ជាប់ទំនាក់ទំនងបណ្តាញគមនាគមន៍
សំរួលដល់ការធ្វើដំណើរដល់ពលរដ្ឋគ្រប់ជាតិសាសន៍ផង
ការទាក់ទាញភ្ញៀវទេសចរផង
និងមួយផ្នែកទៀតក៏បានជួយលើកសម្រស់ទីក្រុងភ្នំពេញថែមមួយកំរិតទៀត ឱ្យសមនឹងពាក្យស្លោក
« ទីក្រុងស្អាត រមណីយដ្ឋានស្អាត សេវាកម្មល្អ»៕