បន្ទាប់ពីការ
ចាកចេញ ពីគណបក្ស សម រង្ស៊ី មកចូលរួមជាមួយគណបក្សសិទ្ធិមនុស្ស
មិនបានប៉ុន្មានផង សមាជិកសមាជិការនៃគណបក្សទាំងនោះ
បានសម្លឹងឃើញទីជម្រកថ្មីមួយទៀត ដែលជាទីឋាននៃឧត្តមភាព
និងអនាគតដ៏ល្អត្រចះត្រចង់របស់ពួកគេ។
តើមូលហេតុអ្វី
ទើបមានការធ្វើចំណាកបក្សយ៉ាងភ្លូកទឹកភ្លូកដីបែបនេះ?
តើជម្រកថ្មីរបស់សមាជិកសមាជិការនៃគណបក្សប្រឆាំងទាំងអស់នោះ នៅឯណា?
ហើយពិតជាបានផ្តល់នូវឧត្តមភាព និងអនាគតសម្រាប់ពួកគេយ៉ាងដូចម្តេច?
នរណាក៏បានដឹង និងឮហើយថា
ការបែកបាក់ផ្ទៃក្នុងរបស់គណបក្សសម រង្ស៊ី គឺកើតឡើងដោយកំហុស
នៃយុទ្ធសាស្ត្រនយោបាយរបស់ពួកគេ គឺការវាយប្រហារបំផ្លើសបំភ្លៃការពិត
ប្រឌិតព្រឹត្តការណ៍ ចោទប្រកាន់មកលើគណបក្សប្រជាជនកម្ពុជា
ទាំងងងឹតងងុលខ្វះការពិចារណា។
ដោយក្តីអស់សង្ឃឹមចំពោះការដឹកនាំ ដែលពុំមានការទទួលខុសត្រូវ
គ្មានអំណោយទានរបស់គណបក្សប្រឆាំង ប្រជាធិបតេយ្យក្លែងក្លាយទាំងនេះ
ម្តងហើយម្តងទៀត ចលនានៃចំណាកបក្សកើតមានជាបន្តបន្ទាប់
ហើយមានទ្រង់ទ្រាយធំទៀតផង។
ការបែកបាក់បង្កើតជាការចោទប្រកាន់គ្នាទៅវិញទៅមក រវាង លោក សម រង្ស៊ី និង
លោក កឹម សុខា ដែលបង្កបានជាសង្គ្រាមពាក្យសម្តី បរិហារ ហែកហួរ
តិះដៀលគ្នាមិនចេះចប់មិនចេះហើយក្នុងទីលាននៃការដណ្តើមសកម្មជន
និងអ្នកគាំទ្រ ប្រៀបបាននឹងកូនក្មេងលេងទាញព្រាត់យ៉ាងដូច្នេះដែរ។
ជុំវិញការបែកបាក់ជាប្រព័ន្ធ
ហើយមានលក្ខណៈទ្រង់ទ្រាយធំ របស់គណបក្ស សម រង្ស៊ី ត្រូវបាន លោក កឹម សុខា
ប្រធានគណបក្សសិទ្ធិមនុស្សរីករាយអបអរសាទរស្វាគមន៍ចំពោះការបាក់បែកនេះ
ហើយ កឹម សុខា ក៏បានអំពាវនាវឲ្យអ្នកគាំទ្រគណបក្សសម រង្ស៊ី
ទាំងអស់ភ្ញាក់រលឹក ហើយដើរចេញពីទីងងឹតមកទីភ្លឺ ឲ្យបានឆាប់រហ័ស
និងទាន់ពេលវេលា
ដោយលោកបានលើកតម្កើងគណបក្សសិទ្ធិមនុស្សរបស់ខ្លួនជាគណបក្សប្រឆាំងទី ១
នៅកម្ពុជា ព្រោះយល់ថា គណបក្សសម រង្ស៊ី
នឹងរលំរលាយនាពេលដ៏ខ្លីខាងមុខនេះ។
ឆ្លើយតបនឹង លោក កឹម សុខា
មេដឹកនាំគណបក្ស សម រង្ស៊ី បានចោទប្រកាន់គណបក្សសិទ្ធិមនុស្សថា
ដណ្តប់ស្បែកប្រជាធិបតេយ្យក្លែងក្លាយ
ហើយអ្វីដែលបក្សសិទ្ធិមនុស្សទទួលបាននោះ គឺជាដុំឈើពុក
សំរាមស្អុយរលួយអស់ទៅហើយ។
ការលើកឡើងបែបនេះ
របស់គណបក្សសម រង្ស៊ី មិនមែនជាលើកទីមួយនោះទេ
ដែលគេតែងតែធ្វើការប្រមាថ
បន្ទាបបន្ថោកតម្លៃមនុស្សមកលើសកម្មជនរបស់ខ្លូន ព្រោះថា នៅពេលណា
ដែលសកម្មជនរបស់ខ្លួនបាត់បង់ជំនឿលើការដឹកនាំរបស់ពួកគេ
ហើយដើរចេញពីបក្សនោះ គេតែងតែចាត់ទុកអ្នកទាំងនោះ ជាជនក្បត់បក្ស
ជាដុំឈើពុក ជាស្លឹកឈើជ្រុះ ជាសំរាមស្អុយរលួយ ដែលការចោទប្រកាន់បែបនេះ
មានលក្ខណៈខុសប្លែកពីពេលមុនៗ នៅពេលដែល សម រង្ស៊ី ទទួលផលចំណេញនយោបាយ
ពីអ្នកទាំងនោះ សម រង្ស៊ី តែងតែចាត់ទុកអ្នកទាំងនោះថា ដុំមាសដ៏មានតម្លៃ
ជាវត្ថុទិព្វ។
ការសប្បាយរីករាយអបអរសាទរ
នូវភាពបរាជ័យរបស់គណបក្សសម រង្ស៊ី មិនបានប៉ុន្មាន ថ្ងៃផង
ភាពសោកសៅក្នុងបក្សសិទ្ធិមនុស្ស បាននាំមកនូវការអាប់អួរ
និងសេចក្តីខ្មាស់អៀនជាខ្លាំង ដោយសមាជិកគណបក្សសិទ្ធិមនុស្សខ្លួនឯង
រួមជាមួយគណបក្សសម រង្ស៊ី
ដែលបានមកចូលរួមជាមួយមិនទាន់បានអង្គុយក្តៅគូថផង អ្នកទាំងនោះ
ក៏បានសម្រេចចូលរួមជាមួយគណបក្សប្រជាជនកម្ពុជាវិញអស់ទៅហើយ។
សកម្មភាពទាំងនេះ ត្រូវបានបក្សសម រង្ស៊ី សើចចំអកឡកឡឺយទៅវិញយ៉ាងខ្លាំង។
ទោះជាយ៉ាងណាក៏ដោយ
កំហុសយុទ្ធសាស្ត្រនយោបាយដ៏ធ្ងន់ធ្ងរ ដែលមិនអាចស្រោចស្រង់បាន
របស់គណបក្សប្រឆាំងទាំងពីរ ការសម្រេចចិត្តលើឆន្ទៈនយោបាយដ៏ត្រឹមត្រូវ
ប្រកបដោយភាពច្បាស់លាស់ របស់អតីតអ្នកគាំទ្រគណបក្ស សម រង្ស៊ី
ដែលបានមកចូលរួមជាមួយគណបក្សសិទ្ធិមនុស្ស
និងអ្នកដែលគាំទ្រគណបក្សសិទ្ធិមនុស្ស
បានដឹកដៃគ្នាជាក្រុមធំៗចាកចេញជាបន្តបន្ទាប់
មករួមរស់ក្នុងមហាគ្រួសារនៃគណបក្សប្រជាជនកម្ពុជា
ដោយអ្នកទាំងនោះផ្តើមស្វែងយល់ និងសម្លឹងឃើញកាន់តែច្បាស់ថា
ពួកគេគ្រាន់តែជាបាវបំរើឱ្យបននយោបាយរបស់ សម រង្ស៊ី និង កឹម សុខា
តែប៉ុណ្ណោះ ព្រោះការរួមរស់ក្នុងបក្សប្រឆាំងពីរនេះ
កន្លងមកពួកគាត់មិនដែលមានឱកាស
ក្នុងការបង្កើតឆន្ទៈនយោបាយម្តងណានោះទេ។
ការសម្រេចចិត្តក្នុងការធ្វើចំណាកបក្ស របស់មន្ត្រីគណបក្សទាំងពីនេះ
ត្រូវបានអ្នកវិភាគស្ថានការណ៍នយោបាយកម្ពុជាយល់ឃើញថា
គឺការសម្រេចចិត្តប្រកបដោយឧត្តមភាព
និងការស្វែងរកអនាគតដ៏ត្រចះត្រចង់
ពោលគឺការសម្រេចចិត្តចាកចេញពីទីងងឹត
មកងងឹតសូន្យឈឹងហើយការចាកចេញពីទីងងឹតសូន្យឈឹង
មករកទីដែលមានពន្លឺពិតប្រាកដ។
សរុបសេចក្តីមក
ការសម្រេចចិត្តត្រឹមត្រូវលើឆន្ទៈនយោបាយរបស់ប្រជាពលរដ្ឋ
គ្រប់និន្នាការតាមរយៈការរួមរស់ ជាមួយគណបក្សប្រជាជនកម្ពុជា
គឺជាការសម្រេចចិត្តប្រកបដោយភាពច្បាស់លាស់
និងប្រសិទ្ធភាពខ្ពស់ក្នុងការជួយលើកស្ទួយលទ្ធិប្រជាធិបតេយ្យ
ការពារបូរណភាពទឹកដី ធានានូវស្ថានភាពនយោបាយ
ស្ថិរភាពម៉ាក្រូហិរញ្ញវត្ថុ ជំរុញការអភិវឌ្ឍ អភិបាលកិច្ចល្អ
តម្លាភាព ការទទួលខុសត្រូវ ទប់ស្កាត់អំពើពុករលួយ
ការពារសិទ្ធិសេរីភាពរបស់ប្រជាពលរដ្ឋទូទៅ លើកតម្កើងកម្រិតជីវភាព
និងសុខមាលភាពសង្គម ក្រោមការដឹកនាំដ៏ឈ្លាសវៃ
របស់សម្តេចអគ្គមហាសេនាបតីតេជោ ហ៊ុន សែន
នាយយករដ្ឋមន្ត្រីនៃព្រះរាជាណាចក្រកម្ពុជា៕
ដោយៈ ឧត្តម សក្តិ