សុន្ទរកថា ឯកឧត្តមបណ្ឌិតសភាចារ្យ សុខ អាន ថ្លែងក្នុងឱកាសបើកសិក្ខាសាលាស្តីពីការផ្សព្វផ្សាយ និងអនុវត្តស្មារតីកិច្ចព្រមព្រៀងទទួលស្គាល់គ្នាទៅវិញទៅមកក្នុងជំនាញវិជ្ជាជីវៈទេសចរណ៍ និងពិធីប្រគល់សញ្ញាបត្របណ្ឌិតគ្រប់គ្រងទេសចរណ៍
សុន្ទរកថា
ឯកឧត្តមបណ្ឌិតសភាចារ្យ សុខ អាន ឧបនាយករដ្ឋមន្ត្រី
រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី
ក្នុងឱកាសបើកសិក្ខាសាលាស្តីពីការផ្សព្វផ្សាយ
និងអនុវត្តស្មារតីកិច្ចព្រមព្រៀងទទួលស្គាល់គ្នាទៅវិញទៅមកក្នុង
ជំនាញវិជ្ជាជីវៈទេសចរណ៍
និងពិធីប្រគល់សញ្ញាបត្របណ្ឌិតគ្រប់គ្រងទេសចរណ៍ ជូន ឯកឧត្តម ថោង ខុន
រដ្ឋមន្ត្រីក្រសួងទេសចរណ៍ ដោយសាកលវិទ្យាល័យសេដ្ឋកិច្ចជាតិហាណូយ
នៅអគារមិត្តភាព ទីស្តីការគណៈរដ្ឋមន្ត្រី
ថ្ងៃទី២៩ ខែមីនា ឆ្នាំ២០១២
- ឯកឧត្តមទេសរដ្ឋមន្ត្រី រដ្ឋមន្ត្រី ឯកឧត្តម លោកជំទាវ សមាជិក សមាជិកា រាជរដ្ឋាភិបាល
- ឯកឧត្តម ថោង ខុន រដ្ឋមន្ត្រីក្រសួងទេសចរណ៍
- លោកសាស្ត្រាចារ្យ Nguyen Van Nam សាកលវិទ្យាធិការនៃសាកលវិទ្យាល័យសេដ្ឋកិច្ចជាតិហាណូយ
- ឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិ អន្តរជាតិ និងប្អូនៗនិស្សិត ជាទីមេត្រី!
ថ្ងៃនេះ ខ្ញុំមានសេចក្តីសោមនស្សរីករាយ ចូលរួមជាមួយឯកឧត្តម លោកជំទាវ
អស់លោក លោកស្រី ភ្ញៀវកិត្តិយសជាតិ និងអន្តរជាតិទាំងអស់ ក្នុងពិធីបើក សិក្ខាសាលាស្ដីពីការផ្សព្វផ្សាយ និងអនុវត្តស្មារតីកិច្ចព្រមព្រៀងទទួលស្គាល់គ្នាទៅវិញទៅមកក្នុងជំនាញវិជ្ជាជីវៈទេសចរណ៍ និងពិធីប្រគល់សញ្ញាបត្របណ្ឌិតគ្រប់គ្រងទេសចរណ៍ជូនឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ នាពេលនេះ។
ជាបឋម ក្នុងបរិយាកាសដ៏មហោឡារិកនេះ
ខ្ញុំសូមអបអរសាទរចំពោះការប្រគល់សញ្ញាបត្របណ្ឌិតគ្រប់គ្រងទេសចរណ៍
ជំនាញអេកូទេសចរណ៍
ដោយសាកលវិទ្យាល័យសេដ្ឋកិច្ចជាតិហាណូយនៃសាធារណរដ្ឋសង្គមនិយម
វៀតណាមជូនចំពោះឯកឧត្តមបណ្ឌិត ថោង ខុន
រដ្ឋមន្ត្រីក្រសួងទេសចរណ៍។ កិត្តិយសដែលឯកឧត្តមទទួលបាននាពេលនេះ
ធ្វើឱ្យយើងទាំងអស់គ្នាមានការកោតសរសើរ និងមានជំនឿយ៉ាងមុតមាំថា
ឯកឧត្តមបណ្ឌិតនឹងយក ចំណេះដឹងទាំងនេះ ទៅរួមចំណែកក្នុងការកសាង
និងអភិវឌ្ឍសេដ្ឋកិច្ច-សង្គមកម្ពុជាឱ្យកាន់តែឈានឡើងថែមទៀត
តាមរយៈការគ្រប់គ្រង
និងការអភិវឌ្ឍវិស័យទេសចរណ៍កម្ពុជាប្រកបដោយនិរន្តរភាព។
ក្នុងឱកាសនេះផងដែរ ខ្ញុំសូមសម្តែងនូវការកោតសរសើរ
និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ
និងមន្ត្រីរាជការទាំងអស់របស់ក្រសួងទេសចរណ៍
និងគណៈកម្មាធិការជាតិអ្នកជំនាញទេសចរណ៍
ព្រមទាំងភាគីពាក់ព័ន្ធទាំងអស់ ក្នុងការជំរុញការអនុវត្តរបស់កម្ពុជា
ក្នុងកិច្ចព្រមព្រៀងទទួលស្គាល់គ្នាទៅវិញទៅមកក្នុងជំនាញវិជ្ជាជីវៈ
ទេសចរណ៍អាស៊ាន ដ៏មានសារៈសំខាន់នេះ។
ឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិ និងអន្តរជាតិ!
រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា សម្រេច
បាននូវសមិទ្ធផលធំៗជាច្រើនជូនជាតិមាតុភូមិ និងប្រជាជន ជាពិសេស
ការនាំមកនិងធានាបាននូវសន្តិភាព ស្ថិរភាពនយោបាយ សុវត្ថិភាពសង្គម
និងសណ្តាប់ធ្នាប់សាធារណៈ ព្រមទាំងការដាក់ចេញនូវគោលនយោបាយ ផែនការ
និងយុទ្ធសាស្ត្រសំខាន់ៗជាច្រើនក្នុងការអភិវឌ្ឍសេដ្ឋកិច្ច-សង្គម
សំដៅលើកកំពស់ជីវភាពរស់នៅ និងកាត់បន្ថយភាពក្រីក្ររបស់ប្រជាពលរដ្ឋ។
ជាក់ស្តែង នៅឆ្នាំ ២០១១
កម្ពុជាសម្រេចបាននូវកំណើនសេដ្ឋកិច្ចក្នុងអត្រាប្រមាណ ៧% ហើយអត្រាភាពក្រីក្រថយចុះមកត្រឹម ២៥,៨% ក្នុង
ឆ្នាំ ២០១០។ សមិទ្ធផលទាំងនេះ
គឺទទួលបានដោយសារការដឹកនាំដ៏ត្រឹមត្រូវប្រកបដោយឆន្ទៈនយោបាយមោះមុត
និងភាពឈ្លាសវៃរបស់សម្តេចតេជោប្រមុខរាជរដ្ឋាភិបាល
តាមរយៈការដាក់ចេញគោលនយោបាយ យុទ្ធសាស្ត្រ និងផែនការអភិវឌ្ឍត្រឹមត្រូវ
ច្បាស់លាស់ និងមានលក្ខណៈប្រាកដប្រជា
គួបផ្សំនឹងយន្តការស្ថាប័នគ្រប់គ្រងប្រកបដោយប្រសិទ្ធភាពលើគ្រប់វិស័យ។
ក្នុងនោះ វិស័យទេសចរណ៍ក៏ត្រូវបានចាត់ទុកជាវិស័យអាទិភាពមួយ ជាមាសបៃតង និងជាការនាំចេញនៅនឹងកន្លែង
ក្នុងការរួមចំណែកដល់ការអភិវឌ្ឍសេដ្ឋកិច្ច-សង្គម និង
ការថែរក្សាបរិស្ថាន ជាពិសេស
ចូលរួមដល់ការសម្រេចបាននូវគោលដៅអភិវឌ្ឍន៍សហស្សវត្សរបស់អង្គការ
សហប្រជាជាតិ
ក៏ដូចជាយុទ្ធសាស្ត្រចតុកោណដំណាក់កាលទីពីររបស់រាជរដ្ឋាភិបាល ដើម្បី “កំណើន ការងារ ប្រសិទ្ធភាព និង សមធម៌”។
ជាការពិត
កម្ពុជាសម្រេចបានសមិទ្ធផលគួរជាទីមោទនៈក្នុងការអភិវឌ្ឍវិស័យទេសចរណ៍
ដែលកំពុងមានសន្ទុះកំណើនដ៏គំហុកក្នុងរយៈកាលចុងក្រោយនេះ។
ជាក់ស្តែង ក្នុងឆ្នាំ ២០១១ នេះ កម្ពុជាទទួលបានភ្ញៀវទេសចរអន្តរជាតិប្រមាណជាង ២,៨លាននាក់ ដែលបាននាំមកនូវចំណូលប្រមាណ ១៩១២លានដុល្លារ ស្មើនឹងប្រមាណ ១២% នៃផលិតផលក្នុងស្រុកសរុប (GDP) ព្រមទាំងបង្កើតការងារដោយផ្ទាល់ប្រមាណ ៣សែន៥ម៉ឺននាក់
និងដោយប្រយោលរាប់សែននាក់បន្ថែមទៀត។
តាមការប៉ាន់ស្មានដោយក្រសួងទេសចរណ៍
កម្ពុជាសង្ឃឹមថានឹងទទួលបានភ្ញៀវទេសចរ អន្តរជាតិប្រមាណ ៤,៥លាននាក់ នៅឆ្នាំ២០១៥ និងប្រមាណ ៧លាននាក់ នៅឆ្នាំ២០២០ ដែលនឹងបង្កើត ការងារប្រមាណ ៨សែននាក់ នៅឆ្នាំ២០២០។
ឯកឧត្តម លោកជំទាវ អស់លោក លោកស្រី បានជ្រាបហើយថា សតវត្សរ៍ទី២១ ត្រូវបានចាត់ទុកជា “សតវត្សរ៍ នៃការធ្វើដំណើរ និងទេសចរណ៍” ហើយបើយោងតាមការព្យាករណ៍របស់អង្គការទេសចរណ៍ពិភពលោក ការធ្វើដំណើរ របស់ភ្ញៀវទេសចរអាចនឹងកើនឡើងដល់ ១ពាន់លាននាក់ នៅឆ្នាំ២០១២ និង ១,៨ពាន់លាននាក់ នៅឆ្នាំ២០៣០ ក្នុងនោះ តំបន់អាស៊ាននឹងទទួលបានភ្ញៀវទេសចរ ១០៧លាននាក់ នៅឆ្នាំ ២០១៥ ១២០លាននាក់ នៅឆ្នាំ ២០២០ និង ១៩០លាននាក់ នៅឆ្នាំ ២០៣០។ ជាក់ស្តែង នៅឆ្នាំ ២០១១
វិស័យទេសចរណ៍សកលលោកបានរួមចំណែកប្រមាណ ៥% នៃផលិតផលសរុបក្នុងស្រុក
(GDP) ដែលស្មើនឹងប្រមាណ ៣០% នៃពាណិជ្ជកម្មពិភពលោក ខាងផ្នែកសេវាកម្ម
និងបង្កើតការងារបានប្រមាណ ២៣៥លាននាក់ ស្មើនឹង ៨% នៃកំលាំងពលកម្មសរុបនៅលើពិភពលោក ពោលគឺនៅលើពិភពលោកនេះមានមនុស្ស ១នាក់ ក្នុងចំណោម ១២នាក់
បម្រើការក្នុងវិស័យទេសចរណ៍។ អង្គការពលកម្មអន្តរជាតិ (ILO)
ក៏បានគូសបញ្ជាក់ផងដែរថា ដើម្បីធានាបាននូវកំណើនសេដ្ឋកិច្ចប្រកបដោយ
និរន្តរភាព
ពិភពលោកទាំងមូលនឹងត្រូវបង្កើតការងារថ្មីប្រមាណ៦០០លាននាក់ទៀតក្នុង
រយៈពេលមួយទសវត្សខាងមុខ
ដែលនេះនឹងផ្តល់នូវតួនាទីដ៏មានសារៈសំខាន់ថែមទៀតដល់វិស័យទេសចរណ៍
ដែលជាវិស័យមួយជះឥទ្ធិពលជាវិជ្ជមានដល់វិស័យដទៃទៀត (Positive Spillover
Effects) ពោលគឺការងារមួយកន្លែងដែលបង្កើតក្នុងវិស័យទេសចរណ៍អាចនឹងបង្កើតការងារមួយកន្លែងកន្លះក្នុងវិស័យផ្សេងទៀតដែលពាក់ព័ន្ធនឹងវិស័យទេសចរណ៍។
ជាមួយនឹងនិន្នាការកើនឡើងជាលំដាប់យ៉ាងឆាប់រហ័សនៃចំនួនភ្ញៀវទេសចរលើសកលលោក និងក្នុងតំបន់ ពិសេសក្នុងបរិបទនៃការជំរុញបង្កើតសហគមន៍សេដ្ឋកិច្ចអាស៊ាន (ASEAN
Economic Community-AEC) ត្រឹមឆ្នាំ ២០១៥
កម្ពុជាក៏ត្រូវយកចិត្តទុកដាក់ដល់ការបណ្តុះបណ្តាលធនធានមនុស្ស
ពិសេសកំលាំងពលកម្មជំនាញវិជ្ជាជីវៈ
ដែលជាតម្រូវការចាំបាច់ក្នុងវិស័យសេវាកម្ម
ដើម្បីត្រៀមខ្លួនធ្វើសមារហណកម្មក្នុងក្របខ័ណ្ឌតំបន់ប្រកបដោយ
សមត្ថភាពប្រកួតប្រជែងរបស់យើង។ កិច្ចព្រមព្រៀងទទួលស្គាល់គ្នាទៅវិញទៅមក (MRAs)
លើអ្នកជំនាញក្នុងវិស័យសេវាកម្មមួយចំនួនដូចជា វិស័យទេសចរណ៍
វិស្វកម្ម ស្ថាបត្យកម្ម គណនេយ្យជាដើម គឺជាឧបករណ៍ដ៏សំខាន់
ដើម្បីឈានឆ្ពោះទៅរកទិសដៅនៃលំហូរកំលាំងពលកម្មដោយសេរីរវាងបណ្តា
ប្រទេសជាសមាជិក។
ឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិ និងអន្តរជាតិ !
ដូចដែលឯកឧត្តមបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអ្នកជំនាញទេសចរណ៍ បានលើកឡើងថា កិច្ចព្រមព្រៀងទទួលស្គាល់គ្នាទៅវិញទៅមកក្នុងជំនាញវិជ្ជាជីវៈទេសចរណ៍ គឺផ្តោត ទៅលើចល័តភាពរបស់ជំនាញវិជ្ជាជីវៈទេសចរណ៍ចំនួន ៣២ មុខជំនាញ ដោយផ្តោតលើសេវាកម្មសំខាន់ ០២ គឺៈ
- ទី១: សេវាកម្មសណ្ឋាគារ ដែលរួមមាន ០៤ ផ្នែកគឺ ផ្នែកការិយាល័យជួរមុខ ផ្នែកគេហកិច្ច ផ្នែកផលិតកម្មម្ហូបអាហារ ផ្នែកសេវាកម្មអាហារ និងភេសជ្ជៈ។
- ទី២: សេវាកម្មធ្វើដំណើរ ដែលរួមមាន ០២ ផ្នែកគឺ ផ្នែកទីភ្នាក់ងារទេសចរណ៍ និងផ្នែកប្រតិបត្តិការខ្សែទស្សនកិច្ច។
ខ្ញុំមានជំនឿយ៉ាងមុតមាំថា ការអនុវត្តកិច្ចព្រមព្រៀងនេះនឹងចូលរួមដល់ការពង្រឹងគុណភាពសេវាកម្មតាមរយៈការបណ្តុះបណ្តាលធនធានមនុស្ស ធ្វើឱ្យកម្ពុជាក្លាយជាគោលដៅទេសចរណ៍ប្រកបដោយគុណភាព និងផ្តល់ភាពកក់ក្តៅដល់ភ្ញៀវទេសចរ និងចល័តភាពរបស់អ្នកជំនាញទេសចរណ៍កម្ពុជាដែលទទួលបានការទទួលស្គាល់ក្នុង តំបន់អាស៊ាន។
ចាប់ពីឆ្នាំ២០១៥ទៅ អ្នកជំនាញវិជ្ជាជីវៈទេសចរណ៍អាស៊ាន
ក្នុងជំនាញណាមួយនៃជំនាញទាំង៣២មុខ
ដែលទទួលបានការទទួលស្គាល់នូវវិជ្ជាជីវៈផ្នែកទេសចរណ៍
អាចមានលទ្ធភាពទៅបំពេញការងារក្នុងបណ្តាប្រទេសជាសមាជិកអាស៊ានណាមួយ
ក៏បាន។ ដើម្បីទទួលបាននូវការទទួលស្គាល់
បុគ្គលម្នាក់ត្រូវមានគុណវុឌ្ឍិជាក់ច្បាស់ដូចដែលបានកំណត់
ទើបអាចទៅបំពេញការងារក្នុងជំនាញណាមួយបាន
គឺទាមទារអោយមានការបណ្តុះបណ្តាលត្រឹមត្រូវទៅតាមស្តង់ដាសមត្ថភាព
និងកម្មវិធីបណ្តុះបណ្តាលដែលបានដាក់ចេញក្នុងក្របខ័ណ្ឌអាស៊ាន។
ជាងនេះទៀត ការរៀបចំកិច្ចព្រមព្រៀងទទួលស្គាល់គ្នាទៅវិញទៅមក
គឺដើម្បីចូលរួមអនុវត្តការធ្វើសមាហរណកម្មអាស៊ានប្រកបដោយប្រសិទ្ធភាព
ខ្ពស់ និងតម្លាភាព ដែលប្រទេសជាសមាជិកទទួលបានប្រយោជន៍ជាច្រើន
ដូចជាតាមរយៈការកាត់បន្ថយតម្លៃ បង្កើនភាពប្រកួតប្រជែង
ធានាលំនឹងទីផ្សារការងារក្នុងអាស៊ាន ជំរុញលំហូរពាណិជ្ជកម្ម
និងសេវាកម្មក្នុងតំបន់ ជាដើម។ ជាពិសេសគឺធានាបាននូវការជឿទុកចិត្ត
ភាពជាដៃគូ និងកិច្ចសហការជិតស្និទ្ធរវាងបណ្តាប្រទេសជាសមាជិក
ព្រមទាំងចូលរួមដល់ការពង្រឹងការអភិវឌ្ឍធនធានមនុស្ស
និងគុណភាពសេវាកម្មទេសចរណ៍ផងដែរ។
ឆ្លៀតក្នុងឱកាសនេះ ខ្ញុំសូមទាញការចាប់អារម្មណ៍
និងលើកឡើងនូវអនុសាសន៍មួយចំនួន
ដើម្បីធានាថាយើងត្រៀមខ្លួនបានត្រឹមត្រូវក្នុងការចូលរួមជំរុញការ
អនុវត្តកិច្ចព្រមព្រៀងទទួលស្គាល់គ្នាទៅវិញទៅមកលើអ្នកជំនាញទេសចរណ៍
នៅឆ្នាំ២០១៥ ដូចខាងក្រោម ៖
- សូមឱ្យគ្រប់ស្ថាប័ន-គ្រឹះស្ថានអប់រំ សាលាបណ្តុះបណ្តាលជំនាញវិជ្ជាជីវៈក្នុងវិស័យទេសចរណ៍ ត្រូវរួសរាន់ធ្វើបច្ចុប្បន្នភាពកម្មវិធីបណ្តុះបណ្តាល និងកម្មវិធីសិក្សារបស់ខ្លួនឱ្យស្របតាមស្តង់ដាសមត្ថភាព និងកម្មវិធីបណ្តុះបណ្តាលដែលបានដាក់ចេញដោយគណៈកម្មាធិការជាតិអ្នកជំនាញ ទេសចរណ៍។ ក្នុងន័យនេះ គណៈកម្មាធិការជាតិអ្នកជំនាញទេសចរណ៍ ដោយសហការជាមួយក្រសួង ស្ថាប័នពាក់ព័ន្ធ “ត្រូវខិតខំរៀបចំឱ្យមានស្តង់ដាសមត្ថភាពអ្នកជំនាញទេសចរណ៍ កម្មវិធីបណ្តុះបណ្តាល ព្រមទាំង ប្រព័ន្ធគុណវុឌ្ឍិសម្រាប់អ្នកជំនាញទេសចរណ៍កម្ពុជា ឱ្យបានឆាប់ ដើម្បីជាមូលដ្ឋានឱ្យគ្រប់គ្រឹះស្ថាន និងសាលាបណ្តុះបណ្តាលជំនាញវិជ្ជាជីវៈទេសចរណ៍ យកទៅប្រើប្រាស់ក្នុងការបណ្តុះបណ្តាល របស់ខ្លួន។
- ក្រសួងទេសចរណ៍ និងគណៈកម្មាធិការជាតិអ្នកជំនាញទេសចរណ៍ ត្រូវរៀបចំលិខិតបទដ្ឋានគតិយុត្តិ ចាំបាច់នានាសម្រាប់ការគ្រប់គ្រងការបណ្តុះបណ្តាលវិជ្ជាជីវៈទេសចរណ៍ កម្ពុជា និង ដើម្បីឱ្យមានសុខដុមនីយកម្មនៃស្តង់ដាសមត្ថភាព និងកម្មវិធីបណ្តុះបណ្តាលថ្នាក់ជាតិតែមួយ នៅតាមសាលាបណ្តុះបណ្តាលជំនាញវិជ្ជាជីវៈទេសចរណ៍ទាំងអស់។
- ទន្ទឹមនឹងការត្រៀមខ្លួនចូលរួមក្នុងចល័តភាពនៃអ្នកជំនាញអាស៊ាន នៅឆ្នាំ២០១៥ ខាងមុខនេះ ខ្ញុំសូមស្នើឱ្យមានការជ្រើសរើសសាលាបណ្តុះបណ្តាលជំនាញវិជ្ជាជីវៈ ទេសចរណ៍គំរូ ដែលបានបណ្តុះបណ្តាល ដោយអនុវត្តតាមស្តង់ដាសមត្ថភាព និងកម្មវិធីបណ្តុះបណ្តាលអាស៊ាន ដើម្បីជាមូលដ្ឋានសម្រាប់ជំរុញឱ្យសាលាបណ្តុះបណ្តាលវិជ្ជាជីវៈ ផ្សេងៗទៀតអនុវត្តតាម។
- គណៈកម្មាធិការជាតិអ្នកជំនាញទេសចរណ៍ ត្រូវបន្តជំរុញធ្វើការផ្សព្វផ្សាយស្មារតីនៃកិច្ចព្រមព្រៀងនេះ ឱ្យកាន់តែទូលំទូលាយ និងស៊ីជម្រៅដល់គ្រប់ភាគីពាក់ព័ន្ធ ជាអាទិ៍សាលាបណ្តុះបណ្តាលវិជ្ជាជីវៈ អ្នកទេសចរណ៍ ប្រតិបត្តិករទេសចរណ៍ សណ្ឋាគារ សេវាកម្មស្នាក់នៅ ភោជនីយដ្ឋាន សិស្ស និងនិស្សិត នៅតំបន់គោលដៅទេសចរណ៍ធំៗនៅកម្ពុជា។
ខ្ញុំសង្ឃឹមថា ឯកឧត្តម លោកជំទាវ អស់លោក លោកស្រី ក្មួយៗនិស្សិត
នឹងចូលរួមផ្តល់យោបល់ អនុសាសន៍ និងធាតុចូលថ្មីៗឱ្យបានផុលផុស
ព្រមទាំងព្យាយាមស្វែងយល់ឱ្យបានស៊ីជម្រៅលើឯកសារសំខាន់ៗ
ដែលជាមូលដ្ឋានសម្រាប់ការអនុវត្តកិច្ចព្រមព្រៀងទទួលស្គាល់គ្នាទៅវិញ
ទៅមកនៃអ្នកជំនាញវិជ្ជាជីវៈទេសចរណ៍នេះ
រួមមានស្តង់ដាសមត្ថភាពសម្រាប់អ្នកជំនាញទេសចរណ៍ផ្នែកគេហកិច្ច
និងផ្នែកការិយាល័យជួរមុខ ហើយខ្ញុំសូមឱ្យក្រសួងទេសចរណ៍
និងគណៈកម្មាធិការជាតិអ្នកជំនាញទេសចរណ៍បន្តផ្សព្វផ្សាយស្មារតី
និងត្រៀមអនុវត្តស្មារតីនៃកិច្ចព្រមព្រៀងនេះនៅរាជធានីភ្នំពេញ
និងតាមបណ្តាខេត្តដែលជាគោលដៅទេសចរណ៍អាទិភាពផ្សេងៗទៀត ដូចជា
ខេត្តសៀមរាប ខេត្តព្រះសីហនុ ឱ្យកាន់តែទូលំទូលាយ និងស៊ីជំរៅ។
មុននឹងបញ្ចប់ ខ្ញុំសូមគាំទ្រផែនការ និងកម្មវិធីការងារអនុវត្តបន្តរបស់គណៈកម្មាធិការជាតិដែលបានលើកទ្បើងដោយឯកឧត្តមបណ្ឌិត ថោង ខុន
រដ្ឋមន្ត្រីក្រសួងទេសចរណ៍
និងជាប្រធានគណៈកម្មាធិការជាតិអ្នកជំនាញទេសចរណ៍ និងសូមអំពាវនាវ
សិស្សានុសិស្ស និស្សិតដែលកំពុងសិក្សាក្តី ឬ
អ្នកជំនាញវិជ្ជាជីវៈទេសចរណ៍កំពុងបម្រើការក្តី
ត្រូវយកចិត្តទុកដាក់អភិវឌ្ឍជំនាញរបស់ខ្លួនឱ្យបានល្អ
រួមផ្សំនឹងការអភិវឌ្ឍជំនាញភាសាបរទេសបន្ថែមផងដែរ
និងសូមឱ្យនិយោជកជាប្រតិបត្តិករទេសចរណ៍ ភោជនីយដ្ឋាន សេវាកម្មស្នាក់នៅ
មេត្តាផ្តល់នូវវគ្គបណ្តុះបណ្តាលដល់និយោជិតរបស់ខ្លួន
ដើម្បីឱ្យពួកគាត់កាន់តែមានសមត្ថភាពប្រកួតប្រជែង
ដើម្បីជាប្រយោជន៍ដល់ការផ្តល់នូវសេវាប្រកបដោយគុណភាពដល់ភ្ញៀវទេសចរ
ក៏ដូចជាបង្កើននូវផលិតភាពការងារជូនក្រុមហ៊ុនវិញផងដែរ។
ខ្ញុំសង្ឃឹមថា ឯកឧត្តម លោកជំទាវ អស់លោក លោកស្រី គ្រប់ភាគីពាក់ព័ន្ធទាំងអស់ ទាំងផ្នែកសាធារណៈ ផ្នែកឯកជន ដៃគូអភិវឌ្ឍ និងពិសេសសាលាបណ្តុះបណ្តាលវិជ្ជាជីវៈទេសចរណ៍
នឹងខិតខំសហការរួមគ្នាថែមទៀត ក្នុងការគាំទ្រផែនការ
និងកម្មវិធីការងាររបស់គណៈកម្មាធិការជាតិអ្នកជំនាញទេសចរណ៍
ដើម្បីជំរុញការអនុវត្ត
កិច្ចព្រមព្រៀងទទួលស្គាល់គ្នាទៅវិញទៅមកក្នុងជំនាញវិជ្ជាជីវៈទេសចរណ៍
ប្រកបដោយប្រសិទ្ធភាព និង ការទទួលខុសត្រូវ
ជាពិសេសរួមគ្នាធានាឱ្យបានទាំងគុណភាពសេវាកម្ម
និងការប្រកួតប្រជែងលើទីផ្សារការងារ។
ជាថ្មីម្តងទៀត ខ្ញុំសូមអបអរសាទរជ័យលាភីបណ្ឌិតគ្រប់គ្រងទេសចរណ៍ដែលឯកឧត្តម ថោង ខុន
ទទួលបាន
និងសូមជូនពរឱ្យអង្គសិក្ខាសាលាទាំងមូលទទួលបានជោគជ័យជាលទ្ធផលប្រកបដោយ
ផ្លែផ្កា និង សូមជូនពរឯកឧត្តម លោកជំទាវ អស់លោក លោកស្រី
ភ្ញៀវកិត្តិយសជាតិ និងអន្តរជាតិទាំងអស់ សូមមានសុខភាពល្អ
ជ័យជំនះគ្រប់ភារកិច្ច និងសុភមង្គលក្នុងក្រុមគ្រួសារ។
ខ្ញុំសូមប្រកាសបើកអង្គសិក្ខាសាលាចាប់ពីពេលនេះតទៅ !
សូមអរគុណ !