សុន្ទរកថា ឯកឧត្ដមបណ្ឌិតសភាចារ្យ សុខ អាន ឧបនាយករដ្ឋមន្ដ្រី រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រីថ្លែងក្នុងពិធីប្រគល់-ទទួលសម្ភារៈបច្ចេកទេស និងគ្រឿងចក្របោសសំអាតមីនជាជំនួយរដ្ឋាភិបាលជប៉ុនផ្តល់ជូនរាជរដ្ឋាភិបាលកម្ពុជា ដើម្បីផ្តល់ឲ្យមជ្ឈមណ្ឌលសកម្មភាពកំចាត់មីនកម្ពុជា(ស៊ីម៉ាក់)
សុន្ទរកថា
ឯកឧត្ដមបណ្ឌិតសភាចារ្យ សុខ អាន ឧបនាយករដ្ឋមន្ដ្រី
រដ្ឋមន្ដ្រីទទួលបន្ទុកទីស្ដីការគណៈរដ្ឋមន្ដ្រីថ្លែងក្នុងពិធីប្រគល់-ទទួលសម្ភារៈបច្ចេកទេស
និងគ្រឿងចក្របោសសំអាតមីនជាជំនួយរដ្ឋាភិបាលជប៉ុនផ្តល់ជូនរាជរដ្ឋាភិបាលកម្ពុជា
ដើម្បីផ្តល់ឲ្យមជ្ឈមណ្ឌលសកម្មភាពកំចាត់មីនកម្ពុជា(ស៊ីម៉ាក់)
សៀមរាប ថ្ងៃទី ១៦ ខែកុម្ភៈ ឆ្នាំ២០១២
- ឯកឧត្តម Masafumi Kuroki ឯកអគ្គរដ្ឋទូតវិសាមញ្ញ និងពេញសមត្ថភាពនៃប្រទេសជប៉ុនប្រចាំព្រះរាជាណាចក្រកម្ពុជា
- លោក SUZUKI Yasujiro ប្រធានទីភ្នាក់ងារសហប្រតិបត្តិការអន្តរជាតិ ជប៉ុន(JICA)ប្រចាំកម្ពុជា
- ឯកឧត្ដម ស៊ូ ភិរិន្ទ អភិបាលខេត្តសៀមរាប
- ឯកឧត្ដម ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់)
- ឯកឧត្ដម លោកជំទាវ អស់លោក លោកស្រី ភ្ញៀវកិត្តិយសជាតិ អន្តរជាតិ
- លោកតា លោកយាយ បងប្អូនប្រជាពលរដ្ឋ លោកគ្រូ អ្នកគ្រូ ក្មួយៗនិស្សិត សិស្សានុសិស្ស ក្រុមកាយឬទិ្ធ ក្រុមកាកបាទក្រហម បុគ្គលិកស៊ីម៉ាក់ និងមន្រ្តីរាជការទាំងអស់ ជាទីស្រទ្បាញ់រាប់អាន
ថ្ងៃនេះ ខ្ញុំមានសេចក្ដីសោមនស្សរីករាយ ចូលរួមជាមួយឯកឧត្ដម លោកជំទាវ
អស់លោក លោកស្រី ភ្ញៀវកិត្តិយសជាតិ អន្តរជាតិ កងកម្លាំងប្រដាប់អាវុធ
លោកតា លោកយាយ បងប្អូនប្រជាពលរដ្ឋ លោកគ្រូ អ្នកគ្រូ ក្មួយៗនិស្សិត
សិស្សានុសិស្ស
ទាំងអស់ក្នុងពិធីប្រគល់-ទទួលសម្ភារៈបច្ចេកទេសបោសសំអាតមីន
ដែលជាជំនួយរដ្ឋាភិបាលជប៉ុនជូនរាជរដ្ឋាភិបាលកម្ពុជា
ដើម្បីផ្ដល់ឲ្យមជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់)
បំពេញបេសកកម្មមនុស្សធម៌ក្នុងព្រះរាជាណាចក្រកម្ពុជា។
នេះជាលើកទី៦ហើយ ដែលរដ្ឋាភិបាល និងប្រជាជនជប៉ុន
ផ្ដល់ជំនួយជាសម្ភារៈបច្ចេកទេសដល់ស្ថាប័នជាតិដោះមីនស៊ីម៉ាក់
ដែលរួមមានគ្រឿងចក្រធុនធ្ងន់កំទេចមីនចំនួន ៨គ្រឿង
ម៉ាស៊ីនរាវមីនគ្រប់ប្រភេទចំនួន ៤៩២គ្រឿង រថយន្ដ Nissan Patrol
ចំនួន៥៨គ្រឿង រថយន្ដ១២កៅអីចំនួន៧គ្រឿង រថយន្ដ Pick-up ចំនួន៥០គ្រឿង
តង់ស្នាក់នៅចល័តចំនួន៨៦ ព្រមទាំងគ្រឿងបន្លាស់សំរាប់គ្រឿងចក្រ
និងរថយន្ដ ព្រមទាំងសម្ភារៈជាច្រើនមុខទៀត ដែលគិតជាទឹកប្រាក់ប្រមាណ
១៦,៥លាន ដុល្លារអាមេរិក។
ក្នុងនាមរាជរដ្ឋាភិបាល
ខ្ញុំសូមវាយតម្លៃខ្ពស់ចំពោះជំនួយដ៏វិសេសវិសាលនេះ ពីព្រោះថាសម្ភារៈទាំង
អស់នេះពិតជាមានសារៈសំខាន់ជាទីបំផុត
សម្រាប់ស៊ីម៉ាក់យកទៅប្រើប្រាស់ជាប្រយោជន៍ជាតិ
និងក្នុងការងារមនុស្សធម៌
ដោយសារសម្ភារៈទាំងនេះនឹងជួយសំរាប់គាំទ្រដល់កិច្ចប្រតិបត្ដិការ
និងបង្កើនល្បឿនបេសកកម្មរបស់ស៊ីម៉ាក់
ក្នុងការបោសសំអាតគ្រាប់មីននិងយុទ្ធភ័ណ្ឌមិនទាន់ផ្ទុះឲ្យកាន់តែមានសន្ទុះ
ខ្លាំងក្លា ដើម្បីឆ្លើយតបតាមតម្រូវការរបស់ប្រជាជននិងរាជរដ្ឋាភិបាល
និងគាំទ្រការអភិវឌ្ឍ លើកកម្ពស់ជីវភាពប្រជាពលរដ្ឋ
និងស្ដារហេដ្ឋារចនាសម្ព័ន្ឋជាតិ គ្រប់វិស័យ។
ការផ្ដល់ជំនួយដ៏ថ្លៃថ្លានេះ
ក៏បានបញ្ជាក់យ៉ាងច្បាស់ថែមទៀតនូវជំហរគាំទ្រយ៉ាងពេញទំហឹងរបស់រដ្ឋាភិបាល
និងប្រជាជនជប៉ុន
ក្នុងការចូលរួមវិភាគទានយ៉ាងសំខាន់ដល់ព្រះរាជាណាចក្រកម្ពុជា
ដើម្បីជួយដោះស្រាយនូវការលំបាក និងបញ្ហានៃគ្រោះមហន្ដរាយ
និងការគំរាមកំហែងដោយសារគ្រាប់មីន និងយុទ្ធភ័ណ្ឌមិនទាន់ផ្ទុះ
ដែលនៅសល់រាយប៉ាយរាប់លានគ្រាប់នៅលើទឹកដីនៃព្រះរាជាណាចក្រកម្ពុជា
ជាពិសេសនៅតាមតំបន់ស្រែចំការ
ហើយដែលបាននិងកំពុងគំរាមកំហែងដោយផ្ទាល់និងដោយប្រយោលដល់ប្រជាជនកម្ពុជា
រាប់ម៉ឺនគ្រួសារ។
ឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិ អន្តរជាតិ
តាមរយៈនយោបាយ ឈ្នះឈ្នះ របស់ សម្ដេចអគ្គមហាសេនាបតីតេជោ ហ៊ុន សែន
ប្រទេសកម្ពុជាទទួលបានឯកភាពជាតិទាំងស្រុង នៅចុងឆ្នាំ១៩៩៨
ដែលនេះជាលើកដំបូងក្នុងរយៈពេល ៥០០ឆ្នាំ
ចុងក្រោយនៃប្រវត្តិសាស្រ្តរបស់កម្ពុជា។
ទោះបីសង្គ្រាមត្រូវបានរលត់ហើយក៏ដោយ ក៏រាជរដ្ឋាភិបាល
ត្រូវរែកពុននូវការលំបាកក្នុងការធ្វើសមាហរណកម្ម
ការកសាងហេដ្ឋារចនាសម្ព័ន្ធរូបវន្ដ និងបញ្ហាធំៗមួយចំនួនទៀត
ហើយថែមទាំងត្រូវប្រឈមមុខដោះស្រាយកាកសំណល់ពីសង្គ្រាមដែលជាគ្រាប់មីន
និងយុទ្ធភ័ណ្ឌមិនទាន់ផ្ទុះយ៉ាងច្រើនទៀត
ហើយដែលកាកសំណល់ខ្លះបាននៅសល់តាំងពីសង្គ្រាមលោកលើកទី២ក៏មានដែរ។
ដូចនេះកិច្ចប្រតិបត្ដិការបោសសំអាតមីន និងយុទ្ធភ័ណ្ឌមិនទាន់ផ្ទុះ
គឺជាគោលដៅដែលរាជរដ្ឋាភិបាល
និងដៃគូអភិវឌ្ឍន៍ទាំងអស់ត្រូវបន្ដសម្រេចឲ្យបានជោគជ័យទាំងស្រុង
ដើម្បីរួមចំណែកធានាបានសេ្ថរភាពនយោបាយ ម៉ាក្រូសេដ្ឋកិច្ច សន្ដិសុខ
និងសុវត្ថិភាពជូនប្រទេស និងប្រជាជនកម្ពុជា ។
ជាការពិតណាស់ ទោះបីជារាជរដ្ឋាភិបាល
និងដៃគូអភិវឌ្ឍន៍បានរួមគ្នាដោះស្រាយបញ្ហាគ្រាប់មីន
និងយុទ្ធភ័ណ្ឌមិនទាន់ផ្ទុះអស់រយៈពេលជាង២០ឆ្នាំហើយក៏ដោយ ក៏គ្រាប់មីន
និងយុទ្ឌភ័ណ្ឌមិនទាន់ផ្ទុះនៅមានសេសសល់ច្រើនទៀតនៅតាមភូមិករ
ដីស្រែចំការ
និងទីតាំងសំខាន់ៗមួយចំនួនដែលនៅតែបន្ដបង្កគ្រោះថ្នាក់ដល់អាយុជីវិតប្រជា
ជន ឬបណ្តាលឲ្យក្លាយជាជនពិការអស់មួយជីវិត ជាពិសេសចំពោះអ្នក
ដែលកំពុងរស់នៅតាមតំបន់អតីតសមរភូមិ។ មិនតែប៉ុណ្ណោះគ្រាប់មីន
និងយុទ្ធភ័ណ្ឌមិនទាន់ផ្ទុះទាំងនោះ
ក៏នៅតែបន្ដបង្កភាពភ័យខ្លាចដល់ការប្រើប្រាស់ដីធ្លីក្នុងការបង្ក
បង្កើនផលចិញ្ចឹមគ្រួសារ
ក៏ដូចជាឧបសគ្គដល់ការអភិវឌ្ឍហេដ្ឋារចនាសម្ព័ន្ធក្នុងប្រទេស។
ដោយសារការខិតខំប្រឹងប្រែងរបស់យើង
អត្រាគ្រោះថ្នាក់ដោយសារគ្រាប់មីន
និងយុទ្ធភ័ណ្ឌមិនទាន់ផ្ទុះធ្លាក់ចុះគួរឲ្យកត់សម្គាល់
ហើយតាមរបាយការណ៍ទិន្នន័យតាមដានអ្នកគ្រោះថ្នាក់ដោយសារគ្រាប់មីនបាន
ឲ្យដឹងថា
ក្នុងឆ្នាំ២០០០-២០០៧មានអត្រាអ្នកគ្រោះថ្នាក់ជាង៨០០នាក់ក្នុងមួយ
ឆ្នាំៗ ហើយមកដល់ឆ្នាំ ២០០៨-២០១១
អត្រានេះបានធ្លាក់មកនៅត្រឹមក្រោម៣០០នាក់ក្នុង១ឆ្នាំៗ។
ទោះបីជាមានការធ្លាក់ចុះអត្រាគ្រោះថ្នាក់យ៉ាងខ្លាំងក៏ដោយ
ក៏តួលេខនេះនៅតែខ្ពស់ជាងបណ្ដាប្រទេសផ្សេងទៀត
ដែលមានសន្ដិភាពពេញលេញដូចកម្ពុជាយើង។
ជាមួយនេះដែរ ជនរងគ្រោះខ្លះបានទទួលគ្រោះថ្នាក់លើដីស្រែចំការ
ដែលពួកគាត់បានធ្វើការដាំដុះជាច្រើនឆ្នាំមក
ហើយប្រការនេះធ្វើឲ្យជនអគតិខ្លះបានចោទប្រកាន់រាជរដ្ឋាភិបាលថា
មិនបានគិតគូរដល់ប្រជាជន ឲ្យពួកគាត់ទៅរស់នៅក្នុងចំការមីន
ប៉ុន្តែតាមការពិតយើងទាំងអស់គ្នានៅទីនេះដឹងច្បាស់ណាស់ថា ចំការមីន
និងភូមិករយ៉ាងច្រើនសន្ធឹកសន្ធាប់ក្រោយពីចប់សង្គ្រាមគឺវានៅជាមួយគ្នា
តែម្តង ដែលនេះគឺជាផលវិបាកនៃសង្គ្រាម។ ហេតុដូច្នេះហើយ
ទើបរាជរដ្ឋាភិបាលនៅតែចាត់ទុកសកម្មភាពបោសសំអាតមីន ជាអាទិភាព
ដ៏សំខាន់មួយក្នុងចំណោមអាទិភាពសំខាន់ៗរបស់ខ្លួន ដើម្បីរួមគ្នាស្ដារ
និងអភិវឌ្ឍប្រទេសជាតិឡើងវិញ។ ជាក់ស្ដែង
តាមរយៈការផ្តើមគំនិតរបស់សម្តេចអគ្គមហាសេនាបតីតេជោ ហ៊ុន សែន
នាយករដ្ឋមន្រ្តីនៃព្រះរាជាណាចក្រកម្ពុជា
រាជរដ្ឋាភិបាលបានដាក់បញ្ចូលវិស័យមីនក្នុងយុទ្ធសាស្ដ្រ
ចតុកោណដំណាក់កាលទី២
និងផែនការអភិវឌ្ឍន៍សហស្សវត្សរ៍របស់អង្គការសហប្រជាជាតិ។
ខ្ញុំសូមបញ្ជាក់ ថា
គោលដៅនេះគឺមានតែប្រទេសកម្ពុជាមួយប៉ុណ្ណោះដែលបាន
បន្ថែមវិស័យមីនជាទិសដៅទី៩ បន្ថែមលើ
ទិសដៅរបស់អង្គការសហប្រជាតិដែលមានចំនួនតែ៨ប៉ុណ្ណោះ
ហើយដើម្បីសម្រេចនូវគោលដៅនេះ រាជរដ្ឋា
ភិបាលបានខិតខំប្រឹងប្រែងគ្រប់លទ្ធភាពទាំងស្មារតី ថវិកា និងធនធាន
ព្រមទាំងផ្តល់ការសហការយ៉ាងពេញលេញជាមួយដៃគូអភិវឌ្ឍន៍
ក្រោមរូបភាពពហុភាគីក្ដី ឬទ្វេភាគីក្ដី សំដៅជំរុញសកម្មភាពមីននេះឲ្យទទួល
បានជោគជ័យ។
តាមរបាយការណ៍របស់ឯកឧត្ដម ហេង រតនា អគ្គនាយកស៊ីម៉ាក់
ខ្ញុំសូមវាយតម្លៃខ្ពស់ និងកោតសរសើរដល់ថ្នាក់ដឹកនាំ មន្ដ្រី
និងបុគ្គលិកស៊ីម៉ាក់ ដែលបានខិតខំប្រឹងប្រែងបំពេញភារកិច្ចរបស់ខ្លួន
រហូតសំរេចបានលទ្ធផលគួរជាទីមោទនៈ
ហើយវាជាមូលដ្ឋានបញ្ជាក់ឲ្យឃើញនូវការសហការបានល្អជាមួយភ្នាក់់ងារ
ផ្ដល់ជំនួយ និងដៃគូអភិវឌ្ឍន៍ទាំងអស់
ជាពិសេសបានឆ្លុះបញ្ចាំងពីការចូលរួមយ៉ាងសកម្មជាមួយរាជរដ្ឋាភិបាល
ក្នុងការបោសសំអាតគ្រាប់មីន និងយុទ្ធភណ្ឌមិនទាន់ផ្ទុះ
គិតពីឆ្នាំ១៩៩២ដល់ឆ្នាំ២០១១ ដោយបោសសំអាតផ្ទៃដីបានចំនួន ១៨៣.១៩៦ហិកតា
រុករកឃើញ និងកំទេចចោលគ្រាប់មីន និងយុទ្ធភ័ណ្ឌមិនទាន់ផ្ទុះជាង
២,២លានគ្រាប់ និងឆ្លើយតបតាមអន្ដរាគមន៍បន្ទាន់បានចំនួន៦១,២៥៥ករណី។
ឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិ អន្តរជាតិ
ក្នុងឱកាសដ៏ប្រពៃនេះ តាមរយៈ ឯកឧត្តម ម៉ាសាហ្វូមី គូរុគី
ឯកអគ្គរដ្ឋទូតវិសាមញ្ញពេញសមត្ថភាពនៃប្រទេសជប៉ុនប្រចាំកម្ពុជា
ក្នុងនាមរាជរដ្ឋាភិបាល និងប្រជាជនកម្ពុជា
ខ្ញុំសូមថ្លែងអំណរគុណយ៉ាងជ្រាលជ្រៅបំផុត ចំពោះរដ្ឋាភិបាល
និងប្រជាជនជប៉ុន
ដែលមានសន្តានចិត្ដប្រកបដោយក្ដីសប្បុរសក្នុងការឧបត្ថមគាំទ្រទាំង
ស្មារតី សម្ភារៈ និងថវិកា
សម្រាប់កិច្ចប្រតិបត្ដិការបោសសំអាតមីននៅកម្ពុជាជារៀងរហូតមក។
ទន្ទឹមនឹងនេះដែរ
ក្នុងនាមជាប្រទេសដែលទទួលរងគ្រោះពីគ្រាប់មីនធ្ងន់ធ្ងរជាងគេក្នុងពិភពលោក
និងជារដ្ឋហត្ថលេខីនៃសន្ធិសញ្ញាអូតាវ៉ា ស្តីពី“ហាមប្រាមការប្រើប្រាស់
ការស្ដុកទុក ការផលិត និងការជូញដូរគ្រាប់មីនប្រឆាំងមនុស្ស”
កម្ពុជាបានប្រកាន់ជំហរយ៉ាងម៉ឺងម៉ាត់
និងត្រឹមត្រូវបំផុតក្នុងការអនុវត្ដ និងប្រតិបត្ដិតាមខ្លឹមសារ
និងស្មារតីនៃសន្ធិសញ្ញាអន្ដរជាតិនេះ។ ជាមួយនេះផងដែរ
កម្ពុជាបាននិងកំពុងចូលរួម យ៉ាងសកម្មជាមួយសហគមន៍អន្ដរជាតិ
ក្នុងការចែករំលែកបទពិសោធ និងធនធានក្នុងការបោសសំអាតមីន
និងយុទ្ធភ័ណ្ឌមិនទាន់ផ្ទុះ ដើម្បីបម្រើឲ្យផលប្រយោជន៍របស់មនុស្សជាតិ។
ជាក់ស្តែង ព្រះរាជាណាចក្រកម្ពុជា
បានធ្វើជាម្ចាស់ផ្ទះក្នុងការរៀបចំកិច្ចប្រជុំលើកទី១១នៃ
រដ្ឋភាគីអនុសញ្ញអូតាវ៉ា កាលពីចុងឆ្នាំ២០១១
ដោយមានការចូលរួមពីប្រទេសជារដ្ឋភាគីចំនួន ១៥០ប្រទេសរដ្ឋមិនភាគី
ប្រទេសផ្ដល់ជំនួយ និងអង្គការជាដៃគូចំនួនជាងមួយពាន់នាក់។
តាមរយៈព្រឹត្ដិការណ៍អន្ដរជាតិដ៏ជោគជ័យនេះ
ពិតជាបានជួយលើកកម្ពស់កិត្យានុភាពជាតិយើងយ៉ាងខ្លាំង។
លើសពីនេះទៀត
រាជរដ្ឋាភិបាលបានបញ្ជូនកងយោធពលខេមរភូមិន្ទជំនាញផ្នែកបោសសំអាតគ្រាប់
មីន និងយុទ្ធភ័ណ្ឌមិនទាន់ផ្ទុះទៅជួយប្រទេសដ៏ទៃទៀតក្នុងពិភពលោក
ដូចជាប្រទេសស៊ូដង់ លីបង់ អាហ្រ្វិកកណ្ដាលជាដើម
ដែលបេសកម្មនេះស្ថិតនៅក្រោមឆ័ត្រអង្គការសហប្រជាតិ។ ទន្ទឹមនឹងនេះ
រាជរដ្ឋាភិបាល
ក៏បានបញ្ជូនកំលាំងកងយោធពលខេមរភូមិន្ទមួយចំនួនទៀតទៅប្រទេសឆាត
និងប្រទេសអាហ្រ្វិកកណ្ដាល។ ស៊ីម៉ាក់ក៏បានចែករំលែកបទពិសោធ
និងចំណេះធ្វើជាមួយប្រទេសមួយចំនួននៅក្នុងតំបន់និង
ផ្នែកខ្លះក្នុងពិភពលោក ដូចជា ប្រទេស ឡាវ ថៃ វៀតណាម កូឡុំប៊ី ស្រីលង្កា
និងប្រទេសមួយចំនួនធំទៀតមកពីទ្វីបអាហ្រ្វិកផងដែរ។
ជាក់ស្ដែងក្នុងឆ្នាំ២០១០-២០១១កន្លងទៅ រដ្ឋាភិបាលជប៉ុនតាមរយៈអង្គការ JICA
បានផ្ដល់ការគាំទ្រឱ្យស៊ីម៉ាក់ទទួល
យកមន្ដ្រីផ្នែកវិស័យមីនពីប្រទេសកូឡុំប៊ីចំនួន ៤៥នាក់ មកហ្វឹកហ្វឺន
ជាមួយស៊ីម៉ាក់ ហើយគំរោងដូចគ្នានេះ
និងបន្ដអនុវត្ដក្នុងឆ្នាំ២០១២-២០១៤
ជាមួយប្រទេសទ្បាវក្នុងការផ្លាស់ប្ដូរបទពិសោធពីគ្នាទៅវិញទៅមកផងដែរ
។
លទ្ធផលជិត២០ឆ្នាំកន្លងមកនេះ ស៊ីម៉ាក់ កងយោធពលខេមរភូមិន្ទ
និងអង្គការដោះមីនហាឡូត្រាស់(Halo Trust) អង្គការម៉ែក(MAG)
អង្គការយេម៉ាស់(JMAS) រួមគ្នាបោសសំអាតផ្ទៃដីបានប្រមាណ
៦៤៣,២១គីឡូម៉ែត្រក្រឡា ហើយតាមការវាយតម្លៃរបស់អាជ្ញាធរមីន
និងប្រតិបត្ដិករទាំងអស់បានឲ្យដឹងថា
ផ្ទៃដីមានមីននៅសល់ជាង៦៧០គីឡូម៉ែត្រក្រឡាទៀត
ដែលទំហំនេះត្រូវធ្វើការបោសសំអាតមីនទាំងស្រុងតែម្ដង
និងនៅមានផ្ទៃដីសង្ស័យថាមានមីនប្រមាណ១០៨៥គីឡូម៉ែត្រក្រឡា
ទៀតដែលចាំបាច់ត្រូវធ្វើការបញ្ជាក់ឡើងវិញឲ្យច្បាស់លាស់ដែរ
ដើម្បីធានាដល់សុវត្ថិភាព និងបំបាត់ការភ័យខ្លាចរបស់ប្រជាជន។
ដោយផ្អែកលើការវាយតម្លៃនេះ កម្ពុជានៅតែត្រូវការធនធានយ៉ាងច្រើនបន្ថែមទៀត
ដើម្បីធ្វើឱ្យទស្សនៈវិស័យ ១០ឆ្នាំលើកទី២ទៅមុខទៀតទទួលបានជោគជ័យ។
ឯកឧត្តម លោកជំទាវ អស់លោក លោកស្រី ភ្ញៀវកិត្តិយសជាតិ អន្តរជាតិ
ខ្ញុំសូមយកឱកាសនេះ សម្តែងនូវការកោតសរសើរជាថ្មីម្តងទៀត
ចំពោះស្នាដៃការងាររបស់ស៊ីម៉ាក់ ដែលបានខិតខំបំពេញភារកិច្ច
និងតួនាទីរបស់ខ្លួនជាស្ថាប័នជាតិ
ក្នុងការធានាបាននូវចីរភាពនៃការងារប្រតិបត្ដិការរបស់ខ្លួន
ដោយធ្វើការសម្របសម្រួល
និងទំនាក់ទំនងបានយ៉ាងល្អជាមួយដៃគូអភិវឌ្ឍន៍ទាំងអស់
ហើយថែមទាំងធានាបាននូវទំនុកចិត្ដ
និងភាពជាដៃគូល្អក្នុងការធ្វើឱ្យបានជោគជ័យក្នុងសកម្មភាពរបស់ខ្លួន
ជាពិសេសបានសម្រេចនូវការកែទម្រង់យ៉ាងស៊ីជម្រៅ
រហូតទទួលបានការអនុវត្ដការងារប្រកបដោយអាជីព
មានកំរិតស្ដង់ដាខ្ពស់តាមតម្រូវការជាតិ និងអន្ដរជាតិ។
ក្នុងនាមរាជរដ្ឋាភិបាលកម្ពុជា ខ្ញុំសូមស្វាគមន៍
និងថ្លែងអំណរគុណចំពោះដៃគូអភិវឌ្ឍន៍ទាំងអស់ ដែលបានផ្ដល់ការគាំទ្រ
និងផ្តល់ជំនួយក្នុងវិស័យមីនតាមគ្រប់រូបភាព ទាំងតាមរយៈរដ្ឋាភិបាល
អង្គការមិនមែនរដ្ឋាភិបាល និងផ្នែកឯកជន
សំដៅធ្វើយ៉ាងណាបោសសំអាតគ្រាប់មីន
និងយុទ្ធភ័ណ្ឌមិនទាន់ផ្ទុះទាំងអស់ឲ្យអស់ពីដីបានយ៉ាងឆាប់រហ័សបំផុត។
ខ្ញុំសូមអំពាវនាវចំពោះអាជ្ញាធរមូលដ្ឋានគ្រប់លំដាប់ថ្នាក់និង
ប្រជាពលរដ្ឋ
សូមមេត្ដាជួយផ្ដល់កិច្ចសហការឱ្យបានល្អជាមួយកម្លាំងស៊ីម៉ាក់ ជាពិសេស
ក្មួយៗនិស្សិតសិស្សានុសិស្ស
សូមស្ដាប់តាមការណែនាំអប់រំផ្សព្វផ្សាយអំពីគ្រោះថ្នាក់ដោយសារមីន
និងយុទ្ឋភ័ណ្ឌមិនទាន់ផ្ទុះ ដូចជា ហាមប៉ះពាល់
និងធ្វើការជួញដូរជាដែកអេតចាយ និងសូមរាយការណ៍មកកម្លាំងមានសមត្ថកិច្ច
ឬបុគ្គលិកស៊ីម៉ាក់នៅពេលបានឃើញគ្រាប់មីន។
មុននឹងបញ្ចប់ ជាថ្មីម្តងទៀត ខ្ញុំសូមថ្លែងអំណរគុណដល់ប្រជាជន
និងរដ្ឋាភិបាលជប៉ុនដែលបានឧបត្ថមគាំទ្រសម្ភារៈ
បច្ចេកទេសដល់រាជរដ្ឋាភិបាល និងប្រជាជនកម្ពុជា ហើយខ្ញុំសង្ឃឹមយ៉ាងមុតមាំថា
ប្រជាជន និងរាជដា្ឋភិបាលជប៉ុននឹងបន្តជួយឧបត្ថម្ភគាំទ្រដល់ស៊ីម៉ាក់
ដើម្បីឲ្យសម្រេចបានគោលដៅកម្ចាត់មីននៅកម្ពុជា។
ជាទីបញ្ចប់នេះ ខ្ញុំសូមជូនពរ ឯកឧត្ដម លោកជំទាវ អស់លោក លោកស្រី
ភ្ញៀវកិត្តិយសជាតិ និងអន្តរជាតិ លោកគ្រូ អ្នកគ្រូ ក្មួយៗនិស្សិត
សិស្សានុសិស្ស ព្រមទាំងបងប្អូនប្រជាពលរដ្ឋ បុគ្គលិកស៊ីម៉ាក់
និងមន្រ្តីរាជការទាំងអស់ ដែលបានអញ្ជើញចូលរួមក្នុងពិធីដ៏មហោឡារិកនេះ
ឲ្យជួបប្រទះតែសុខភាពល្អ សុភមង្គលក្នុងក្រុមគ្រួសារ
និងទទួលបានជ័យជំនះគ្រប់ភារកិច្ច។
សូមអរគុណ